Apocalipsis 19:20 - Biblia

²⁰ Jare joko pe oï wi jokua bestia taɨkue rupi uyekuaa wae – jae ko jokua Tumpa iñee umɨmbeuraanga wae. Jare jae ko tenonde yawe tenondewa bestia jee re uyapo mbaembae kuimbae retaño ipuere’ä uyapo wae. Jukuärái jae umbɨtawɨ jokua bestia imarka onoi wae reta jare jaanga re umbɨadora wae reta. Erëi Tumpa uipɨsɨka jokua bestia jare Tumpa iñee umɨmbeuraanga wae. Jare jae reta mokui rewe Tumpa omomboka Tatawasurenda pe. Jokua tata wasu jendɨ oï azufre ndiwe.

Guaraní Pe (Western): Simba

²⁰ Jare uyepɨsɨca jocua maemɨmba guasu jocua ĩru maemɨmba guasu jei umɨmbeu co Tumpa iñee upurumbɨtavɨ vaerã vae ndive. Echa'ã jocua upurumbɨtavɨ vae tenonde yave uyapo mɨacañɨ reta jocua maemɨmba guasu jovai, umbɨtavɨ vaerã maemɨmba guasu imarca güɨnoi vae reta. Echa'ã jae reta umbɨadora jocua maemɨmba guasu jaanga. Jayave cua mocui reve uyemomboca jecove reve tata guasu pe. Joco pe jendɨ oĩ azufre.

Apocalipsis 19:20 Iomraidhean Croise

Génesis 19:24

Jayawe aramoiño Tumpa ombou ara wi tata jare azufre jendɨ wae tëta wasu reta Sodoma jare Gomorra re.

San Mateo 7:15

“Piyandareko kawi piyé kuri, echa’ä outa oï Tumpa iñee umɨmbeuraanga wae reta. Jae reta ikota pepɨte rupi owecha reta rami, echa’ä uyekuaata reta pewe ikoi wae echa rami. Erëi añetete jae reta ko yawa pochɨ wae rami,” jei.

Apocalipsis 17:12

“Jare jokua payandepo bestia jäti ndecha wae uyembɨjaanga oï payandepo mburuwicha wasu reta re. Kua payandepo reta ndeiño ñonoï mburuwicharä. Erëi pëti ara imeta onoi reta mbaepuere michi pewa jokua tenondewa bestia ndiwe,” jei.

Apocalipsis 19:19

Jayawe aecha jokua bestia, jare ɨwɨ pewa mburuwicha wasu reta jare opaete isɨndaro reta ndiwe. Jae reta uyembatɨ ma ñonoï uñeräro waerä jokua kawayu tïi wae re opo wae ndiwe jare isɨndaro reta ndiwe.

Apocalipsis 20:10

Jae reta uyembɨtawɨka Añawasu pe. Jare joko wi aecha jokua tata wasu azufre ndiwe jendɨ oï wae. Joko pe ko tenonde yawe Tumpa omomboka jokua bestia jare Tumpa iñee umɨmbeuraanga wae ndiwe. Jare amae aiko rambuewe, Tumpa omomboka Añawasu joko pe wi. Jae reta mbapɨ rewe uiporarata joko pe ara rupi jare pɨ̈tu rupi jaeño mái pewa.

Apocalipsis 21:8

“Erëi jokua urukɨye jekowe umee wae reta, jare uipota’ä wɨrowia cheré wae reta, jare mbae kachi wae uyapo wae reta, jare upuruyuka wae reta, jare iawasapota wae reta, jare ipaye wae reta, jare tumparaanga re umbɨadora wae reta, jare opaete iyapu wae reta wi – opaete jokua nunga reta iyapɨ ko jae tata wasu azufre jendɨ oï wae pe. Kua ko jae mano mokuía jei chupe reta wae,” jei Tumpa.

Apocalipsis 22:15

“Erëi ndarau uike kua tëta wasu pe jeko kachi wae reta, jare ipaye wae reta, jare iawasapota wae reta, jare upuruyuka wae reta, jare tumparaanga re umbɨadora wae reta, jare opaete uyerowia rewe upurumbɨtawɨ wae reta,” jei.

Apocalipsis 9:17

Jare jokua kawayu reta jare opo jese wae reta uyekuaa chewe kuärái: Ime onoi ipɨtía re temimonde ñeräro pewa – jae ko jiero pewa pɨ̈tasɨ wae, jare jowɨasɨ wae, jare iyuasɨ wae. Jare kawayu reta iñäka yawapɨ̈ta tuicha wae iñäka echa. Jare iyuru wi oë tata jare tatäti jare azufre.