Efesios 2:5 - Biblia

⁵ Jáeramo yepe tëi ñamano wae echa yaiko Tumpa wi yayawɨ ikotɨ jeko pewa, jesewe Tumpa umee yandewe tekowe ipɨau wae. ¿Kërái ra ko jokua? Yaikuaa ñaï yandeRu Tumpa umbɨjekowe ye Cristo ueru umanokue wae reta ipɨte wi. Jukuärái rami Tumpa yanembɨjekowe ye ma jae yandapo pëti ramiño Cristo re yawe. Jayawe Tumpa ipɨakawi tuicha ramo, yanderepɨ ma teko ikotɨ ñanoi wae wi.

Guaraní Pe (Western): Simba

⁵ Jáeramo umee yandeve tecove opa mbae vae yaico vaerã Cristo ndive, yepe tẽi tenonde yave ñanoi'ã tecove opa mbae vae yanembaeyoa reta jeco pegua. Tumpa yanembɨasa ipɨacavi jeco pegua.

Efesios 2:5 Iomraidhean Croise

San Lucas 15:24

Echa’ä kua cheraɨ mii umano rami iko chewi, jare añawe ikowe ye rami ma ko chewe. Jare ukañɨ iko chewi, jare añawe ou wɨte ye ma chepɨ,’ jei tu. Jayawe umbɨpɨ jorɨkatu reta,” jei Jesús chupe reta.

San Juan 5:21

“CheRu Tumpa, jae ko tekowe iYa jare jae ipuere umbɨjekowe ye umanokue wae reta. Jare jukuärái wi che jae Taɨrä aï wae chepuere amee tekowe ipotawe kía aipota wae pe,” jei chupe reta.

San Juan 6:63

“Jare jokua ara che a ye yawe, ¿këraita pa penoi tekowe opa mbae wae pe retaiño? Ndarau pepuere, echa’ä jaeño Tumpa iEspíritu umee kua nunga tekowe. Jare kua chiñee mii reta ou ko Espíritu Santo wi jare ueru tekowe opa mbae wae.

Hechos 15:11

“Mase, yande yarowia Tumpa yanderepɨ ma ko yandeYa Jesús ipɨakawi rupiño, mbaetɨ ko Moisés arakae uikuatía wae rupi. Jae nunga wi judío mbae wae reta uyerepɨka wi Jesús ipɨakawi rupiño,” jei Pedro chupe reta.

Romanos 16:20

Tumpa ko jae jekuaeño yanembɨpɨakatu wae. Jare jae ɨmambaeño peñonota pemɨamɨri waerä Satanás kërái mbae re pepɨ̈ro wae rami. YandeYa Jesucristo jekuaeño tipɨakawi pewe.

Romanos 3:24

Añetete jokua teko yareko wae ñaneapɨ̈ti iko rami jare yanembɨtɨrɨrɨ iko rami Tatawasurenda kotɨ. Erëi Tumpa ipɨakawi rupi umae yanderé yandereko mbae wae rami yambɨepɨ mbae chupe rewe. Echa’ä Jesucristo opa ma umbɨepɨ mbaembae yayawɨ Tumpa kotɨ wae jare jukuärái yandeyora chuwi.

Romanos 4:16

Erëi Tumpa ipɨakawiete ye jeko pewa, jae uipota opaete wae yayekou waerä – jae ko judiorä yaiko wae reta jare judío mbae yaiko wae reta wi. Jáeramo jae jei yandewe jaeño yarowia waerä jese kërái Abraham wɨrowia jese rami. Jare jukuärái yayapo yawe, Abraham ko jae yanderukue rami Tumpa jowai.

Romanos 5:10

Echa’ä yepe tëi tenonde yawe yaikose Tumpa jowaichorä, erëi añawe yayeapɨkatu ma ko Tumpa ndiwe Taɨ imano rupi. Jare jukuärái yawe, ¿këraita pa Tumpa uitɨ oï iarasɨ yanderé kuri ara taɨkuewa pe? Ndarau uyapo, echa’ä Jesús jekuaeño oï yanderepɨ waerä.

Romanos 5:6

Jare ¿kërái ra ko Tumpa yanderau? Yaikuaa Tumpa yanderauete ko, echa’ä Cristo umano yanderé, yande jupi mbae yaiko wae reta re. Yande parawete reta teko pe yaiko Tumpa jowai yayawɨ jae jei wae ramo. Jare yandepuere’ä etei yayerepɨ chuwi yandeiño. Erëi ou ma uwäe yawe ara Tumpa uiparawo wae, Cristo umano yanderé.

Romanos 5:8

Erëi Tumpa uechaka ma yandewe yanderauete ko. Echa’ä yepe tëi yande yayapoñoi mbaembae kachi wae Tumpa jowai, erëi jesewe jae etei ombou Cristo umano waerä yanderé.

Romanos 8:2

Echa’ä yepe tëi yayawɨ Tumpa kotɨ, jare jokua jeko pewa imeta tëi ko ya Tatawasurenda pe, erëi añawe Tumpa yanderepɨ ma chuwi Jesucristo rupi. Echa’ä pëti ramiño ñaï Jesucristo re, jare jukuärái Tumpa umee yandewe Espíritu Santo. Jare jokua Espíritu Santo rupi ime ma ñanoi tekowe ipɨau wae. Jáeramo ndarau ma Tumpa yanembɨsɨrɨ iyuwi.

2 Corintios 13:14

YandeYa Jesucristo jekuaeño tipɨakawi pewe. Jare yandeRu Tumpa jekuaeño tuechaka pewe perau wae. Jare jae nunga wi Espíritu Santo jekuaeño tuñemɨïru kawi opaete pe reta ndiwe. Jukuärái tuiko.

Efesios 2:1

Erëi ndei Jesucristo re perowia mbowe, pemano wae echa piko mbɨrɨ tekowe iYa wi, pereko kachi rupi jare piyawɨ Tumpa kotɨ jeko pewa.

Efesios 2:8

Echa’ä Cristo re yarowia wae rupi Tumpa yanderepɨ mbaembae yayawɨ ikotɨ wae wi. Jare jukuärái uyapo yandewe yambɨepɨ mbae rewe ipɨakawi ramo. Yande yamɨngana wae rupi’ä ko Tumpa yanderepɨ.

Efesios 5:14

Jokua jeko pewa ko jei chupe reta kuärái: “Ndeke neï wae, esarekoño ma. Epüa eyu umanokue wae reta ipɨte wi. Jare Cristo umeeta oï ndewe tembipe,” jei chupe reta.

Tito 2:11

Jayawe emboe opaete wae reta kuärái: Tumpa ipɨakawiete ko, echa’ä jae umee tëi ma opaete ɨwɨ pewa reta pe kërái ipuere waerä onoi tekowe opa mbae wae jae ndiwe.

Tito 3:5

Echa’ä jae opa umbái yandewi mbaembae yayawɨ ikotɨ wae, jare jukuärái yanderepɨ teko ime yareko ikotɨ wae wi. Jukuärái jae uyapo yandeparareko ramo – mbaetɨ ko mbae jupi yayapo wae rupi. Añetete Espíritu Santo rupi Tumpa yandepɨayoe, jare jukuärái umee yandewe tekowe ipɨau wae. Jare yandereko umbɨpɨau wi.

Apocalipsis 22:21

YandeYa Jesús jekuaeño tipɨakawi pewe. Jukuärái tuiko.