Apocalipsis 7:3 - Biblia

³ Jare kua araɨwa usapɨkai rewe jei jokua irundɨ araɨwa reta pe: “Awɨye perükumewa ɨwɨ, jare mar, jare ɨwɨra reta ndei amɨseñara mbowe yandeTumpa pe uyeyokui wae reta jesɨwa pe,” jei chupe reta. Jayawe joko wi araɨwa oo upurumɨseñara.

Apocalipsis 7:3 Iomraidhean Croise

Éxodo 12:13

Jare jei wi chupe reta: “Pemɨmbeu wi chupe reta kuärái: ‘Jokua tuwɨ piñono öke iáramo jare iyɨkeyɨke pe wae uikuaakata piyapo ma che jae pewe wae. Jayawe che aecha jokua tuwɨ yawe, asa wɨraeñota pewi, jare ayapota’ä mbaesusere pewe ɨwɨ Egipto pewa reta pe aiporaraka aï yawe,’ pere chupe reta,” jei.

Éxodo 12:23

“Echa’ä Tumpa outa uasa oo oï opaete ɨwɨ Egipto rupi pëti araɨwa ndiwe. Jokua araɨwa pe Tumpa umee mbaepuere uyuka waerä opaete wae reta taɨrɨpɨ. Erëi Tumpa uecha yawe tuwɨ perëta jöke iáramo jare iyɨkeyɨke pe oï wae, umaeñota’ä araɨwa upuruyuka wae re uike waerä perëta japɨpe,” jei chupe reta.

San Mateo 24:22

“Jare Tumpa jei’ä yawe awɨye uiporara reta waerä ɨma rupi, ndarau etei upɨta kiawe jekowe rewe jokua ara reta opa rewa. Erëi Tumpa uiparareko jae uiparawo wae reta ramo, jae jeita awɨye uiporara reta waerä ɨma,” jei chupe reta.

San Mateo 24:31

“Jare pëti temimbɨ wasu uñee oï rewe che amondota araɨwa reta umbatɨ waerä che aiparawo wae reta opaete kerupi rupi wi,” jei chupe reta.

San Juan 12:26

“Jayawe ime yawe kía uipota uyeyokui chewe wae, tuwata che ndiwe oï waerä che aï wae pe. Jare jukuärái uyapo yawe, cheRu umbutuichakata oï,” jei Jesús.

San Juan 3:33

Erëi Tumpa ko ombou jare umee chupe Espíritu Santo opaete imbaepuere rewe. Jáeramo jae jupi umɨmbeu Tumpa iñee. Jare ime yawe kía wɨrowia jae iñee re wae, uikuaa Tumpa iñee añetete yepe.

Romanos 6:22

Erëi añawe, ime yawe jokua kɨrëɨ mbae kachi piyapo waerä wae, jokua kɨrëɨ ndarau ye ma onoi mbaepuere peré. Ndarau ma piko jokua kɨrëɨ pe täta rupi piyeyokui waerä, echa’ä Tumpa peyora ma ko chuwi jare añawe täta rupi piyeyokui peï Tumpa pe. Jare jokua ikawita oï pewe, echa’ä opa ara rupi jekuaeño pereko oya katu oo oï jupi wae re. Jare jae nunga wi perekowe opa yawe kua ɨwɨ pe, imeta penoi tekowe opa mbae wae.

Apocalipsis 13:16

Jare bestia taɨkue aecha wae jei opaete wae onoi waerä pëti marka ipo iyakata kotɨ ani jesɨwa re. Jayawe ikuasɨ wae reta jare mburuwicha reta, jare ikokatu wae reta jare iparawete wae reta, jare täta rupi uyeyokui wae reta jare uyeyokui mbae wae retawe imeta ko onoi reta jokua marka.

Apocalipsis 13:17

Jare ime yawe kía nunga mbaetɨ onoi jokua marka wae, ndarau ipuere owa mbae awe jare ndarau ipuere mbae owaka wi. Jokua marka ko jae jokua bestia jee, ani yandepuere yae chupe jae ko número umbɨjaanga bestia jee re wae.

Apocalipsis 14:1

Joko wi aecha jokua Owecha kuimbae taurusu wae uyemboɨ oï ɨwɨtu wasu Sion jee wae re. Jare joko pe ñonoï jae ndiwe jokua 144.000 wae reta. Jae reta jesɨwa re uyekuatía oï Owecha kuimbae taurusu wae jee jare Tu jee.

Apocalipsis 14:9

Jayawe jokua araɨwa jaɨkue rupi uyekuaa ïru araɨwa. Kua re uyekuaa mbapɨ ma. Jare jae jei usapɨkai rewe: “Opaete jokua tenondewa bestia re jare jae jaanga re umbɨadora wae reta uikuaata ñonoï Tumpa iarasɨ wasu. Jare jae nunga wi jokua bestia imarka ime onoi jesɨwa re ani ipo re wae reta uikuaata ñonoï wi Tumpa iarasɨ wasu. Echa’ä Tumpa pochɨete chupe reta jare täta rupi uiporarakata chupe reta,” jei. “Jae reta uiporarata tata pe jare azufre jendɨ oï wae pe araɨwa Tumpa oñono tee wae reta jowai jare Owecha kuimbae taurusu wae jowai,” jei.

Apocalipsis 19:2

Echa’ä jae upurumbɨjeko jupi wae rupi, jare uiporaraka ɨwɨ pewa reta pe añetete wae rupi. Añawe jae uiporaraka ma jokua kuña jete re umɨngana wae jeräkuaete wae pe. Echa’ä jokua kuña opa urükumewa ɨwɨ pewa reta awasa uyapo wae rupi, jare upɨyere Tumpa pe uyeyokui wae reta juwɨ. Jáeramo Tumpa uyepɨ ma chupe reta jokua kuña pe.” Jukuärái jei reta.

Apocalipsis 20:4

Jare aecha wi jeta mburuwicha reta iwapɨa jare joko pe uwapɨ ñonoï wae reta. Tumpa umee chupe reta mbaepuere mburuwicha wasurä yureko waerä. Jare aecha wi jeta umanokue wae reta joko pe ñonoï. Jae reta umɨmbeu kawise Tumpa iñee jare Cristo rewa. Jare umbutuicha’ä reta jokua bestia jee re jare umbɨadora’ä reta jae jaanga re. Jare mbaetɨ onoi reta wi bestia imarka jesɨwa re jare ipo re. Jáeramo bestia uyayuasɨaka reta kɨsepuku pe. Erëi Tumpa umbɨjekowe ye ueru reta umanokue wae reta ipɨte wi. Jare jae reta onoita mbaepuere Cristo ndiwe miri año pewa. Jae reta rani ko jae Tumpa umbɨjekowe ye wae. Erëitu ïru umanokue wae reta ikowe yeta’ä jokua miri año uasa rewa.

Apocalipsis 22:4

Jae reta uechata Tumpa jowa etei jare onoita reta Tumpa jee jesɨwa re.

Apocalipsis 6:6

Jare ayandu jokua irundɨ mbae tekowe onoi wae ipɨte wi jei: “Pëti kilo trigo jepɨ pëti ara mbarawɨkɨ pewa, jare mbapɨ kilo cebada jepɨ pëti ara mbarawɨkɨ pewa. Jare awɨye erükumewa aceite jare vino,” jei.

Apocalipsis 7:1

Jare kua jaɨkue rupi aecha irundɨ araɨwa reta uyemboɨ ñonoï ɨwɨ pe. Pëti uyemboɨ oï warasɨ oë wae kotɨ, jare ïru uyemboɨ oï warasɨ uike wae kotɨ. Ïru uyemboɨ oï norte kotɨ, jare ïru uyemboɨ oï sur kotɨ. Jare jae reta oyopia yureko irundɨ kotɨ kotɨ wi ɨwɨtu uyepeyu wae, awɨye waerä ɨwɨtu uyepeyu ɨwɨ re, jare mar re, jare ɨwɨra reta re.

Apocalipsis 7:2

Kua araɨwa reta pe uñemee ma mbaepuere urükumewa waerä ɨwɨ jare mar. Jare aecha ïru araɨwa uyupi oo oï ara kotɨ warasɨ oë wae kotɨ wi. Jare aecha ipo pe wɨraa pëti marka – jokua ko jae Tumpa ikoño mái wae imarka. Jokua pɨpe araɨwa umɨseñarata iko Tumpa uiparawo wae reta.

Apocalipsis 9:4

Jare Tumpa jei tuku reta pe awɨye urükumewa waerä opaete temitɨ jokɨ reta ɨwɨ pe oï wae jare ɨwɨra reta. Jaeño ipuere umbɨpere reta jokua mbaetɨ Tumpa imarka jesɨwa re onoi wae reta.