Génesis 6:17 - Biblia

¹⁷ Tumpa jei wi chupe: “¡Mase! Che ambouta aï ɨporu wasu opaete ɨwɨ re ambái waerä opaetei ɨwɨ pewa reta tekowe onoi wae,” jei. “Jukuärái opaete wae umanota,” jei.

Génesis 6:17 Iomraidhean Croise

Génesis 2:7

Jayawe Tumpa uyapo kuimbae ɨwɨkuí wi, jare umee chupe ipütuerä. Jukuärái kuimbae umbɨpɨ tekowe onoi.

Génesis 6:13

Jayawe Tumpa jei Noé pe: “¡Mase! Ambaita aï opaete ɨwɨ pewa reta,” jei. “Echa’ä ɨwɨ tɨnee oï ikawi mbae wae peño jae reta jeko pewa. Jáeramo ambaita aï opaetei jae reta jare opaete mbaembae ɨwɨ pe ñonoï wae wi,” jei chupe.

Génesis 6:16

Embɨyasoi kawi chalana wasu, jare emɨmbɨre opaete chalana wasu iyɨke rupi medio metro ɨwambɨ iáramo rupi tembipe jare ɨwɨtu pewarä. Iyapo pëtiño öke chalana wasu iyɨke pe. Jare iyapo japɨpe mbapɨ piso reta: pëti ɨwɨ kotɨ, ïruwe mbɨte pe, jare ïruwe ɨwate kotɨ,” jei Tumpa Noé pe.

Génesis 6:7

Jare Tumpa jei iyupe: “Ambaita ɨwɨ wi opaete ɨwɨ pewa reta ayapo wae. Ambaita opaete kuimbae jare kuña reta, mbaemɨmba reta, wɨra reta, jare ɨwɨ rupi uyewichɨ wae reta. Echa’ä chepɨatɨtɨ aï jae reta ayapo ramo,” jei iyupe.

Génesis 7:15

Mokui mokui rupi opaete ipütúe wae reta wi yuweru chalana wasu kotɨ Noé oï wae pe.

Génesis 7:17

Joko wi ama okɨ tuichaete ɨwɨ re cuarenta ara. Jare ɨ umbɨpɨ ukuakuaa tuicha jare uyeupi chalana wasu ɨ ndiwe ɨwate kotɨ ɨwɨ wi.

Génesis 7:4

Echa’ä kua wi chiu ara pe amongɨta ɨwɨ re cuarenta ara jare cuarenta pɨ̈tu rupi. Jare che ambaita ɨwɨ wi opaete ipütúe wae reta ayapo wae,” jei Tumpa Noé pe.

Génesis 9:9

“Mase, ayapo aï pëti yemɨngeta ikawi wae nde ndiwe jare niñemoñaa reta ndiwe,” jei.

Éxodo 14:17

“Mase, che amɨtätata sɨndaro reta ɨwɨ Egipto pewa ipɨa chuwi reta peraɨkuemoña reta waerä mar mbɨte rupi. Joko pe aechakata aï chembaepuere opaete ɨwɨ pewa reta pe perowaicho reta amɨamɨri wae rupi. Jae reta ko mburuwicha wasu, opaete isɨndaro reta, opaete ikarosa ñeräro pewa reta, jare opaete isɨndaro opo kawayu re wae reta wi. Amɨamɨri reta yawe, opaete ɨwɨ Egipto pewa reta uikuaata che ko jae opaete wae iYa,” jei Tumpa Moisés pe.

San Mateo 24:39

“Jare ɨporu wasu ou uwäe yawe, opaetei uyepokouka reta, jare ɨ opa wɨraa reta. Jare jukuärái wi ɨwɨ pewa reta uyepokoukata ñonoï kuri che kuimbaerä ayeyapo wae ayu ye yawe,” jei chupe reta.

San Lucas 17:27

“Echa’ä arakaete rupi, ndei ɨporu wasu ou mbowe, ɨwɨ pewa reta ipɨawiwe yureko jekoño mái rupi. Echa’ä jae reta ukaruñoi jare ukauñoi yureko. Jare jekuaeño umenda reta jare umɨmendaka reta wi. Jukuärái uyapo yureko reta jokua ara Noé jare jëtara reta ndiwe opa uike rewa chalana wasu pe. Jayawe ou ɨporu wasu jare opa umɨkañɨ reta opaetei,” jei chupe reta.

Romanos 5:21

Jáeramo kërái yaikose teko yareko wae ipo pe jare jokua yanembɨsɨrɨ iko Tumpa wi, jukuärái wi añawe Tumpa ipɨakawi wae ipo pe ko ñaï jare ime ma ñanoi tekowe opa mbae wae. Echa’ä ime yawe kía wɨrowia yandeYa Jesucristo re wae, Tumpa umae jese jeko mbae wae rami.

Romanos 6:23

Echa’ä mbaembae yayawɨ Tumpa kotɨ wae jepɨ ko mano – jae ko yembɨsɨrɨ Tumpa wi jaeño mái pewa Tatawasurenda pe. Erëi Tumpa umee yandewe tekowe opa mbae wae jepɨ mbae awe. Jare kua re ko yande yayekou ñaï, echa’ä pëti ramiño ko ñaï yandeYa Jesucristo re ramo. Jukuärái ko. Jáeramo mbaetɨ ikawi jekuaeño yayawɨ waerä Tumpa jei wae.

Hebreos 11:7

Jae nunga wi yanemandúa Noé re. Tumpa uikuaaka chupe ombouta iko ɨporu wasu. Jare Noé wɨrowia. Jáeramo uipɨu rewe uyapo chalana wasu, jukuärái jae jare jëtara reta ipuere waerä oyepe ɨporu wasu wi. Jáeramo Noé wɨrowia Tumpa jei wae re ramo, Tumpa umae jese jeko mbae wae rami. Jare Noé kua uyapo wae rupi uyekuaa jupiete ko opa umano waerä opaete ïru ɨwɨ pewa reta ɨporu wasu pe, echa’ä jae reta wɨrowia’ä Tumpa re.

1 Pedro 3:20

Arakaete rupi, Noé chalana wasu uyapo iko rambuewe, kua reta uyapo’ä Tumpa jei wae rupi yepe tëi Tumpa ipɨawasuete chupe reta. Jare ou yawe jokua ɨporu wasu, mbowɨ miño kuimbae jare kuña reta oyepe reta chalana wasu pe. Añetete Tumpa jaeño jokua juri wae reta uepɨ ɨporu wasu wi.

2 Pedro 2:5

Jare yanemandúa kawi ñaï wi, arakaete Tumpa uiporaraka opaete ɨwɨ pewa reta pe ɨporu wasu pe. Jaeño uepɨ chuwi Noé jare ïru chiu wae. Noé umɨmbeu tëi ïru wae reta pe kërái yureko reta waerä jupi Tumpa kotɨ. Erëitu jae reta uipɨu’ä Tumpa wi; jáeramo Tumpa opa umbái reta.