San Juan 15:5 - Biblia

⁵ “Che ko jae uva iyɨpɨ rami, jare pe reta ko jae jäka reta rami. Jekuaeño piñemɨïru kawi yawe che ndiwe, uyekuaata oï peré Tumpa jeko ikawi wae, echa’ä che jekuaeño aïta pe reta ndiwe pomborɨ waerä. Añetete pe retaiño ndarau pepuere piyapo mbae ikawi wae Tumpa pewarä che pomborɨ mbae rewe,” jei chupe reta.

Guaraní Pe (Western): Simba

⁵ Che co jae uva iyɨpɨ rami, jare pe reta co jae jãca reta rami. Jocua ico cheré güɨrovia reve vae uyapota jeta icavi vae Tumpa peguarã. Echa'ã che aico ipɨa pe. Ẽrei che aico'ã yave pepɨa pe, pepuereta'ã mbae piyapo Tumpa peguarã —jei—.

San Juan 15:5 Iomraidhean Croise

San Mateo 13:21

“Erëi Tumpa iñee uyembɨjapo kawi’ä ipɨa pe ramo, ɨmambae ikueri. Yembɨawái ou chupe yawe, jare ïru wae reta uyapo ikawi mbae wae chupe yawe Tumpa iñee re wɨrowia jeko pewa, jayawe jupiwoiño opia Tumpa jape wi,” jei chupe reta.

San Juan 12:24

“Che tae pewe añetete wae, cheree uyembutuichakata oï chemano rupi. Yande yaikuaa kawi ñaï pëti atiräɨ mii ñañotɨ'ä yawe, ndarau uñemoña. Jekuaeño ikota jaeño pe etei. Erëi ñañotɨ yawe, yepe tëi umano, erëi jekuaeño uñemoña. Jukuärái ko chemano rupi jeta wae reta onoita tekowe ipɨau wae,” jei.

San Juan 15:16

“Pe reta’ä ko cheparawo. Che ko puparawo, jare amee ma pewe mbarawɨkɨ – jae ko opaete kerupi peo wae rupi Tumpa jeko ikawi wae tuyekuaa jeta peré. Jare jekuaeño jukuärái tuiko. Jare jayawe cheRu uyapota oï pewe ipotawe mbae piyerure jese cheree re wae,” jei chupe reta.

San Juan 5:19

Jayawe Jesús jei chupe reta: “Che tae pewe añetete wae, che Tumpa Taɨrä aï wae, cheiño chepuere’ä mbae ayapo. Jaeño mbae aecha cheRu uyapo wae chepuere ayapo. Jare jokua mbaembae cheRu uyapo wae, jokua etei che ayapo wi,” jei.

San Juan 9:33

Kua kuimbae ou’ä Tumpa wi yawe, ndarau etei ipuere uyapo kua mbaembae jae uyapo wae,” jei kuimbae chupe reta.

Hechos 4:12

“Jayawe mbaetɨ ye kía ipuere yanderepɨ waerä mbaembae yayawɨ Tumpa kotɨ wae wi. Echa’ä yandeRu Tumpa ombou pëtiño kua ɨwɨ pe ipuere yanderepɨ waerä wae – jae ko Jesús.” Jukuärái jei Pedro chupe reta.

Romanos 12:5

Jukuärái wi ko opaete yande Cristo re yarowia wae reta. Yepe tëi jeta ko yande reta jare oyowake’ä etei ko ñaï, erëi Cristo opaetei yandapo ma pëti ramiño iyé. Jare pëti ramiño ko ñaï jese ramo, yande reta pëti ramiño ko ñaï yandiyé wi.

Romanos 6:22

Erëi añawe, ime yawe jokua kɨrëɨ mbae kachi piyapo waerä wae, jokua kɨrëɨ ndarau ye ma onoi mbaepuere peré. Ndarau ma piko jokua kɨrëɨ pe täta rupi piyeyokui waerä, echa’ä Tumpa peyora ma ko chuwi jare añawe täta rupi piyeyokui peï Tumpa pe. Jare jokua ikawita oï pewe, echa’ä opa ara rupi jekuaeño pereko oya katu oo oï jupi wae re. Jare jae nunga wi perekowe opa yawe kua ɨwɨ pe, imeta penoi tekowe opa mbae wae.

Romanos 7:4

Jukuäraiete wi, hermano mii reta, jokua Moisés arakae uikuatía wae mbaetɨ ma onoi mbaepuere yanderé. Jukuärái ko, echa’ä ñamano rami ma ko chuwi. ¿Kërái ra jokua? Yayemboe ma kërái ñamano rami ko Cristo ndiwe jae umano yawe. Jare jokua jeko pewa Moisés arakae uikuatía wae ndarau ye ma onoi mbaepuere yanderé. Añawe Tumpa yandapo ma Cristo pewarä – jae ko jokua ikowe ye ou umanokue wae reta ipɨte wi wae. Jukuärái Tumpa yandapo yandepuere waerä yayeyokui kawi chupe.

1 Corintios 10:16

Yande reta yayembatɨ yawe yayemɨmandúa waerä yandeYa imano re, ¿ñañemɨïru’ä yerá yandeYa ndiwe etei mbaembae yau wae rupi? Jukuärái ko. Jokua copa wi yau yawe jare ñamee yasurupái jese yawe, yayemɨmandúa ñaï yandeYa Cristo juwɨ jae upɨyere yanderé wae re. Jukuärái wi yau yawe mbɨyape, yayemɨmandúa ñaï Cristo uiporara jete pe yanderé wae re. Jukuärái jokua mbaembae rupi ñañemɨïru ñaï yandeYa Cristo ndiwe etei. Jae ramiño wi kía jou yawe ipotawe mbae tumparaanga pe, jae uñemɨïru ko oï jokua tumparaanga ndiwe.

1 Corintios 12:12

Kua yandepuere yambɨjaanga yanderete re. Yande yaikuaa ñaï, yepe tëi yanderete pëtiño ko, erëi yanderete pe ime jeta mbaembae ñanoi. Jare opaete kua mbaembae reta, yepe tëi oyowake’ä ko, erëi opaete wae yanderete pewa ko jare yanderete pëtiño ko. Jare jukuärái wi ko opaete yande reta pëti ramiño ñaï Cristo re wae.

1 Corintios 12:27

Jayawe yanemandúa kawi yawe opaete kua mbaembae reta re, añawe yandepuere yae yambɨjaanga rewe opaete yande ko jae yandeYa Cristo jete, jare pëti pëti ko ñaï jae jete pewa.

2 Corintios 13:8

¿Këraita pa orepuere nduiporaraka kía pe jeko kachi ueya ma yawe? Ore nduipotaete numɨkɨrëɨ waerä jokua añetete wae rupi ma iko wae reta. Nduipota’ä nduiporaraka chupe reta.

2 Corintios 9:10

Tumpa ko umee yandewe yanderemitɨrä ñañotɨ waerä jare yanderembiurä yau waerä. Jare jae ko umeeta oï pewe opaete mbaembae uata oï pewe wae. Jare jokuaño’ä ko. Jae umbɨjetata oï pewe mbaembae ime penoi wae, jukuärái pepuere waerä pemborɨ ïru wae reta ipotawe mbae ikawi wae rupi.

Gálatas 5:22

Erëi kía iko yawe Espíritu Santo jei wae rupi, upuruauta, uyerowiata, ipɨakatuta, ipɨawasuta, ipɨakawita, jeko kawita, wɨrowia kawita Tumpa re,

Filipenses 1:11

Jare Jesucristo pemborɨta ime waerä penoi teko ikawi wae opaete wae uecha waerä. Jare jukuärái pereko pewa ïru wae reta uipɨuta Tumpa wi jare umbutuichata jae jee. Jukuärái ko ayerure aï Tumpa pe peré.

Filipenses 4:13

Añetete opaete kua mbaembae che chepuere amɨawäta, echa’ä Cristo jekuaeño chemɨmɨräta oï ramo.

Filipenses 4:17

Kua mbaetɨ ko che ayemɨngeta aï pe reta jekuaeño peruruka ye chewe waerä yemborɨ. Jaeño aipota pe reta jekuaeño piyapo waerä kua nunga mbaembae, echa’ä pëti ara Tumpa umɨñatimata oï pewe jokua piyapo wae re.

Colosenses 1:10

Jukuärái ore nduyerure noï peré pereko kawi waerä kërái ikawi ko yureko waerä kía kía Tumpa pewa iko wae reta. Echa’ä jukuärái piko yawe, pembɨyerowiata Tumpa opaete mbaembae piyapo wae rupi. Echa’ä piyeyokui kawita chupe opaete mbae ikawi wae Tumpa pe piyapo wae rupi, jare jekuaeño wi pekuakuaata Tumpa kotɨ arakuaa rupi.

Colosenses 1:6

Kua ñee ikawi wae uyemɨmbeu pewe wae jae nunga wi uyemɨmbeu oo oï opaete ɨwɨ rupi, jare jeta wae reta wɨrowia oï jese. Jare añawe uyeyapo oï chupe reta wi pewe uyeyapo wae rami. Echa’ä pe reta pemandúa kawi peï jaeramo piyandu yawe ñee ikawi wae, jare pikuaa yawe añetete ko Tumpa ipɨakawiete ye, ¿mbae pa uyeyapo pewe? Pe reta perowia jese, jare joko wiwe jokua ñee uparawɨkɨ oï pepɨa pe umbɨambɨe waerä perekowe jukuärái piyeyokui kawi waerä Tumpa pe. Jare jokua etei wi añawe uyeyapo oï opaete ɨwɨ rupi.

Santiago 1:17

Tumpa jaeño umee yandewe ikawi wae. Añetete opaete mbaembae ikawi wae jare jupi wae ou ara wi yandeRu Tumpa oï wae wi. Jae umbɨyekuaa opaete tembipe reta ara re ñonoï wae ipɨakawi rupi. Jare yepe tëi jokua tembipe reta opa kërái rái uyembɨambɨe, erëi yandeRu Tumpa ndarau etei uyembɨambɨe jare ndarau uyepepɨka wi.

1 Pedro 2:4

YandeYa Jesús ko jae pëti ita tekowe onoi wae rami jare tëta iyapoa reta wɨrɨ̈ro omombo iyuwi reta wae rami. Erëi yepe tëi jeta wae reta wɨrɨ̈ro Jesús, jesewe jae ko yandeRu Tumpa etei uiparawo wae. Jare Tumpa pewarä jae ko pëti ita ipöraete jare jepɨete wae rami. Jare pe reta perowia ma jese ramo,

2 Pedro 3:18

Jekuaeño pekuakuaa Tumpa kotɨ yandeRepɨ wae yandeYa Jesucristo ipɨakawi rupi. Jare arakuaa jesewa tukuakuaa peré. ¡Jae jee tuyembutuichaka añawe jare jaeño mái pewa! Jukuärái tuiko.