Efesios 2:18 - Biblia

¹⁸ Jukuärái Cristo uyapo yandewe ramo, päwe rewe yandepuere yaya yandeRu Tumpa re Espíritu Santo rupi.

Guaraní Pe (Western): Simba

¹⁸ Echa'ã Cristo rupi mocui reve yandepuere yaya yandeRu re Espíritu Santo rupi. Echa'ã Espíritu Santo pentiño co.

Efesios 2:18 Iomraidhean Croise

San Mateo 28:19

“Jáeramo che tae pewe, pekua opaete ɨwɨ rupi. Jare pemboe opaete wae ambɨe ye ye iñee pe uyemɨngeta wae reta yureko waerä cheremimboe retarä,” jei chupe reta. “Pembɨsakambu reta ɨ pe cheRu jee re, jare cheree re, jare Espíritu Santo jee re,” jei.

San Juan 10:7

Jayawe Jesús jei wi chupe reta: “Che tae pewe añetete wae, che ko jae jokua owecharokai jöke rami. Echa’ä che rupiño ko ipuere uike kía Tumpa jëta pe,” jei.

San Juan 10:9

“Che ko jae owecharokai jöke rami,” jei. “Ime yawe kía uñepɨ̈ro cheré wae, che aepɨta ko. Jae ikota pëti owecha ipɨawiwe wae rami. Jae ipuereta oë oo ukaru uyemɨngapɨɨ kapii re rami. Jare mbae uyamondo yawe, ipuereta osi oo jokai pe uike uñepɨ̈ro waerä. Jukuärái ko, echa’ä iyandarekoa umae kawi oï jese ramo,” jei chupe reta.

San Juan 14:6

Jare Jesús jei chupe: “Che ko jae tape Tumpa kotɨ oo wae. Che ko jae añetete ayemɨngeta Tumpa rewa wae. Cheño ko jae tekowe opa mbae wae amee wae. Jare kiawe ipuere’ä oya cheRu re – jaeño che rupi,” jei chupe.

Romanos 5:2

Jare añawe yarowia ma Cristo re ramo, Cristo uyapo ma yayekou waerä Tumpa ipɨakawi re. Jare yayerowia ñaï, echa’ä yaikuaa ko pëti ara yayekouta ñaï kuri Tumpa imbaepuere jupiete ye wae re.

Romanos 8:15

Jayawe mbaetɨ ko ikawi yakɨye waerä Tumpa wi kërái pione reta ukɨye ipatrón wi rami. Echa’ä Espíritu Santo Tumpa umee yandewe wae yandapo’ä oï yakɨye chuwi waerä. Echa’ä Espíritu Santo yandapo ko Tumpa taɨrä yaiko waerä. Jáeramo añawe yandepuere yae Tumpa pe: “CheRu.”

1 Corintios 12:13

Echa’ä yepe tëi opaete yande reta ambɨe ye ye ko yandeyuwi, erëi Espíritu Santo yandapo ma pëti ramiño Cristo re. Yande ko jae Cristo jete pewa rami ipotawe kía ko yande wae. Ipuere ko yande judío ani judío mbae wae, jare uyeyokui wae ani uyeyokui mbae wae. Erëi opaete yande reta pëti ramiño ko ñaï Cristo re, jare yandepuere yayekou oyowake Espíritu Santo re yandepɨa pe oï wae rupi.

1 Corintios 8:6

Erëi yanemaerä ime pëtiño Tumpa añetete wae. Jae ko yandeRu Tumpa ara pe oï wae. Jae ko uyapo opaete mbaembae, jare yande reta yaiko yambutuicha waerä jae jee. Jare ime wi oï pëtiño yandeYa. Jae ko yandeYa Jesucristo. Jae rupi ko opaete mbaembae uyekuaa. Jare jae rupi ko wi yande reta ime ñanoi tekowe ipɨau wae.

Gálatas 4:6

Jare Tumpa taɨ reta ma yaiko ramo, jae ombou Espíritu Santo ikoño mái Taɨ ndiwe wae iko waerä yandepɨa pe. Jare jae ko uparawɨkɨ yanderé yandepuere waerä yae Tumpa pe yandepɨa rewe, “Cheru.”

Efesios 3:12

Jayawe Cristo re yarowia ramo, pëti ramiño ñaï jese. Jáeramo yandepuere ñañemɨïru kawi Tumpa ndiwe yakɨye mbae rewe jare yandepɨawiwe rewe.

Efesios 3:14

Chepɨa pe ayemɨngeta yawe Tumpa ipɨayemɨngeta ikawiete wae re, añeñono chetawa re yandeRu Tumpa jowai ayerure waerä chupe peré. Jae ko yandeYa Jesucristo Tu.

Efesios 4:4

Añetete yande ñaï pëti ramiño, echa’ä Cristo jete rami ko ñaï. Jae nunga wi Espíritu Santo yandepɨa pe oï wae pëtiño ko. Jae ramiño wi pëti ramiño yande ñaäro ñaï yarowia katu rewe jokua ara ñanoi waerä opaete mbaembae ikawiete wae Tumpa umeeta oï yandewe wae.

Efesios 6:18

Jare Tumpa umee wi yandewe pëti tembiporu ye – jae ko yerure. Jayawe jekuaeño piyerure Tumpa pe. Pekañoi chupe pemborɨ waerä kërái Espíritu Santo uikuaaka oï pewe wae rupi. Jare awɨye peakɨ piyerure waerä chupe opaete kerupi ñonoï Cristo re wɨrowia wae reta re.

Colosenses 1:12

Jare pemeeta wi yandeRu pe yasurupái, echa’ä jae peñono tee ma jae imaerä, jare ime onoi pemaerä mbaembae ikawiete ye wae umee waerä pewe kuri. Jayawe pe reta tuicha rupi piyekouta peï jokua ara opaete Cristo re wɨrowia wae reta tembipe pe ñonoï wae reta ndiwe.

Santiago 3:9

Yandeyuru pe yambutuicha yandeRu Tumpa jee. Pɨpe wi ko yayepɨpeyu yanderapicha re, yepe tëi Tumpa uyapo jae echa rami.

1 Pedro 1:17

Tumpa – jae ko yande yae chupe “cheRu” wae – jae jekuaeño oyowake rupi umae oï yanderé. Jare taɨkue rupi pëti pëti wae pe jeita mbaembae yayapo wae re. Jáeramo piko kawi pipɨu rewe kua ɨwɨ pe peï rambuewe. Añetete pe reta ko jae kua ɨwɨ rupi pewata piko waeño, echa’ä pe reta ara pewa ma ko peï.

1 Pedro 1:21

Jare kua Cristo uyapo pewe wae rupi pe reta piyeko peï Tumpa re. YandeRu Tumpa jae ko umbɨjekowe ye Cristo ueru umanokue wae reta ipɨte wi wae. Jare jae umbɨjekowe ye ma yawe, umee chupe mbaepuere jupiete ye wae. Jukuärái Tumpa uyapo pe reta pikuaa waerä pepuere perowia katu jese umee waerä pewe opaete jae jei umeeta pewe wae.

1 Pedro 3:18

Kua pe ikawi ñamae waerä Cristo re. Yepe tëi jae ko jupi wae, erëitu jae uiporara yande jupi mbae yaiko wae reta re. Yande jeta yayawɨ Tumpa kotɨ. Erëi Cristo umano pëti weseño jaeño mái pewa jokua mbaembae yayawɨ wae re, jukuärái yandepuere waerä yaya Tumpa re. Cristo uyeyapo kuimbaerä. Jáeramo jae umano yawe, umano jete pe yande rami. Erëitu ikowe ye ou umanokue wae reta ipɨte wi Espíritu Santo imbaepuere rupi.

Judas 1:20

Erëi pe cheïru puau mii wae reta, jekuaeño piñemɨmɨräta Tumpa iñee jupi wae rupi perowia jese wae. Jare jekuaeño piyerure Tumpa pe Espíritu Santo jei wae rupi.