San Juan 11:52 - Biblia

⁵² Erëi mbaetɨta umano judío reta reño. Umanota iko wi opaete Tumpa taɨ reta kerupi rupi ñonoï wae re jae reta yureko waerä pëti ramiño.

Guaraní Pe (Western): Simba

⁵² Umanota umbatɨ vaerã opaete Tumpa taɨ uñemɨai vae reta - umanota'ã judío reta reño.

San Juan 11:52 Iomraidhean Croise

Oseas 1:10

Tumpa jei: “Israel iñemoñaa reta ikota ɨwɨkuïti ɨ wasu jembeɨ rupi oï wae rami, echa’ä jetaeteta ko jare ndarau kiawe ipuereta uipapa reta. Tenonde yawe che jae chupe reta: ‘Pe reta chembae’ä ko,’ jaese chupe reta. Erëi opaete kerupi rupi jukuärái che jae wae rupi, pëti ara jaeta chupe reta: ‘Che ko jae peTumpa aikoño mái wae. Jare pe reta ko jae cheraɨ reta.’ Jukuärái jaeta chupe reta,” jei Tumpa.

San Lucas 15:8

Jare Jesús jei wi chupe reta umbɨjaanga rewe: “Jae ramiño wi pëti kuña ime onoi yawe payandepo riare korepoti jepɨete wae, jare umɨkañɨ yawe pëti riare o pe, ¿mbae ra jae uyapota? ¿Ndarau yerá jae umɨendɨ mechero jare utupei ueka kawi waerä uwäe chupe rewa? Jukuäraita ko,” jei.

San Lucas 2:32

Jae ikota pëti tembipe rami judío mbae wae reta pe, echa’ä jae ndekuaakata oï chupe reta. Jare jae orembutuichata oï, ore Israel pewa nduiko wae reta, echa’ä ore ko jae nde oreparawo wae reta.” Jukuärái jei Simeón.

San Juan 1:12

Erëi amokue wae reta umbɨresiwe. Wɨrowia reta jese. Jáeramo jae reta Tumpa uyapo taɨ retarä yureko waerä.

San Juan 1:29

Pɨarewe pe Juan uecha Jesús ou oï ikotɨ, jare jei joko pe ñonoï wae reta pe: “Mase, pee oï Tumpa ombou wae,” jei. “Jae ko pëti owecha kuimbae yaraa yayuka ñamee Tumpa pe wae rami. Echa’ä Tumpa ombou umano waerä yanderé, jae rupi umbái waerä teko ñanoi Tumpa kotɨ wae. Jae ko opaete ɨwɨ pewa reta pewarä tëi,” jei.

San Juan 10:16

“Jare imeta oï wi ïru cheowecha reta. Erëi ndei ko jae reta oï cheowecharokai pe, echa’ä jae’ä ko judío reta. Jae reta wi uyapɨsakata chiñee re che aeni reta yawe. Jare che imeta ko jae reta wi aru amɨinge waerä cheowecharokai pe. Jare aru reta ma yawe, yurekota reta pëti wae peño jare pëtiño opaete jae reta iyandarekorä aikota,” jei chupe reta.

San Juan 12:32

“Erëi che, ïru wae reta chekututa ñonoï kurusu re jare chembɨyemboɨta cheñono reta. Jare jokua ara uwäe yawe, che amɨkɨrëɨta opaete ɨwɨ pewa reta ou waerä chekotɨ,” jei chupe reta.

Hechos 18:10

Echa’ä che aï nde ndiwe jare ndarau kiawe ipuere marái ndapo,” jei. “Jekuaeño chemɨeräkua, echa’ä imeño jeta wae reta wɨrowiata ñonoï cheré kua tëta wasu pe.” Jukuärái yandeYa jei chupe.

Romanos 3:29

Jare jukuärái ko opaete pewarä, echa’ä ime pëtiño Tumpa. Jáeramo yaikuaa ñaï jae ko judío reta iTumpa jare judío mbae wae reta iTumpa wi. Jayawe ime pëtiño kërái rupi judío reta jare judío mbae wae reta ipuere waerä ñonoï jeko mbae wae rami Tumpa jowai – jae ko Cristo re yarowia wae rupiño.

Romanos 4:17

Jukuärái ko jei Tumpa iñeerɨru pe. Echa’ä uyekuatía oï joko pe kua mbae Tumpa jei Abraham pe wae: “Che nduyapota aï jeta ambɨe ɨwɨ pewa reta tamɨrä.” Jukuärái Tumpa jei chupe jare jukuärái ma uyapo chupe, echa’ä opaete yande Cristo re yarowia wae reta ko jae Abraham iñemoñaa añetete wae Tumpa jowai. Jare jukuärái yandepuereta yayekou Abraham ndiwe jokua mbaembae Tumpa umeeta oï chupe wae re. Tumpa uyapo kua mbae ikawi wae Abraham pewarä, echa’ä Abraham wɨrowia iñee re ramo. Abraham uikuaa Tumpa imbaepuere tuichaete ko, jare Tumpa uipota yawe, jae nunga wi ipuere umbɨjekowe ye umanokue wae reta. Jáeramo Abraham uikuaa yawai’ä ko Tumpa pewarä umee chupe uñemoña waerä.

Efesios 1:5

Jare wi iyɨpɨ wiwe Tumpa yandeparawo yaiko waerä taɨ jare tayɨ retarä yanderauete ramo. Jokua ko jae Tumpa ipɨayemɨngeta uyerowia rewe uyapota iko wae, echa’ä jukuärái jae uipota ramo. Jáeramo ipɨakawi ramo, ombou Cristo kua ɨwɨ pe. Jare Cristo upɨyere juwɨ opa umbái waerä yandewi mbaembae yayawɨ Tumpa kotɨ wae. Jukuärái jae yanderepɨ ma jokua teko yareko wae wi. Jayawe Tumpa yandapo ñaï waerä pëti ramiño Taɨ uauete wae re. Jáeramo uyerowia umae yanderé. Jukuärái Tumpa uyapo yandewe yambutuicha waerä Tumpa jee ipɨakawi tuichaete yandewe ramo.

Santiago 1:1

Pe Israel iñemoñaa piko wae reta opaete piñemɨái peï kerupi rupi wae, che araaka aï pewe saludo. Che ko jae Santiago aikuatía aï pewe wae. Che ko jae pëti wae yandeRu Tumpa jare yandeYa Jesucristo pe ayeyokui wae.

1 Pedro 1:1

Pe Tumpa peparawo wae reta piñemɨái peï ɨwɨ Ponto, Galacia, Capadocia, Asia, jare Bitinia rupi wae reta, che ko jae Pedro aikuatía aï wae. Jesucristo chemondo jae jee re opaete kerupi amɨmbeu waerä jesewa. Tumpa jekuaeño tuicha tipɨakawi pewe jare tuyapo pewe piko waerä pepɨakatu rewe. Añawe pe reta ambɨe ɨwɨ pewa rami ko peï kua ɨwɨ pe, echa’ä pe reta ara pewa ko. Iyɨpɨ wiwe yandeRu Tumpa pekuaaño mái iko. Jare jokua arakuaa rupi jae peparawoño mái pe reta piko waerä jae imaerä. Jare Espíritu Santo peñono tee piko waerä Jesucristo jei wae rupi jare pepɨayoe waerä Tumpa kotɨ Jesucristo juwɨ uyepɨyere wae rupi.

1 Juan 2:2

Jare jae etei ko uñemee umano waerä mbaembae yayawɨ Tumpa kotɨ wae re, jare jukuärái umbɨpɨakatu Tumpa iarasɨ tëi iko yandekotɨ wae. Jare yandereño’ä ko Cristo umano. Jae umano tëi ko wi opaete ɨwɨ pewa reta re.

1 Juan 3:1

Mase, kërái etei ra ko yandeRu Tumpa yanderau, echa’ä jae jei yandewe, “Cheraɨ retarä ko.” Jare jokua ko jae yande reta. Erëi kua ɨwɨ jeko rupi yureko wae reta uikuaa’ä kía ko yande wae, echa’ä uikuaa’ä reta yandeRu Tumpa ramo.

1 Juan 3:10

Jukuärái ko yandepuere yaikuaa kía ra ko jae Tumpa taɨ reta wae jare kía ra ko jae Añawasu taɨ reta wae. Opaete mbae jupi mbae uyapo wae reta Tumpa pewa’ä ko. Jare jae nunga wi opaete uau’ä japicha wae reta Tumpa pewa’ä ko wi.

1 Juan 3:2

Cheïru puau wae reta, añawe yande ko jae Tumpa taɨ reta. Jare ndeiño Tumpa uikuaaka yandewe kërái eteita ra ko ñaï kuri wae. Erëi yaikuaa ko ñaïta Cristo rami jae ou ye yawe, echa’ä yaechata jae etei kërái ko jae wae.

Apocalipsis 5:9

Jare jae reta ukäta Owecha kuimbae taurusu wae jowai pëti käta ipɨau wae kuärái: “Ndeñoete ko jupi nenoi waerä jokua tupapire jare ndipea waerä imboyaka reta. Echa’ä ndeyuka reta, jare nderuwɨ uyepɨyere wae rupi ndewa pɨau ye ma jeta wae reta Tumpa pewarä. Jae reta ko jae opaete ambɨembɨe ɨwɨ pewa reta kiape kiape ñonoï wae rupi jare opa kërái rái ñee pe uyemɨngeta wae reta.