Apocalipsis 12:9 - Biblia

⁹ Jayawe Miguel jare iaraɨwa reta omombo jokua dragón ara wi ɨwɨ pe opaete araɨwa jese uyemboya wae reta ndiwe. Jokua dragón ko jae mboi arakaete Eva umɨngeta wae. Jae ko Satanás, Añawasu yande yae chupe wae. Jae ko umbɨtawɨ opaete ɨwɨ pewa reta wae.

Apocalipsis 12:9 Iomraidhean Croise

Génesis 3:1

Mboi iyarakuaa katuete opaete ïru mbaemɨmba reta Tumpa ikoño mái wae uyapo wae wi. Jare mboi upɨrandu kuña pe: “¿Añetete yerá Tumpa jei pewe awɨye peu waerä pëti awe ɨwɨra reta ía kua mbaewɨyerenda pewa?” jei chupe.

Génesis 3:13

Jáeramo Tumpa upɨrandu kuña pe: “¿Mbae pa ndiyapo?” jei. Jare kuña jei chupe: “Mboi chembɨtawɨ; jáeramo che jau,” jei.

Isaías 14:12

Tumpa jei kuärái: “Nde, yasɨtata ndimbowe uyekuaa wae echa wae, ¡ndea ma ɨwɨ pe nderenda ikawiete wae ara pe oï wae wi! Nde nditɨka jeta tëta wasu tuicha wae reta, erëi añawe nde ndiyeritɨka ma ɨwɨ pe,” jei.

San Mateo 13:39

Jare koo iya jowaicho kapii oñotɨ wae uyembɨjaanga oï Añawasu re etei. Jare mbaepoo uyembɨjaanga oï ara taɨkuewa re. Jare umbaepoo wae reta uyembɨjaanga oï araɨwa reta re,” jei chupe reta.

San Mateo 24:24

“Echa’ä imeta upurumbɨtawɨ wae reta jei, ‘Che ko jae Cristo,’ jare imeta wi ïru upurumbɨtawɨ wae reta jei, ‘Tumpa chembou amɨmbeu waerä ñee chuwi etei ou wae.’ Jukuärái jeita tëi reta. Jare jae reta uyapota mbaembae tuicha wae kuimbae retaño ipuere’ä uyapo wae. Jare jokua mbaembae rupi jae reta uipotata tëi wi umbɨtawɨ Tumpa uiparawo wae retawe,” jei.

San Mateo 25:41

“Joko wi che jaeta cheaso kotɨ ñonoï wae reta pe: ‘Pesɨrɨ chewi tata owe mbae wae pe. Jokua tata uyeyapɨkatu ma oï Añawasu jare araɨwakue chupe uyeyokui wae reta pewarä. Joko pe pikuaata peï Tumpa iarasɨ.

San Mateo 4:1

Joko wi Espíritu Santo jei Jesús pe oo waerä ɨwɨtini wasu kotɨ tëta mbae rupi. Jayawe Jesús oo jokotɨ. Kua uyeyapo Añawasu ou uyawɨka waerä tëi Jesús pe Tumpa kotɨ.

San Mateo 4:10

Jayawe Jesús jei chupe: “Esɨrɨ chewi, Satanás. Echa’ä Tumpa iñeerɨru pe uyekuatía oï kuärái: ‘Tumpa jeeño ko pembutuichata, jare chupeño ko piyeyokuita.’ Jukuärái uyekuatía oï,” jei chupe.

San Mateo 4:5

Jayawe Añawasu wɨraa Jesús Jerusalén pe jare uyupi reta yuraa ɨwatete ye tupao wasu iyapɨte re.

San Mateo 4:8

Jayawe Añawasu wɨraa Jesús pëti ɨwɨtu wasu ɨwatete wae re jare joko wi uechaka chupe opaetei tëta wasu reta ipöraete wae imburuwicha wasu imbaepuere wae reta ndiwe.

San Lucas 10:18

Jayawe Jesús jei chupe reta: “Che aecha pe reta pemɨamɨri jae reta itenondewa – jae ko Satanás. Aecha jae oa ara wi amaterere oa wae rami,” jei.

San Lucas 13:16

¿Maera ra jayawe chepuereta’ä amɨnguera kua kuña parawete mbutuu ara pe?” jei chupe reta. “Satanás dieciocho año ma umɨmbaerasɨ kua kuña parawete. Jare kua kuña ikawiete ko ipotawe perɨmba reta wi, echa’ä jae ko Abraham iñemoñaa pewa,” jei chupe reta.

San Lucas 22:3

Jayawe Satanás uike Judas Iscariote ipɨa pe. Judas ko jae Jesús doce jemimboe reta wi pëti wae.

San Lucas 22:31

Joko wi Jesús jei Simón Pedro pe: “Simón, Simón, mase, Satanás uipota uyapo pe reta opa pesɨrɨ waerä chewi. Jáeramo jae ueka Tumpa pe Tumpa umaeño jese waerä,” jei chupe.

San Lucas 8:12

“Jare jokua tape raɨ rupi temitɨ oa wae uyembɨjaanga oï amokue wae Tumpa iñee uyandu wae re. Echa’ä ou chupe reta Añawasu jare opa umɨakañɨka reta Tumpa iñee wi awɨye waerä wɨrowia reta. Echa’ä Añawasu uipota’ä etei onoi reta waerä tekowe opa mbae wae,” jei chupe reta.

San Juan 12:31

“Kua ɨwɨ pewa reta opaete seri oyowaicho ñonoï Tumpa kotɨ. Erëi añawe uwäe ma ara Tumpa umbɨjeko reta waerä mbae che ayapota aï wae rupi. Jare Tumpa umbɨjekota wi jae reta imburuwicha wasu – jae ko Añawasu,” jei.

San Juan 14:30

“Ndarau ma jekuaeño ɨma ayemɨngeta aï pe reta ndiwe. Echa’ä uwäe ma ara che aiporara waerä kua ɨwɨ imburuwicha ipo pe – jae ko Añawasu. Erëi jae ndarau etei ipuere cheré,” jei chupe reta.

San Juan 16:11

“Jare jae reta uikuaa’ä wi pëti ara jae reta uyemboɨta ñonoï Tumpa jowai, jare Tumpa jeita jae reta uiporara waerä mbaembae uyawɨ reta ikotɨ wae re. Kua uyeyapo ñotái oï, echa’ä añawe uyembɨpɨ ma oï jae reta imburuwicha ndiwe. Añawe Tumpa jei ma Añawasu uiporara ñotái ko oï, jare jokua Tumpa jei wae jaeño mái jei. Jokua ko jae mbapɨ mbaembae reta Espíritu Santo uikuaakata oï kuri ɨwɨ pewa reta pe jae ou ma yawe,” jei Jesús jemimboe reta pe.

San Juan 8:44

“Añawasu ko jae peru. Jare jokua mbaembae jae uipota uyapo wae, jokua nunga etei ko pe reta pipota piyapo peï wi. Añawasu iyɨpɨ wiwe upuruyuka wae ko. Jare jae opa ueya mbaembae jupi wae, echa’ä jae ko mbaembae kachi wae iya. Jare jae iyapu yawe, jae etei uyekuaaka oï, echa’ä jae ko iyapu wae jare jae etei ko apu iya,” jei chupe reta.

Hechos 26:18

nemɨmaeka reta waerä, jare jukuärái uyerowa reta waerä pɨ̈tumimbi wi tembipe kotɨ, jare wi uyerowa reta waerä Satanás imbaepuere wi Tumpa kotɨ. Kua uyapo reta yawe, Tumpa opata umbái chuwi reta mbaembae ikotɨ uyawɨ reta wae. Jayawe tuicha rupi uyekouta ñonoï, echa’ä Tumpa oñono teeta reta jae imaerä kërái jae uyapo opaete ïru cheré wɨrowia wae reta pe rami.’ Jukuärái jei chewe yandeYa,” jei.

Hechos 5:3

Jayawe Pedro jei chupe: “Ananías, nde ndiyapɨsaka ma Satanás jei wae re jare nemaeño ma ndiyembɨtawɨka. Jáeramo ndipota tëi ndapu Espíritu Santo pe, jare nemɨmbɨre ndeyupe ndeɨwɨ jepɨkue,” jei.

Romanos 16:18

Jokua nunga oporomboe wae reta mbaetɨ uyeyokui ñonoï yandeYa Jesucristo pe. Jaeño ko uparawɨkɨ ñonoï jae reta jei wae rupiño. Jae reta iñee kawi rupi umbɨtawɨ onoi ikoi mii wae reta.

Romanos 16:20

Tumpa ko jae jekuaeño yanembɨpɨakatu wae. Jare jae ɨmambaeño peñonota pemɨamɨri waerä Satanás kërái mbae re pepɨ̈ro wae rami. YandeYa Jesucristo jekuaeño tipɨakawi pewe.

2 Corintios 11:14

Erëi awɨye yandepɨakañɨ kua re. Echa’ä Satanás etei ipuere uyekuaaka pëti araɨwa ikawi wae Tumpa wi ou wae echa rami.

2 Corintios 11:3

Erëi che ayembɨpɨa’ä aï peré. Aramoi pemaeñota piyembɨtawɨka kërái Eva uyembɨtawɨka jokua mboi ikatuete iyapu wae pe, jare jukuärái pikota’ä ma pekɨrëɨ ngatu rewe Cristo pewarä.

2 Corintios 12:7

YandeYa uechaka chewe jeta kua nunga mbaembae ikawiete ye wae. Erëi che awɨye waerä ayembutuichaete jokua re, Tumpa umaeño pëti mbae jasɨ chewe waerä. Jekuaeño jasɨ chewe pëti ñuräti yandesoo pe yandekutu oï wae rami. Satanás etei ombouka chewe kua uiporaraka waerä chewe.

2 Corintios 4:4

Jae reta wɨrowia’ä, echa’ä pɨ̈tumimbi pe yureko reta rami. Echa’ä kua ɨwɨ iya – jae ko Añawasu – umɨpɨ̈tumimbi ma iyarakuaa awɨye waerä jae reta uikuaa kawi ñee ikawi wae Cristo rewa. Jokua jeko pewa jae reta uikuaa’ä kërái Cristo ikawiete ye ko jare jae ko Tumpa etei wae.

Efesios 4:14

Jukuärái ñanepɨräta kawi yawe Tumpa kotɨ, yaikota’ä ma sambiaɨ reta rami. Echa’ä sambiaɨ reta uikuaa’ä mbae re wɨrowia waerä. Pëti ara ipuere wɨrowia pëti mbae re, jare ïru ara ipuere wɨrowia ambɨe re. Erëi ñanepɨräta kawi Tumpa kotɨ yawe, ipuereta’ä kiawe yanembɨtawɨ. Echa’ä ime jeta wae reta ikatu upurumbɨtawɨ waerä kachi oporomboe wae rupi.

2 Tesalonicenses 2:3

Awɨye wi pemaeño kía re pembɨtawɨ waerä. Echa’ä ndei ara yandeYa pewa uwäe mbowe, imeta ko uyeyapo rani ïru mbaembae. Echa’ä jeta wae reta oyowaichoeteta Tumpa kotɨ. Jare uyekuaata wi oï jokua kuimbae ikawi mbaete oï jese wae. Jokua kuimbae Tumpa omombota oï kuri Tatawasurenda pe.

1 Timoteo 2:14

Jare Adán uyembɨtawɨka’ä Añawasu pe. Kuña ko uyembɨtawɨka, jare jukuärái uyawɨ Tumpa kotɨ.

2 Timoteo 3:13

Erëi jeko pochɨ wae reta jare upurumbɨtawɨ wae reta jeieteta uyapo reta mbaembae ikawi mbae wae. Jae reta jekuaeño umbɨtawɨta ïru wae reta, jare jae reta uyembɨtawɨkata wi.

Hebreos 2:14

Opaete kua Tumpa taɨ reta yae chupe wae, jae reta ko jae soo jare tuwɨ jare maekäwe pewa. Jáeramo Jesús wi uyeyapo jae reta rami etei ipuere waerä imano rupi umɨamɨri mano iya – jae ko Añawasu.

1 Pedro 5:8

Jekuaeño piyandareko piyé jare piko pearakuaa katu rewe. Echa’ä perowaicho Añawasu ko jae yawapɨ̈ta tuicha wae uñee uwata oï wae rami jare ueka oï kía jou waerä rami.

1 Juan 5:19

Añetete ko, yande yaikuaa opaete kua ɨwɨ jeko rupi yureko wae reta Añawasu imbaepuere pe ko ñonoï. Erëi yaikuaa wi yande reta ko jae Tumpa pewa reta.

Judas 1:9

yepe tëi araɨwa retawe uyemɨngeta’ä jukuärái. Echa’ä arakae araɨwa tenondewa Miguel jee wae uyeaka iko yawe Añawasu ndiwe Moisés jetekue re, uipɨu umbɨjeko waerä Añawasu pochɨ rewe. Jaeño jei chupe: “YandeYa tuñeengata ndewe,” jei chupe.

Apocalipsis 12:12

¡Jáeramo ara pe ma ñonoï wae reta tuyerowia! Erëi, pe reta ɨwɨ pe peï wae jare mar rupi peï wae, ¡kërái etei ndipo piporara paraweteta! Echa’ä Añawasu uweyɨ ma ara wi uyembowaicho waerä pekotɨ täta iarasɨ rewe. Echa’ä jae uikuaa michiño ma ara onoi wae.” Jukuärái jei jokua ñee ayandu wae.

Apocalipsis 12:3

Jare uyekuaa ïru mbae ara re chepɨakañɨete jese wae. Jae ko pëti teyu wasu pɨ̈ta wae dragón jei chupe wae. Jae onoi chiu iñäka jare payandepo jäti reta. Jare pëti pëti iñäka re onoi corona.

Apocalipsis 12:7

Jayawe uyeyapo pëti ñeräro ara pe. Pëti araɨwa tenondewa Miguel jee wae jare iaraɨwa reta uñeräro jokua dragón ndiwe. Jare dragón jare jokua araɨwa reta uyemboya jese wae uñeräro wi jae reta ndiwe.

Apocalipsis 12:8

Erëi dragón jare iaraɨwa reta opa jamɨri, jare mbaetɨ ye ma jendarä ara pe.

Apocalipsis 13:14

Kua mbaembae reta ipuere uyapo, echa’ä jokua ïru bestia umee chupe mbaepuere jae jee re uyapo waerä ramo. Jare jukuärái rupi jae umbɨtawɨ ɨwɨ pewa reta. Echa’ä jae jei ɨwɨ pewa reta pe uyapo reta waerä jokua ïru bestia jaanga – jae ko jokua ipere iko kɨsepuku pe wae jare ikowe ye wae jaanga.

Apocalipsis 16:14

Jokua aña reta ipuere uyapo mbaembae umbɨpɨakañɨete waerä ɨwɨ pewa reta. Jae reta yuraa opaete ɨwɨ rupi umbatɨ waerä mburuwicha wasu reta jare isɨndaro reta ndiwe ombowaicho waerä tëi Tumpa. Jokua ñeräro uyeyapota oï Armagedón jee wae pe. Jukuärái ko jee hebreo ñee pe. Erëi Tumpa opaetei mbaepuere onoi. Jare jae uiporarakata oï chupe reta jokua ara. YandeYa jei, “Mase, che ayu yeta aï pepɨranoe pewa pëti imonda wae ou rami. Jare jokua uyandareko kawi ñonoï wae reta jare jupi rupi yureko wae reta uyekoueteta ñonoï. Echa’ä che ayu ye awäe yawe, jae reta ndarau imara kía nani etei uyepokouka wae rami,” jei.

Apocalipsis 18:2

Jare usapɨkai rewe jei: “¡Opata ma oï Babilonia, jokua tëta wasu jeräkuaete wae jare imbaepuerete wae! Añawe wiwe jaeño aña kachi kachi wae reta yurekota joko pe. Jae nunga wi wɨra kachi wae reta jare ikawi’ä maeräwe wae reta yurekota jokoropi.

Apocalipsis 18:23

Jae ramiño wi ndarau ye ma uyekuaa mechero jendɨ joko pe. Jare ndarau ye ma kía umenda joko pe. Jukuärái Tumpa uiporarakata oï Babilonia pe, echa’ä joko pewa mbaembae owaka wae reta uyembutuicha opaete ɨwɨ rupi. Jare jae nunga wi jokua tëta wasu pewa reta umbɨtawɨ opaete ɨwɨ pewa reta kërái ipaye wae reta upurumɨkañɨ wae echa.

Apocalipsis 19:20

Jare joko pe oï wi jokua bestia taɨkue rupi uyekuaa wae – jae ko jokua Tumpa iñee umɨmbeuraanga wae. Jare jae ko tenonde yawe tenondewa bestia jee re uyapo mbaembae kuimbae retaño ipuere’ä uyapo wae. Jukuärái jae umbɨtawɨ jokua bestia imarka onoi wae reta jare jaanga re umbɨadora wae reta. Erëi Tumpa uipɨsɨka jokua bestia jare Tumpa iñee umɨmbeuraanga wae. Jare jae reta mokui rewe Tumpa omomboka Tatawasurenda pe. Jokua tata wasu jendɨ oï azufre ndiwe.

Apocalipsis 2:13

Jare che tae Pérgamo pewa cheré wɨrowia wae reta pe kuärái: Che aikuaa opaete mbae piyapo wae. Jare aikuaa wi Satanás ime onoi iwapɨa mburuwicha wasu pewa perëta wasu pe. Erëi pe reta jekuaeño perowia peï cheré jare chekuaku’ä. Chemandúa wi Antipas re. Jae jekuaeño umɨmbeu kawi iko che rewa, jare jokua jeko pewa perëtáɨwa reta uyuka. Echa’ä añetete Satanás ime onoi jetaete mbaepuere joko pe. Erëitu jokua ara reta rupi awe peya’ä perowia cheré wae, yepe tëi yawaiete pewe. Kua ikawi ko.

Apocalipsis 2:24

‘Erëi amokue pe Tiatira pe peï wae reta pipɨsɨ'ä jokua kuña omboe wae re, jare pikuaa’ä jokua arakuaa jei chupe reta wae erëi añetete Satanás wi ou wae. Kua pereko ikawi ko. Jáeramo che tae pewe kuaño piyapo waerä:

Apocalipsis 2:9

Jare che tae Esmirna pewa cheré wɨrowia wae reta pe kuärái: Che aikuaa opaete mbae piyapo wae, jare kërái piporara jare peparawete (erëi añetete pikokatu peï Tumpa kotɨ). Aikuaa wi jei ñonoï ñee kachi pekotɨ jokua judío jei tëi iyupe wae reta. Jae reta uyererowia tëi Tumpa pewa reta ko, erëi jukuärai’ä ko. Jae reta ko uyembatɨ Satanás jee re uikuaa mbae rewe.

Apocalipsis 20:10

Jae reta uyembɨtawɨka Añawasu pe. Jare joko wi aecha jokua tata wasu azufre ndiwe jendɨ oï wae. Joko pe ko tenonde yawe Tumpa omomboka jokua bestia jare Tumpa iñee umɨmbeuraanga wae ndiwe. Jare amae aiko rambuewe, Tumpa omomboka Añawasu joko pe wi. Jae reta mbapɨ rewe uiporarata joko pe ara rupi jare pɨ̈tu rupi jaeño mái pewa.

Apocalipsis 20:8

Jare Añawasu oota oï opaete ɨwɨ rupi umbɨtawɨ waerä ɨwɨ pewa reta. Jae reta ko Gog jare Magog pewa jei chupe reta wae. Jayawe Satanás umbatɨta jetaete ye uñeräro waerä tëi yandeYa ndiwe. Jae reta jetaete ye ye ko, ɨwɨkuïti ɨpa wasu jembeɨ rupiwa yandepuere’ä etei yaipapa wae rami.

Apocalipsis 3:9

‘Pe reta pikuaa jokua judío jei tëi iyupe wae reta. Jae reta uyererowia tëi Tumpa pewa reta ko, erëi jukuärai’ä ko. Jae reta iyapu wae reta ko jare uyembatɨ Satanás jee re uikuaa mbae rewe. Mase, che ayapokata jae reta yuweru waerä pekotɨ jare uñeñono reta waerä ɨwɨ re perowai uñemɨmichi rewe. Jare jeita reta pewe: “Añetete yepe yandeYa perau,” jeita reta.

Apocalipsis 9:1

Jayawe ïru araɨwa umɨñee jemimbɨ wasu. Kua re pandepo ma umɨñee. Jare umɨñee yawe, aecha ɨwɨ pe pëti yasɨtata echa wae ara wi oakue. Jare uñemee chupe ɨwɨkua wasu juwa mbae wae illave.

Apocalipsis 9:20

Jare jokua ɨwɨ pewa reta umano’ä jokua mbaesusere reta rupi wae uipota’ä etei ueya ipɨayemɨngeta mbaembae kachi uyapo wae rewa. Echa’ä jae reta jekuaeño uipota umbɨadora aña reta re jare tumparaanga reta re oro pewa, jare korepoti jiero pewa, jare jiero bronce pewa, jare ita pewa, jare ɨwɨra pewa wi. Jokua tumparaanga reta ipuere’ä etei umae jare uyandu jare uwata wi. Erëi jesewe ɨwɨ pewa reta umbɨadora jese reta.