Génesis 41:8 - Biblia

⁸ Joko wi pɨarewe ndimbowe yawe, mburuwicha wasu ipɨatɨtɨete upɨta ipau reta jeko pewa. Jáeramo omondo uenika opaete upurumbusuerte wae reta jare opaete iyarakuaa katu wae reta ɨwɨ Egipto pewa. Jayawe mburuwicha wasu imiäri chupe reta ipau reta rewa. Erëi pëti awe jae reta ipuere’ä uikuaaka chupe mbae ra ipau reta uipota jei wae.

Génesis 41:8 Iomraidhean Croise

Génesis 40:6

Pɨarewe ndimbowe José uecha ipɨatɨtɨ ñonoï wae.

Génesis 40:8

Jayawe jae reta jei chupe: “Ore ndupau pɨare, jare nduipota tëi nduikuaa orepau rewa. Erëi kua pe mbaetɨ kiawe uikuaaka waerä orewe,” jei reta chupe. Jayawe José jei chupe reta: “Pemiäri chewe pepau wae, echa’ä Tumpaño ko uikuaaka yandewe yandepau uipota jei wae. Jare Tumpa uikuaakata chewe pepau rewa,” jei chupe reta.

Génesis 41:15

Jayawe mburuwicha wasu jei José pe: “Che apau, erëi mbaetɨ kiawe ipuere uikuaaka chewe chepau rewa,” jei. “Erëi uikuaaka reta chewe nde rewa, kërái nde ndikuaa yawe kía ipau rewa, nde ndaye ndikuaa ndikuaaka waerä chupe mbae uipota jei ipau wae,” jei José pe.

Génesis 41:24

“Jare jawoi pewa jokua chiu jäka pöiraɨ jare ipiru wae reta opa jou jokua ïru jäka yawɨye kawi wae reta. Jukuärái ko chepau reta,” jei chupe. “Chemiäri tëi opaete chepau reta rewa upurumbusuerte wae reta pe. Erëi pëti awe jae reta ipuere’ä uikuaaka chewe mbae ra uipota jei wae,” jei imiäri José pe.

Génesis 41:7

Jare jawoi pewa jokua chiu jäka pöiraɨ jare ipiru wae reta opa jou jokua ïru chiu jäka yawɨye kawi wae reta. Jayawe mburuwicha wasu usareko jare uikuaa upau yepe.

Éxodo 7:11

Erëi mburuwicha wasu uenika ichoropa wae reta jare ipaye wae reta. Jae reta uyapo wi ichoropa rupi Moisés jare Aarón uyapo rami.

Éxodo 7:22

Erëi ichoropa mburuwicha wasu pe uyeyokui wae reta jukuärái uyapo wi ichoropa rupi. Jayawe mburuwicha wasu imeño ipɨatäta jare uyapɨsaka’ä Moisés jare Aarón re kërái Tumpa jei rami.

Éxodo 8:7

Erëi ichoropa wae reta uyapo wi ou waerä ɨwɨ Egipto pe pïte reta.

Éxodo 9:11

Jare ichoropa wae reta ipuere’ä ma yuweru uyemboɨ Moisés jowai, echa’ä opaete ma iyatiitii ñonoï reta ramo, opaete ïru ɨwɨ Egipto pewa reta rami.

Isaías 8:19

Aramoi kía jeita pewe: “Jokua kía jei ipuere uyemɨngeta umanokue wae reta iä ndiwe wae, pekua pepɨrandu chupe pembɨarakuaa waerä,” jeita pewe. Jare aramoi kía jeita pewe: “Pekua pepɨrandu upurumbusuerte wae reta pe pembɨarakuaa waerä.” Jukuäraita jei pewe aramoi. Erëi awɨye piyapɨsaka jese reta. Echa’ä umanokue wae reta ipuere’ä uikuaaka yandewe mbae yanderekowe ñanoi wae reta pe. Jekuaeño ikawi ko yaeka waerä Tumpa pe.

Levítico 19:31

Awɨye peka upurumbusuerte wae reta mbaembae uikuaaka pewe waerä. Jare awɨye peka wi kía jei ipuere uyemɨngeta umano wae reta iäkue ndiwe wae. Che ko jae peTumpa aikoño mái wae, jare piyapo jukuärái yawe, amaeta peré pepɨa ikɨa ma oï cherowai.’ Jukuärái ere chupe reta,” jei Tumpa Moisés pe.

Levítico 20:6

Tumpa jei Moisés pe kuärái: “Ipotawe kía ueka yawe upurumbusuerte wae reta jare kía jei ipuere uyemɨngeta umano wae reta iäkue ndiwe wae, chembae’ä ma ko. Jayawe che etei ayowaichota ikotɨ reta, echa’ä jae reta chereya ma kërái amokue kuña umenda wae ueya ime iko waerä ambɨe kuimbae ndiwe,” jei Tumpa Moisés pe.

San Mateo 2:1

Jesús oa ɨwɨ Judea pe tëta wasu raɨ Belén pe. Jare Jesús oa yawe, Herodes iko mburuwicha wasurä opaete ɨwɨ Israel re. Jayawe jokua ara rupi yuweru uwäe kuimbae reta yasɨtata re uyemboe wae reta warasɨ oë wae kotɨ wi tëta wasu Jerusalén pe.

Hechos 17:18

Pëti ara amokue oporomboe wae reta umbɨpɨ uyeaka Pablo ndiwe. Jae reta ipɨte wi ime iko epikúreo jeko omomoe wae reta, jare ime iko wi estoiko jeko omomoe wae reta. Jare Pablo umɨmbeu chupe reta Cristo rewa, kërái jae ikowe ye ou umanokue wae reta ipɨte wi wae rewa. Jayawe amokue jokua oporomboe wae reta jei iyupe: “¿Mbae ra jei oï kua iyemɨngetase wae?” jei reta. Jare ïru wae reta jei iyupe: “Jae oporomboe chawaa oï ambɨe tumpa reta rewa,” jei reta.

Hechos 7:22

Jayawe Moisés uyemboe opaete arakuaa ɨwɨ Egipto pewa re, jare mbaepuere rewe uyemɨngeta jare ikatuete mbaembae uyapo,” jei Esteban chupe reta.

1 Corintios 1:19

Arakuaa kua ɨwɨ pewa ndarau ipuere yanemborɨ. Jukuärái ko jei yandewe Tumpa iñeerɨru pe, echa’ä joko pe uyekuatía oï kuärái: “Tumpa jei: ‘Che aikuaakata aï jokua iyarakuaa katu echa iyupe wae reta pe iyarakuaa añetete mbae’ä ko. Jae ramiño wi aikuaakata aï opaete mbaembae uikuaa kawi echa iyupe wae reta pe añetete uikuaa’ä etei ko mbae awe,’ jei.” Jukuärái uyekuatía oï.