San Juan 10:28 - Biblia

²⁸ Che amee chupe reta tekowe opa mbae wae, jare jae reta ndarau etei yuraa Tatawasurenda pe. Añetete, mbaetɨ kiawe ipuere upɨ̈ro reta chepo wi,” jei chupe reta.

Guaraní Pe (Western): Simba

²⁸ Jare amee chupe reta tecove opa mbae vae, jare ndarau etei oo cañɨtei pe. Mbaetɨ quía ipuere upɨ̃ro chegüi —jei—.

San Juan 10:28 Iomraidhean Croise

Jeremías 31:34

Jare ndarau ye ma ime kía omboe japicha wae jare jëtara wae chekuaa waerä. Ndarau ye ma ime kía jei ïru pe uyemboe waerä cheré. Echa’ä opaete wae – iparawete wae reta wiwe jare mburuwicha retawe – chekuaata ñonoï. Echa’ä che amaeta jese reta aiparareko rewe. Ambaita chuwi reta mbaembae uyawɨ reta chekotɨ wae jare ndarau ye ma chemandúa jese.” Jukuärái jei Tumpa ikoño mái wae.

Marcos 13:22

“Echa’ä imeta upurumbɨtawɨ wae reta jei, ‘Che ko jae Cristo,’ jare imeta wi ïru upurumbɨtawɨ wae reta jei, ‘Tumpa chembou amɨmbeu waerä ñee chuwi etei ou wae.’ Jukuärái jeita tëi reta. Jare jae reta uyapota mbaembae tuicha wae kuimbae retaño ipuere’ä uyapo wae. Jare jokua mbaembae rupi jae reta uipotata tëi wi umbɨtawɨ Tumpa uiparawo wae retawe,” jei.

San Lucas 23:46

Jayawe Jesús täta usapɨkai rewe jei: “CheRu, añono cherekowe mii ndepo pe,” jei. Jare kua jei ma yawe, umano.

San Juan 10:29

“CheRu etei ko umee reta chewe yureko waerä chemaerä. Jare mbaetɨ kiawe ipuere upɨ̈ro reta cheRu ipo wi, echa’ä cheRu imbaepuere tuichaete ye ko opaete wae wi.

San Juan 11:25

Jayawe Jesús jei chupe: “Che ko jae tekowe amee wae jare umanokue wae reta ambɨjekowe ye wae,” jei chupe. “Cheré wɨrowia wae reta, yepe tëi umano, erëi ikowe yeta ñonoï.

San Juan 14:19

“Ndei ɨma mbowe, kua ɨwɨ jeko rupi yureko wae reta ndarau ye ma cherecha. Erëi pe reta cherecha yeta peï kuri. Jare che aikowe yeta aï ramo, pe reta penoita wi tekowe ipɨau wae.

San Juan 17:2

“Jukuärái ayapota, echa’ä che ameeta tekowe opa mbae wae opaete nde nemee chewe wae reta pe. Jukuärái chepuere ayapo, echa’ä nde chapo opaete wae iYarä ramo,” jei.

San Juan 18:9

Kua jei Jesús uyeyapo waerä tenonde yawe jei Tu pe wae. Echa’ä jae jei chupe: “Che ayandareko kawi nde nemee chewe wae reta re. Ndarau pëti awe ukañɨ chewi,” jei.

San Juan 3:36

Jare ipotawe kía Tumpa Taɨ re wɨrowia wae ime onoi tekowe opa mbae wae. Erëi Tumpa Taɨ re wɨrowia mbae wae ndarau onoi jokua tekowe, jare Tumpa iarasɨ jekuaeño oï jese.

San Juan 4:14

“Erëi ipotawe kía jou jokua ɨ che ameeta chupe wae, ndarau etei ma iɨwe yewɨ. Echa’ä jokua ɨ che ameeta chupe wae uyeyapota ipɨa pe pëti ɨkua ɨwororo jekuaeño oë wae rami, jare umeeta chupe tekowe opa mbae wae,” jei chupe.

San Juan 5:24

“Che tae pewe añetete wae, ipotawe kía chiñee re uyapɨsaka wae jare chembou wae re wɨrowia wae, jae onoi tekowe opa mbae wae. Tenonde yawe oo iko Tatawasurenda kotɨ, erëi añawe ime ma onoi tekowe opa mbae wae. Tumpa ndarau ma umbɨjeko,” jei chupe reta.

San Juan 6:27

“Erëi awɨye peparawɨkɨ perembiurä ɨmata’ä iko pewe wae reño. Peparawɨkɨta ko perembiurä opata mbae wae re – jokua ko jae tekowe opa mbae wae che kuimbaerä ayeyapo wae chepuere amee pewe wae. Jare jukuärái chepuere ayapo, echa’ä cheRu Tumpa umee ma chewe mbaepuere jokua ayapo waerä,” jei chupe reta.

San Juan 6:37

Erëitu opaete kía kía cheRu umee chewe wae reta yuweruta chekotɨ. Jare ipotawe kía chekotɨ ou wae ndaraúi amombo.

San Juan 6:47

Erëi yepe tëi kiawe uecha’ä etei cheRu, erëitu che tae pewe añetete wae, ipotawe kía wɨrowia cheré wae ime onoi tekowe opa mbae wae.

San Juan 6:68

Jare Simón Pedro jei chupe: “¿OreYa, ¿kía re pa ndoota nduyemboya?” jei. “Ndeeño ko nemɨmbeu kawi orewe tekowe opa mbae wae kërái nonoi waerä.

Hechos 7:59

Jare uyapi reta rambuewe, Esteban uyerure yandeYa Jesucristo pe kuärái: “CheYa Jesús, eraa cherekowe,” jei.

Romanos 5:17

Añetete, jokua pëti kuimbae Adán uyawɨ Tumpa jei wae jeko pewa mano uyembɨiya opaete wae re. Erëi yaipɨsɨ Tumpa ipɨakawi yawe, jare jae umae yanderé yandereko mbae wae rami yawe, tuichaete ye uyembɨiyata oï yanderé tekowe opa mbae wae jokua pëti kuimbae Jesucristo uyapo yandewe wae rupi.

Romanos 5:2

Jare añawe yarowia ma Cristo re ramo, Cristo uyapo ma yayekou waerä Tumpa ipɨakawi re. Jare yayerowia ñaï, echa’ä yaikuaa ko pëti ara yayekouta ñaï kuri Tumpa imbaepuere jupiete ye wae re.

Romanos 5:21

Jáeramo kërái yaikose teko yareko wae ipo pe jare jokua yanembɨsɨrɨ iko Tumpa wi, jukuärái wi añawe Tumpa ipɨakawi wae ipo pe ko ñaï jare ime ma ñanoi tekowe opa mbae wae. Echa’ä ime yawe kía wɨrowia yandeYa Jesucristo re wae, Tumpa umae jese jeko mbae wae rami.

Romanos 5:9

Jayawe jukuärái ko Tumpa yanderauete ye. Erëi ime ye mbae ikawi wae yaikuaa waerä. Yaikuaa ñaï yandeYa Jesús upɨyere juwɨ jare umano yanderé Tumpa ipuere waerä umae yanderé yandereko mbae wae rami. Jare jukuärái yawe, ¿këraita pa Tumpa iarasɨ oata oï yanderé kuri ara taɨkuewa pe? Ndarau etei ma.

Romanos 6:23

Echa’ä mbaembae yayawɨ Tumpa kotɨ wae jepɨ ko mano – jae ko yembɨsɨrɨ Tumpa wi jaeño mái pewa Tatawasurenda pe. Erëi Tumpa umee yandewe tekowe opa mbae wae jepɨ mbae awe. Jare kua re ko yande yayekou ñaï, echa’ä pëti ramiño ko ñaï yandeYa Jesucristo re ramo. Jukuärái ko. Jáeramo mbaetɨ ikawi jekuaeño yayawɨ waerä Tumpa jei wae.

Romanos 8:1

Jayawe ¿mbae ra añawe yandepuere yaikuaa opaete kua mbaembae reta rupi? ¿Kërái ra ko ñaï añawe yande reta Cristo re pëti ramiño yaiko wae? Añawe yaikuaa ñaï Tumpa ndarau ma yanembɨjeko.

Romanos 8:29

Jare ¿kërái ra ko Tumpa ipɨayemɨngeta yanemaerä? Iyɨpɨ wiwe jae yandekuaaño mái, yande jae imaerä yaiko wae reta. Jáeramo iyɨpɨ wiwe jae ipɨayemɨngeta iko ñaneñono tee waerä yande reta yaiko waerä Taɨ Jesucristo echa rami. Echa’ä Tumpa uipota onoi jeta taɨ reta, jare jae nunga wi jae uipota taɨ Jesucristo oï waerä ñanerëtara tenondewarä. Jukuärái ko Tumpa ipɨayemɨngeta ikawi wae yanemaerä.

Filipenses 1:6

Pe reta jaeramo perowia Cristo re yawe, Tumpa umbɨpɨ uparawɨkɨ pepɨa pe umbɨambɨe waerä pereko, jukuärái piko waerä yandeYa Jesucristo rami. Jare che arowia katu aï Tumpa jekuaeño uyapota oï jokua mbarawɨkɨ ara yandeYa Jesucristo pewa ou rewa. Jokua ara ramo jae opata uyapo.

2 Tesalonicenses 2:13

Erëi ikawi ko ore jekuaeño numee waerä yasurupái Tumpa pe peré, pe yandeYa perau wae reta. Echa’ä Tumpa peparawo iyɨpɨ wiwe penoi waerä tekowe opa mbae wae añetete wae perowia wae rupi jare Espíritu Santo rupi – jae ko peñono tee Tumpa pewarä wae.

1 Timoteo 1:16

Erëi Tumpa ipɨakawi chewe ïru wae reta ipuere waerä uikuaa añetete ko Jesucristo ipɨawasu ipotawe uyawɨ ikotɨ wae reta pe. Jukuärái che ko jae pëti jaanga rami jae reta pewarä. Echa’ä jae reta uikuaa ma chereko rewa yawe, uikuaata jae reta wi ipuere wɨrowia waerä Cristo re jare onoi reta waerä tekowe opa mbae wae.

2 Timoteo 1:12

Jáeramo Jesucristo jowaicho reta cheñonoka kua peresorɨru pe. Erëi che chemara’ä aï aiporara aï wae re, echa’ä aikuaa aï Jesucristo. Jare arowia katu aï jese chemborɨta oï wae opa ayapo waerä jokua jae umee chewe ayapo waerä wae. Jare jokua ara jae ou ye yawe, jae umeeta oï chewe mbae ikawi wae jokua ayapo wae re.

Hebreos 7:25

Jáeramo ime yawe kía uipota iko Tumpa ndiwe wae jare wɨrowia ma Jesús re wae, Jesús ipuerete uepɨ jaeño mái pewa. Echa’ä Jesús ikoño mái uyerure waerä Tumpa pe omborɨ reta waerä.

1 Pedro 1:5

Erëi añawe pe reta peäro peï rambuewe, Tumpa uyandareko oï peré imbaepuere pe, echa’ä pe reta perowia jese ramo. Jare jae jekuaeño uyandarekota oï peré ara taɨkuewa rewa. Jare ara taɨkuewa uwäe ma yawe, jayawe ramo uyekuaata oï opa ma uyeyapo Tumpa ipɨayemɨngeta yanderepɨ waerä.

1 Juan 1:2

Jae ikoño mái yandeRu Tumpa ndiwe jare añawe uyechaka ma orewe. Ore reta etei nduecha ma, jare añawe nduikuaaka noï pewe jesewa jare kërái jae ikoño mái iko wae rewa.

1 Juan 2:19

Jae reta uyembatɨse yande ndiwe añetete wae nunga. Erëitu opa ma usɨrɨ reta yandewi. Jae reta uñemɨïru’ä añetete rewe yande ndiwe. Jae reta añetete uñemɨïru yande ndiwe yawe, jekuaeñota tëi yureko yande ndiwe. Erëi opa usɨrɨ reta yandewi. Jukuärái yaikuaa jae reta mbaetɨ ko yande rami, echa’ä jae reta Tumpa pewa’ä ko.

1 Juan 2:25

Jare kua ko jae Tumpa jei umeeta oï yandewe wae – tekowe opa mbae wae.

1 Juan 5:11

Jare Tumpa uikuaaka yandewe kuärái: Jae umee ma yandewe tekowe opa mbae wae, jare kua tekowe opa mbae wae ñawäe Tumpa Taɨ re.

Judas 1:1

Pe yandeRu Tumpa perau jare pereni wae reta, yandeYa Jesucristo uyandareko kawi oï peré. Che ko jae Jacobo tɨwɨ Judas jee wae aikuatía aï pewe kua tupapire. Che wi ko jae Jesucristo pe ayeyokui wae.

Judas 1:21

Pe reta pikuaa peï yandeYa Jesucristo umeeta oï pewe tekowe opa mbae wae peparareko ramo. Jare añawe jokua peäro peï rambuewe, jekuaeño pemandúa kërái Tumpa perau wae re.

Judas 1:24

Añawe, ¡Tumpa jeeño yambutuicha! Echa’ä jaeño ipuere ñanemɨmɨräta awɨye waerä yapia jape wi. Jare jaeño ipuere yanembɨyemboɨ jae jowai yandereko mbae rewe jare tuicha yerowia rewe.