Efesios 1:14 - Biblia

¹⁴ Jare jokuaño’ä ko. Jae nunga wi Espíritu Santo ñanoi ramo, uikuaaka yandewe pëti ara imeta ñanoi opaete mbaembae Tumpa jei umeeta yandewe wae. Jokua ara ramo opaete yarowia jese wae reta Tumpa yanderepɨta oï opaete mbae ikawi mbae wae wi. Jayawe, ¡yambutuicha Tumpa jee jae imbaepuere tuichaete ramo!

Guaraní Pe (Western): Simba

¹⁴ Tumpa umee yandeve Espíritu Santo, uicuaaca vaerã ñanoita opaete Tumpa umeeta yandeve vae. Cua Tumpa umeeta yandeve yanderepɨ ete yave. Yande co jae imbae. Jare Tumpa cua uyapo yave, uyembɨadoracata co cua jeco pegua.

Efesios 1:14 Iomraidhean Croise

San Lucas 21:28

“Jayawe opaete kua mbaembae umbɨpɨ uyeyapo oï yawe, piñemɨatangätuta ko kuri. Echa’ä ɨmambae Tumpa perepɨta oï,” jei chupe reta.

Hechos 20:28

Jare jei wi chupe reta: “Jayawe, pe reta Cristo re wɨrowia wae itenondewa reta, piyandareko kawi piyé,” jei. “Jare piyandareko kawi wi opaete hermano reta Tumpa umee pewe wae re. Pikuaa peï kërái pëti owecha iyandarekoa uyandareko kawi iowecha reta re. Jukuärái wi piyandareko kawi hermano reta re jare pemboe kawi reta. Echa’ä yandeYa uepɨ reta jae juwɨ pɨpe etei, jare jukuärái jae reta yandeYa imbae ko. Jekuaeño pemandúa Espíritu Santo ko peparawo pe reta piko waerä jae reta itenondewarä,” jei Pablo chupe reta.

Hechos 20:32

“Añawe poñono aï Tumpa ipo pe. Jae tuyandareko kawi mii peré,” jei. “Pemanduañoi wi jokua ñee Tumpa ipɨakawiete yandewe wae re. Echa’ä jokua ñee rupi Tumpa ñanemɨmɨräta ikotɨ, jare umee yandewe yanderendarä opaete Tumpa oñono tee jae imaerä wae reta ndiwe,” jei Pablo chupe reta.

Romanos 8:23

Jukuärái wi yande reta yaiporara ñaï yandepɨa pe jokua kuña imembɨrasɨ oï wae rami. Echa’ä yepe tëi Tumpa umbɨtenonde ma yandewe Espíritu Santo, erëi imeño ñaäro ñaï yayekou waerä ïru mbaembae reta re – jae ko jokua mbaembae Tumpa umeeta oï yandewe jae taɨrä ma yaiko wae reta pe. Jare jokua ko uyeyapota oï yandewe kuri, jokua ara Tumpa umbɨpɨau yawe yanderete.

1 Corintios 1:30

Pe retái piyeyapo’ä ko pëti ramiño Jesucristo re. Tumpa ko uyapo jokua mbae. Jare Cristo rupi Tumpa uikuaaka yandewe iyarakuaa. Echa’ä Cristo uyapo wae rupi opa ma uyembɨepɨ teko yareko wae, jare jukuärái Tumpa umae yanderé yandereko mbae wae rami jare ñaneñono tee jae imaerä.

2 Corintios 1:22

Jare Tumpa oñono ma Espíritu Santo yandepɨa pe uikuaaka waerä yandewe jae imbae ma ko yande reta. Tumpa umbɨtenonde ma yandewe Espíritu Santo opaete mbaembae ikawi wae jae umeeta oï yandewe wae wi. Jare jukuärái yaikuaa añetete ko pëti ara Tumpa umeeta oï yandewe opaetei jokua mbaembae.

2 Corintios 5:5

Tumpa etei ko yandapo yayekou waerä kua re. Jare Tumpa umbɨtenonde ma yandewe Espíritu Santo uikuaaka waerä yandewe yayekouta ñaï taɨkuete rupi yanderete ipɨau wae re.

Gálatas 4:6

Jare Tumpa taɨ reta ma yaiko ramo, jae ombou Espíritu Santo ikoño mái Taɨ ndiwe wae iko waerä yandepɨa pe. Jare jae ko uparawɨkɨ yanderé yandepuere waerä yae Tumpa pe yandepɨa rewe, “Cheru.”

Efesios 1:11

Jare yande ñaï pëti ramiño Cristo re ramo, Tumpa umee yandewe yandepuere yayekou waerä opaete mbaembae Tumpa onoi Cristo pewarä wae re. Jukuärái ko tenonde wiwe Tumpa ipɨayemɨngeta. Jare jokua jae uipota uyapo wae, jae jekuaeño uyapo.

Efesios 1:12

Jare jae ipɨayemɨngeta wi ko ore judiorä nduiko wae rani ndorowia waerä Cristo re, jare jukuärái rupi jae jee uyembutuichaka waerä.

Efesios 4:30

Awɨye pembɨpɨatɨtɨ Espíritu Santo Tumpa umee pewe wae. Echa’ä Tumpa umee yandewe Espíritu Santo uikuaaka waerä yandewe jae umbɨepɨ ma ko yande yaiko waerä jae imaerä jaeño mái pewa. Jare Espíritu Santo ñanoi ramo, uikuaaka wi yandewe kërái ara taɨkuewa pe Tumpa opata yanderepɨ oï opaete mbae ikawi mbae wae wi.

1 Pedro 2:9

Erëi pe reta ko jae Tumpa uiparawo wae reta. Pe reta ko jae sacerdote reta piyeyokui peï yaneMburuwicha wasu ara pewa pe. Jare Tumpa peñono tee ma pe reta piko waerä jae imaerä, pemɨmbeu waerä kërái jokua jae uyapo wae ikawiete ye ko. Echa’ä tenonde yawe pikuaa’ä piko añetete wae Tumpa rewa jare jukuärái pikose pɨ̈tumimbi pe rami. Erëi añawe jae uyekuaaka ma pewe, jare jukuärái pereni ma ikotɨ jokua pɨ̈tumimbi wi piko waerä tembipe ikawiete wae pe.