San Juan 3:18 - Biblia

¹⁸ Jare opaete Tumpa Taɨ re wɨrowia wae reta, Tumpa mbaetɨ ma umbɨjeko reta. Erëi opaete Taɨ re wɨrowia’ä wae reta, Tumpa umbɨjeko ma reta, echa’ä jae reta wɨrɨ̈ro Tumpa Taɨ jae waeño wae.

Guaraní Pe (Western): Simba

¹⁸ Güɨrovia Tumpa Taɨ re vae reta ndarau ma uñeãaca. Ẽrei ĩru vae reta uñeãaca ma co. Echa'ã Tumpa Taɨ jae vaeño umɨmbeu ma quía co jae. Ẽrei jae reta güɨrovia'ã.

San Juan 3:18 Iomraidhean Croise

Marcos 16:16

“Jare ipotawe kía wɨrowia jare uyembɨsakambuka ɨ pe wae onoita tekowe opa mbae wae. Erëi jokua wɨrowia’ä wae reta, Tumpa umbɨjekota oï reta jare omombota oï reta Tatawasurenda pe jaeño mái pewa,” jei chupe reta.

San Juan 1:12

Erëi amokue wae reta umbɨresiwe. Wɨrowia reta jese. Jáeramo jae reta Tumpa uyapo taɨ retarä yureko waerä.

San Juan 1:18

Mbaetɨi kiawe uecha ma yandeRu Tumpa wae. Erëi Tumpa Taɨ jae waeño wae uikuaaka ma yandewe kërái ko jae wae. Taɨ ko Tumpa etei jare jekuaeño uñemɨïru oï Tu ndiwe.

San Juan 20:31

Erëi kua uyekuatía oï wae uyekuatía ko pe reta perowia waerä Jesús jae ko Cristo jei chupe reta wae jare Tumpa Taɨ etei ko. Jare jukuärái perowia jese yawe, penoita tekowe opa mbae wae jae imbaepuere rupi.

San Juan 3:16

Tumpa uauete ɨwɨ pewa reta. Jáeramo umee Taɨ jae waeño wae, ipotawe kía wɨrowia jese wae onoi waerä tekowe opa mbae wae. Ndarau etei oo Tatawasurenda pe.

San Juan 3:36

Jare ipotawe kía Tumpa Taɨ re wɨrowia wae ime onoi tekowe opa mbae wae. Erëi Tumpa Taɨ re wɨrowia mbae wae ndarau onoi jokua tekowe, jare Tumpa iarasɨ jekuaeño oï jese.

San Juan 5:24

“Che tae pewe añetete wae, ipotawe kía chiñee re uyapɨsaka wae jare chembou wae re wɨrowia wae, jae onoi tekowe opa mbae wae. Tenonde yawe oo iko Tatawasurenda kotɨ, erëi añawe ime ma onoi tekowe opa mbae wae. Tumpa ndarau ma umbɨjeko,” jei chupe reta.

San Juan 6:40

“Jayawe opaete cheré wɨrowia wae reta onoita tekowe opa mbae wae. Jare jae reta che ambɨjekowe yeta aï kuri umanokue wae reta ipɨte wi ara taɨkuewa pe. Jokua ko jae cheRu uipota wae,” jei Jesús chupe reta.

San Juan 6:47

Erëi yepe tëi kiawe uecha’ä etei cheRu, erëitu che tae pewe añetete wae, ipotawe kía wɨrowia cheré wae ime onoi tekowe opa mbae wae.

Romanos 5:1

Añawe yaikuaa ñaï Tumpa umae ma yanderé yandereko mbae wae rami yandeYa Jesucristo re yarowia wae rupi. Jáeramo yayeapɨkatu ma Tumpa ndiwe, Cristo uyapo yandewe wae rupi.

Romanos 8:1

Jayawe ¿mbae ra añawe yandepuere yaikuaa opaete kua mbaembae reta rupi? ¿Kërái ra ko ñaï añawe yande reta Cristo re pëti ramiño yaiko wae? Añawe yaikuaa ñaï Tumpa ndarau ma yanembɨjeko.

Romanos 8:34

Jayawe ¿imeta ra kía ye ipuere omboya teko yanderé Tumpa jowai? Ndarau ipuere kiawe, echa’ä Jesucristo etei ko umano jokua teko yareko wae re opa umbái waerä yandewi. Jare kuaño’ä ko, echa’ä jae ikowe ye ou wi umanokue wae reta ipɨte wi. Jare añawe jae ime oï yandeRu Tumpa ndiwe iyɨke pe iyakata kotɨ. Jare jae etei ko uyerure oï yandeRu Tumpa pe yanderé.

Hebreos 12:25

Tumpa pemɨngeta oï. Jayawe piyapɨsaka kawi jese. Pemandúa peï yanderamɨkue reta re. Jae reta täta uiporara uyapɨsaka’ä reta yawe Moisés jei wae re. Erëi oeteta ko yande yayapɨsaka’ä yawe Jesús jei wae re. Echa’ä Moisés kua ɨwɨ pewaño ko, erëi Jesús ko jae ara pewa.

Hebreos 2:3

Erëi ñee tekowe opa mbae wae rewa ikawiete ko. Jayawe, ¿këraita pa yayepe Tumpa iarasɨ wi yayapɨsaka’ä yawe jokua ñee re? Ndarau yandepuere. Jokua ñee ipɨau wae ikawiete ko, echa’ä yandeYa etei tenonde umɨmbeu. Jare jaɨkue rupi jae iñee uyandu wae reta umɨmbeu yuapɨ ye yandewe jupi rupi.

Hebreos 3:19

Jukuärái ko yaikuaa jae reta wɨrowia’ä Tumpa jei wae jeko pewa ipuere’ä uike reta jokua ɨwɨ pe kiape uputuuta tëi yureko wae pe.

1 Juan 3:23

Jare kua ko jae Tumpa jei yandewe wae: imeta ko yarowia Taɨ Jesucristo re, jare imeta ko yayerau päwe rewe kërái Cristo jei yandewe rami.

1 Juan 4:9

Jare Tumpa uechaka yandewe yanderau ko kuärái: Jae ombou Taɨ jae waeño wae kua ɨwɨ pe yande yandepuere waerä ñanoi tekowe opa mbae wae Taɨ uyapo yandewe wae rupi.

1 Juan 5:10

Kía Tumpa Taɨ re wɨrowia wae uikuaa ipɨa pe añetete ko kua mbaembae Tumpa uikuaaka yandewe wae. Erëi jokua wɨrowia’ä wae jei oï tëi Tumpa pe iyapu wae ko, echa’ä wɨrowia’ä Tumpa jei Taɨ rewa wae ramo.

1 Juan 5:12

Jayawe kía ime onoi Tumpa Taɨ wae, ime onoi kua tekowe. Erëi kía mbaetɨ onoi Tumpa Taɨ wae, mbaetɨ etei onoi kua tekowe opa mbae wae.