San Juan 16:33 - Biblia

³³ “Jare che jae aï pewe kua mbaembae piko waerä pepɨakatu rewe che rupi. Kua ɨwɨ pe peï rambuewe, pe reta piporarata peï. Erëi piñemɨkɨrëɨ, echa’ä che amɨamɨri ma towaicho kua ɨwɨ pewa,” jei chupe reta.

Guaraní Pe (Western): Simba

³³ Cua che jae ma peve pepɨacatu vaerã cheré perovia ramo. Cua ɨvɨ pe pico rambueve, piporarata co. Ẽrei agüɨye pepɨatɨtɨ. Echa'ã che chepuere ete ɨvɨ pegua reta güi —jei.

San Juan 16:33 Iomraidhean Croise

San Mateo 9:2

Jayawe amokue wae reta owoɨ ueru jupa rewe pëti kuimbae ipuere mbae omɨ wae Jesús oï wae pe. Jare Jesús kua uecha yawe, uikuaa jae reta wɨrowia kawi jese wae. Jáeramo jei kuimbae ipuere mbae omɨ wae pe: “Iñemɨatangätu, cheraɨ. Teko nenoi Tumpa kotɨ wae opa ma uyembái ndewi,” jei chupe.

San Lucas 19:38

Jare jei reta: “¡Kua ko jae yanemburuwicha wasurä Tumpa jee re ou oï wae! ¡Tumpa tuyapo ikawiete wae chupe! ¡Añawe Tumpa uyapo ma yandewe yaiko waerä yandepɨakatu rewe! ¡Tuyembutuichaka Tumpa jee ara pe!” Jukuärái jei reta usapɨkai pɨi rewe.

San Lucas 2:14

“¡Tuyembutuichaka Tumpa ara pe oï wae jee! Jare tipɨakatu ɨwɨ pewa reta Tumpa ipɨakawi chupe reta wae,” jei araɨwa reta.

San Juan 12:31

“Kua ɨwɨ pewa reta opaete seri oyowaicho ñonoï Tumpa kotɨ. Erëi añawe uwäe ma ara Tumpa umbɨjeko reta waerä mbae che ayapota aï wae rupi. Jare Tumpa umbɨjekota wi jae reta imburuwicha wasu – jae ko Añawasu,” jei.

San Juan 14:1

Jayawe Jesús jei wi jemimboe reta pe: “Awɨye pepɨatɨtɨ. Perowia Tumpa re jare perowia wi cheré,” jei chupe reta.

San Juan 14:27

“Añawe che pueya aï pepɨakatu rewe. Kërái chepɨakatu aï rami, jukuärái wi ayapo pewe pepɨakatu waerä añetete pewa. Kua ɨwɨ pewa reta ‘ndepɨakatu,’ jei yandewe yawe, jae reta uyemɨngetaiño ñonoï. Erëi che ayapota pepɨakatu waerä añetete pewa. Jáeramo awɨye pepɨatɨtɨ mbae uasata oï wae re, jare awɨye wi pekɨye chuwi,” jei chupe reta.

San Juan 16:11

“Jare jae reta uikuaa’ä wi pëti ara jae reta uyemboɨta ñonoï Tumpa jowai, jare Tumpa jeita jae reta uiporara waerä mbaembae uyawɨ reta ikotɨ wae re. Kua uyeyapo ñotái oï, echa’ä añawe uyembɨpɨ ma oï jae reta imburuwicha ndiwe. Añawe Tumpa jei ma Añawasu uiporara ñotái ko oï, jare jokua Tumpa jei wae jaeño mái jei. Jokua ko jae mbapɨ mbaembae reta Espíritu Santo uikuaakata oï kuri ɨwɨ pewa reta pe jae ou ma yawe,” jei Jesús jemimboe reta pe.

Hechos 14:22

Jare jokua tëta wasu reta rupi, jae reta jekuaeño uyembatɨ Cristo re wɨrowia wae reta ndiwe. Jare omboe reta ye Tumpa iñee re umɨmɨräta reta waerä Tumpa re. Jare umɨkɨrëɨ reta awɨye uyerowa ye reta waerä Tumpa wi. Jare jei wi chupe reta: “Pëti ara Tumpa ikota opaete wae imburuwicha wasurä jaeño mái pewa. Jare yande yaiporara ñotái ko jeta ñaï waerä jae ndiwe, echa’ä Tumpa jowaicho reta ikuerita’ä uiporaraka yandewe ramo.” Jukuärái jei chupe reta.

Hechos 23:11

Jare jokua pɨ̈tu yandeYa uyekuaa Pablo pe jare jei chupe: “Iñemɨatangätu,” jei. “Chemɨeräkua ma Jerusalén pe. Jare añawe chemɨeräkuata ko wi tëta wasu Roma pe,” jei chupe.

Hechos 27:22

Erëi añawe che tae pewe piñemɨatangätu waerä, echa’ä ndarau kía umano yandepɨte pe. Jaeño chalana wasu ukañɨta oï,” jei.

Hechos 27:25

“Jayawe pe cheïru reta, piñemɨatangätu. Echa’ä che arowia katu aï cheTumpa, jare aikuaa jokua jae jei chewe wae uyeyapota oï wae.

Hechos 9:31

Joko wi ɨma katu rupi opaete ɨwɨ Judea rupi, Galilea rupi, jare Samaria rupi hermano reta ipɨawiwe yureko jare uñemɨmɨräta reta Tumpa re. Yureko reta uipɨu rewe yandeYa wi, jare Espíritu Santo umbɨpɨakatu reta. Jayawe jekuaeño uyembɨjeta yuraa Cristo re wɨrowia wae reta.

2 Corintios 1:3

¡Yambutuicha yandeRu Tumpa jee! Jae ko yandeYa Jesucristo Tu. Jae ko yandeRu Tumpa yandeparareko wae jare yanembɨpɨakatu wae.

2 Corintios 13:11

Jayawe hermano mii reta, kuaño ma aipota pe reta piyapo waerä: Piyerowia jare jekuaeño peka mbae jupi waeño piyapo waerä. Piñemɨkɨrëɨ päwe rewe. Piko kawi pepɨakatu rewe pëti ramiño. Jare Tumpa oïta pe reta ndiwe. Jae ko yanderau jare yanembɨpɨakatu wae.

2 Corintios 2:14

Erëitu orepɨakatu noï. Numee yasurupái Tumpa pe, echa’ä jae jekuaeño oremborɨ ndupurumɨamɨri waerä, echa’ä ore noï pëti ramiño Cristo re ramo. Jare ore rupi opaete kerupi rupi uikuaa ñonoï Cristo rewa.

2 Corintios 4:7

Ore parawete reta orepɨräta’ä noï. Erëi Tumpa umee orewe kua mbarawɨkɨ ikawiete wae. Jae ko kía umbɨru oï mbae ikawiete wae pëti yambɨi oyɨ kawi mbae wae pe rami. Erëi jukuärái ko uyekuaa waerä ore rupi ipotawe mbaepuere nonoi wae Tumpa wi ko ou. Ou’ä ko orewi.

2 Corintios 6:4

Opaete mbaembae rupi nduechaka kërái ore ko jae Tumpa pe nduyeyokui wae reta. Echa’ä jekuaeño numɨawäta orepɨawasu rewe mbaeporara reta, jare mbaesusere reta, jare yembɨawái reta.

2 Corintios 7:4

Che arowia che chepuere ayemɨngeta pewe añetete rewe. Che ayerowia katu aï peré. Jare jokua pereräkua chewe wae chembɨyerowia wi. Jáeramo yepe tëi ore tuicha nduiporara noï kua pe, erëi che ayerowiaete aï.

Gálatas 1:4

Kua ɨwɨ pewa reta opaete seri oyowaicho ñonoï Tumpa kotɨ. Jare jae reta jeko kachi oï Tumpa jowake. Erëi yandeYa Cristo uñemee umano waerä yanderé mbaembae yayawɨ Tumpa kotɨ wae opa umbái waerä yandewi, jare jukuärái yanderepɨ waerä kua ɨwɨ jeko ikawi mbae wae wi. Jukuärái Cristo uyapo yandeRu Tumpa uipota ramo.

Gálatas 6:14

Erëi che ndarau etei ayembutuicha mbae re awe. Jaeño ambutuichata yandeYa Jesucristo jee jae kurusu re uyapo yandewe wae re. Echa’ä jokua jae uyapo chemaerä jeko pewa, opaete mbaembae kachi wae Cristo re wɨrowia mbae wae reta ueka wae mbae’ä ma ko chewe. Añetete che amano rami ma ko chuwi. Jare jae reta imaerä mbae’ä ma ko che.

Filipenses 4:7

Jare Tumpa pembɨpɨakatuta oï añetete rewe. Añetete, ndarau kiawe ipuere uikuaa kawi këraita ra peasa peï yembɨawái rupi pepɨawiwe rewe. Erëi jukuärái Tumpa pemborɨta awɨye waerä piyembɨpɨa’äete. Jukuäraita ko, echa’ä pe reta peï pëti ramiño Cristo re ramo.

Colosenses 1:20

Jare ime ye mbae yandeRu Tumpa uipota uyapo iko wae. Jae uipota iko uyapɨkatu jae ndiwe etei opaete mbaembae ɨwɨ pe oï wae jare ara pe oï wae wi. Jare jukuärái jae opa uyapo Taɨ Jesucristo juwɨ uyepɨyere wae rupi jae kurusu re iko rambuewe.

1 Tesalonicenses 3:4

Pemandúa kawi peï, ore nduiko yawe pe reta ndiwe, jekuaeño numɨmbeu pewe yaiporarata ñaï Cristo re yarowia jeko pewa. Jare añawe uasa ma pewe jukuäraiete pe reta pikuaa rami.

1 Tesalonicenses 3:7

Jayawe hermano mii reta, yepe tëi ïru wae reta uyapo ikawi mbae wae orewe jare nduiporara noï, erëi orepɨakatu noï jekuaeño perowia peï yandeYa re ramo.

2 Tesalonicenses 3:16

YandeYa ko jae yanembɨpɨakatu wae. Jare jae jekuaeño tuyapo pewe pepɨakatu waerä ipotawe mbae uyeyapo pewe wae rupi. YandeYa toï opaete pe reta ndiwe.

2 Timoteo 3:12

Añetete kía uipota iko jupi rupi pëti ramiño Jesucristo re wae, uiporara ñotái ko Tumpa jowaicho reta ipo pe.

Hebreos 11:25

Jae ipuereta tëi jekuaeño iko mbae kachi waeño uipota uyapo wae rupi joko pe. Añetete jukuärái yaiko yawe, ipuere ko yanembɨyerowia. Erëi jokua ko jae mbae kachi wae Tumpa jowai jare jokua nunga yerowia michi pewaño ko. Erëi Moisés uyapo’ä jukuärái. Jae uiparawo uiporara waerä Israel iñemoñaa reta ndiwe – jae ko Tumpa uiparawo wae reta ndiwe.

Hebreos 7:2

Jayawe Abraham opaete mbaembae upɨ̈ro jowaicho reta wi wae, jokua wi umee diezmo Melquisedec pe. Jokua tee Melquisedec uipota jei “mburuwicha wasu jupi wae.” Jare jae iko tëta wasu Salem imburuwicha wasurä ramo, jae jee wi “mburuwicha wasu umbɨpɨakatu wae.” Echa’ä tee Salem uipota jei “ipɨakatu wae.”

1 Pedro 5:9

Erëi awɨye piyapɨsaka jese. Piñemɨmɨräta chuwi Tumpa iñee re. Pikuaa ko opaete ɨwɨ rupi yandehermano reta uiporara ñonoï wi pe reta piporara rami.

1 Juan 2:13

Jare pe pekuakuaa ma piko wae reta, pe reta pikuaa jokua iyɨpɨ wiwe ikoño mái wae. Jare jokua jeko pewa ko aikuatía aï pewe. Jare pe taurusu piko wae reta, pe reta pemɨamɨri ma Añawasu. Jare jokua jeko pewa ko aikuatía aï pewe wi. Sambiaɨ mii reta, taikuatía ye pewe kua mbaembae, echa’ä pe reta pikuaa yandeRu Tumpa ramo.

1 Juan 4:4

Erëi pe cheraɨ puau wae reta, pe reta opa ma pemɨamɨri jokua oporomboeraanga wae reta, echa’ä pe reta ko jae Tumpa pewa jare Espíritu Santo oï pepɨa pe. Jare yepe tëi Añawasu ko jae kua ɨwɨ iya, erëi Espíritu Santo imbaepuere tuichaete ye ko Añawasu imbaepuere wi.

1 Juan 5:4

Kua ɨwɨ jeko uipota tëi yanembɨawái, erëi yande Tumpa taɨrä yaiko wae reta ñamɨamɨri ma ko kua ɨwɨ jeko. Jare jukuärái yayapo Jesucristo re yarowia wae rupi.

Apocalipsis 12:11

Echa’ä jae reta opa ma umɨamɨri Añawasu Owecha kuimbae taurusu wae juwɨ rupi jare Tumpa iñee umɨmbeu reta wae rupi. Jare mbaetɨ etei urukɨye reta jekowe umano waerä.

Apocalipsis 3:21

‘Che opa ma apurumɨamɨri, jare joko wi awapɨ cheRu ndiwe iwapɨa mburuwicha wasu pewa re. Jare jukuärái wi ikawi mbae wae umɨamɨri wae reta pe che ameeta uwapɨ waerä che ndiwe chewapɨa pe.

Apocalipsis 7:14

“Aikuaa’ä etei. Nde ndikuaa,” jae chupe. Jayawe jae jei chewe: “Kua reta ko jae uasa mbaesusere wasu rupi wae. Oyoe ma reta jemimonde jare umɨtïi reta Owecha kuimbae taurusu wae juwɨ pe,” jei.