Gálatas 2:7 - Biblia

⁷ Jare jae nunga wi jae reta uikuaa ko Tumpa chokui che amɨmbeu waerä ñee ikawi wae judío mbae wae reta pe kërái Tumpa oyokui Pedro umɨmbeu waerä judío reta pe rami.

Guaraní Pe (Western): Simba

⁷ Ẽrei jae reta uicuaa ma Tumpa umee co cheve amɨmbeu vaerã ñee icavi vae judío mbae vae reta pegua, Pedro pe umɨmbeu vaerã ñee icavi vae judío reta pegua umee rami.

Gálatas 2:7 Iomraidhean Croise

Hechos 15:12

Joko wi Bernabé jare Pablo umɨmbeu chupe reta kërái jae reta rupi Tumpa uyapo jeta mbaembae kiawe ipuere’ä uyapo wae judío mbae wae reta ipɨte rupi. Jare opaete uyembatɨ yureko wae reta kïiño uyapɨsaka jese reta.

Hechos 18:6

Erëi jokua judío reta jekuaeño oyowaicho Pablo ndiwe, jare umbɨpɨ jei reta ikawi mbae wae chupe. Jáeramo Pablo umɨtɨmo jemimonde ɨwɨkuí usururu waerä chuwi, jare jei chupe reta: “Tumpa uiporaraka pewe yawe, pe reta ko teko penoi. Che mbaetɨ anoi teko. Añawe wiwe ata amɨmbeu judío mbae wae reta pe Cristo rewa,” jei chupe reta.

Hechos 28:28

Jare Pablo jei wi jokua judío reta pe: “Pikuaa kawi kua: Tumpa umbɨpɨ ma uikuaaka judío mbae wae reta pe kërái rupi ipuere onoi reta waerä tekowe opa mbae wae Tumpa ndiwe. Jare jae reta uyapɨsakata jese,” jei Pablo chupe reta.

Hechos 9:15

Jayawe yandeYa jei chupe: “Ekuaño eowäiti Saulo,” jei. “Echa’ä che aiparawo ma uyeyokui waerä chewe. Amondota aï Saulo chekuaaka waerä judío mbae wae reta pe, jare imburuwicha reta pe, jare Israel iñemoñaa reta pe wi.

Romanos 1:5

Kua Jesucristo uyekuaaka chewe ipɨakawi rupi. Jare jukuärái Tumpa chemondo opaete ɨwɨ rupi amɨmbeu waerä opaete judío mbae wae reta pe, jae reta wi wɨrowia waerä yandeYa Jesucristo re jare jukuärái uyapo reta waerä Jesús jei wae. Jare kua mbarawɨkɨ ayapo aï Jesucristo jee uyembutuichaka waerä.

Romanos 11:13

Erëi añawe aipota ayemɨngeta pewe pe judío mbae piko wae reta pe. Tumpa chokui amɨmbeu waerä pewe ñee ikawi wae Cristo rewa, jare jokua re cheratangätu aï.

1 Corintios 9:17

Añetete moná ayapo yawe che jae wae rupiño amɨmbeu waerä pewe ñee ikawi wae, jayawe jaekawita tëi ko pembɨepɨ waerä chewe. Erëi jukuärai’ä ko, echa’ä Tumpa ko jei chewe amɨmbeu waerä ñee ikawi wae. Jokuaño ko che ayapo aï.

Gálatas 1:16

Taɨ uikuaaka chewe waerä. Jukuärái uyapo chewe che a amɨmbeu waerä Taɨ rewa judío mbae wae reta pe kerupi rupi ñonoï wae rupi. Erëi Tumpa Taɨ uyekuaa chewe yawe, che aeka’ä kiawe chembɨarakuaa waerä jese.

Gálatas 1:18

Jokua jaɨkue rupi, mbapɨ año ma uasa yawe ramo che a Jerusalén pe aikuaa waerä Pedro. Erëi jaeño apɨta jae ndiwe quince ara rupi.

Gálatas 1:6

Tumpa pereni jare Cristo rupi uechaka pewe ipɨakawi. Jare che chepɨakañɨete aï kërái pe reta ɨmambae rupiño piyerowa ma Cristo wi perowia waerä ambɨe ñee ikawi echa wae re.

Gálatas 2:11

Erëi kua jaɨkue rupi Pedro ou tëta wasu Antioquía pe. Jare joko pe oï rambuewe, che imeta ko ambɨeta chupe jae mbaetɨ jupi uyapo iko ramo.

Gálatas 2:14

Jayawe aecha yawe jae reta yureko’ä añetete wae rupi ñee ikawi wae yanemboe wae rupi, che jae Pedro pe etei opaete wae jowake: “Nde ko jae judío, erëi kua pe ndeya ma judío reta jeko ndiko waerä judío mbae wae reta rami. Jokua jaekawi ko. Erëi ¿këraita ra añawe ndesɨrɨ neï chuwi reta? ¿Ndipota ra jae reta wɨrowia waerä ikɨa ra ñonoï Tumpa kotɨ jare imeta ko uyeyapo judío retarä?” jae chupe.

Gálatas 2:9

Jare joko pe yureko wi Pedro, Jacobo, jare Juan. Jese reta ïru wae reta umae Cristo re wɨrowia wae reta itenondewaete reta ko. Jare jae reta uikuaa ma yawe Tumpa ko umee chewe ipɨakawi rupi kua mbarawɨkɨ, chepopɨsɨ reta opaete wae jowake. Jare uipopɨsɨ reta wi Bernabé. Jukuärái jae reta uikuaaka opaete wae pe oyowake ñonoï ore ndiwe jare jaekawi chupe reta jokua ñee ore numɨmbeu wae. Jare ikawi iko chupe reta ore jekuaeño numɨmbeu waerä judío mbae wae reta pe jare jae reta umɨmbeu waerä judío reta pe.

1 Tesalonicenses 2:4

Ore numɨmbeu pewe ñee ikawi wae, echa’ä nduipota numbɨyerowia Tumpa ramo. Tumpa ko jekuaeño umae oï opaete orepɨa re jare kërái nduyeyokui chupe wae re. Jare oreparawɨkɨ ikawi iko chupe ramo, jae wɨrowia katu ma oreré numɨmbeu waerä ñee ikawi wae. Jáeramo Tumpa ko nduipota numbɨyerowia. Mbaetɨ ko kuimbae reta.

1 Timoteo 1:11

Kua yemboe añetete wae ou Tumpa wi. Jae ko ñee ikawi wae jae umee chewe amɨmbeu waerä ïru wae reta pe. ¡Tuyembutuichaka Tumpa jee!

1 Timoteo 2:7

Jare Tumpa cheparawo jare chemondo jae jee re opaete kerupi amɨmbeu waerä iñee. Jare kua che jae aï wae añetete ko. Chapu’ä etei ko aï. Echa’ä Tumpa etei cheparawo amboe waerä judío mbae wae reta pe añetete wae rewa.

2 Timoteo 1:11

Jayawe Tumpa cheparawo, jare chemondo jae jee re etei amɨmbeu waerä jeta wae reta pe jokua ñee jare aporomboe waerä jese.

2 Pedro 3:15

Jare che aipota pikuaa waerä kua: YandeYa ipɨawasu rewe uäro oï jeta wae reta ipuere waerä onoi tekowe opa mbae wae. Jare kua jae nunga wi uikuatía pewe yandehermano mii Pablo jokua arakuaa Tumpa umee chupe wae rupi.