Efesios 6:8 - Biblia

⁸ Jare timandúa reta kua re: Yayapo yawe mbaembae ikawi wae, yandeYa umɨñatimata oï yandewe ikawi wae jokua re. Jukuäraita ko kía pe uyeyokui wae jare uyeyokui mbae wae wi.

Guaraní Pe (Western): Simba

⁸ Tuicuaa cua: Ipotave vae - penti uyeyocui vae ani penti uyeyocui mbae vae - mbae icavi vae uyapo yave, yandeYa uyapota vi chupe mbae icavi vae.

Efesios 6:8 Iomraidhean Croise

San Mateo 16:27

“Che jae pewe kua mbaembae, echa’ä pëti ara che kuimbaerä ayeyapo wae ayu yeta aï cheRu imbaepuere jembipete rewe jare chearaɨwa reta ndiwe. Jare jayawe amɨñatimata aï pëti pëti wae pe mbae uyapo wae rupi,” jei.

San Mateo 20:7

‘Mbaetɨ kía umee orewe mbarawɨkɨ ramo,’ jei reta. “Jayawe uvarupa iya jei chupe reta: ‘Pe reta wi pekua peparawɨkɨ cheuvarupa pe. Jare ambɨepɨta pewe jupi wae,’ jei chupe reta. Jayawe jae reta wi yuraa uparawɨkɨ kuimbae iuvarupa pe,” jei Jesús.

San Mateo 5:12

Echa’ä Tumpa umɨñatimata oï pewe ara pe opaete mbaembae piporara wae rupi. Jáeramo piyerowiaete jare pepɨakatu jukuärái piporara yawe. Añetete jukuärái Tumpa iñee arakae umɨmbeu wae reta uiporara wi ïru wae reta ipo pe,” jei chupe reta.

San Mateo 6:1

Jesús jekuaeño omboe reta kuärái: “Jayawe pe reta piyapo yawe ikawi wae pembɨyerowia waerä Tumpa, awɨye piyapo opaete wae jowake umae waerä peré. Echa’ä jukuärái piyapo yawe, peRu ara pe oï wae ndarau ma umee pewe mbae ikawi wae jokua piyapo wae re,” jei.

San Mateo 6:4

Iyapo kía uikuaa mbae rewe. Jare jukuärái ndeRuño uikuaata jokua ndiyapo wae re, jare jae umeeta oï ndewe mbae ikawi wae jokua re,” jei Jesús chupe reta.

San Lucas 6:35

“Erëi pe reta imeta ko peau perowaicho reta, jare piyapo ikawi wae chupe reta. Piporuka wi pembaembae chupe reta peäro mbae rewe umɨñatima waerä pewe jokua re,” jei. “Jukuärái piyapo yawe, Tumpa tuicha umɨñatimata oï pewe kuri, jare uyekuaata pe reta ko jae Tumpa imbaepuere tuichaete wae taɨ reta añetete wae,” jei. “Echa’ä Tumpa ipɨakawi oï opaete pewarä, yepe tëi jeta wae reta umee’ä etei yasurupái chupe jare jeko kachi wi.

1 Corintios 12:13

Echa’ä yepe tëi opaete yande reta ambɨe ye ye ko yandeyuwi, erëi Espíritu Santo yandapo ma pëti ramiño Cristo re. Yande ko jae Cristo jete pewa rami ipotawe kía ko yande wae. Ipuere ko yande judío ani judío mbae wae, jare uyeyokui wae ani uyeyokui mbae wae. Erëi opaete yande reta pëti ramiño ko ñaï Cristo re, jare yandepuere yayekou oyowake Espíritu Santo re yandepɨa pe oï wae rupi.

2 Corintios 5:10

Echa’ä pëti ara Cristo uwapɨta iwapɨa mburuwicha wasu pewa re, jare opaete wae yayemboɨta ñaï jae jowai. Jare jokua ara jae umɨñatimata oï yandewe pëti pëti pe kua ɨwɨ pe yaiko rambuewe yayapo wae re. Jae umɨñatimata yandewe ikawi wae yayapo wae re jare ikawi mbae wae yayapo wae re.

Gálatas 3:28

Añetete, ore judiorä nduiko wae reta jare pe judío mbae piko wae reta oyowakeño ko ñaï pëti ramiño Cristo re. Jare jae nunga wi täta rupi yayeyokui wae reta jare yayeyokui mbae wae reta oyowakeño ko wi. Jare yande kuimbaerä yaiko wae reta jare kuña reta oyowakeño ko wi. Echa’ä opaete yande reta ñaï pëti ramiño Jesucristo re ramo.

Colosenses 3:11

Jare kua tekowe ipɨau wae rupi pëti wae rami yayowake ma ñaï. Jayawe yanemaerä mbaetɨ ma judío reta jare judío mbae wae reta, uyembɨcircuncidaka wae reta jare uyembɨcircuncidaka mbae wae reta, ñana rupiwa reta jare ambɨe ɨwɨ pewa reta, uyeyokui wae reta jare uyeyokui mbae wae reta. YandeYa Cristo jeeño ko yambutuicha. Jare opaete yande pëti pëti wae reta, jae oyowakeño oï yandepɨa pe.

Colosenses 3:24

Echa’ä jukuärái uyapo reta yawe, yandeYa Cristo pe etei uyeyokui ñonoï. Jekuaeño timandúa reta yandeYa umɨñatimata oï chupe reta ikawi wae opaete kía kía jae imaerä ñonoï wae reta ndiwe.

Colosenses 3:25

Erëi ime yawe uyeyokui wae jekuaeño mbae ikawi mbae uyapo wae, Tumpa umɨñatimata oï ikotɨ jupi rupi jokua mbae ikawi mbae uyapo wae re. Jare mbaeta’ä Tumpa pe kía ko jae wae, echa’ä Tumpa opaete wae re oyowake umae.

Hebreos 10:35

Jáeramo jekuaeño piyeko kawi Tumpa re, echa’ä jokua re jae jeta umɨñatimata oï pewe kuri.

Hebreos 11:26

Echa’ä Moisés wɨrowia Upuruepɨ wae outa iko wae re. Jare chupe waerä ikawiete ko uiporara waerä jokua jae wɨrowia wae re opaete mbaembae ikawi wae ɨwɨ Egipto pe ime tëi oï wae wi. Echa’ä jae wɨrowia Tumpa jetaete ye umɨñatimata iko chupe jokua re.