Apocalipsis 13:16 - Biblia

¹⁶ Jare bestia taɨkue aecha wae jei opaete wae onoi waerä pëti marka ipo iyakata kotɨ ani jesɨwa re. Jayawe ikuasɨ wae reta jare mburuwicha reta, jare ikokatu wae reta jare iparawete wae reta, jare täta rupi uyeyokui wae reta jare uyeyokui mbae wae retawe imeta ko onoi reta jokua marka.

Guaraní Pe (Western): Simba

¹⁶ Jare oyocui opaete vae - sambiaɨ reta jare ucuacuaa vae reta, icocatu vae reta jare iparavete vae reta, uyeyocui mbae vae reta jare uyeyocui vae reta - güɨnoi vaerã penti marca ipo iyacata re ani isɨva re.

Apocalipsis 13:16 Iomraidhean Croise

Éxodo 13:9

Kua semana oïta pemaerä pëti mbae yemɨmanduaka pewa peresɨwa re jare pepapɨ re oï wae rami. Pemɨmanduata oï mbaembae Tumpa yanemboe wae re pikuaa kawi peyupe waerä jare pere waerä wi. Echa’ä jae ko peTumpa perepɨ ɨwɨ Egipto pewa reta wi wae imbaepuere tuichaete wae rupi.

Hechos 26:22

Erëi Tumpa cherepɨ chuwi reta ramo, imeño aiko kua ara rewa. Jare jekuaeño amɨmbeu aï kua mbaembae opaete wae reta pe, iparawete wae reta wiwe jare mburuwicha reta pe awe,” jei. “Jokua mbaembae Moisés jare ïru kuimbae Tumpa iñee arakae umɨmbeu wae reta jei uyeyapota iko wae re, jokua reño ko che amɨmbeu wi.

1 Corintios 12:13

Echa’ä yepe tëi opaete yande reta ambɨe ye ye ko yandeyuwi, erëi Espíritu Santo yandapo ma pëti ramiño Cristo re. Yande ko jae Cristo jete pewa rami ipotawe kía ko yande wae. Ipuere ko yande judío ani judío mbae wae, jare uyeyokui wae ani uyeyokui mbae wae. Erëi opaete yande reta pëti ramiño ko ñaï Cristo re, jare yandepuere yayekou oyowake Espíritu Santo re yandepɨa pe oï wae rupi.

Gálatas 3:28

Añetete, ore judiorä nduiko wae reta jare pe judío mbae piko wae reta oyowakeño ko ñaï pëti ramiño Cristo re. Jare jae nunga wi täta rupi yayeyokui wae reta jare yayeyokui mbae wae reta oyowakeño ko wi. Jare yande kuimbaerä yaiko wae reta jare kuña reta oyowakeño ko wi. Echa’ä opaete yande reta ñaï pëti ramiño Jesucristo re ramo.

Gálatas 6:17

Mase, cherete re ime uyekuaa oï chembɨpere wae reta jendakue. Jokua uikuaaka oï kërái che tuicha aiporara ayeyokui kawi waerä yandeYa Cristo pe. Erëi jukuärai’ä ko jokua oporomboe kachi wae reta. Jáeramo añawe wiwe awɨye ma jae reta chembɨawái toï kuri.

Efesios 6:8

Jare timandúa reta kua re: Yayapo yawe mbaembae ikawi wae, yandeYa umɨñatimata oï yandewe ikawi wae jokua re. Jukuäraita ko kía pe uyeyokui wae jare uyeyokui mbae wae wi.

Colosenses 3:11

Jare kua tekowe ipɨau wae rupi pëti wae rami yayowake ma ñaï. Jayawe yanemaerä mbaetɨ ma judío reta jare judío mbae wae reta, uyembɨcircuncidaka wae reta jare uyembɨcircuncidaka mbae wae reta, ñana rupiwa reta jare ambɨe ɨwɨ pewa reta, uyeyokui wae reta jare uyeyokui mbae wae reta. YandeYa Cristo jeeño ko yambutuicha. Jare opaete yande pëti pëti wae reta, jae oyowakeño oï yandepɨa pe.

2 Timoteo 3:8

Jokua kuimbae oporomboeraanga wae reta ipɨayemɨngeta mbaetɨ ko jupi, jare jokua wɨrowia reta tëi wae re añetete’ä ko. Jae reta oyowaicho yemboe añetete wae kotɨ, kërái arakae ɨwɨ Egipto pe kuimbae ichoropa wae reta Janes jare Jambres jee wae reta oyowaicho Moisés kotɨ wae rami.

Apocalipsis 11:18

Ɨwɨ pewa reta uyembopochɨ tëi ndekotɨ. Erëi añawe ndearasɨ wasu nditɨta ma neï jese reta. Ou ma uwäe ara umanokue wae reta uyemboɨ waerä nderowai. Jare ipotawe kía urükumewa ɨwɨ pewa reta ndekotɨ wae, nde opata nembái. Jare niñee umɨmbeu wae reta pe jare opaete wae niñono tee nemaerä wae reta pe nemɨñatimata neï chupe reta ikawi wae. Iparawete wae reta wiwe jare mburuwichakue retawe, opaete uipɨu ndewi wae reta pe nde nemɨñatimata neï.” Jukuärái jei jokua mburuwicha reta.

Apocalipsis 15:2

Jayawe aecha pëti ɨpa wasu vidrio uyea tata ndiwe oï wae echa chewe. Jare jeta wae reta uyemboɨ oï jese. Jae reta ko jae jokua bestia tenondewa kotɨ umaeño’ä iyé wae reta, echa’ä umbɨadora’ä reta bestia re jare jae jaanga re. Jare umaeño’ä reta wi oñonoka waerä marka iyé. Jokua marka ko jae número umbɨjaanga bestia jee re wae. Jare pëti pëti jae reta ime onoi arpa Tumpa umee chupe wae.

Apocalipsis 19:18

peu waerä Tumpa jowaicho reta jetekue – jae ko mburuwicha wasu reta jetekue, jare sɨndaro itenondewa reta jetekue, jare kuimbae ipɨräta wae reta jetekue, jare kawayu reta jetekue, jare opo jese wae reta jetekue. Jae ko opaete Tumpa jowaicho uyeyokui wae reta jare uyeyokui mbae wae reta, jare iparawete wae reta jare mburuwicha reta jetekue,” jei.

Apocalipsis 19:20

Jare joko pe oï wi jokua bestia taɨkue rupi uyekuaa wae – jae ko jokua Tumpa iñee umɨmbeuraanga wae. Jare jae ko tenonde yawe tenondewa bestia jee re uyapo mbaembae kuimbae retaño ipuere’ä uyapo wae. Jukuärái jae umbɨtawɨ jokua bestia imarka onoi wae reta jare jaanga re umbɨadora wae reta. Erëi Tumpa uipɨsɨka jokua bestia jare Tumpa iñee umɨmbeuraanga wae. Jare jae reta mokui rewe Tumpa omomboka Tatawasurenda pe. Jokua tata wasu jendɨ oï azufre ndiwe.

Apocalipsis 19:5

Jare Tumpa iwapɨa wi oë pëti ñee jei kuärái: “Pembutuicha yandeTumpa jee opaete piyeyokui chupe wae reta jare chuwi pipɨu wae reta. Iparawete wae reta wiwe jare mburuwicha retawe, opaete pe reta pembutuicha yandeTumpa jee,” jei.

Apocalipsis 20:12

Jare aecha wi umanokue wae reta jenda uyepea ma oï. Jare aecha opaete umanokue wae reta joko pe yureko wae uyemboɨ ñonoï Tumpa jowai. Iparawete wae reta wiwe jare mburuwichakue retawe, opaetei joko pe ñonoï. Jare jokua mar pe iputupa umano wae reta joko pe ñonoï wi. Jare joko pe oï wi tupapire reta opaete ɨwɨ pewa reta mbaembae uyapo wae uyekuatía oï pɨpe wae. Jayawe araɨwa uipea jokua tupapire reta, jare Tumpa umbɨjeko umanokue wae reta pëti pëti mbaembae uyapo wae rupi. Jare joko pe oï wi pëti tupapire tekowe opa mbae wae onoi wae reta jee uyekuatía oï pɨpe wae. Jare jokua tupapire araɨwa uipea wi.

Apocalipsis 20:4

Jare aecha wi jeta mburuwicha reta iwapɨa jare joko pe uwapɨ ñonoï wae reta. Tumpa umee chupe reta mbaepuere mburuwicha wasurä yureko waerä. Jare aecha wi jeta umanokue wae reta joko pe ñonoï. Jae reta umɨmbeu kawise Tumpa iñee jare Cristo rewa. Jare umbutuicha’ä reta jokua bestia jee re jare umbɨadora’ä reta jae jaanga re. Jare mbaetɨ onoi reta wi bestia imarka jesɨwa re jare ipo re. Jáeramo bestia uyayuasɨaka reta kɨsepuku pe. Erëi Tumpa umbɨjekowe ye ueru reta umanokue wae reta ipɨte wi. Jare jae reta onoita mbaepuere Cristo ndiwe miri año pewa. Jae reta rani ko jae Tumpa umbɨjekowe ye wae. Erëitu ïru umanokue wae reta ikowe yeta’ä jokua miri año uasa rewa.

Apocalipsis 6:15

Jare opaete ɨwɨ pewa reta – jae ko mburuwicha wasu reta, jare ïru mburuwicha reta, jare ikokatu wae reta, jare sɨndaro itenondewa reta, jare mbaepuere onoi wae reta, jare opaete täta rupi uyeyokui wae reta, jare opaete uyeyokui mbae wae reta wi – opaetei jae reta opa uñemi tëi mbae ikua rupi jare ɨwɨtu wasu reta itape ipäu rupi.

Apocalipsis 7:3

Jare kua araɨwa usapɨkai rewe jei jokua irundɨ araɨwa reta pe: “Awɨye perükumewa ɨwɨ, jare mar, jare ɨwɨra reta ndei amɨseñara mbowe yandeTumpa pe uyeyokui wae reta jesɨwa pe,” jei chupe reta. Jayawe joko wi araɨwa oo upurumɨseñara.