Efesios 1:21 - Biblia

²¹ Joko pe Tumpa ndiwe Cristo ime onoi mbaepuere tuichaete wae opaete mburuwicha reta ara jare ɨwɨ pe ñonoï wae reta re. Jukuärái Cristo Tu ndiwe imbaepuere tuichaete ko opaete wae reta mbaepuere ime onoi wae wi añawe wiwe jare jaeño mái pewa.

Guaraní Pe (Western): Simba

²¹ Cristo imbaepuere tuicha ete opaete mburuvicha reta ara pegua jare ɨvɨ pegua jare ipotave mbaepuere güɨnoi vae imbaepuere güi. Cristo imbaepuere tuicha ete opaete cua ara reta pe mbaepuere güɨnoi vae reta jare opaete ara reta outa vae pe mbaepuere güɨnoita vae reta imbaepuere güi.

Efesios 1:21 Iomraidhean Croise

San Mateo 12:32

“Jare che kuimbaerä ayeyapo wae, ime yawe kía mbae kachi jei chekotɨ wae, Tumpa ipuereta umbái chuwi jokua mbae kachi wae. Erëi ime yawe kía uyemɨngeta kachi Espíritu Santo kotɨ wae, Tumpa ndarau umbái chuwi jokua. Jukuärái ko añawe rupi jare jaeño mái pewa wi,” jei chupe reta.

Hechos 4:12

“Jayawe mbaetɨ ye kía ipuere yanderepɨ waerä mbaembae yayawɨ Tumpa kotɨ wae wi. Echa’ä yandeRu Tumpa ombou pëtiño kua ɨwɨ pe ipuere yanderepɨ waerä wae – jae ko Jesús.” Jukuärái jei Pedro chupe reta.

Efesios 2:2

Jukuärái pe reta pikose, echa’ä jekuaeño pemomoe piko kua ɨwɨ pewa reta jeko kachi wae re. Piyeyokuise piko Añawasu pe. Jae ko opaete aña reta imburuwicha, jare yandepuere’ä yaecha wae. Jae ko espíritu ikawi mbae wae jare uparawɨkɨ oï imbaepuere rewe opaete Cristo re wɨrowia mbae wae reta ipɨa pe.

Efesios 3:10

Jukuärái Tumpa ipɨayemɨngeta ikoño mái wae uyeyapo ma oï yandeYa Jesucristo rupi. Jare Tumpa uipota wi opaete araɨwa reta uecha waerä jokua mbaembae jae uyapo wae Cristo re yarowia wae reta pe. Jare jukuärái araɨwa reta jare araɨwa itenondewa retawe uikuaa kërái tuichaete ye ko Tumpa iyarakuaa wae.

Efesios 6:12

Pemandúa ñañeräro’ä ko ñaï ɨwɨ pewa reta ndiwe. Yanderowaicho reta ko jae Añawasu jare aña reta. Jae reta ko jae ɨwɨ pewa pɨ̈tumimbi pe ñonoï reta wae echa iya. Jukuärái teko kachi tuicha ukuakuaa oo oï kua ɨwɨ pe.

Colosenses 2:10

Jare jae ko opaete mburuwicha reta ara pewa jare ɨwɨ pewa iYa. Jare pe reta pëti ramiño peï Cristo re ramo, uata’ä etei pewe mbae awe penoi waerä tekowe opa mbae wae.

Colosenses 2:15

Jare jokuaño’ä ko. Cristo umano kurusu re yawe, jae opa umɨamɨri opaete aña reta jare upɨ̈ro chuwi reta imbaepuere jae reta ime wɨreko yanderé wae. Jare joko wi jae umɨmichika reta opaete wae jowake. Jare jukuärái Cristo uechaka opaete wae pe jae ko upurumɨamɨri wae.

Hebreos 1:4

Jukuärái kua uyapo wae rupi Tumpa Taɨ uyapɨraa opaete araɨwa reta. Jare uñemee chupe imbaepuerete waerä opaete araɨwa reta wi.

Hebreos 2:5

Tumpa pëti ara umbɨpɨauta oï kua ɨwɨ. Erëi umeeta’ä araɨwa reta pe mbaepuere onoi waerä jese.

Hebreos 4:14

Erëi yande ime ma ñanoi pëti sacerdote tenondewaete – jae ko Jesús, Tumpa Taɨ etei. Jae oo ma ara pe etei yandeRu Tumpa jowai jare joko pe jae uyerure oï yanderé. Jáeramo jekuaeñota ko yarowia kawi jese.

1 Pedro 3:22

Jare añawe jae oo ye ma ara pe jare joko pe oï Tumpa iyakata kotɨ. Jare ime onoi mbaepuere araɨwa reta re, jare aña reta re, jare opaete ara pe mbaepuere onoi wae reta re.