Daniel 9:26 - Biblia

²⁶ “Jare 483 año ma uasa yawe, uyukata ñonoï reta Cristo yae chupe wae, erëi mbaetɨta mbae jae uyapo wae jeko pewa. Joko wi ɨma ma uasa yawe, uyekuaata oï ambɨe mburuwicha wasurä ambɨe ɨwɨ pewa. Erëi ndei jae uyekuaa mbowe, iɨwɨ pewa reta opata umbái Jerusalén jare tupao wasu. Opata umbái reta mbaesusere tuichaete wae rupi, jare joko wiwe ara taɨkuewa uwäe rewa imeta ñeräro reta jare mbaesusere reta. Jukuärái Tumpa jei uyeyapota oï.

Daniel 9:26 Iomraidhean Croise

Isaías 53:8

Jae reta uipɨsɨ jare wɨraa umbɨjeko reta waerä teko iya ikawi mbae wae echa rami. ¿Kía ra ipuere uikuaaka jae jëtara reta rewa? Mbaetɨ kiawe, echa’ä jowaicho reta uyukaka ndei jae onoi mbowe iñemoñaa retarä. Opaete jae reta ipɨte wi, mbaetɨ kiawe uikuaa jae uiporara iko jae reta ipepɨka pe wae jare umano jae reta jeko pewa.

Daniel 9:27

“Jokua mburuwicha wasurä outa oï wae uyapota oï tëi pëti yemɨngeta jeta wae reta ndiwe chiu año pewa. Erëi mbapɨ año mbɨte uasa ma yawe, aramoiño jae umaeñota’ä tueru reta tupao wasu pe mbaemɨmba reta jare ïru mbaembae Tumpa pewarä. Jare oete ye, jae oñonota oï tupao wasu joo pe mbae ikawi mbaete wae – jae ko upururükumewa wae. Jare joko pe upɨtata oï uwäe ara Tumpa jei wae rewa. Jare jokua ara ramo jokua mburuwicha wasu ukañɨta oï jaeño mái pewa.” Jukuärái jei araɨwa Daniel pe.

San Mateo 22:2

“Pëti ara Tumpa ikota opaete wae imburuwicha wasurä jaeño mái pewa. Jare yandepuere yambɨjaanga jokua ara re kuärái: Ime iko pëti mburuwicha wasu taɨ umendata iko wae. Jayawe tu uipota uyapoka chupe tembiu ikawi wae, jare uparea jeta wae reta pe yuweru waerä jare uyekou waerä wi.

San Mateo 22:7

“Jayawe mburuwicha wasu kua uikuaa yawe, pochɨete. Jáeramo omondo isɨndaro reta opa uyuka waerä jokua upuruyuka wae reta jare opa uapɨ waerä chuwi reta jokua jëta wasu,” jei.

San Mateo 23:38

“Mase, añawe Tumpa pereyata oï, jare petupao wasu wi usɨrɨta oï.

San Mateo 24:2

Jayawe Jesús jei chupe reta: “Tuicha jare ipöra tëi ñonoï reta,” jei. “Erëi che tae pewe añetete wae, outa uwäe oï ara opa uitɨ reta waerä. Jare jokua ara ndarau pëti awe ita upɨta ïru ita iáramo,” jei chupe reta.

Marcos 13:2

Jayawe Jesús jei chupe: “Tuicha jare ipöra tëi ñonoï reta,” jei. “Erëi jesewe outa uwäe oï ara opa uitɨ reta waerä. Jare jokua ara ndarau pëti awe ita upɨta ïru ita iáramo,” jei chupe.

Marcos 13:7

“Jare imeta oï ñeräro reta koiño pewi. Jae nunga wi imeta oï ñeräro reta mbɨrɨ pewi. Erëi piyandu yawe kua reta rewa, awɨye pekɨye. Echa’ä kua mbaesusere reta uyeyapo ñotái ko. Erëi ndei wɨteño ko ara reta opa waerä,” jei.

Marcos 9:12

Jayawe Jesús jei chupe reta: “Añetete ko jae reta jei wae. Elías rani ko ou uyapɨkatu waerä opaete mbaembae,” jei. “Erëitu Tumpa iñeerɨru pe uyekuatía oï wi che kuimbaerä ayeyapo wae aiporarata ko jeta jare ïru wae reta chererɨ̈rota,” jei.

San Lucas 21:24

“Jare jeta jae reta umanota kɨsepuku pe. Jare ïru wae reta uyereraata peresorä ambɨe ɨwɨ reta pe,” jei. “Jare judío mbae wae reta uyembɨiyata kua Jerusalén re jare yurekota pɨpe jae reta ime mbaepuere onoi wae opa rewa,” jei Jesús jemimboe reta pe.

San Lucas 21:6

“Kua mbaembae pecha peï wae, ipöra ñonoï tëi,” jei. “Erëi jesewe outa uwäe oï ara opa uitɨ reta waerä. Jare jokua ara ndarau pëti awe ita upɨta ïru ita iáramo,” jei chupe reta.

San Lucas 24:26

“¿Uyekuatia’ä yerá oï kërái Cristo yae chupe wae tenonde imeta ko uiporara rani? Jare uiporara ma yawe, yandeRu Tumpa etei umbutuichata oï ara pe,” jei chupe reta.

San Lucas 24:46

Jei chupe reta: “Uyekuatía oï kërái Cristo pere chupe wae imeta ko uiporara jare umano, jare joko wi ikowe ye ou mbapɨ ara pe,” jei chupe reta.

San Juan 14:30

“Ndarau ma jekuaeño ɨma ayemɨngeta aï pe reta ndiwe. Echa’ä uwäe ma ara che aiporara waerä kua ɨwɨ imburuwicha ipo pe – jae ko Añawasu. Erëi jae ndarau etei ipuere cheré,” jei chupe reta.

2 Corintios 5:21

YandeYa Cristo uyapo’ä etei ko mbae kachi wae. Erëi Tumpa uiporaraka chupe opaetei mbaembae kachi yayapo wae re Cristo etei jokua mbaembae uyapo wae rami. Jukuärái Tumpa uyapo yandepuere waerä ñaï kawi jae ndiwe yandereko mbae wae rami Cristo uyapo yandewe wae rupi.

Gálatas 3:13

Jayawe yepe tëi yande yaiko’ä ko jupi rupi opaete Tumpa arakae jei Moisés pe wae rupi, jare jokua jeko pewa Tumpa iarasɨ pe yaikose, jesewe yandeYa Cristo yanderepɨ ma chuwi. Echa’ä Tumpa iarasɨ oata tëi iko yanderé wae oa Cristo re yandepepɨka pe jae uyekutuka iko kurusu re rambuewe. Jukuärái jei yandewe Tumpa iñeerɨru pe jei yawe: “Kía uyekutuka ɨwɨra re wae, Tumpa iarasɨ toa jese.”

1 Pedro 2:21

Echa’ä jokuaerä ko Tumpa ueni reta. YandeYa Cristo uiporara yanderé, jare jukuärái uechaka yandewe kërái ñamɨawäta waerä yaiporara wae rupi. Jayawe pemomoe mii jae jeko.

1 Pedro 2:24

Yande jeta ma yayawɨ Tumpa kotɨ. Erëi Cristo uyekutuka iko kurusu re yawe, jae etei uiporara jete pe yanderé jokua teko ñanoi wae opa umbái waerä yandewi. Jare jukuärái Cristo uyapo yandepuere waerä yaiko jupi rupi. Jare jukuärái ko yandepuere yayapo, echa’ä yande reta ñamano rami ma ko yandereko kachi wi. Jare Cristo ipere wae rupi yakuera ma ko Tumpa kotɨ.

1 Pedro 3:18

Kua pe ikawi ñamae waerä Cristo re. Yepe tëi jae ko jupi wae, erëitu jae uiporara yande jupi mbae yaiko wae reta re. Yande jeta yayawɨ Tumpa kotɨ. Erëi Cristo umano pëti weseño jaeño mái pewa jokua mbaembae yayawɨ wae re, jukuärái yandepuere waerä yaya Tumpa re. Cristo uyeyapo kuimbaerä. Jáeramo jae umano yawe, umano jete pe yande rami. Erëitu ikowe ye ou umanokue wae reta ipɨte wi Espíritu Santo imbaepuere rupi.