Efesios 2:16 - Biblia

¹⁶ Jare jukuärái jae uyapo ma imano kurusu re wae rupi. Añetete Cristo imano rupi yanembɨpɨakatu ma yande yepái jare jae nunga wi yanembɨpɨakatu ma Tumpa ndiwe. Jáeramo mbaetɨ ye ma yayembowaicho ñaï yande yepái.

Guaraní Pe (Western): Simba

¹⁶ Jare cua uyapo, umbɨpɨacatu vaerã Tumpa ndive mocui reve penti ramiño imano jeco pegua. Echa'ã imano jeco pegua oyovaicho'ã ma uyupii.

Efesios 2:16 Iomraidhean Croise

Romanos 5:10

Echa’ä yepe tëi tenonde yawe yaikose Tumpa jowaichorä, erëi añawe yayeapɨkatu ma ko Tumpa ndiwe Taɨ imano rupi. Jare jukuärái yawe, ¿këraita pa Tumpa uitɨ oï iarasɨ yanderé kuri ara taɨkuewa pe? Ndarau uyapo, echa’ä Jesús jekuaeño oï yanderepɨ waerä.

Romanos 6:6

Yanemandúa kawi ñaï kërái yaikose wae re. Jaeño yaikose yande yae wae rupiño, jare jukuärái jeta yayawɨse Tumpa kotɨ. Erëi yarowia yawe Cristo re, Tumpa ñaneñono pëti ramiño Cristo re yaiko waerä. Jáeramo Cristo uyekutuka kurusu re yawe, yandereko indechikue uyekutuka wi jae ndiwe rami. Jáeramo yepe tëi amo wese pe ime ñanoi kɨrëɨ mbae kachi yayapo waerä, erëi jokua kɨrëɨ ndarau ye ma mbaepuere ime onoi yanderé. Ndarau ma yaiko jokua kɨrëɨ pe täta rupi yayeyokui waerä.

Romanos 8:3

Opaete Tumpa jei Moisés pe uikuatía waerä wae ipuere’ä yanderepɨ Tumpa iarasɨ wi, echa’ä ñanepɨräta’ä ñaï yaiko waerä jupi opaete Tumpa jei wae rupi. Jáeramo Tumpa uyapo mbae ikawi wae yanderepɨ waerä. Jae ombou Taɨ kua ɨwɨ pe umano waerä mbaembae yayawɨ Tumpa kotɨ wae re. Taɨ uyeyapo kuimbaerä jare uyekuaa yandewe ipotawe kuimbae uyawɨ Tumpa kotɨ wae rami, erëi jae uyawɨ'ä etei Tumpa kotɨ. Erëitu Tumpa uiporaraka chupe jete pe yande mbaembae yayawɨ wae re, jare jukuärái ndarau ma ñanoi teko Tumpa jowai.

Romanos 8:7

Kua nunga reta Tumpa jowaicho ko, echa’ä uipota’ä uyapo reta Tumpa jei wae rupi jare ipuere’äwe uyapo reta wi.

1 Corintios 10:17

Jare ime ye mbae kua pe yaecha waerä. Mbɨyape pëtiño ko, erëi joko wiño opaete yande reta ñapɨsäa yau päwe waerä. Kua pëti yembɨjaanga ko jare uikuaaka yandewe yepe tëi yande jeta ñaï, erëi pëti ramiño ko ñaï wi, echa’ä opaete yande reta Cristo pewa ko.

Gálatas 2:20

Echa’ä che arowia Cristo re ramo, cherekowe indechikue umano rami jokua kurusu re Cristo ndiwe. Jare ndarau ye ma aiko tenonde aiko rami, echa’ä añawe Cristo oï ma chepɨa pe. Jare añawe imeño cherekowe aï rambuewe, jekuaeño arowiata Tumpa Taɨ re. Echa’ä jae cherau jare uñemee umano waerä cheré.

Efesios 3:6

Jare Tumpa ipɨayemɨngeta ko kua: Judío jare judío mbae Cristo re wɨrowia wae reta jae ma ko Tumpa taɨ jare tayɨ reta. Jae reta ñonoï ma ko pëti ramiño Cristo re jare oyowakeño onoita imaerä opaete mbaembae ikawiete wae Tumpa umeeta oï taɨ reta pe wae.

Efesios 4:4

Añetete yande ñaï pëti ramiño, echa’ä Cristo jete rami ko ñaï. Jae nunga wi Espíritu Santo yandepɨa pe oï wae pëtiño ko. Jae ramiño wi pëti ramiño yande ñaäro ñaï yarowia katu rewe jokua ara ñanoi waerä opaete mbaembae ikawiete wae Tumpa umeeta oï yandewe wae.

Colosenses 2:14

Añetete jokua mbaembae yayawɨ wae uyekuatía iko tupapire re rami opaete yanembɨjekose iko jese wae ndiwe. Jare jokua ko Tumpa opa ma uikutu kurusu re rami Cristo uyekutuka iko yawe. Jáeramo yande mbaetɨ ma teko pe ñaï Tumpa jowai yayawɨ wae re.

Colosenses 3:15

Tumpa pereni piko waerä pëti ramiño pepɨakatu rewe. Jokuaerä ko Cristo pembɨpɨakatu. Jáeramo jekuaeño piko jukuärái. Jare jekuaeño pemee yasurupái Tumpa pe.