1 Juan 3:8 - Biblia

⁸ Erëi ime kía Tumpa jei wae jekuaeño uyawɨ wae, jae Añawasu pewa ko. Echa’ä Añawasu iyɨpɨ wiwe uyawɨño mái Tumpa kotɨ. Erëi Tumpa Taɨ uyeyapo kuimbaerä opa umbái waerä Añawasu iparawɨkɨ.

Guaraní Pe (Western): Simba

⁸ Jecuaeño mbaeyoa uyapo vae aña guasu imbae co. Echa'ã aña guasu jecuaeño iyoa iyɨpɨ güive. Jare Tumpa Taɨ uyeyapo cuimbaerã umbai vaerã aña guasu iparavɨquɨ.

1 Juan 3:8 Iomraidhean Croise

Génesis 3:15

Jare ayapota nde jare kuña piyembowaicho waerä, jare jae iñemoñaa jare nde niñemoñaa wi. Jokua kuña iñemoñaa uyapasota näka, jare nde nembɨpereta ipɨtäsa pe,” jei Tumpa mboi pe.

Números 21:9

Jayawe Moisés uyapo pëti mboiraanga jiero bronce pewa, jare oñono pëti ɨwɨra puku wae re, jare umbɨyatɨka. Joko wi ipotawe mboi uichuu wae umae jese yawe, ukuera woi.

San Mateo 12:28

“Añetete Tumpa iEspíritu imbaepuere pe ko che amoë aï aña uyembɨiya jese wae reta wi. Jáeramo añawe pecha peï Tumpa imbaepuere mburuwicha wasu pewa pepɨte rupi oï,” jei Jesús fariseo reta pe.

San Mateo 13:38

“Jare jokua koo uyembɨjaanga oï opaete ɨwɨ re. Jare trigo ikawi wae uyembɨjaanga oï kía reta ikota Tumpa ndiwe wae re, Tumpa oï ma yawe opaete wae imburuwicha wasurä jaeño mái pewa. Jae reta ko Tumpa taɨ reta. Jare kapii ikawi mbae wae uyembɨjaanga oï jokua uyeyokui Añawasu pe wae reta re. Jae reta ko jae Añawasu taɨ reta.

San Mateo 4:3

Jayawe Añawasu ou jei chupe: “Nde ko jae Tumpa Taɨ yawe, yaecha ere kua ita reta pe tuyeyapo ndewe mbɨyaperä,” jei chupe.

Marcos 1:24

“Jesús Nazaret pewa, ¿mbae pa ndeyu ndeka kua pe?” jei. “¿Ndeyu pa orerukachi waerä? Che ndukuaa. Nde ko jae Tumpa Taɨ jupiete wae,” jei.

San Lucas 10:18

Jayawe Jesús jei chupe reta: “Che aecha pe reta pemɨamɨri jae reta itenondewa – jae ko Satanás. Aecha jae oa ara wi amaterere oa wae rami,” jei.

San Juan 12:31

“Kua ɨwɨ pewa reta opaete seri oyowaicho ñonoï Tumpa kotɨ. Erëi añawe uwäe ma ara Tumpa umbɨjeko reta waerä mbae che ayapota aï wae rupi. Jare Tumpa umbɨjekota wi jae reta imburuwicha wasu – jae ko Añawasu,” jei.

San Juan 16:11

“Jare jae reta uikuaa’ä wi pëti ara jae reta uyemboɨta ñonoï Tumpa jowai, jare Tumpa jeita jae reta uiporara waerä mbaembae uyawɨ reta ikotɨ wae re. Kua uyeyapo ñotái oï, echa’ä añawe uyembɨpɨ ma oï jae reta imburuwicha ndiwe. Añawe Tumpa jei ma Añawasu uiporara ñotái ko oï, jare jokua Tumpa jei wae jaeño mái jei. Jokua ko jae mbapɨ mbaembae reta Espíritu Santo uikuaakata oï kuri ɨwɨ pewa reta pe jae ou ma yawe,” jei Jesús jemimboe reta pe.

San Juan 8:44

“Añawasu ko jae peru. Jare jokua mbaembae jae uipota uyapo wae, jokua nunga etei ko pe reta pipota piyapo peï wi. Añawasu iyɨpɨ wiwe upuruyuka wae ko. Jare jae opa ueya mbaembae jupi wae, echa’ä jae ko mbaembae kachi wae iya. Jare jae iyapu yawe, jae etei uyekuaaka oï, echa’ä jae ko iyapu wae jare jae etei ko apu iya,” jei chupe reta.

Romanos 16:20

Tumpa ko jae jekuaeño yanembɨpɨakatu wae. Jare jae ɨmambaeño peñonota pemɨamɨri waerä Satanás kërái mbae re pepɨ̈ro wae rami. YandeYa Jesucristo jekuaeño tipɨakawi pewe.

Efesios 2:2

Jukuärái pe reta pikose, echa’ä jekuaeño pemomoe piko kua ɨwɨ pewa reta jeko kachi wae re. Piyeyokuise piko Añawasu pe. Jae ko opaete aña reta imburuwicha, jare yandepuere’ä yaecha wae. Jae ko espíritu ikawi mbae wae jare uparawɨkɨ oï imbaepuere rewe opaete Cristo re wɨrowia mbae wae reta ipɨa pe.

Colosenses 2:15

Jare jokuaño’ä ko. Cristo umano kurusu re yawe, jae opa umɨamɨri opaete aña reta jare upɨ̈ro chuwi reta imbaepuere jae reta ime wɨreko yanderé wae. Jare joko wi jae umɨmichika reta opaete wae jowake. Jare jukuärái Cristo uechaka opaete wae pe jae ko upurumɨamɨri wae.

1 Timoteo 3:16

Jare ikawiete ye ko kua yemboe, echa’ä uikuaaka yandewe kuärái: Jae ikoño mái wae uyeyapo kuimbaerä. Espíritu Santo uikuaaka kawi yandewe jae ko Tumpa Taɨ wae. Araɨwa reta uecha uyerowia rewe. Uyemɨmbeu jesewa opaete kerupi. Jare jeta wae reta wɨrowia jese. Jare Tu wɨraa ye ara pe oï waerä jae ndiwe. Jukuärái jokua yemboe añetete wae uikuaaka yandewe.

Hebreos 2:14

Opaete kua Tumpa taɨ reta yae chupe wae, jae reta ko jae soo jare tuwɨ jare maekäwe pewa. Jáeramo Jesús wi uyeyapo jae reta rami etei ipuere waerä imano rupi umɨamɨri mano iya – jae ko Añawasu.

Hebreos 9:26

Jukuärái yawe, jayawe ɨwɨ uyeyapo wiwe jeta wese Cristo umanota tëi. Erëi añawe kua ara taɨkuewa rupi jae uñemee umano waerä pëti weseño jaeño mái pewa opa umbái waerä mbaembae yayawɨ Tumpa kotɨ wae.

2 Pedro 2:4

Yaikuaa Tumpa uiporarakata oï chupe reta, echa’ä araɨwa retawe ipuere’ä oyepe Tumpa iarasɨ wi arakaete uyawɨ reta Tumpa kotɨ yawe. Echa’ä Tumpa ara wi omombo reta pɨ̈tumimbiete oï wae pe, jare joko pe uñeñapɨ̈ti ñonoï reta ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

1 Juan 1:2

Jae ikoño mái yandeRu Tumpa ndiwe jare añawe uyechaka ma orewe. Ore reta etei nduecha ma, jare añawe nduikuaaka noï pewe jesewa jare kërái jae ikoño mái iko wae rewa.

1 Juan 3:10

Jukuärái ko yandepuere yaikuaa kía ra ko jae Tumpa taɨ reta wae jare kía ra ko jae Añawasu taɨ reta wae. Opaete mbae jupi mbae uyapo wae reta Tumpa pewa’ä ko. Jare jae nunga wi opaete uau’ä japicha wae reta Tumpa pewa’ä ko wi.

1 Juan 3:5

Erëi pe reta pikuaa kawi peï Cristo uyeyapo kuimbaerä opa umbái waerä yandewi mbaembae yayawɨ Tumpa kotɨ wae. Jare Cristo pëti wese awe uyawɨ'ä.

1 Juan 5:19

Añetete ko, yande yaikuaa opaete kua ɨwɨ jeko rupi yureko wae reta Añawasu imbaepuere pe ko ñonoï. Erëi yaikuaa wi yande reta ko jae Tumpa pewa reta.

Judas 1:6

Jare yanemandúa wi arakae mbae uasa amokue araɨwa reta pe. Yepe tëi Tumpa umee chupe reta mbaepuere ara pe, erëi uwäe ara jae reta uipota’ä jokua mbaepuere jare opa ueya reta jenda ara pewa. Jáeramo Tumpa omombo reta kiape pɨ̈tumimbiete oï wae pe, jare joko pe jae reta uñeñapɨ̈ti ñonoï ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

Apocalipsis 20:10

Jae reta uyembɨtawɨka Añawasu pe. Jare joko wi aecha jokua tata wasu azufre ndiwe jendɨ oï wae. Joko pe ko tenonde yawe Tumpa omomboka jokua bestia jare Tumpa iñee umɨmbeuraanga wae ndiwe. Jare amae aiko rambuewe, Tumpa omomboka Añawasu joko pe wi. Jae reta mbapɨ rewe uiporarata joko pe ara rupi jare pɨ̈tu rupi jaeño mái pewa.