San Juan 7:17 - Biblia

¹⁷ “Erëi pe reta, ¿këraita ra pikuaa jokua che aporomboe wae ou ra ko chewiño ani ou ra Tumpa wi? Che tae pewe, tenonde imeta ko piñeñono piyapo rani waerä Tumpa jei wae rupi. Jayawe ramo pikuaata che aporomboe wae ou ko Tumpa wi wae,” jei.

Guaraní Pe (Western): Simba

¹⁷ Ipotave Tumpa jei vae uipota uyapo vae uicuaata cheporomboe Tumpa iporomboe co. Uicuaata chiñeeiño'ã co —jei—.

San Juan 7:17 Iomraidhean Croise

San Mateo 6:22

“Kërái pemae pembaembae re, jukuäraita iko pemaerä. Echa’ä neräkateɨ'ä yawe nembaembae re, ndiyekouta neï kuri opa kërái rái rupi. Jokua ikota ndewe pëti tembipe ikawi wae pe ndiko wae rami.

San Lucas 8:15

“Erëi amokue temitɨ oa ɨwɨkawi pe. Jare kua jae nunga wi uyembɨjaanga oï ïru wae reta Tumpa iñee uyandu wae re,” jei. “Kua nunga reta uipɨsɨ kawi Tumpa iñee ipɨa rewe. Jare uyapo reta ipɨawasu rewe Tumpa iñee pe jei wae. Jáeramo uyekuaa jese reta Tumpa jeko ikawi wae,” jei chupe reta. “Jukuärái ko ambɨjaanga rewe jae pewe wae,” jei Jesús jemimboe reta pe.

San Juan 3:21

Erëi añetete pewa rupi yureko wae reta oya jokua tembipe re, echa’ä jae reta uipota uikuaaka opaete wae pe uyapo ko ñonoï Tumpa uipota wae.

San Juan 8:43

“¿Maera pa pikuaa kawi’ä kua che aikuaaka pewe wae? Echa’ä pe reta pipota’ä piyapɨsaka peï chiñee re. Jáeramo jokua jeko pewa ko pe reta pikuaa’ä peï,” jei chupe reta.

San Juan 8:44

“Añawasu ko jae peru. Jare jokua mbaembae jae uipota uyapo wae, jokua nunga etei ko pe reta pipota piyapo peï wi. Añawasu iyɨpɨ wiwe upuruyuka wae ko. Jare jae opa ueya mbaembae jupi wae, echa’ä jae ko mbaembae kachi wae iya. Jare jae iyapu yawe, jae etei uyekuaaka oï, echa’ä jae ko iyapu wae jare jae etei ko apu iya,” jei chupe reta.

San Juan 8:47

Echa’ä pe reta Tumpa taɨ'ä ko. Jokua jeko pewa pipota’ä piyapɨsaka. Jaeño Tumpa taɨ reta uyapɨsaka Tumpa iñee re,” jei Jesús chupe reta.

Hechos 17:11

Jokua tëta wasu pewa judío reta jeko kawiete tëta wasu Tesalónica pewa reta wi. Echa’ä jae reta jekuaeño ikɨrëɨ rewe uyapɨsaka reta Tumpa iñee re. Jare opa ara rupi umɨngetañoi reta Tumpa iñee uyekuatía oï wae uikuaa kawi reta waerä añetete ra ko Pablo oporomboe wae.