1 Juan 4:4 - Biblia

⁴ Erëi pe cheraɨ puau wae reta, pe reta opa ma pemɨamɨri jokua oporomboeraanga wae reta, echa’ä pe reta ko jae Tumpa pewa jare Espíritu Santo oï pepɨa pe. Jare yepe tëi Añawasu ko jae kua ɨwɨ iya, erëi Espíritu Santo imbaepuere tuichaete ye ko Añawasu imbaepuere wi.

Guaraní Pe (Western): Simba

⁴ Cheraɨ reta, pe reta co jae Tumpa imbae reta, jare pemɨamɨri ma Cristo ndive oyovaicho vae reta. Echa'ã Espíritu Santo ico pepɨa pe jare jae imbaepuere tuicha ete ɨvɨ pegua reta iya imbaepuere güi.

1 Juan 4:4 Iomraidhean Croise

San Juan 12:31

“Kua ɨwɨ pewa reta opaete seri oyowaicho ñonoï Tumpa kotɨ. Erëi añawe uwäe ma ara Tumpa umbɨjeko reta waerä mbae che ayapota aï wae rupi. Jare Tumpa umbɨjekota wi jae reta imburuwicha wasu – jae ko Añawasu,” jei.

San Juan 14:30

“Ndarau ma jekuaeño ɨma ayemɨngeta aï pe reta ndiwe. Echa’ä uwäe ma ara che aiporara waerä kua ɨwɨ imburuwicha ipo pe – jae ko Añawasu. Erëi jae ndarau etei ipuere cheré,” jei chupe reta.

San Juan 16:11

“Jare jae reta uikuaa’ä wi pëti ara jae reta uyemboɨta ñonoï Tumpa jowai, jare Tumpa jeita jae reta uiporara waerä mbaembae uyawɨ reta ikotɨ wae re. Kua uyeyapo ñotái oï, echa’ä añawe uyembɨpɨ ma oï jae reta imburuwicha ndiwe. Añawe Tumpa jei ma Añawasu uiporara ñotái ko oï, jare jokua Tumpa jei wae jaeño mái jei. Jokua ko jae mbapɨ mbaembae reta Espíritu Santo uikuaakata oï kuri ɨwɨ pewa reta pe jae ou ma yawe,” jei Jesús jemimboe reta pe.

San Juan 17:23

“Che aikota pëti ramiño jae reta ndiwe, jare nde pëti ramiño che ndiwe. Tuiko reta wi pëti ramiño. Echa’ä ɨwɨ pewa reta uecha yawe kërái jae reta pëti ramiño ñonoï, jayawe ramo uikuaata reta nde ko chembou wae. Jare uikuaata reta wi nde ndeau ko cheré wɨrowia wae reta kërái nde cherau rami,” jei.

Romanos 8:31

Jayawe opaete kua mbaembae rupi yaikuaa ko Tumpa oï yandepepɨka pe yanemborɨ waerä. ¿Kía ra ipuereta ñanemɨamɨri jayawe? ¡Ndarau ipuere kiawe!

Romanos 8:37

Aramoi yandewe wi uyeyapota opaete jokua nunga mbaembae reta, erëi jesewe Cristo jekuaeño yanderauete oï, jare jae imbaepuere rupi yande reta jekuaeño opata ñamɨamɨri jokua mbaembae reta.

1 Corintios 2:12

Jare Tumpa kua ipɨayemɨngeta uikuaaka ma yandewe wi, echa’ä jae iEspíritu oï yandepɨa pe ramo. Jare arakuaa Tumpa umee yandewe wae kua ɨwɨ pewa’ä ko. Jae ko Espíritu Santo pewa etei. Jare Tumpa umee yandewe Espíritu Santo yaikuaa kawi waerä opaete mbaembae ikawi wae Tumpa umee ma yandewe wae.

1 Corintios 6:13

Jare amokue pe reta pere peï kuärái: “Tembiu yanderɨe pewarä ko, jare yanderɨe tembiu pewarä ko wi. Erëi pëti ara Tumpa mokui rewe umbaita oï. Jare jukuärái ko yanderete oï wi. Pëti ara yanderete Tumpa umbaita oï. Jáeramo mbae’ä ko yayapo waerä awasa.” Jukuärái amokue pe reta pere tëi. Erëi jukuärai’ä ko. Añetete pëti ara yanderete kua ɨwɨ pewa opata oï. Erëi Tumpa umbɨjekowe yeta oï yanderete imbaepuere tuichaete wae rupi kërái jae umbɨjekowe ye yandeYa rami. Jayawe yanderete jae’ä ko awasa pewarä – jae ko yayeyokui kawi waerä yandeYa pe. Jare yandeYa ko jae yanderete iYa.

2 Corintios 4:4

Jae reta wɨrowia’ä, echa’ä pɨ̈tumimbi pe yureko reta rami. Echa’ä kua ɨwɨ iya – jae ko Añawasu – umɨpɨ̈tumimbi ma iyarakuaa awɨye waerä jae reta uikuaa kawi ñee ikawi wae Cristo rewa. Jokua jeko pewa jae reta uikuaa’ä kërái Cristo ikawiete ye ko jare jae ko Tumpa etei wae.

2 Corintios 6:16

¿Këraita ra kía oñono yawe tumparaanga reta tupao wasu japɨpe? Ndarau ikawi. Jare yande reta ko jae jokua tupao wasu rami, echa’ä Tumpa imeño mái iko wae yandepɨte pe oï ramo. Jukuärái jei Tumpa iñeerɨru pe. Echa’ä joko pe Tumpa jei yandewe kuärái: “Che aikota jare awatata cherëtara reta ndiwe. Che aikota jae reta iTumparä, jare jae reta yurekota chemaerä,” jei.

Efesios 2:2

Jukuärái pe reta pikose, echa’ä jekuaeño pemomoe piko kua ɨwɨ pewa reta jeko kachi wae re. Piyeyokuise piko Añawasu pe. Jae ko opaete aña reta imburuwicha, jare yandepuere’ä yaecha wae. Jae ko espíritu ikawi mbae wae jare uparawɨkɨ oï imbaepuere rewe opaete Cristo re wɨrowia mbae wae reta ipɨa pe.

Efesios 3:17

Jare aeka aï chupe wi piñemɨatangätu perowia katu waerä Cristo re, jukuärái Cristo jekuaeño oï waerä pepɨa pe ipɨawiwe rewe. Jukuärái rupi pepuere piyerau päwe añetete rewe. Jáeramo piñemɨmɨrätata peï Tumpa re pëti temitɨ kɨpe japo oï wae rami.

Efesios 6:10

Añawe hermano reta, kua jaeño ma jaeta aï pewe: Ndarau yandepuere yayeyokui yandei yandeYa pe. Jáeramo yayekota ko jae imbaepuere tuichaete wae re.

1 Juan 2:1

Cheraɨ mii puau wae reta, aikuatía aï pewe kua mbaembae awɨye waerä piyawɨ Tumpa kotɨ. Erëi kía uyawɨ Tumpa kotɨ yawe, ime ko pëti wae yandeRu Tumpa jowai oï yandepepɨka pe – jae ko Jesucristo. Jae jupiete ye wae ko.

1 Juan 2:13

Jare pe pekuakuaa ma piko wae reta, pe reta pikuaa jokua iyɨpɨ wiwe ikoño mái wae. Jare jokua jeko pewa ko aikuatía aï pewe. Jare pe taurusu piko wae reta, pe reta pemɨamɨri ma Añawasu. Jare jokua jeko pewa ko aikuatía aï pewe wi. Sambiaɨ mii reta, taikuatía ye pewe kua mbaembae, echa’ä pe reta pikuaa yandeRu Tumpa ramo.

1 Juan 3:20

Echa’ä aramoi yandepɨa yanembɨjeko oï mbae re. Erëi jesewe yandepuereta yandepɨakatu Tumpa jowai, echa’ä yaikuaa Tumpa uikuaa yande rewa opaetei. Jare jokua jae jei yandereko rewa wae jupiete ko yandepɨa jei wae wi.

1 Juan 3:24

Jare kía kua Tumpa jei wae uyapo wae jekuaeño uñemɨïru Tumpa ndiwe, jare Tumpa jekuaeño uñemɨïru jae ndiwe wi. Jare yande yaikuaa Tumpa uñemɨïru ko yande ndiwe, echa’ä jae umee yandewe Espíritu Santo ramo.

1 Juan 4:13

Jare yande yaikuaa ñañemɨïru ko ñaï Tumpa ndiwe jare Tumpa uñemɨïru ko oï yande ndiwe wi, echa’ä jae umee ma yandewe iEspíritu Santo.

1 Juan 4:16

Jayawe kua mbaembae rupi yaikuaa kawi ma Tumpa yanderau ko, jare jokua re yarowia jare yayeko ma jese. Tumpa ko tuicha upuruau. Añetete Tumpa etei ko jae mburuau. Jayawe kía upuruau rewe iko wae uñemɨïru kawi ko oï Tumpa ndiwe, jare Tumpa uñemɨïru kawi oï jae ndiwe wi.

1 Juan 4:6

Erëi ore reta, oriñee ou ko Tumpa wi. Jáeramo ime yawe kía uikuaa Tumpa wae, jae uyapɨsaka oriñee re. Erëi kía uikuaa’ä Tumpa wae uyapɨsaka’ä oriñee re. Jukuärái yaikuaa kía ko jae oporomboe jupi wae jare kía ko upurumbɨtawɨ wae.

1 Juan 5:19

Añetete ko, yande yaikuaa opaete kua ɨwɨ jeko rupi yureko wae reta Añawasu imbaepuere pe ko ñonoï. Erëi yaikuaa wi yande reta ko jae Tumpa pewa reta.

1 Juan 5:4

Kua ɨwɨ jeko uipota tëi yanembɨawái, erëi yande Tumpa taɨrä yaiko wae reta ñamɨamɨri ma ko kua ɨwɨ jeko. Jare jukuärái yayapo Jesucristo re yarowia wae rupi.

Apocalipsis 12:11

Echa’ä jae reta opa ma umɨamɨri Añawasu Owecha kuimbae taurusu wae juwɨ rupi jare Tumpa iñee umɨmbeu reta wae rupi. Jare mbaetɨ etei urukɨye reta jekowe umano waerä.