Apocalipsis 20:6 - Biblia

⁶ Jare jokua tenonde ikowe ye wae reta uyekouete ñonoï. Echa’ä Tumpa oñono tee ma reta jae imaerä, jare ndarau uiporara reta Tatawasurenda pe – jae ko jokua mano mokuía jei chupe reta wae. Jae reta yurekota sacerdote retarä uyeyokui waerä Tumpa pe jare Cristo pe. Jare jae reta ñonoïta mburuwicharä Cristo iyɨpɨ pe miri año pewa.

Guaraní Pe (Western): Simba

⁶ Uyeroviata reta co tenonde icove yeta yugüeru umanocue vae reta ipɨte güi vae reta. Echa'ã uñeñono tee Tumpa peguarã vae reta co. Jocua mano mocuia ndarau ipuere jese reta. Jae reta yugüɨrecota sacerdote retarã, uyeyocui vaerã Tumpa jare Cristo pe. Jare oporoyocuita reta Cristo ndive mil año pegua.

Apocalipsis 20:6 Iomraidhean Croise

San Lucas 14:15

Kua uyandu yawe, pëti wae uwapɨ iko Jesús ndiwe wae mesa pe jei chupe: “Tumpa oï ma yawe opaete wae imburuwicha wasurä jaeño mái pewa, ¡kërái eteita ndipo uyekou joko pe ukaruta oï wae reta!” jei chupe.

Romanos 12:1

Jayawe hermano mii reta, añawe yaikuaa ko Tumpa yandepararekoete wae. Jáeramo, ¿kërái ra ikawita yayeyokui waerä chupe añawe? Arakae rupi Israel iñemoñaa reta wɨraa mbaemɨmba uyuka umee waerä Tumpa pe. Jare jokua mbaemɨmba Tumpa pewaräño ko. Jare jukuärái ramiete wi che pumɨñera piñemee waerä Tumpa pe opaete perekowe rewe jae imaeräño piko waerä. Piñeñono tee Tumpa pewarä pembɨyerowia waerä. Echa’ä jukuärái ko jupi pembutuicha waerä Tumpa jee.

Romanos 8:17

Jare yande ko jae Tumpa taɨ reta ramo, yandepuere yaikuaa kawi Tumpa upi oï yanemaerä mbaembae ikawiete ye wae umee waerä yandewe kuri. Jokua ko jae mbaembae añawe Cristo uyekou oï jese wae, jare yande reta wi yayekouta ñaï kuri jokua mbaembae re Cristo ndiwe etei. Kua ikawi yaikuaa kawi waerä. Echa’ä añawe rupi yaiporara ñaï Cristo re yarowia ramo. Erëi Cristo jae nunga wi uiporara kua ɨwɨ pe iko rambuewe. Jare yande yaiporara yawe kërái Cristo uiporara wae rami, jukuärái wi yayekouta ñaï jae ndiwe jae oï ma yawe opaete wae imburuwicha wasurä jaeño mái pewa.

2 Timoteo 2:12

Jare ñamɨawäta yawe yaiporara wae yayeyokui chupe ramo, jae yandapota ñaï waerä mburuwicharä jae ndiwe jaeño mái pewa. Erëi kía uikuaku yawe, jae uikuakuta wi.

1 Pedro 2:5

Tumpa peapo oï pëti tupao wasu rami Espíritu Santo iko pɨpe waerä. Añetete pe reta ko jae jokua tupao wasu pewa ita tekowe ime onoi wae reta rami. Jukuärái Tumpa peñono tee oï piko waerä sacerdote retarä. Echa’ä jae uipota pe reta piyeyokui waerä chupe jare piyapo waerä jokua mbaembae jae umbɨyerowia wae. Jare jukuärái pepuere piyapo Jesucristo pemborɨ oï wae rupi.

1 Pedro 2:9

Erëi pe reta ko jae Tumpa uiparawo wae reta. Pe reta ko jae sacerdote reta piyeyokui peï yaneMburuwicha wasu ara pewa pe. Jare Tumpa peñono tee ma pe reta piko waerä jae imaerä, pemɨmbeu waerä kërái jokua jae uyapo wae ikawiete ye ko. Echa’ä tenonde yawe pikuaa’ä piko añetete wae Tumpa rewa jare jukuärái pikose pɨ̈tumimbi pe rami. Erëi añawe jae uyekuaaka ma pewe, jare jukuärái pereni ma ikotɨ jokua pɨ̈tumimbi wi piko waerä tembipe ikawiete wae pe.

Apocalipsis 1:6

Jare jokuaño’ä uyapo. Jae yandapo wi mburuwicha wasu retarä jare sacerdote retarä jukuärái yayeyokui waerä Tu pe – jae ko yandeRu Tumpa pe. Jesucristo jee tuyembutuichaka, jare jaeño tonoi mbaepuere tuichaete wae jaeño mái pewa. Jukuärái tuiko.

Apocalipsis 14:13

Jayawe ayandu ara wi ñee jei chewe: “Ikuatía kuärái: Kua wiwe yandeYa re wɨrowia rewe umanota wae reta uyekoueteta ñonoï,” jei chewe. Jare joko wi Espíritu Santo jei: “Añetete ko. Jae reta uyekoueteta ñonoï, echa’ä uputuuta reta iparawɨkɨ wi. Jare Tumpa umɨñatimata oï chupe reta mbarawɨkɨ uyapo reta Tumpa pewarä wae re,” jei.

Apocalipsis 2:11

‘Ipotawe kía uipota uikuaa kawi wae, tuyapɨsaka kua ñee re – jae ko Espíritu Santo jei oï cheré wɨrowia wae reta pe kerupi rupi uyembatɨ ñonoï wae reta pe. ‘Ikawi mbae wae umɨamɨri wae reta ndarau etei uiporara mano mokuía re.’ Jukuärái ikuatía,” jei chewe.

Apocalipsis 20:14

Jare opaete kía kía jee uyekuatia’ä oï jokua tupapire pe wae reta Tumpa opa omomboka reta Tatawasurenda pe. Kua ko jae mano mokuía jei chupe reta wae. Jare joko wiwe ndarau ye ma ime mano jare umanokue wae reta jenda, echa’ä jokua mbaembae opa ma ukañɨ tata wasu pe.

Apocalipsis 21:8

“Erëi jokua urukɨye jekowe umee wae reta, jare uipota’ä wɨrowia cheré wae reta, jare mbae kachi wae uyapo wae reta, jare upuruyuka wae reta, jare iawasapota wae reta, jare ipaye wae reta, jare tumparaanga re umbɨadora wae reta, jare opaete iyapu wae reta wi – opaete jokua nunga reta iyapɨ ko jae tata wasu azufre jendɨ oï wae pe. Kua ko jae mano mokuía jei chupe reta wae,” jei Tumpa.

Apocalipsis 22:5

Jare ndarau ime joko pe pɨ̈tu. Jare ndarau uiporu reta mechero jare warasɨ jembipe, echa’ä yandeYa Tumpa etei jembipeta chupe reta. Jare jae reta yurekota mburuwicharä jaeño mái pewa.

Apocalipsis 22:7

“YandeYa jei: ‘Mase, ayu yeta jupiwoiño. Aikuaaka ma kua tupapire rupi mbaembae uasata oï wae. Jayawe uyekouete ñonoï kua ñee uipɨsɨ wae reta,’ jei,” jei araɨwa chewe.

Apocalipsis 3:21

‘Che opa ma apurumɨamɨri, jare joko wi awapɨ cheRu ndiwe iwapɨa mburuwicha wasu pewa re. Jare jukuärái wi ikawi mbae wae umɨamɨri wae reta pe che ameeta uwapɨ waerä che ndiwe chewapɨa pe.

Apocalipsis 5:10

Jare jae reta ndiyapo mburuwicha wasu retarä jare sacerdote retarä ipuere reta waerä uyeyokui yandeTumpa pe. Jare jae reta onoita mbaepuere ɨwɨ pe.” Jukuärái ukäta reta.