Apocalipsis 17:8 - Biblia

⁸ Jayawe araɨwa jei wi chewe: “Kua bestia ndecha wae ikose tenonde yawe, erëi añawe mbaetɨ ma. Erëi uyekuaa yeta oï, echa’ä oëta ma oï ɨwɨkua wasu juwa mbae wae wi. Erëi jokua jaɨkue rupi Tumpa omombota Tatawasurenda pe jaeño mái pewa,” jei. “Jare ɨwɨ pewa reta ipɨakañɨeteta uecha yawe jokua bestia tenonde ikose wae uyekuaa ye ramo. Jae reta jee mbaetɨ uyekuatía oï ɨwɨ uyembɨpɨ wiwe Tumpa itupapire pe. Echa’ä jaeño tekowe opa mbae wae onoi wae reta jee uyekuatía oï jokua tupapire pe,” jei chewe.

Guaraní Pe (Western): Simba

⁸ Maemɨmba guasu ndeecha vae icose, ẽrei ico'ã ma. Ẽrei oẽta ɨvɨcua quɨpe ete vae güi. Ẽrei oo yeta cañɨtei pe. Jare ɨvɨ pe yugüɨreco vae reta uecha yave jocua maemɨmba guasu icose vae, ipɨacañɨta reta. Echa'ã jae reta jee uyecuatia'ã oĩ libro tecove opa mbae vae pegua pe ɨvɨ uyeyapo güive. Jocua maemɨmba guasu mbaetɨ ma ico. Ẽrei ico yeta co —jei—.

Apocalipsis 17:8 Iomraidhean Croise

San Mateo 25:34

“Joko wi che mburuwicha wasurä aïta wae, jaeta cheakata kotɨ ñonoï wae reta pe: ‘CheRu uyapo ma pewe piyekou waerä che ndiwe che opaete wae imburuwicha wasurä aï wae re. CheRu kua uyapɨkatu ma pewe ɨwɨ uyembɨpɨ wiwe. Peyu piyekou jese.

San Lucas 10:20

“Erëitu awɨye piyerowia aña reta uyapo pe pere chupe wae re. Piyerowiata ko peree uyekuatía ma oï ara pe wae re,” jei chupe reta.

San Lucas 8:31

Jare aña reta jekuaeño umɨñera Jesús awɨye waerä omondo reta ɨwɨkua wasu juwa mbae wae pe.

San Juan 17:24

“CheRu mii, ndei ɨwɨ uyeyapo mbowe, nde cherauño mái jare nemee chewe mbaepuere jupiete ye wae. Jare che aipota jokua kía nunga nde nemee chewe wae reta yureko waerä che ndiwe kiape che aikota wae pe. Echa’ä che aipota jae reta uecha waerä chembaepuere jupiete ye wae,” jei.

Hechos 15:18

Jae ko arakae wiwe uikuaaka kua mbaembae.’ Jukuärái uyekuatía oï,” jei Jacobo chupe reta.

Efesios 1:4

Jukuärái Tumpa uipota uyapo yandewe opaete yande pëti ramiño ñaï Cristo re wae. Echa’ä iyɨpɨ wiwe jae yanderau ndei ɨwɨ uyapo mbowe, jare yandeparawo ñaï waerä jae imaeräño jare yandereko mbae wae rami.

Tito 1:2

Jae reta wɨrowia kawi yawe Cristo re jare yemboe añetete wae uikuaa kawi reta yawe, wɨrowia katu rewe uärota ñonoï tekowe opa mbae wae. Echa’ä ndei ɨwɨ uyembɨpɨ mbowe, Tumpa jei umeeta oï yandewe tekowe opa mbae wae. Jare Tumpa ndarau etei iyapu yandewe.

1 Pedro 1:20

Ndei ɨwɨ uyeyapo mbowe yandeRu Tumpa uiparawoño mái Cristo jae perepɨ waerä. Jare jukuärái jae uyapo ma pewe kua ara taɨkuewa reta pe, echa’ä ou ma ikawi waerä pewe.

Apocalipsis 11:7

Jayawe jae reta opa ma Tumpa rewa umɨmbeu yawe, pëti mbaemɨmba echa ipɨrätaete jare pochɨete wae oëta jokua ɨwɨkua wasu juwa mbae wae wi. Jare jae ombowaichota jokua mokui kuimbae reta, jare umɨamɨrita, jare uyukata reta.

Apocalipsis 17:11

“Jare jokua bestia tenonde yawe ikose wae erëi añawe mbaetɨ ma iko wae, jae uyembɨjaanga oï ambɨe mburuwicha wasu ndeiño ou wae re. Jokua re juri. Jare jae ikota jokua chiu mburuwicha wasu reta rami. Erëi taɨkue rupi Tumpa omombota Tatawasurenda pe jaeño mái pewa,” jei chewe.

Apocalipsis 17:2

“Ɨwɨ pewa mburuwicha wasu reta uyapo awasa jokua kuña ndiwe. Jare jokua awasa ko vino rami ɨwɨ pewa reta pe. Jare jokua pɨpe jae reta opa usawɨpo rami ñonoï,” jei chewe.

Apocalipsis 20:10

Jae reta uyembɨtawɨka Añawasu pe. Jare joko wi aecha jokua tata wasu azufre ndiwe jendɨ oï wae. Joko pe ko tenonde yawe Tumpa omomboka jokua bestia jare Tumpa iñee umɨmbeuraanga wae ndiwe. Jare amae aiko rambuewe, Tumpa omomboka Añawasu joko pe wi. Jae reta mbapɨ rewe uiporarata joko pe ara rupi jare pɨ̈tu rupi jaeño mái pewa.

Apocalipsis 20:12

Jare aecha wi umanokue wae reta jenda uyepea ma oï. Jare aecha opaete umanokue wae reta joko pe yureko wae uyemboɨ ñonoï Tumpa jowai. Iparawete wae reta wiwe jare mburuwichakue retawe, opaetei joko pe ñonoï. Jare jokua mar pe iputupa umano wae reta joko pe ñonoï wi. Jare joko pe oï wi tupapire reta opaete ɨwɨ pewa reta mbaembae uyapo wae uyekuatía oï pɨpe wae. Jayawe araɨwa uipea jokua tupapire reta, jare Tumpa umbɨjeko umanokue wae reta pëti pëti mbaembae uyapo wae rupi. Jare joko pe oï wi pëti tupapire tekowe opa mbae wae onoi wae reta jee uyekuatía oï pɨpe wae. Jare jokua tupapire araɨwa uipea wi.

Apocalipsis 3:10

‘Che jae ma pewe pemɨawäta waerä opaño mbaembae pepɨawasu rewe, jare jukuärái piyapo ma. Jáeramo yepe tëi ara uwäeta oï opaete ɨwɨ pewa reta tuicha rupi uiporara waerä, erëi che puepɨta aï chuwi kuri.

Apocalipsis 3:5

‘Jukuärái wi ameeta temimonde tïi wae ikawi mbae wae umɨamɨri wae reta pe. Jare jae reta jee ndarau ambái tupapire tekowe opa mbae pewa wi – jokua ko jae tupapire kía kía tekowe opa mbae wae onoi wae reta jee uyekuatía oï pɨpe wae. Kua reta che aechakata cheRu pe jare cheRu iaraɨwa reta jowake. Jare jaeta chupe reta: “Kua reta ayapo chemaerä,” jaeta. Jukuärái ayapota upurumɨamɨri wae reta pe.