Apocalipsis 4:8 - Biblia

⁸ Jare pëti pëti jokua irundɨ mbae tekowe onoi wae reta ime onoi owa ipepo reta. Jare opaete jete rupi ime onoi jeta jesa reta. Jae reta ara rupi jare pɨ̈tu rupi jekuaeño jei reta ikueri mbae rewe: “Jupi, jupi, jupi wae ko jae Tumpa ikoño mái wae jare opaete mbaepuere onoi wae. Jae ko iyɨpɨ wiwe ikoño mái wae, jare jekuaeño oï wae, jare jaeño mái pewa ikota wae.”

Guaraní Pe (Western): Simba

⁸ Jare penti penti jocua irundɨ mbaembae icove vae reta güɨnoi seis ipepo reta, jare jete rupi güɨnoi jeta jesa. Jare jecuaeño jei reta: —YandeYa Tumpa opaete mbaepuere güɨnoi vae iyoa mbae etei co. Jae iyɨpɨ güive jare añave jecuaeño ico. Jare jae jecuae oĩta. Jucuarãi jei reta ara rupi jare pɨ̃tu rupi. Uputuu'ã etei reta.

Apocalipsis 4:8 Iomraidhean Croise

Génesis 17:1

Abram ime wɨreko noventa y nueve año yawe, Tumpa uyekuaa ye chupe jare jei chupe: “Che ko jae Tumpa chembaepuere tuichaete wae,” jei chupe. “Iñemɨïru kawi che ndiwe jare iyapo jupi waeño.

Éxodo 15:11

OreTumpa, ¡mbaetɨ pëti awe nde rami! ¡Mbaetɨ kiawe jupiete jare imbaepuerete nde rami! ¡Opaete wae tumbutuicha nderee, echa’ä jaeño nde ndepuere ndiyapo mbaembae kɨye pewa ipuere mbaei kía uyapo wae!

Éxodo 3:14

Jayawe Tumpa jei Moisés pe: “Che cheree ko CHE KO CHE,” jei chupe. “Nde ndereta chupe reta, ‘CHE KO CHE jee wae chembou pekotɨ.’

Hechos 20:31

“Jáeramo pemae kawi peyupe,” jei. “Jekuaeño pemandúa jokua mbapɨ año rupi pe ndiwe aiko wae re. Pemandúa kërái ara rupi jare pɨ̈tu rupi cheresaɨ rewe jekuaeño pumbɨarakuaa aiko wae re,” jei chupe reta.

2 Corintios 6:18

Che aikota peRurä, jare pe reta pikota cheraɨrä jare cherayɨrä.” Jukuärái jei yandeYa imbaepuerete wae.

1 Tesalonicenses 2:9

Pemandúa kawi peï, hermano reta, kërái ore täta nduparawɨkɨ ara rupi jare pɨ̈tu rupi ime waerä nonoi orerembiurä. Jukuärái nduyapo awɨye waerä pe reta piyembɨpɨa’ä oreré numɨmbeu pewe rambuewe ñee ikawi wae Tumpa wi ou wae.

1 Timoteo 4:16

Jare iyandareko kawi ndiyé ndiko kawi waerä jare ndeporomboe kawi waerä. Jekuaeño iñemɨatangätu kua mbaembae re. Echa’ä jukuärái ndiyapo yawe, Tumpa uepɨta jokua nderé uyapɨsaka wae reta kërái jae nderepɨta oï wae rami.

2 Timoteo 4:2

Jekuaeño emɨmbeu Tumpa iñee. Jekuaeño iñemɨatangätu nemɨmbeu waerä Tumpa iñee kía kía uipota uyapɨsaka nderé wae pe jare uipota’ä uyapɨsaka nderé wae reta pe wi. Ikuaaka chupe reta kërái uyawɨ ñonoï wae, jare embɨeta chupe reta wi. Emɨkɨrëɨ reta Tumpa kotɨ, jare emboe kawi reta ndepɨawasu rewe.

Hebreos 13:8

Jesucristo uyembɨambɨe’ä etei iyɨpɨ wiwe, añawe rewa, jare jaeño mái pewa.

Apocalipsis 1:4

Pe Cristo re perowia wae reta chiu tëta wasu ɨwɨ Asia pewa pe piyembatɨ wae, che araaka aï pewe kua saludo. Che ko jae Juan kua aikuatía aï wae. Tumpa iyɨpɨ wiwe ikoño mái, jare jekuaeño oï, jare jekuaeñota oï. Jae jekuaeño tipɨakawi pewe jare tuyapo pewe piko waerä pepɨakatu rewe. Jare jukuärái wi tuyapo pewe Jesucristo jare Espíritu Santo. Kua Tumpa iEspíritu chiu wese ye jupi jare Tumpa iwapɨa jowai oï. Jesucristo ko jae jekuaeño uikuaaka añetete wae. Jae ko opaete umanokue wae reta ikowe ye wae itenondewaete. Jare jae ko opaete ɨwɨ pewa mburuwicha wasu reta imburuwicha yuapɨ ye. Yande reta jeta ma yayawɨ Tumpa kotɨ. Erëi Jesucristo yanderau jare upɨyere juwɨ opa oyoe waerä yandewi yandereko.

Apocalipsis 1:8

Jare yandeYa Tumpa jei: “Che ko jae Alfa jare Omega jee wae,” jei. “Che ko jae iyɨpɨete wae jare iyapɨete wae. Che ko jae jekuaeño oï wae, jare iyɨpɨ wiwe ikoño mái wae, jare jaeño mái pewa ikota wae. Che ko jae opaete mbaepuere anoi wae,” jei.

Apocalipsis 11:17

Jare jei reta: “OreYa Tumpa, nde nenoi opaete mbaepuere. Nde ko jae jekuaeño oï wae, jare iyɨpɨ wiwe ikoño mái wae, jare jaeño mái pewa ikota wae. Ore numee yasurupái ndewe. Echa’ä nembaepuere tuichaete wae rupi ndiyeyapo ma opaete wae imburuwicha wasurä.

Apocalipsis 14:11

“Jare jokua tata jae reta uiporarata ñonoï pɨpe wae jae ko tata owe mbae wae. Ara rupi jare pɨ̈tu rupi uiporarata reta, jare ndarau michi pewa yepe uputuu reta,” jei. “Jukuärái uyeyapota opaete jokua tenondewa bestia re jare jae jaanga re umbɨadora wae reta pe, jare opaete bestia imarka onoi wae reta pe. Jokua marka ko jae bestia jee,” jei.

Apocalipsis 14:3

Echa’ä jokua 144.000 wae reta ukäta ñonoï Tumpa iwapɨa jowai, jare jokua irundɨ mbae tekowe onoi wae reta jare mburuwicha reta jowai. Jae reta ukäta ñonoï käta ipɨau wae. Jare ndarau kiawe ipuere uikuaa jokua ukäta reta wae – jaeño jae reta ipuere uikuaa. Tumpa uepɨ kua reta ɨwɨ pewa reta ipɨte wi.

Apocalipsis 15:3

Jare jae reta ukäta Moisés ikäta pe jare Owecha kuimbae taurusu wae ikäta pe. Ukäta reta kuärái: “OreYa Tumpa, nde opaetei mbaepuere nenoi. ¡Nderembiapo reta ikawiete jare orembɨpɨakañɨete! Nde ko jae opaete wae imburuwicha wasurä jaeño mái pewa. Jare opaete nde ndiyapo wae jupi ko jare añetete ko.

Apocalipsis 15:7

Jare jokua irundɨ mbae tekowe onoi wae reta wi pëti wae umee jokua chiu araɨwa reta pe pëti pëti copa oro pewa. Jare Tumpa ikoño mái wae iarasɨ tɨnee oï jokua copa reta pe.

Apocalipsis 16:14

Jokua aña reta ipuere uyapo mbaembae umbɨpɨakañɨete waerä ɨwɨ pewa reta. Jae reta yuraa opaete ɨwɨ rupi umbatɨ waerä mburuwicha wasu reta jare isɨndaro reta ndiwe ombowaicho waerä tëi Tumpa. Jokua ñeräro uyeyapota oï Armagedón jee wae pe. Jukuärái ko jee hebreo ñee pe. Erëi Tumpa opaetei mbaepuere onoi. Jare jae uiporarakata oï chupe reta jokua ara. YandeYa jei, “Mase, che ayu yeta aï pepɨranoe pewa pëti imonda wae ou rami. Jare jokua uyandareko kawi ñonoï wae reta jare jupi rupi yureko wae reta uyekoueteta ñonoï. Echa’ä che ayu ye awäe yawe, jae reta ndarau imara kía nani etei uyepokouka wae rami,” jei.

Apocalipsis 16:7

Jayawe ayandu ïru ñee oë mbaerenda mbae utimbo kawi wae uyeapɨ jese wae wi. Jare jei kuärái: “Añetete jukuärái ko, oreYa Tumpa. ¡Nde nembaepuerete ye wae ko! Nde ndepurumbɨjeko jupi wae rupi jare ndiporaraka añetete wae rupi,” jei.

Apocalipsis 19:15

Kua Tumpa Iñee jee wae, iyuru wi oë pëti kɨsepuku jaimbe wae. Jokua pɨpe opata umɨamɨri ɨwɨ pewa reta. Jare jae onoita jese reta tuicha mbaepuere. Upɨ̈rota jese reta kërái uva iya uitami yawe upɨ̈ro jese wae rami. Jare jukuärái jae rupi Tumpa opaete mbaepuere onoi wae uitɨta oï iarasɨ wasu jowaicho reta re.

Apocalipsis 19:4

Jayawe jokua veinticuatro mburuwicha reta jare jokua irundɨ mbae tekowe onoi wae reta uñeñono ɨwɨ re Tumpa iwapɨa jowai jare jae jee umbutuicha reta. Jare jei reta: “¡Jukuärái tuiko! ¡Opaete wae tumbutuicha Tumpa jee!” jei reta.

Apocalipsis 21:22

Jare mbaetɨ etei aecha tupao wasu jokua tëta wasu pe. Echa’ä yandeYa Tumpa imbaepuerete ye wae jare Owecha kuimbae taurusu wae, jae reta etei ñonoï joko pe tupao wasu ipepɨka pe.

Apocalipsis 3:7

Jare yandeYa jei wi chewe: “Ime pëti araɨwa uyandareko oï opaete cheré wɨrowia wae reta re tëta wasu Filadelfia pe. Ikuatía chupe kua chiñee kuärái: ‘Che ko jae Jupiete wae jare Añetete pewa. Cheeño ime anoi tëta wasu Jerusalén ipɨau wae jöke illave, kërái arakaete mburuwicha wasu David jëta wasu illave wɨreko wae rami. Jáeramo che aipea yawe jokua öke, ndarau kía ipuere uyukenda ye. Jae ramiño wi che ayukenda yawe jokua öke, ndarau kía ipuere uipea ye.

Apocalipsis 4:4

Jare aecha jokua mburuwicha iwapɨa iyɨpɨ rupi ïru veinticuatro wapɨa reta uyere etei iko jese wae. Jare joko pe uwapɨ ñonoï veinticuatro mburuwicha reta. Jae reta omonde ñonoï temimonde tïi wae, jare iñäka re onoi reta corona oro pewa.

Apocalipsis 4:6

Jare aecha wi jokua wapɨa jowai pëti ɨpa wasu echa. Jare jokua jesäkasɨ vidrio rami. Jare jokua mburuwicha iwapɨa iyɨpɨ rupi etei aecha irundɨ mbae tekowe onoi wae reta. Jae reta jete rupi onoi jeta jesa reta jenonde kotɨ jare jaɨkue kotɨ.

Apocalipsis 4:9

Jukuärái jokua mbae tekowe onoi wae reta umbutuicha jokua wapɨa pe uwapɨ oï wae jee – jae ko ikoño mái wae jee. Jare jae reta uyapo yawe jukuärái jare umee reta yawe yasurupái chupe,

Apocalipsis 5:6

Jayawe aecha pëti Owecha kuimbae taurusu wae. Jare jete re uyekuaa ipere jendakue. Chemaerä jae chawaa jokua uyuka reta wae. Jae uyemboɨ oï jokua mburuwicha iwapɨa jare jokua irundɨ mbae tekowe onoi wae reta ipäu pe, jokua mburuwicha reta ipɨte pe. Jae onoi chiu jäti jare chiu jesa. Jare jokua chiu jesa uyembɨjaanga oï Tumpa iEspíritu chiu wese ye jupi wae Tumpa omondo opaete ɨwɨ rupi wae.

Apocalipsis 6:1

Jayawe che aecha jokua Owecha kuimbae taurusu wae uipea tupapire imboyaka pëti wae. Jayawe ayandu pëti mbae tekowe onoi wae jei: “¡Eyu!” Jare jae uyemɨngeta yawe, iñee uyendu ara jɨapu wae echa.

Apocalipsis 6:6

Jare ayandu jokua irundɨ mbae tekowe onoi wae ipɨte wi jei: “Pëti kilo trigo jepɨ pëti ara mbarawɨkɨ pewa, jare mbapɨ kilo cebada jepɨ pëti ara mbarawɨkɨ pewa. Jare awɨye erükumewa aceite jare vino,” jei.

Apocalipsis 7:11

Jare opaete araɨwa reta uyemboɨ ñonoï jokua mburuwicha wasu iwapɨa jare jokua mburuwicha reta jare jokua irundɨ mbae tekowe onoi wae reta iyɨpɨ rupi. Jayawe jae reta uñeñono ɨwɨ re uñemɨmichi rewe mburuwicha wasu iwapɨa jowai jare umbutuicha reta Tumpa jee.

Apocalipsis 7:15

“Jáeramo añawe ñonoï reta Tumpa joo pe iwapɨa jowai uyeyokui reta waerä chupe ara rupi jare pɨ̈tu rupi,” jei. “Jare jokua imburuwicha wasu iwapɨa pe uwapɨ oï wae uyandarekota oï jese reta.