Daniel 9:25 - Biblia

²⁵ “Jayawe iyapɨsaka jare ikuaa kawi kua: Pëti mburuwicha wasu jeita uyapo reta ye waerä tëta wasu Jerusalén. Jare jokua ara wiwe uasata 483 año mburuwicha wasurä Cristo yae chupe wae ou rewa. Jayawe mburuwicha wasu jei wae rupi umupüa yeta ñonoï Jerusalén ikësea reta, jare uyapo yeta ñonoï icalle reta wi. Jukuärái uyapota ñonoï reta, echa’ä imeta onoi yemumburu mano pewa ramo.

Daniel 9:25 Iomraidhean Croise

Isaías 9:6

Oa ma yandewe pëti sambiaɨ kuimbae. Jae ko Tumpa Taɨ etei jae umee yandewe wae. Jare jae ikota yanemburuwicha wasurä. Jare jeita chupe reta: UPURUMBƗARAKUAA KAWIETE WAE, jare TUMPA IMBAEPUERE TUICHAETE WAE, jare YANDERU TUMPA IKOÑO MÁI WAE, jare MBURUWICHA WASU YANEMBƗPƗAKATU WAE. Jukuärái jeita chupe reta.

Miqueas 5:2

Tumpa jei kuärái: “Erëi tëta wasu raɨ Belén Efrata jee wae, yepe tëi pëti tëta michi raɨ ko opaete tëta wasu ɨwɨ Judá pewa reta ipɨte wi, erëitu joko wi aruta pëti kuimbae opaete Israel pewa reta imburuwicharä. Iyɨpɨ wiwe jae ikoño mái.” Jukuärái jei Tumpa.

San Mateo 13:23

“Erëi amokue temitɨ oa ɨwɨkawi pe. Kua ɨwɨ ikawi wae uyembɨjaanga oï kía Tumpa iñee uyandu wae jare uepitɨ kawi oï wae re,” jei. “Jare Tumpa iñee uyembɨjapo kawi oï ipɨa pe ramo, uyekuaa jese Tumpa jeko ikawi wae. Amokue reta re uyekuaa kawi Tumpa jeko ikawi wae. Ïru wae reta re uyekuaa kawiete, jare ïru wae reta re uyekuaa kawiete ye,” jei. “Jukuärái ko ambɨjaanga rewe jae pewe wae,” jei Jesús jemimboe reta pe.

San Mateo 24:15

“Jare pe reta pechata peï mbae ikawi mbaete wae – jae ko upururükumewa wae uyemboɨ oï tupao wasu pe. Jukuärái arakae Tumpa iñee umɨmbeu wae Daniel jei uyekuaata ko,” jei. (Jare kua umɨngeta wae tuikuaa kawi mbae uipota jei wae.)

Marcos 13:14

“Jare pe reta pechata peï mbae ikawi mbaete wae – jae ko upururükumewa wae uyemboɨ oï kiape oïta’ä tëi wae pe. Jokua ko jae tupao wasu pe. Jukuärái arakae Tumpa iñee umɨmbeu wae Daniel jei uyekuaata ko,” jei. (Jare kua umɨngeta wae tuikuaa kawi mbae uipota jei wae.) “Jayawe jokua pecha yawe, kua ɨwɨ Judea pe ñonoï wae reta tosi ɨwɨtu wasu reta kotɨ,” jei.

San Juan 1:41

Joko wi jawoi pewa Andrés oo ueka tɨkeɨ Simón. Jare uwäe chupe yawe, jei chupe: “Ore nduecha wɨte ma jokua yae chupe Mesías wae,” jei chupe. (Kua ñee Mesías uipota jei ‘Cristo’ jae reta iñee pe.)

San Juan 4:25

Jayawe kuña jei Jesús pe: “Che aikuaa jokua yae chupe Mesías wae outa oï – jae wi ko Cristo yae chupe wae. Jare jae ou yawe, umɨmbeuta oï yandewe opaete mbaembae rewa,” jei chupe.

Hechos 3:15

Jare jukuärái piyukaka tekowe iYa etei,” jei. “Erëi yepe tëi piyukaka, jesewe Tumpa umbɨjekowe ye ueru umanokue wae reta ipɨte wi. Jare kua ore nduecha oreresa pe etei,” jei chupe reta.

Hechos 5:31

Joko wi wɨraa ara pe. Jare joko pe Jesús uwapɨ oï yandeRu Tumpa iyɨpɨ iyakata kotɨ, jare jae ndiwe ime onoi mbaepuere opaete wae re,” jei. “Jukuärái yandeRu Tumpa uikuaaka opaete wae pe Jesús ko jae yandeYa jare yandeRepɨ wae. Jare jukuärái Tumpa umee yandewe yandepuere waerä yaeya yandepɨayemɨngeta jupi mbae wae Tumpa rewa. Jukuärái opaete mbaembae yayawɨ Tumpa kotɨ wae jae opata umbái yandewi,” jei.

Hechos 8:30

Jayawe Felipe osi oya oo karosa kotɨ, jare uyandu jokua kuimbae umɨngeta oï Isaías uikuatía wae. Jare Felipe upɨrandu chupe: “¿Ndikuaa pa nemɨngeta neï wae?” jei chupe.

Efesios 5:16

Añetete kua ɨwɨ pewa reta jeko kachi tuicha rupi ukuakuaa oo oï. Jáeramo piporu kawi ara reta piyeyokui waerä Tumpa pe.

Apocalipsis 19:16

Jare jae jemimonde re jare iu re uyekuatía oï kua tee: MBURUWICHA WASU RETA ITENONDEWAETE WAE JARE OPAETE WAE IYA TENONDEWAETE WAE