San Juan 1:29 - Biblia

²⁹ Pɨarewe pe Juan uecha Jesús ou oï ikotɨ, jare jei joko pe ñonoï wae reta pe: “Mase, pee oï Tumpa ombou wae,” jei. “Jae ko pëti owecha kuimbae yaraa yayuka ñamee Tumpa pe wae rami. Echa’ä Tumpa ombou umano waerä yanderé, jae rupi umbái waerä teko ñanoi Tumpa kotɨ wae. Jae ko opaete ɨwɨ pewa reta pewarä tëi,” jei.

Guaraní Pe (Western): Simba

²⁹ Pɨareve pe Juan uecha Jesús ou icotɨ jare jei: —Mase, pee oĩ Tumpa ombou vae. Jae co ovecha rami. Ou güɨraa vaerã opaete ɨvɨ pegua reta imbaeyoa —jei—.

San Juan 1:29 Iomraidhean Croise

Isaías 53:10

Tumpa ipɨayemɨngeta ko uiporaraete waerä jukuärái jokua chupe uyeyokui wae mbɨatɨtɨ tuicha wae pe. Erëi jekowe umee ma yawe ɨwɨ pewa reta jeko pewa, joko wi oïta jae iñemoñaa reta ndiwe jetaete ye ara rupi. Jae rupi Tumpa ipɨayemɨngeta opata uyeyapo kawi.

Isaías 53:11

Jetaete ma uiporara yawe, uyerowia yeta, echa’ä jae uikuaata jokua jae uiporara wae rupi jeta wae reta onoita tekowe opa mbae wae Tumpa ndiwe. Tumpa jei kuärái: “Che amaeta jeta wae reta re jeko mbae wae reta rami. Echa’ä yepe tëi uyawɨ reta ma chekotɨ, jesewe jokua chewe uyeyokui wae opata umbɨepɨ teko onoi reta chekotɨ wae.

Isaías 53:7

Yepe tëi umbɨpere reta jasɨ rupi, jesewe kua kuimbae jei’ä mbae awe. Wɨraa uyuka reta waerä jokua kuimbae kërái pëti owecha raɨ uyuka reta rami. Kërái pëti owecha umaeño iyé iñeapika wae reta pe, jukuärái rami jae omoë'ä iñee.

Números 21:9

Jayawe Moisés uyapo pëti mboiraanga jiero bronce pewa, jare oñono pëti ɨwɨra puku wae re, jare umbɨyatɨka. Joko wi ipotawe mboi uichuu wae umae jese yawe, ukuera woi.

San Mateo 1:21

“María imembɨta oï pëti kuimbae jare nde nembɨjeeta jokua sambiaɨ Jesús. Echa’ä yepe tëi opaete wae uyawɨ Tumpa kotɨ jare ime onoi reta teko Tumpa jowai, erëi Jesús uepɨta oï kía kía jae imaerä iko wae reta,” jei araɨwa José pe.

San Mateo 20:28

“Jukuärái wi che kuimbaerä ayeyapo wae ayu’ä ko ïru wae reta uyeyokui waerä chewe. Che ayu ko ayeyokui waerä ïru wae reta pe jare amee waerä cherekowe jeta wae reta aepɨ waerä.” Jukuärái jei Jesús jemimboe reta pe.

San Juan 1:35

Pɨarewe pe Juan joko pe oï yewɨ mokui jemimboe ndiwe.

San Juan 1:36

Jayawe Jesús uasa jokoropi ou. Jare Juan umae ngatu jese jare jei ye: “Mase, pea kuimbae Tumpa ombou umano waerä yanderé pëti owecha yayuka ñamee Tumpa pe wae rami,” jei chupe reta.

San Juan 1:43

Pɨarewe pe Jesús uipota oo ɨwɨ Galilea kotɨ. Jare uwata iko rambuewe, oñowäiti pëti kuimbae Felipe jee wae ndiwe jare jei chupe: “Eyu che ndiwe ndiko waerä cheremimboerä,” jei chupe.

San Juan 2:1

Joko wi mbapɨ ara pe ime iko pëti umenda oï wae ɨwɨ Galilea pe tëta wasu raɨ Caná jee wae pe. Jare Jesús ichɨ oo wi joko pe.

San Juan 3:16

Tumpa uauete ɨwɨ pewa reta. Jáeramo umee Taɨ jae waeño wae, ipotawe kía wɨrowia jese wae onoi waerä tekowe opa mbae wae. Ndarau etei oo Tatawasurenda pe.

San Juan 4:42

Jei reta kuña pe: “Añawe mbaetɨ ko nde nemɨmbeu orewe ramoño ndorowia noï jese. Añawe ore etei nduyapɨsaka ma jese. Jare añawe ore nduikuaa añetete yepe jae ko Upuruepɨ wae ou kua ɨwɨ pe wae,” jei reta kuña pe.

San Juan 6:51

“Jare che etei ko jae jokua mbɨyape ara wi ayu wae tekowe opa mbae wae amee wae. Jare ipotawe kía kua mbɨyape jou wae onoita tekowe opa mbae wae,” jei umbɨjaanga rewe. “Cherete etei ko jae jokua mbɨyape. Jare che ameeta aï cherete opaete ɨwɨ pewa reta re opaete onoi waerä tëi tekowe ipɨau wae,” jei Jesús chupe reta.

Hechos 13:39

Echa’ä ipotawe kía wɨrowia Jesús re wae Tumpa umaeta jese jeko mbae wae rami,” jei. “Kua ikawiete ko, echa’ä ɨma ma yaipota tëi yayembujupika Moisés arakae uikuatía wae rupi. Erëi yandepuere’ä etei,” jei chupe reta.

Hechos 8:32

Eunuco umɨngeta iko Tumpa iñeerɨru pe kiape uyekuatía oï kuärái: “Wɨraa uyuka reta waerä jokua kuimbae kërái pëti owecha uyuka reta rami. Kërái pëti owecha raɨ umaeño iyé iñeapika wae reta pe, jukuärái rami jae omoë'ä iñee.

1 Corintios 15:3

Che amɨmbeu yuapɨ ye pewe jokua ñee ikawi wae Cristo etei tenonde umɨmbeu ma chewe wae. Jare jokua ñee ikawiete oï opaete ïru ñee reta wi. Kuärái ko jokua ñee: YandeYa Cristo umano mbaembae yayawɨ Tumpa kotɨ wae re opa umbái waerä yandewi. Jare jukuärái jae uyapo kërái arakae Tumpa iñeerɨru pe uyekuatía iko wae rupi.

2 Corintios 5:21

YandeYa Cristo uyapo’ä etei ko mbae kachi wae. Erëi Tumpa uiporaraka chupe opaetei mbaembae kachi yayapo wae re Cristo etei jokua mbaembae uyapo wae rami. Jukuärái Tumpa uyapo yandepuere waerä ñaï kawi jae ndiwe yandereko mbae wae rami Cristo uyapo yandewe wae rupi.

Gálatas 1:4

Kua ɨwɨ pewa reta opaete seri oyowaicho ñonoï Tumpa kotɨ. Jare jae reta jeko kachi oï Tumpa jowake. Erëi yandeYa Cristo uñemee umano waerä yanderé mbaembae yayawɨ Tumpa kotɨ wae opa umbái waerä yandewi, jare jukuärái yanderepɨ waerä kua ɨwɨ jeko ikawi mbae wae wi. Jukuärái Cristo uyapo yandeRu Tumpa uipota ramo.

Gálatas 3:13

Jayawe yepe tëi yande yaiko’ä ko jupi rupi opaete Tumpa arakae jei Moisés pe wae rupi, jare jokua jeko pewa Tumpa iarasɨ pe yaikose, jesewe yandeYa Cristo yanderepɨ ma chuwi. Echa’ä Tumpa iarasɨ oata tëi iko yanderé wae oa Cristo re yandepepɨka pe jae uyekutuka iko kurusu re rambuewe. Jukuärái jei yandewe Tumpa iñeerɨru pe jei yawe: “Kía uyekutuka ɨwɨra re wae, Tumpa iarasɨ toa jese.”

1 Timoteo 2:6

Echa’ä opaete wae yayawɨ Tumpa kotɨ jare yandereko ñaneapɨ̈ti oï wae echa. Erëi Jesucristo uñemee umano waerä yanderé umbɨepɨ waerä teko ñanoi wae. Jukuärái jae yandeyora ma yandereko wi. Jokua ko jae ñee ikawi wae Tumpa uikuaaka yandewe wae jokua ara jae uiparawo wae pe.

Tito 2:14

Opaete yande jeta ma yayawɨ Tumpa kotɨ. Erëi Jesucristo uñemee umano waerä yanderé yanderepɨ waerä jokua teko ñanoi wae wi, jare oyoe waerä yandepɨa opaete ikawi mbae wae wi. Jukuärái jae ñaneñono tee ma jae imaerä, yande ñanekɨrëɨ yayapo waerä mbaembae ikawi waeño.

Hebreos 1:3

Jare Taɨ iñee imbaepuerete wae rupi opaete jokua mbaembae jekuaeño ime ñonoï. Taɨ rupi uyekuaa Tumpa imbaepuere jembipete ye wae jare kërái etei ko Tumpa wae. Taɨ etei ou kua ɨwɨ pe umano waerä mbaembae yayawɨ Tumpa kotɨ wae re opa umbái waerä yandewi. Joko wi jae ikowe ye ou umanokue wae reta ipɨte wi, jare oo ye ara pe uwapɨ Tumpa iyakata kotɨ kiape onoi mbaepuere Tumpa ndiwe opaete mbaembae re.

Hebreos 2:17

Jáeramo jae imeta ko uyeyapo yande rami etei uyapo waerä yandewe kërái rupi yaya waerä Tumpa re. Jae uyeyapo yandesacerdote tenondewaeterä jupi wae. Jare jae uiporara wae rupi opa umbái yandewi mbaembae yayawɨ Tumpa kotɨ wae. Añawe yandepuere yarowia katu jese jae uyapo waerä mbarawɨkɨ jupi yanemaerä Tumpa jowai, jukuärái yandepuere waerä yaya Tumpa re. Jare jae yande rami etei iko ramo, jae umae yanderé yandeparareko rewe.

Hebreos 9:28

Jare jukuärái wi Cristo pëti weseño uñemee umano waerä jeta wae reta re mbaembae jae reta uyawɨ Tumpa kotɨ wae opa umbái waerä. Jare jae ou yeta oï, erëi mbaetɨta ma ou umbɨepɨ ye waerä mbaembae yayawɨ wae. Jae ou yeta oï umee waerä tekowe opa mbae wae opaete kía uäro ñonoï wae reta pe.

1 Pedro 1:19

Tumpa perepɨ ma Cristo juwɨ pe etei. Jare jokua juwɨ ndaraúi uñewäe chupe jepɨrä wae. YandeYa Cristo jae ko pëti owecha kuimbae ikawiete wae jare ipere mbaei wae kía wɨraa umee Tumpa pe wae rami.

1 Pedro 2:24

Yande jeta ma yayawɨ Tumpa kotɨ. Erëi Cristo uyekutuka iko kurusu re yawe, jae etei uiporara jete pe yanderé jokua teko ñanoi wae opa umbái waerä yandewi. Jare jukuärái Cristo uyapo yandepuere waerä yaiko jupi rupi. Jare jukuärái ko yandepuere yayapo, echa’ä yande reta ñamano rami ma ko yandereko kachi wi. Jare Cristo ipere wae rupi yakuera ma ko Tumpa kotɨ.

1 Pedro 3:18

Kua pe ikawi ñamae waerä Cristo re. Yepe tëi jae ko jupi wae, erëitu jae uiporara yande jupi mbae yaiko wae reta re. Yande jeta yayawɨ Tumpa kotɨ. Erëi Cristo umano pëti weseño jaeño mái pewa jokua mbaembae yayawɨ wae re, jukuärái yandepuere waerä yaya Tumpa re. Cristo uyeyapo kuimbaerä. Jáeramo jae umano yawe, umano jete pe yande rami. Erëitu ikowe ye ou umanokue wae reta ipɨte wi Espíritu Santo imbaepuere rupi.

1 Juan 2:2

Jare jae etei ko uñemee umano waerä mbaembae yayawɨ Tumpa kotɨ wae re, jare jukuärái umbɨpɨakatu Tumpa iarasɨ tëi iko yandekotɨ wae. Jare yandereño’ä ko Cristo umano. Jae umano tëi ko wi opaete ɨwɨ pewa reta re.

1 Juan 3:5

Erëi pe reta pikuaa kawi peï Cristo uyeyapo kuimbaerä opa umbái waerä yandewi mbaembae yayawɨ Tumpa kotɨ wae. Jare Cristo pëti wese awe uyawɨ'ä.

1 Juan 4:10

Echa’ä Tumpa ombou Taɨ umano waerä mbaembae yayawɨ ikotɨ wae re, jare jukuärái umbɨpɨakatu Tumpa iarasɨ tëi iko yandekotɨ wae. Yaipota yaikuaa yawe kërái yapuruau waerä añetete rewe, jokua re ko ikawi ñamae waerä. Awɨye ñamae yandiyé kërái yaau Tumpa wae re. Echa’ä yaau Tumpa wae ndarau etei omboyowake Tumpa yanderau wae.

Apocalipsis 12:11

Echa’ä jae reta opa ma umɨamɨri Añawasu Owecha kuimbae taurusu wae juwɨ rupi jare Tumpa iñee umɨmbeu reta wae rupi. Jare mbaetɨ etei urukɨye reta jekowe umano waerä.

Apocalipsis 13:8

Jare opaete seri ɨwɨ pewa reta umbutuicha bestia jee. Jaeño jokua Owecha kuimbae taurusu wae uyeyukaka wae itupapire pe jee uyekuatía oï wae reta umbutuicha’ä jae jee. Jokua tupapire ko jae opaete tekowe opa mbae wae onoi wae reta jee uyekuatía oï pɨpe wae. Jare jae reta jee uyekuatiaño mái iko ɨwɨ uyembɨpɨ wiwe.

Apocalipsis 14:1

Joko wi aecha jokua Owecha kuimbae taurusu wae uyemboɨ oï ɨwɨtu wasu Sion jee wae re. Jare joko pe ñonoï jae ndiwe jokua 144.000 wae reta. Jae reta jesɨwa re uyekuatía oï Owecha kuimbae taurusu wae jee jare Tu jee.

Apocalipsis 14:4

Jare jae reta uyemɨngɨa’ä Tumpa kotɨ. Kërái pëti kuimbae uyapo’ä etei awasa wae rami, kua reta jekuaeño jupi Tumpa kotɨ. Jae reta umɨïru oï Owecha kuimbae taurusu wae ipotawe kerupi oo wae rupi. Jae uepɨ kua reta ɨwɨ pewa reta ipɨte wi oñono tee reta waerä jae imaerä jare Tumpa pewarä wi.

Apocalipsis 15:3

Jare jae reta ukäta Moisés ikäta pe jare Owecha kuimbae taurusu wae ikäta pe. Ukäta reta kuärái: “OreYa Tumpa, nde opaetei mbaepuere nenoi. ¡Nderembiapo reta ikawiete jare orembɨpɨakañɨete! Nde ko jae opaete wae imburuwicha wasurä jaeño mái pewa. Jare opaete nde ndiyapo wae jupi ko jare añetete ko.

Apocalipsis 17:14

“Kua reta ombowaichota tëi Owecha kuimbae taurusu wae. Erëitu Owecha kuimbae opata umɨamɨri reta, echa’ä jae ko mburuwicha wasu reta itenondewaete wae jare opaete wae iYa tenondewaete wae,” jei. “Jare jae nunga wi ñonoïta jae ndiwe jae uiparawo wae reta ñeräro pe. Kua reta jae ueni, jare jae reta jupi uyeyokui chupe wae ko,” jei chewe araɨwa.

Apocalipsis 19:7

Yayerowia jare yambutuicha jae jee, echa’ä uwäe ma ara Owecha kuimbae taurusu wae umenda waerä. Jare jembirekorä wae uyeyapɨkatu kawi ma oï.

Apocalipsis 19:9

Jare pëti araɨwa jei chewe: “Ikuatía kua ñee: ‘Owecha kuimbae taurusu wae umenda oï, jare uyapɨkatu ma tembiu ikawiete wae uyekou reta waerä jese. Uyekouete ñonoï Tumpa uparea chupe reta wae.’ Jukuärái ikuatía.” Jare jei wi chewe: “Kua ñee añetete ko. Tumpa iñee etei ko,” jei.

Apocalipsis 21:14

Jare tëta wasu ikësea ime onoi doce iwapɨka. Jare uyekuatía oï jese reta Owecha kuimbae taurusu wae doce jemimboe tenondewaete jee reta pëti pëti rupi.

Apocalipsis 21:27

Erëi ndarau etei uike joko pe ipotawe mbae ikɨa oï Tumpa kotɨ wae. Jare ndarau uike wi joko pe jeko kachi wae reta jare iyapu wae reta. Jaeño uiketa joko pe Owecha kuimbae taurusu wae itupapire pe jee uyekuatía oï wae reta. Jae ko jokua tupapire tekowe opa mbae wae onoi wae reta jee uyekuatía oï pɨpe wae.

Apocalipsis 21:9

Joko wi pëti araɨwa ou che aï wae pe. Kua araɨwa tenonde yawe aecha ime wɨreko pëti copa tɨnee mbaesusere pewa – jae ko chiu wae wi pëti. Jare jae jei chewe: “Eyu che ndiwe. Taechaka ndewe Owecha kuimbae taurusu wae jembirekorä,” jei chewe.

Apocalipsis 5:6

Jayawe aecha pëti Owecha kuimbae taurusu wae. Jare jete re uyekuaa ipere jendakue. Chemaerä jae chawaa jokua uyuka reta wae. Jae uyemboɨ oï jokua mburuwicha iwapɨa jare jokua irundɨ mbae tekowe onoi wae reta ipäu pe, jokua mburuwicha reta ipɨte pe. Jae onoi chiu jäti jare chiu jesa. Jare jokua chiu jesa uyembɨjaanga oï Tumpa iEspíritu chiu wese ye jupi wae Tumpa omondo opaete ɨwɨ rupi wae.

Apocalipsis 5:8

Jare tupapire onoi ma ipo pe yawe, jokua irundɨ mbae tekowe onoi wae reta jare jokua veinticuatro mburuwicha reta opa uñeñono ɨwɨ re Owecha kuimbae taurusu wae jowai uñemɨmichi rewe. Pëti pëti onoi reta arpa jare copa oro pewa, jare tɨnee onoi reta pɨpe mbae utimbo kawi wae. Jokua mbae utimbo kawi wae uyembɨjaanga oï Tumpa re wɨrowia wae reta uyerure chupe wae re.

Apocalipsis 6:1

Jayawe che aecha jokua Owecha kuimbae taurusu wae uipea tupapire imboyaka pëti wae. Jayawe ayandu pëti mbae tekowe onoi wae jei: “¡Eyu!” Jare jae uyemɨngeta yawe, iñee uyendu ara jɨapu wae echa.

Apocalipsis 6:16

Jare jei tëi reta: “Tuyapara yanderé ɨwɨtu wasu reta jare itape reta awɨye waerä yanderecha pea wapɨa pe uwapɨ oï wae, jare awɨye waerä Owecha kuimbae taurusu wae iarasɨ oa yanderé.

Apocalipsis 7:14

“Aikuaa’ä etei. Nde ndikuaa,” jae chupe. Jayawe jae jei chewe: “Kua reta ko jae uasa mbaesusere wasu rupi wae. Oyoe ma reta jemimonde jare umɨtïi reta Owecha kuimbae taurusu wae juwɨ pe,” jei.

Apocalipsis 7:17

Echa’ä Owecha kuimbae taurusu wae wapɨa mburuwicha wasu pewa pe oï wae uyandarekota oï jese reta. Jare jae wɨraata oï reta ɨkua ɨwororo jekuaeño oë wae pe, joko pe jou reta waerä ɨ tekowe umee wae. Jare Tumpa etei oyoeta jesaɨ chuwi reta.” Jukuärái jokua mburuwicha jei chewe.