Éxodo 6:7 - Biblia

⁷ Che puyapota pe reta chemaerä, jare che aikota peTumparä. Pe reta pikuaata che ko jae peTumpa aikoño mái wae jare puepɨta peparawɨkɨ jasɨ katu ɨwɨ Egipto pe wae wi.

Éxodo 6:7 Iomraidhean Croise

Génesis 28:13

Jare Jacob uecha wi Tumpa yupika iáramo oï wae. Jare Tumpa jei Jacob pe: “Che ko jae Tumpa aikoño mái wae, nderamɨkue Abraham iTumpa jare nderu Isaac iTumpa,” jei. “Opaete kua ɨwɨ Canaán, ndiyapakua neï jese wae etei, ameeta aï ndewe jare niñemoñaa reta pe,” jei.

Éxodo 13:14

Jare jei wi chupe reta: “Aramoi rupi pesambiaɨ reta upɨranduta pewe, “¿Marái ramo pa yayapo ñaï kua?’ Jayawe pere chupe reta: ‘Kua yayapo ñaï wae umbɨjaanga oï Tumpa ñanerenoe ɨwɨ Egipto wi wae re imbaepuere tuichaete wae rupi. Echa’ä ɨwɨ Egipto pe yaikuasɨete yaiko.

Éxodo 13:3

Jayawe Moisés jei opaete Israel iñemoñaa reta pe: “Jekuaeño pemandúa kawi kua ara re,” jei. “Echa’ä kua ara Tumpa perenoe jae imbaepuerete rupi ɨwɨ Egipto wi. Joko pe täta piyeyokuise ɨwɨ Egipto pewa reta pe. Kua ara awɨye peu mbɨyape levadura rewe wae.

Éxodo 14:4

“Jare che amɨtäta yeta mburuwicha wasu ipɨa chuwi,” jei. “Jayawe jae peraɨkuemoñakata oï pepɨsɨka waerä tëi. Erëi che amɨamɨrita aï mburuwicha wasu jare opaete isɨndaro reta, jare jukuärái aikuaakata aï opaete ɨwɨ pewa reta pe chembaepuere. Taɨkue rupi opaete ɨwɨ Egipto pewa reta uikuaata che ko jae opaetei wae iYa,” jei Tumpa Moisés pe. Jayawe Israel iñemoñaa reta uyapo kërái Tumpa jei wae rupi.

Éxodo 15:16

Kɨye opata uyapɨraa reta. Nembaepuere rupi tupɨta reta kïi ngatu ita rami ore opa nduasa rewa. Jukuärái tuyeyapo, oreTumpa, echa’ä ore ko jae nde ndiparawo wae reta.

Éxodo 15:2

Tumpa jae chemɨmɨräta wae ko; jáeramo che akätata chupe. Jae ko cheTumpa cherepɨ wae. Jae jeeño tambutuicha. Jae ko cherukue iTumpa wi. Tambutuicha jae jee.

Éxodo 16:12

“Ayandu ma Israel iñemoñaa reta iyengeta chekotɨ wae,” jei. “Emɨmbeu chupe reta kuärái: ‘Kaaru yawe, pe reta peuta soo. Jare ndimbowe yawe, peuta jeta mbɨyape pepunga rewa. Jukuärái pikuaa kawita che ko jae peTumpa aikoño mái wae.’ Jukuärái emɨmbeu chupe reta,” jei Tumpa Moisés pe.

Éxodo 16:6

Jayawe Moisés jare Aarón umbatɨ opaete Israel iñemoñaa reta uikuaaka waerä chupe reta Tumpa jei wae. Jare omoë iñee chupe reta kuärái: “Kua kaaru pechata Tumpa imbaepuere, jare pikuaata Tumpa ko jae pereru ɨwɨ Egipto wi wae,” jei reta.

Éxodo 2:11

Jeta año ma uasa yawe, Moisés ukuakuaa ma. Jare pëti ara Moisés oë oo opou waerä jëtáɨwa hebreo reta ipɨ. Joko pe uecha kërái kuimbae ɨwɨ Egipto pewa reta umɨmbarawɨkɨ täta hebreo reta. Aramoiño uecha pëti kuimbae Egipto pewa uinupa täta oï pëti kuimbae hebreo.

Éxodo 6:6

“Jayawe ekua nde jare ere Israel iñemoñaa reta pe che jae aï chupe reta kuärái: ‘Che ko jae Tumpa aikoño mái wae, jare che puepɨta ɨwɨ Egipto pewa reta wi. Chembaepuerete rupi pupɨ̈rota aï chuwi reta, jare mbaembae kɨye pewa pɨpe aiporarakata aï chupe reta.

Éxodo 7:17

Jáeramo añawe Tumpa jei oï ndewe kuärái: ‘Kua rupi nde ndikuaata che ko Tumpa añetete wae. Mase, ambokuakata aï kua ɨ wasu re kua popoka pɨpe, jare ɨ uyeyapota tuwɨ.

Jeremías 31:33

Erëitu taɨkuete rupi ayapota aï pëti yemɨngeta ipɨau wae Israel iñemoñaa reta ndiwe. Jae ko kua: Che añonota aï chiñee jae reta ipɨa pe, jare jukuärái jae reta opata uikuaa kawi. Che aikota jae reta iTumparä jare jae reta yurekota chemaerä.

Oseas 1:10

Tumpa jei: “Israel iñemoñaa reta ikota ɨwɨkuïti ɨ wasu jembeɨ rupi oï wae rami, echa’ä jetaeteta ko jare ndarau kiawe ipuereta uipapa reta. Tenonde yawe che jae chupe reta: ‘Pe reta chembae’ä ko,’ jaese chupe reta. Erëi opaete kerupi rupi jukuärái che jae wae rupi, pëti ara jaeta chupe reta: ‘Che ko jae peTumpa aikoño mái wae. Jare pe reta ko jae cheraɨ reta.’ Jukuärái jaeta chupe reta,” jei Tumpa.

San Mateo 22:32

Echa’ä jei kuärái: ‘Che ko jae nderamɨkue reta Abraham, Isaac, jare Jacob iTumpa.’ Jukuärái Tumpa jei yepe tëi yanderamɨkue reta arakaete ye ma opa umano,” jei. “Añetete umanokue wae reta mbaetɨ yawe onoi tekowe, jayawe Tumpa ndarau jei tëi jae ko jae reta iTumpa wae, echa’ä jae ko ime tekowe onoi wae reta iTumpa,” jei. “Jayawe kua uikuaaka yandewe yanderamɨkue reta imeño yepe tekowe onoi,” jei Jesús saduceo reta pe.

Romanos 8:31

Jayawe opaete kua mbaembae rupi yaikuaa ko Tumpa oï yandepepɨka pe yanemborɨ waerä. ¿Kía ra ipuereta ñanemɨamɨri jayawe? ¡Ndarau ipuere kiawe!

Hebreos 11:16

Erëi jukuärai’ä uyapo reta. Jae reta ikɨrëɨete yureko pëti ɨwɨ ikawiete ye wae pe – jae ko ɨwɨ ara pe oï wae pe. Jáeramo Tumpa uyerowiaete jae reta iTumparä iko ramo. Jukuärái yaikuaa, echa’ä Tumpa uyapɨkatu pëti tëta wasu jae reta imaerä ara pe.

1 Pedro 2:10

Tenonde yawe pe reta Tumpa pewa’ä piko. Erëi añawe Tumpa pewa ma ko peï. Tenonde yawe Tumpa iarasɨ uitɨta tëi iko peré. Erëi añawe jae peparareko ma.

Apocalipsis 21:3

Jare ayandu pëti ñee ara wi usapɨkai rewe jei: “Mase, añawe wiwe Tumpa jëta oï ɨwɨ pewa reta ipɨte pe. Tumpa ikota jae reta ndiwe jare jae reta yurekota Tumpa imaerä. Jare Tumpa etei ikota jae reta iTumparä,” jei.

Apocalipsis 21:7

“Jare ikawi mbae wae umɨamɨri wae reta pe ameeta opaete kua mbaembae ipɨau wae reta. Che etei aikota jae reta iTumparä jare jae reta yurekota cheraɨ retarä,” jei.