Efesios 2:10 - Biblia

¹⁰ ¿Maera ra yayapo jayawe mbaembae ikawi wae? Mase, Tumpa umbɨpɨau ma yanderekowe jae yandapo pëti ramiño Cristo re yawe. Jare añawe yanderekowe uyembɨpɨau ma ramo, Tumpa uipota yayapo waerä mbaembae ikawi wae tenonde wiwe jae uipota yayapo waerä wae. Echa’ä jokuaerä ko Tumpa yandapo.

Guaraní Pe (Western): Simba

¹⁰ Echa'ã Tumpa yandeapo. Jare yandeapo ma penti ramiño Cristo Jesús ndive, yande yayapo vaerã icavi vae. Echa'ã tenonde yave Tumpa iquɨrẽɨ jecuaeño yayapo vaerã icavi vae.

Efesios 2:10 Iomraidhean Croise

Jeremías 31:33

Erëitu taɨkuete rupi ayapota aï pëti yemɨngeta ipɨau wae Israel iñemoñaa reta ndiwe. Jae ko kua: Che añonota aï chiñee jae reta ipɨa pe, jare jukuärái jae reta opata uikuaa kawi. Che aikota jae reta iTumparä jare jae reta yurekota chemaerä.

San Mateo 5:16

“Jukuärái wi pe reta, jokua tembipe rami, jekuaeñota ko pechaka pereko ikawi wae opaete wae jowake jae reta uecha waerä jare umbutuicha waerä peRu ara pe oï wae jee,” jei Jesús chupe reta.

San Juan 3:21

Erëi añetete pewa rupi yureko wae reta oya jokua tembipe re, echa’ä jae reta uipota uikuaaka opaete wae pe uyapo ko ñonoï Tumpa uipota wae.

Hechos 9:31

Joko wi ɨma katu rupi opaete ɨwɨ Judea rupi, Galilea rupi, jare Samaria rupi hermano reta ipɨawiwe yureko jare uñemɨmɨräta reta Tumpa re. Yureko reta uipɨu rewe yandeYa wi, jare Espíritu Santo umbɨpɨakatu reta. Jayawe jekuaeño uyembɨjeta yuraa Cristo re wɨrowia wae reta.

Hechos 9:36

Tëta wasu Jope jee wae pe ime iko pëti kuña Cristo re wɨrowia wae Tabita jee wae. Griego ñee pe jae jee Dorcas. Jae uyapoñoi jeta mbaembae ikawi wae, jare jekuaeño omborɨ iparawete wae reta.

Romanos 8:1

Jayawe ¿mbae ra añawe yandepuere yaikuaa opaete kua mbaembae reta rupi? ¿Kërái ra ko ñaï añawe yande reta Cristo re pëti ramiño yaiko wae? Añawe yaikuaa ñaï Tumpa ndarau ma yanembɨjeko.

Romanos 8:29

Jare ¿kërái ra ko Tumpa ipɨayemɨngeta yanemaerä? Iyɨpɨ wiwe jae yandekuaaño mái, yande jae imaerä yaiko wae reta. Jáeramo iyɨpɨ wiwe jae ipɨayemɨngeta iko ñaneñono tee waerä yande reta yaiko waerä Taɨ Jesucristo echa rami. Echa’ä Tumpa uipota onoi jeta taɨ reta, jare jae nunga wi jae uipota taɨ Jesucristo oï waerä ñanerëtara tenondewarä. Jukuärái ko Tumpa ipɨayemɨngeta ikawi wae yanemaerä.

1 Corintios 3:9

Apolos jare che, yepe tëi oreparawɨkɨ oyowake’ä ko, erëi nduparawɨkɨ noï pëti ramiño Tumpa pewarä jae iko pe wae rami. Jare pe reta ko jae Tumpa iko rami. Jare jae nunga wi pe reta ko jae pëti tëta Tumpa uyapoka oï wae rami.

2 Corintios 5:17

Jayawe ime yawe kía pëti ramiño oï Cristo re wae, jae ko Tumpa jembiapo ipɨau wae. Jae jeko indechikue uasa ma. Mase, añawe jae ko ipɨau wae.

2 Corintios 5:5

Tumpa etei ko yandapo yayekou waerä kua re. Jare Tumpa umbɨtenonde ma yandewe Espíritu Santo uikuaaka waerä yandewe yayekouta ñaï taɨkuete rupi yanderete ipɨau wae re.

2 Corintios 9:8

Tumpa imbaepuerete ko. Jare jae ipɨakawi rupi ipuerete uyapo pewe piyekou waerä jeta mbaembae re. Jare jukuärái ndarau uata pewe mbae awe, jare jokua penoi wae wi pepuereta jekuaeño peporomborɨ ipotawe mbaembae ikawi wae rupi.

Gálatas 6:15

Añetete, yande pëti ramiño ñaï Jesucristo re ramo, mbae’ä ko yayembɨcircuncidaka ma wae. Jare mbae’ä ko wi yayembɨcircuncidaka mbae wae. Erëi mbae ikawi wae ko jae tekowe ipɨau wae ñanoi wae.

Efesios 1:1

Cherɨkeɨ reta, cherɨwɨ reta, jare cherindɨ reta tëta wasu Éfeso pe piko wae, che araaka aï pewe saludo yandeYa Jesucristo jee re. Che ko jae Pablo. YandeYa Jesucristo chemondo jae jee re amɨmbeu waerä jesewa, echa’ä jukuärái Tumpa uipota ramo. Jare aikuatía aï kua tupapire pewe Cristo re perowia wae reta pe. Pe reta ko jae Tumpa peñono tee jae imaerä.

Efesios 1:4

Jukuärái Tumpa uipota uyapo yandewe opaete yande pëti ramiño ñaï Cristo re wae. Echa’ä iyɨpɨ wiwe jae yanderau ndei ɨwɨ uyapo mbowe, jare yandeparawo ñaï waerä jae imaeräño jare yandereko mbae wae rami.

Efesios 2:13

Erëi añawe Tumpa pemokoiño ma iyé Jesucristo rupi, echa’ä Cristo upɨyere juwɨ kurusu re umbái waerä teko penoi Tumpa kotɨ wae. Jare Cristo re perowia ramo, Tumpa peapo ma pëti ramiño jese.

Efesios 2:2

Jukuärái pe reta pikose, echa’ä jekuaeño pemomoe piko kua ɨwɨ pewa reta jeko kachi wae re. Piyeyokuise piko Añawasu pe. Jae ko opaete aña reta imburuwicha, jare yandepuere’ä yaecha wae. Jae ko espíritu ikawi mbae wae jare uparawɨkɨ oï imbaepuere rewe opaete Cristo re wɨrowia mbae wae reta ipɨa pe.

Efesios 2:6

Jare jokuaño’ä ko. Jae nunga wi yandeRu Tumpa wɨraa Cristo ara pe, jare jae uwapɨ oï Tumpa iyɨke pe iyakata kotɨ jare onoi mbaepuere opaete wae re. Jukuärái rami wi Tumpa umae yanderé yawapɨ ñaï Cristo ndiwe ara pe ñanoi waerä mbaepuere jae ndiwe. Jukuärái ko, echa’ä yande ñaï pëti ramiño Cristo re ramo.

Efesios 4:1

Che aï peresorɨru pe ayeyokui yandeYa Jesucristo pe jeko pewa ramo. Mase, yayeyokui Tumpa pe yawe, ipuere ou yandewe jeta yembɨawái reta. Erëi jesewe che aipota pumɨkɨrëɨ mii. Añawe yaikuaa ñaï pëti ramiño ñaï Cristo re ramo, Tumpa uyapo ma jeta mbaembae ikawiete wae yanemaerä. Jáeramo jekuaeño pechaka mii teko kawi, echa’ä jokuaerä ko Tumpa yandeparawo. Piko teko kawi rupi ïru wae reta jowai jae reta ipuere uikuaa waerä pe reta ko jae Tumpa taɨ reta.

Efesios 4:24

jare kërái imeta ko piko pereko ipɨau wae rupi. Jukuärái piyapota ikawi waeño jare jupi waeño. Jukuärái ko Tumpa jeko jare jukuäraita ko pereko wi.

Filipenses 1:6

Pe reta jaeramo perowia Cristo re yawe, Tumpa umbɨpɨ uparawɨkɨ pepɨa pe umbɨambɨe waerä pereko, jukuärái piko waerä yandeYa Jesucristo rami. Jare che arowia katu aï Tumpa jekuaeño uyapota oï jokua mbarawɨkɨ ara yandeYa Jesucristo pewa ou rewa. Jokua ara ramo jae opata uyapo.

Filipenses 2:13

Jare kua pepuerete piyapo, echa’ä Tumpa etei ñanemɨkɨrëɨ jare umee yandewe mbaepuere yayapo waerä jokua mbaembae Tumpa umbɨyerowia wae.

Colosenses 1:10

Jukuärái ore nduyerure noï peré pereko kawi waerä kërái ikawi ko yureko waerä kía kía Tumpa pewa iko wae reta. Echa’ä jukuärái piko yawe, pembɨyerowiata Tumpa opaete mbaembae piyapo wae rupi. Echa’ä piyeyokui kawita chupe opaete mbae ikawi wae Tumpa pe piyapo wae rupi, jare jekuaeño wi pekuakuaata Tumpa kotɨ arakuaa rupi.

Colosenses 3:10

Jare pipɨsɨ ma peyupe teko ipɨau wae. Añawe Tumpa jekuaeño umbɨpɨau oï pepɨa, pe reta pikuaa kawi waerä Tumpa. Jare jukuärái pereko oya katu oo oï jae jeko jupi wae re.

2 Tesalonicenses 2:17

Añawe jae tumee pewe kɨrëɨ jare mɨräta pere waerä ikawi wae jare piyapo kawi waerä wi.

1 Timoteo 2:10

Echa’ä ime kía nunga kuña jei yawe, “Aipɨu ko Tumpa wi,” jei, jayawe ikawi ko jokua nunga kuña uñemɨmaepöra waerä Tumpa pewarä. Jare kuña reta uyapo yawe mbaembae ikawi wae omborɨ waerä ïru wae reta, jokua nunga kuña reta ko jae maepöraete Tumpa pewarä.

1 Timoteo 5:10

Jare tuyekuaaka Cristo re wɨrowia wae reta pe jae ko kuña ikawi uyapo wae. Jare tuiko kuña umbɨkuakuaa kawi isambiaɨ reta wae, jare umbɨasa kawi mboupa reta jëta pe wae, jare uñemɨmichi rewe omborɨ ïru wae reta Cristo re wɨrowia wae, jare omborɨ ipotawe kía yembɨawái pe oï wae. Jayawe tuiko kuña jekuaeño uñemɨatangätu uyapo waerä ikawi wae. Jokua nunga kuña ime umano chuwi wae reta ko yandepuere yamborɨ.

1 Timoteo 5:25

Jae ramiño wi amokue wae reta uyapo mbaembae ikawi wae jare jeko kawi uyekuaa ïru wae reta pe. Erëi ïru wae reta wɨari rupi uyapo mbaembae ikawi wae kía uecha mbae wae. Jokua jae nunga wi pëti ara uyekuaa ñotái ko.

1 Timoteo 6:18

Jare ere wi chupe reta uyapo waerä jeta mbaembae ikawi wae, jare jekuaeño umee reta waerä mbaembae onoi wae wi omborɨ waerä uata oï chupe reta wae pe.

2 Timoteo 2:21

Jae ramiño wi yande pëti pëti wae ime ñanoi yandereko ikawi wae jare yandereko kachi wae. Erëi yaeya yawe yandereko kachi wae, yande reta ko jae jokua mbaembae jɨru jepɨete wae rami. Jare yandeYa ñaneñono teeta jae imaerä ipuere waerä yandeporu mbaembae ikawiete wae pewarä.

2 Timoteo 3:17

Jukuärái kía Tumpa pe uyeyokui wae ipuere uyapo kawi opaete Tumpa uipota wae.

Tito 2:14

Opaete yande jeta ma yayawɨ Tumpa kotɨ. Erëi Jesucristo uñemee umano waerä yanderé yanderepɨ waerä jokua teko ñanoi wae wi, jare oyoe waerä yandepɨa opaete ikawi mbae wae wi. Jukuärái jae ñaneñono tee ma jae imaerä, yande ñanekɨrëɨ yayapo waerä mbaembae ikawi waeño.

Tito 2:7

Jare nde, Tito, echaka ndereko kawi taurusu wae reta pe jae reta omomoe waerä ndereko. Jare jekuaeño eporomboe añetete wae jare jupi wae ndipɨu rewe Tumpa wi awɨye waerä kía ipuere nembɨjeko mbae re. Echa’ä jukuärái ndiyapo yawe, oyowaicho nde ndiwe wae reta kïiño upɨtata reta, echa’ä mbaetɨta chupe reta mbae re iñera waerä yandekotɨ.

Tito 3:1

Jekuaeño emɨmandúa Cristo re wɨrowia wae reta kua re: Jae reta tuipɨu imburuwicha reta wi jare tuyapoñoi jae reta jei wae rupi. Toï reta uyapo waerä ipotawe mbae ikawi wae.

Tito 3:14

Opaete Cristo re wɨrowia wae reta tuyemboe jekuaeño uyapo reta waerä mbaembae ikawi wae omborɨ waerä mbae uata oï chupe wae reta pe. Jare jukuärái uyapo reta yawe, ndarau yureko iyakɨ wae reta rami.

Tito 3:8

Jokua ñee añetete ko. Jáeramo awɨye ndekueri ndeporomboe waerä jese. Echa’ä jukuärái opaete Tumpa re wɨrowia wae reta uñemɨatangätuta jekuaeño uyapo reta waerä mbaembae ikawi waeño.

Hebreos 10:24

Jae nunga wi ñañemɨatangätu mii yayerau päwe waerä jare yayapo waerä ikawi wae.

Hebreos 13:21

Che ayerure aï Tumpa pe jekuaeño pemborɨ piyapo kawi waerä opaete jae jei wae rupi. Jare jae tuparawɨkɨ yandepɨa pe yande reta jekuaeño yambɨyerowia waerä jae. Jare jukuärái tuyapo yandeYa Jesucristo imbaepuere rupi. ¡Tuyembutuichaka yandeYa Jesucristo jee jaeño mái pewa! Jukuärái tuiko.

1 Pedro 2:12

Pechaka mii teko kawi Tumpa re wɨrowia mbae wae reta ipɨte rupi. Añawe jae reta uyemɨngeta tëi kachi pekotɨ pereko kachi wae echa rami. Erëitu pereko ikawi oï yawe, jae reta uechata jare aramoi ipɨakueeta kuri Tumpa kotɨ. Jayawe uwäe yawe ara opaete wae uyemboɨ waerä Tumpa jowai, jae reta umbutuichata ñonoï Tumpa jee pereko pewa.

1 Juan 1:7

Erëi Tumpa ko jae arakuaa iYa, jare jokua arakuaa ko jae pëti tembipe rami yandewe. Jare yande yaiko yawe jokua arakuaa Tumpa umee yandewe wae rupi, jayawe yande ñañemɨïru kawita päwe rewe. Jare yandeRu Tumpa Taɨ Jesucristo juwɨ uyepɨyere wae jekuaeño yandeyoe oï Tumpa kotɨ. Echa’ä umbái oï yandewi mbaembae yayawɨ Tumpa kotɨ wae.

1 Juan 2:6

Jayawe ime yawe kía jei, “Che aï pëti ramiño Tumpa re” wae, jayawe tuiko kawi kërái Jesucristo iko rami.