San Juan 17:26 - Biblia

²⁶ “Che aikuaaka ma chupe reta nde rewa, jare jekuaeño che ayapota jukuärái jae reta cherau waerä kërái nde cherau rami. Jare jukuärái che etei aïta jae reta ndiwe. Jukuärái ko ayerure ndewe,” jei Jesús.

Guaraní Pe (Western): Simba

²⁶ Che numɨmbeu ma chupe reta jare numɨmbeu yeta, jae reta tuau ĩru vae reta nde cherau rami, jare che aico vaerã ipɨa pe —jei.

San Juan 17:26 Iomraidhean Croise

San Juan 14:20

Jare jokua ara ramo pikuaa kawita che aï cheRu ndiwe wae, jare pe reta peï che ndiwe wae, jare che aï pe reta ndiwe wae,” jei chupe reta.

San Juan 14:23

Jare Jesús jei chupe: “Cherau wae uyapota chiñee rupi. Jare cheRu uauta jae. Jare che jare cheRu mokui rewe ndoyuta nduiko waerä jae ndiwe. Jayawe che ayekuaakata chupe,” jei.

San Juan 15:15

Ndarau ye ma jae pewe uyeyokui wae reta, echa’ä uyeyokui wae reta uikuaa’ä opaete mbaembae ipatrón uipota uyapo wae. Ipatrón uikuaaka’ä chupe reta opaete,” jei. “Erëi che aikuaaka ma pewe opaete cheRu uikuaaka chewe wae. Jáeramo añawe che tae pewe cheïru reta ko,” jei chupe reta.

San Juan 15:4

“Jekuaeño piñemɨïru che ndiwe, jare che jekuaeño añemɨïruta aï pe reta ndiwe. Jare jukuärái uyekuaata peré Tumpa jeko ikawi wae,” jei. “Yambɨjaanga. Yande yaikuaa kawi ñaï jaeño uva jäka uyepɨsɨ oï iyɨpɨ re wae reta ipuere ía. Jare pëti jäka uyepɨsɨ'ä oï yawe iyɨpɨ re, ndarau ma ía,” jei. “Jae ramiño wi pe reta mbaetɨ yawe jekuaeño piñemɨïru kawi che ndiwe, ndarau uyekuaa peré Tumpa jeko ikawi wae,” jei chupe reta.

San Juan 15:9

“Kërái cheRu cherau rami, jukuäraiete wi che puau. Jayawe jekuaeño piko che puau wae re.

San Juan 17:23

“Che aikota pëti ramiño jae reta ndiwe, jare nde pëti ramiño che ndiwe. Tuiko reta wi pëti ramiño. Echa’ä ɨwɨ pewa reta uecha yawe kërái jae reta pëti ramiño ñonoï, jayawe ramo uikuaata reta nde ko chembou wae. Jare uikuaata reta wi nde ndeau ko cheré wɨrowia wae reta kërái nde cherau rami,” jei.

San Juan 17:6

“Kua cheremimboe mii reta, nde nemee ma chewe ɨwɨ pewa reta ipɨte wi. Jae reta nembae ko, jare nde nemee chewe reta wi,” jei. “Añawe che amɨmbeu kawi ma chupe reta nde rewa, jare jae reta uyapo ma nde ndere wae.

San Juan 8:50

“Añetete chemaerä che aipota’ä ayembutuicha. Erëi ime oï pëti wae uipota cheree uyembutuichaka waerä. Jae ko cheRu Tumpa. Jae uikuaakata chiñee añetete wae ko,” jei.

Romanos 8:10

Erëi pe reta jukuärai’ä ko, echa’ä Cristo oï pepɨa pe ramo. Jayawe, yepe tëi perete umanota oï piyawɨ Tumpa kotɨ jeko pewa, erëi pe reta penoi ma ko tekowe ipɨau wae, echa’ä añawe Tumpa umae ma peré pereko mbae wae rami.

1 Corintios 1:30

Pe retái piyeyapo’ä ko pëti ramiño Jesucristo re. Tumpa ko uyapo jokua mbae. Jare Cristo rupi Tumpa uikuaaka yandewe iyarakuaa. Echa’ä Cristo uyapo wae rupi opa ma uyembɨepɨ teko yareko wae, jare jukuärái Tumpa umae yanderé yandereko mbae wae rami jare ñaneñono tee jae imaerä.

1 Corintios 12:12

Kua yandepuere yambɨjaanga yanderete re. Yande yaikuaa ñaï, yepe tëi yanderete pëtiño ko, erëi yanderete pe ime jeta mbaembae ñanoi. Jare opaete kua mbaembae reta, yepe tëi oyowake’ä ko, erëi opaete wae yanderete pewa ko jare yanderete pëtiño ko. Jare jukuärái wi ko opaete yande reta pëti ramiño ñaï Cristo re wae.

Gálatas 2:20

Echa’ä che arowia Cristo re ramo, cherekowe indechikue umano rami jokua kurusu re Cristo ndiwe. Jare ndarau ye ma aiko tenonde aiko rami, echa’ä añawe Cristo oï ma chepɨa pe. Jare añawe imeño cherekowe aï rambuewe, jekuaeño arowiata Tumpa Taɨ re. Echa’ä jae cherau jare uñemee umano waerä cheré.

Efesios 3:17

Jare aeka aï chupe wi piñemɨatangätu perowia katu waerä Cristo re, jukuärái Cristo jekuaeño oï waerä pepɨa pe ipɨawiwe rewe. Jukuärái rupi pepuere piyerau päwe añetete rewe. Jáeramo piñemɨmɨrätata peï Tumpa re pëti temitɨ kɨpe japo oï wae rami.

Efesios 5:32

Yawái ko yaikuaa kawi waerä opaete kua mbaembae rewa. Erëitu jokua uyekuatía oï wae umbɨjaanga oï wi yandewe kërái yande Cristo re yarowia wae reta ñaï pëti ramiño Cristo re wae.

Colosenses 1:27

Echa’ä Tumpa uikuaaka ma yandewe kërái opaete wae ipuere uyekou mbae ikawiete ye wae re – jae ko ipuere onoi Cristo ipɨa pe kërái pe reta penoi wae rami. Jare jukuärái ipuere uäro reta wi uyerowia katu rewe uyekou reta waerä Tumpa imbaepuere jembipete ye wae re.

Colosenses 2:10

Jare jae ko opaete mburuwicha reta ara pewa jare ɨwɨ pewa iYa. Jare pe reta pëti ramiño peï Cristo re ramo, uata’ä etei pewe mbae awe penoi waerä tekowe opa mbae wae.

Colosenses 3:11

Jare kua tekowe ipɨau wae rupi pëti wae rami yayowake ma ñaï. Jayawe yanemaerä mbaetɨ ma judío reta jare judío mbae wae reta, uyembɨcircuncidaka wae reta jare uyembɨcircuncidaka mbae wae reta, ñana rupiwa reta jare ambɨe ɨwɨ pewa reta, uyeyokui wae reta jare uyeyokui mbae wae reta. YandeYa Cristo jeeño ko yambutuicha. Jare opaete yande pëti pëti wae reta, jae oyowakeño oï yandepɨa pe.

2 Tesalonicenses 2:16

YandeYa Jesucristo etei jare yandeRu Tumpa yanderau jare ñanemɨkɨrëɨ. Jare jukuärái uyapota oï jaeño mái pewa. Jáeramo yandepuere ñaäro yarowia katu rewe jokua mbaembae ikawi wae jae ipɨakawi rupi umeeta oï yandewe wae.

Hebreos 2:12

Echa’ä yamɨngeta Tumpa iñeerɨru pe kërái Jesús jei Tu pe kuärái: “Che aikuaakata cherɨwɨ reta pe jare cherindɨ reta pe nde rewa. Ambutuichata nderee akäta wae pɨpe nderé wɨrowia wae reta uyembatɨ ñonoï wae rupi.” Jukuärái jei.

1 Juan 3:24

Jare kía kua Tumpa jei wae uyapo wae jekuaeño uñemɨïru Tumpa ndiwe, jare Tumpa jekuaeño uñemɨïru jae ndiwe wi. Jare yande yaikuaa Tumpa uñemɨïru ko yande ndiwe, echa’ä jae umee yandewe Espíritu Santo ramo.