Apocalipsis 4:1 - Biblia

¹ Kua jaɨkue rupi amae jare aecha pëti öke uyepea oï ara pe. Jare ayandu jokua ñee tenonde yawe ayandu wae – jae ko jokua ñee täta uyemɨngeta wae temimbɨ wasu uñee wae rami wae. Jare jei chewe: “Iyupi kua ɨwate, jare aechakata ndewe mbaembae uasata oï kuri kua jaɨkue rupi wae,” jei.

Guaraní Pe (Western): Simba

¹ Cua jaɨcue rupi amae jare aecha penti onque uyepea oĩ ara pe. Jare ñee tenonde yave ayandu vae jei cheve. Penti trompeta rami iñeeãta reve jei cheve: —Iyupi cua pe jare aechacata ndeve mbaembae uyeyapota vae.

Apocalipsis 4:1 Iomraidhean Croise

Éxodo 1:1

Kuärái ko Jacob taɨ reta jae ndiwe yuraa uwäe ɨwɨ Egipto pe wae reta, pëti pëti wae jëtara reta ndiwe.

Éxodo 19:24

Jayawe Tumpa jei Moisés pe: “Ekua ye Israel iñemoñaa reta kotɨ jare eru nde ndiwe nderɨkeɨ Aarón. Erëi sacerdote reta jare ïruwe reta awɨye tuasa ɨwɨtu wasu uyemɨaanga oï wae yuweru reta waerä chekotɨ. Jukuärái uyapo reta yawe, aiporarakata aï chupe reta,” jei Tumpa Moisés pe.

Éxodo 24:12

Tumpa jei Moisés pe: “Iyupi eyu kua ɨwɨtu wasu re chekotɨ. Jare kua pe neï rambuewe, che ameeta ndewe mokui ita ipe kawi wae chiñee aikuatía jese wae. Jokua re nemboeta opaete Israel iñemoñaa reta,” jei chupe.

San Mateo 3:16

Jare uyembɨsakambuka ma yawe, Jesús oë ɨ wi. Jare jupiwoiño ara uyepea, jare jae uecha Espíritu Santo uweyɨ ou ara wi uwapɨ jese pëti pɨkasu rami.

Marcos 1:10

Jare Jesús oë ye ɨ wi yawe, jupiwoi uecha ara uyepea oï. Jare uecha wi Espíritu Santo uweyɨ ou ara wi uwapɨ jese pëti pɨkasu rami.

San Lucas 3:21

Erëi ndei oñono reta Juan peresorɨru pe mbowe, Juan umbɨsakambu iko jeta wae reta ɨ pe. Jare jae nunga wi Juan umbɨsakambu Jesús. Jare jokua jaɨkue rupi, Jesús uyerure iko Tumpa pe. Jare jae uyerure iko rambuewe, ara uyepea.

San Juan 16:13

“Erëi Espíritu Santo ou ma yawe, jae pembɨarakuaa kawita añetete wae rewa. Echa’ä ñee jae uikuaakata oï pewe wae jae iñeeño’ä ko. Tumpa jei chupe wae, jokua ko uikuaaka yuapɨ yeta oï pewe. Jare jae uikuaakata oï wi pewe mbaembae taɨkue rupi uasata oï kuri wae,” jei.

Hechos 10:11

Jare jukuärái Pedro uecha ara uyepea oï, jare uweyɨ ou ɨwɨ kotɨ pëti tarapo tuicha wae. Kua uyembɨweyɨ wae uyepɨsɨ iko irundɨ itiäkua reta pe.

Hechos 7:56

Jayawe Esteban jei: “¡Mase! ¡Aecha ara uyepea oï, jare joko pe uyemboɨ oï kuimbaerä uyeyapo wae yandeRu Tumpa iyakata kotɨ!” jei.

Apocalipsis 1:10

Jare aipota aikuaaka pewe kua: Pëti domingo ara pe Espíritu Santo uechaka chewe amokue mbaembae. Jae chembɨpau wae echa. Jukuärái aramoiño ayandu chekupe kotɨ pëti ñee täta uyemɨngeta wae temimbɨ wasu uñee wae rami.

Apocalipsis 1:12

Jayawe ayerowa amae aecha waerä kía chemɨngeta oï wae. Jare amae yawe, aecha chiu mechero iwapɨka oro pewa.

Apocalipsis 1:19

“Añawe ikuatía kua mbaembae ndecha wae. Jare che aipota ndikuatía waerä wi ïru mbaembae reta añawe aechakata aï ndewe wae – jae ko mbaembae añawe uyeyapo oï wae jare taɨkue rupi uyeyapota oï kuri wae,” jei chewe.

Apocalipsis 11:12

Jare jokua mokui kuimbae reta uyandu ara wi ñee jei usapɨkai rewe: “Piyeupi peyu,” jei. Jayawe uyeupi reta oo ara kotɨ amapɨ̈tu re jowaicho reta jowake.

Apocalipsis 11:19

Jare kua jei reta ma yawe, tupao wasu ara pe oï wae uyepea, jare o pe uyekuaa Tumpa arakae jei wae yemɨmandúa jɨru. Jare uyekuaa uwera wae, jare uyendu jɨapu täta wae amaterere rami. Jare uyendu wi ara jɨapu wae. Jare jawoi pewa ɨwɨ ukäta. Jare oa wi amandau jeta wae.

Apocalipsis 16:17

Joko wi ïru araɨwa upɨyere icopa. Kua re chiu ma upɨyere. Jare upɨyere yawe, jae upɨyere ɨwɨtu uyepeyu wae re. Jare jupiwoiño oë ñee täta wae tupao wasu ara pe oï wae wi, Tumpa iwapɨa wi. Jare jokua ñee jei kuärái: “¡Tumpa iarasɨ opata ma oï!” jei.

Apocalipsis 19:11

Jayawe che aecha ara uyepea oï. Jare aecha pëti kawayu tïi wae. Jare opo jese wae ko jee Tumpa Iñee. Jesa uyekuaa kërái tata jendɨ wae rami, jare iñäka re onoi jeta corona mburuwicha wasu pewa reta. Jare jae jemimonde tuwɨ yepái. Jae ko jekuaeño jupi uyapo wae jare añetete wae umɨmbeu wae. Jae jupi rupi upurumbɨjeko, jare uñeräro jowaicho reta ndiwe. Jare uyekuatía oï jese pëti tee kiawe uikuaa’ä wae. Jaeño uikuaa wae.

Apocalipsis 22:6

Jayawe araɨwa jei chewe: “Kua ñee reta añetete ko jare opaete wae ipuere wɨrowia katu jese,” jei. “Arakaete rupi yandeYa Tumpa uikuaaka mbaembae uasata oï wae jae iñee umɨmbeu wae reta rupi. Jare añawe jae ombou pëti araɨwa uikuaaka waerä uyeyokui chupe wae reta pe jupiwoiño mbaembae uasata oï wae,” jei.