Apocalipsis 1:9 - Biblia

⁹ Che perɨkeɨ Juan, che aiporara aï wi pe reta piporara peï rami. Jukuärái ñotái ko yaiporara Jesús re yarowia jeko pewa ramo. Erëi yandepuere ñamɨawäta yandepɨawasu rewe, echa’ä pëti ramiño ñaï Jesús re ramo. Jare yande ñaïta wi jae ndiwe jae oï ma yawe opaete wae imburuwicha wasurä jaeño mái pewa. Che aï pëti pereso ɨwɨ ɨ mbɨte pe oï wae Patmos jee wae pe. Chereru reta kua pe Tumpa iñee amɨmbeu ramo jare Jesús rewa amɨeräkua ramo.

Guaraní Pe (Western): Simba

⁹ Che co jae perɨqueɨ Juan, Jesús re yarovia ramo. Che vi aiporara aĩ pe reta rami Tumpa iporoyocuia jeco pegua, jare chepɨaguasu pe reta pepɨaguasu rami. Che aĩ ɨvɨ ɨ mbɨte pe oĩ vae Patmos jee vae pe penti peresorã Tumpa iñee amɨmbeu jare Jesús regua chemiari ramo.

Apocalipsis 1:9 Iomraidhean Croise

San Mateo 20:23

Jayawe Jesús jei chupe reta: “Añetete ko piporarata che rami,” jei. “Erëi chepuere’ä jae pewe pëti wae uwapɨ waerä cheakata kotɨ jare ïru cheaso kotɨ. Echa’ä cheRu Tumpa uyapɨkatu ma jokua tenda reta kía nunga jae uiparawo wae reta pewarä,” jei chupe reta.

Marcos 10:39

“Orepuereta ko,” jei reta. Jayawe Jesús jei chupe reta: “Añetete ko piporarata jare peasata yembɨawái reta rupi che rami,” jei.

San Juan 16:33

“Jare che jae aï pewe kua mbaembae piko waerä pepɨakatu rewe che rupi. Kua ɨwɨ pe peï rambuewe, pe reta piporarata peï. Erëi piñemɨkɨrëɨ, echa’ä che amɨamɨri ma towaicho kua ɨwɨ pewa,” jei chupe reta.

Hechos 1:15

Jayawe pëti ara Cristo re wɨrowia wae reta joko pe uyembatɨ 120 rupi. Jare Pedro uyemboɨ jae reta ipɨte pe jare jei chupe reta:

Hechos 14:22

Jare jokua tëta wasu reta rupi, jae reta jekuaeño uyembatɨ Cristo re wɨrowia wae reta ndiwe. Jare omboe reta ye Tumpa iñee re umɨmɨräta reta waerä Tumpa re. Jare umɨkɨrëɨ reta awɨye uyerowa ye reta waerä Tumpa wi. Jare jei wi chupe reta: “Pëti ara Tumpa ikota opaete wae imburuwicha wasurä jaeño mái pewa. Jare yande yaiporara ñotái ko jeta ñaï waerä jae ndiwe, echa’ä Tumpa jowaicho reta ikuerita’ä uiporaraka yandewe ramo.” Jukuärái jei chupe reta.

Romanos 8:17

Jare yande ko jae Tumpa taɨ reta ramo, yandepuere yaikuaa kawi Tumpa upi oï yanemaerä mbaembae ikawiete ye wae umee waerä yandewe kuri. Jokua ko jae mbaembae añawe Cristo uyekou oï jese wae, jare yande reta wi yayekouta ñaï kuri jokua mbaembae re Cristo ndiwe etei. Kua ikawi yaikuaa kawi waerä. Echa’ä añawe rupi yaiporara ñaï Cristo re yarowia ramo. Erëi Cristo jae nunga wi uiporara kua ɨwɨ pe iko rambuewe. Jare yande yaiporara yawe kërái Cristo uiporara wae rami, jukuärái wi yayekouta ñaï jae ndiwe jae oï ma yawe opaete wae imburuwicha wasurä jaeño mái pewa.

Romanos 8:25

Erëi yande ñaäro ñaï mbaembae ndeiño ñanoi wae, jare jukuärái ñaäro ñaï yandekueri mbae rewe jare yarowia katu rewe.

2 Corintios 1:7

Erëi ore nduikuaa yepe tëi pe reta piporarata peï ore nduiporara wae rami, erëitu Tumpa pembɨpɨakatuta wi kërái jae orembɨpɨakatu ma wae rami. Jáeramo ore ndorowia katu noï peré pe reta pemɨawäta waerä.

Filipenses 1:7

Che jupi ko ayemɨngeta waerä kuärái peré, echa’ä che puauete ramo. Jae nunga wi yayekou ñaï päwe rewe Tumpa ipɨakawi re. Echa’ä jae umaeño ma yanderé yaparawɨkɨ waerä pëti ramiño ñee ikawi wae uñemɨái waerä. Echa’ä che amɨmbeu aï ñee ikawi wae jare aikuaaka aï chupe reta kërái jokua ñee añetete wae ko. Jare pe reta chemborɨ peï chepuere waerä ayapo jukuärái. Jare jokuaño’ä ko. Jae nunga wi, yepe tëi che peresorɨru pe aï, erëitu pe reta jekuaeño chemborɨ peï.

Filipenses 4:14

Erëitu amee aï pewe yasurupái pe reta chemborɨ wae re aiporara aï wae rupi.

2 Tesalonicenses 3:5

Ayerure aï yandeYa pe jae pemborɨ pikuaa kawi waerä kërái Tumpa perau wae, jare kërái pepɨawasu waerä yembɨawái reta rupi Cristo ipɨawasu rami.

2 Timoteo 1:8

Jáeramo awɨye nemara nemɨmbeu waerä yandeYa Jesucristo rewa. Jare awɨye wi nemara chewi che aï kua peresorɨru pe wae re. Echa’ä yandeYa pe ayeyokui ramo, aï kua pe. Nde ndikuaa kawi neï yamɨmbeu yawe ñee ikawi wae Jesucristo rewa, yaiporara ñotái ko. Erëi nde, iyapo che ayapo wae rami. Jekuaeño emɨmbeu jokua ñee. Jare yepe tëi ndiporarata neï, erëi Tumpa umee yandewe mbaepuere ñamɨawäta waerä.

Hebreos 10:36

Ikawi ko jekuaeño piyeko waerä jese pepɨawasu rewe. Echa’ä opa ma piyapo yawe jae uipota wae, penoita opaete mbaembae ikawi wae Tumpa jei umeeta oï pewe wae.

1 Pedro 5:1

Añawe pe Cristo re perowia piko wae reta, che aipota ambɨarakuaa petenondewa reta kuärái: Che ko jae peparawɨkɨ ïru. Jare che aecha cheresa pe etei kërái Cristo uiporara yanderé. Jare Cristo ou ye yawe imbaepuere jembipete rewe, che wi ayerowiata pe reta ndiwe. Jáeramo che pumɨñera

Apocalipsis 1:1

Kua tupapire pe Juan uikuaaka yandewe jokua mbaembae reta uasata oï ɨmambaeño wae. YandeRu Tumpa etei uikuaaka kua mbaembae Jesucristo pe jae uikuaaka yuapɨ ye waerä yandewe Juan rupi. Juan uyeyokui kawi Jesucristo pe. Jayawe Jesucristo ombou pëti araɨwa Juan pe, jare jokua araɨwa uechaka chupe kua mbaembae uyeyapota oï wae. Jare añawe Juan uikuaaka oï yandewe, yande Cristo pe yayeyokui wae reta pe, opaete mbaembae jae uecha wae. Kua ñee Tumpa iñee etei ko, jare jokua etei ko Jesucristo uikuaaka.

Apocalipsis 1:4

Pe Cristo re perowia wae reta chiu tëta wasu ɨwɨ Asia pewa pe piyembatɨ wae, che araaka aï pewe kua saludo. Che ko jae Juan kua aikuatía aï wae. Tumpa iyɨpɨ wiwe ikoño mái, jare jekuaeño oï, jare jekuaeñota oï. Jae jekuaeño tipɨakawi pewe jare tuyapo pewe piko waerä pepɨakatu rewe. Jare jukuärái wi tuyapo pewe Jesucristo jare Espíritu Santo. Kua Tumpa iEspíritu chiu wese ye jupi jare Tumpa iwapɨa jowai oï. Jesucristo ko jae jekuaeño uikuaaka añetete wae. Jae ko opaete umanokue wae reta ikowe ye wae itenondewaete. Jare jae ko opaete ɨwɨ pewa mburuwicha wasu reta imburuwicha yuapɨ ye. Yande reta jeta ma yayawɨ Tumpa kotɨ. Erëi Jesucristo yanderau jare upɨyere juwɨ opa oyoe waerä yandewi yandereko.

Apocalipsis 1:6

Jare jokuaño’ä uyapo. Jae yandapo wi mburuwicha wasu retarä jare sacerdote retarä jukuärái yayeyokui waerä Tu pe – jae ko yandeRu Tumpa pe. Jesucristo jee tuyembutuichaka, jare jaeño tonoi mbaepuere tuichaete wae jaeño mái pewa. Jukuärái tuiko.

Apocalipsis 11:7

Jayawe jae reta opa ma Tumpa rewa umɨmbeu yawe, pëti mbaemɨmba echa ipɨrätaete jare pochɨete wae oëta jokua ɨwɨkua wasu juwa mbae wae wi. Jare jae ombowaichota jokua mokui kuimbae reta, jare umɨamɨrita, jare uyukata reta.

Apocalipsis 12:11

Echa’ä jae reta opa ma umɨamɨri Añawasu Owecha kuimbae taurusu wae juwɨ rupi jare Tumpa iñee umɨmbeu reta wae rupi. Jare mbaetɨ etei urukɨye reta jekowe umano waerä.

Apocalipsis 12:17

Jayawe dragón pochɨete upɨta kuña pe, jare oo uñeräro waerä kuña iñemoñaa reta ndiwe – jae reta ko Tumpa jei wae rupi yureko wae reta jare Jesús rewa jupi umɨmbeu wae reta.

Apocalipsis 13:10

Tumpa uipota yawe ipotawe kía uyepɨsɨka waerä jowaicho reta pe, jukuärái ñotái oï. Jare Tumpa uipota yawe ipotawe kía uyeyukaka waerä kɨsepuku pe, jukuärái ñotái oï wi. Kua nunga mbaembae uyeyapo ñotái oï. Jáeramo Tumpa re wɨrowia wae reta tumɨawäta ipɨawasu rewe jare jekuaeño wɨrowia kawi jese rewe.

Apocalipsis 14:12

Jáeramo ipotawe kía Tumpa oñono tee jae imaerä wae reta – jae ko Tumpa jei wae rupi yureko wae reta jare Jesús re wɨrowia wae reta – tuñemɨkɨrëɨ jare tumɨawäta ipɨawasu rewe uiporara reta wae.

Apocalipsis 19:10

Jayawe che añeñono ɨwɨ re araɨwa jowai ambutuicha waerä tëi. Erëi jae jei chewe: “¡Awɨye iyapo!” jei. “Che ayeyokui Tumpa pe nde jare ndehermano reta rami. Kërái pe reta pemɨmbeu jupi Jesús rewa, jukuäraiño wi ko che,” jei. “Tumpa jeeño embutuicha. Echa’ä jae ko umee yandewe ñee Jesús rewa yamɨmbeu waerä,” jei araɨwa chewe.

Apocalipsis 20:4

Jare aecha wi jeta mburuwicha reta iwapɨa jare joko pe uwapɨ ñonoï wae reta. Tumpa umee chupe reta mbaepuere mburuwicha wasurä yureko waerä. Jare aecha wi jeta umanokue wae reta joko pe ñonoï. Jae reta umɨmbeu kawise Tumpa iñee jare Cristo rewa. Jare umbutuicha’ä reta jokua bestia jee re jare umbɨadora’ä reta jae jaanga re. Jare mbaetɨ onoi reta wi bestia imarka jesɨwa re jare ipo re. Jáeramo bestia uyayuasɨaka reta kɨsepuku pe. Erëi Tumpa umbɨjekowe ye ueru reta umanokue wae reta ipɨte wi. Jare jae reta onoita mbaepuere Cristo ndiwe miri año pewa. Jae reta rani ko jae Tumpa umbɨjekowe ye wae. Erëitu ïru umanokue wae reta ikowe yeta’ä jokua miri año uasa rewa.

Apocalipsis 3:10

‘Che jae ma pewe pemɨawäta waerä opaño mbaembae pepɨawasu rewe, jare jukuärái piyapo ma. Jáeramo yepe tëi ara uwäeta oï opaete ɨwɨ pewa reta tuicha rupi uiporara waerä, erëi che puepɨta aï chuwi kuri.

Apocalipsis 6:9

Joko wi Owecha kuimbae taurusu wae uipea ye tupapire imboyaka. Kua re uipea ma pandepo imboyaka. Jayawe che aecha ara pe pëti mbaerenda. Jare jokua mbaerenda íɨwɨ pe aecha jeta umano wae reta iä. Jae reta uyeyukaka Tumpa iñee umɨmbeu ramo jare jupi yureko Tumpa re ramo.

Apocalipsis 7:14

“Aikuaa’ä etei. Nde ndikuaa,” jae chupe. Jayawe jae jei chewe: “Kua reta ko jae uasa mbaesusere wasu rupi wae. Oyoe ma reta jemimonde jare umɨtïi reta Owecha kuimbae taurusu wae juwɨ pe,” jei.