1 Juan 3:22 - Biblia

²² Jare ipotawe mbae yayerure chupe wae, jae uyapota yandewe, echa’ä yayapo jae jei wae ramo jare yayapo mbaembae jae umbɨyerowia wae ramo.

Guaraní Pe (Western): Simba

²² Jare yayerure yave Tumpa pe mbae re, jae umeeta yandeve, yayapo iporoyocui reta ramo. Echa'ã jocua yayapo vae umbɨyerovia Tumpa.

1 Juan 3:22 Iomraidhean Croise

San Mateo 17:5

Jare Pedro uyemɨngeta iko rambuewe, uyekuaa chupe reta amapɨ̈tu jembipe wae jare opa oñowa reta. Jare amapɨ̈tu wi uyendu ñee jei: “Kua ko jae cheRaɨ auete wae. Jae chembɨyerowiaete. Piyapɨsaka jese,” jei.

San Mateo 21:22

“Jare pipota yawe Tumpa ipotawe mbae uyapo waerä pewe, piyerure Tumpa pe jese. Jare perowia kawi Tumpa uyapota oï pewe yawe, jayawe uyapota ko,” jei Jesús jemimboe reta pe.

Marcos 11:24

“Jáeramo che tae pewe, piyerure yawe Tumpa pe ipotawe mbae re, jare perowia Tumpa umee ma ko pewe yawe, jayawe penoita ko,” jei chupe reta.

San Juan 14:13

“Jayawe ipotawe mbae re pe reta piyerure yawe cheRu pe cheree re, che ayapota aï. Echa’ä jukuärái ayapota cheRu jee uyembutuichaka waerä.

San Juan 15:10

¿Kërái ra pikota jukuärái? Pe reta piko yawe che jae wae rupi, jayawe jekuaeño piyekouta peï kuri che puau wae re. Jukuärái wi che jekuaeño ayekou aï cheRu cherau wae re, echa’ä che aiko jae jei wae rupi,” jei chupe reta.

San Juan 15:7

“Erëi pe reta jekuaeño piñemɨïru kawi yawe che ndiwe jare jekuaeño piyapo yawe che pomboe wae rupi, jayawe pepuereta piyerure cheRu pe ipotawe mbae pipota wae re, jare cheRu uyapota oï pewe,” jei chupe reta.

San Juan 6:29

Jayawe Jesús jei chupe reta: “Perowia Tumpa ombou wae re – jae ko che. Kua ko jae mbarawɨkɨ Tumpa uipota piyapo waerä wae,” jei chupe reta.

San Juan 8:29

“CheRu ko chembou jare jae oï che ndiwe. Jae chereya’ä etei, echa’ä che jekuaeño ayapo jae umbɨyerowia wae,” jei chupe reta.

San Juan 9:31

Yande yaikuaa ñaï Tumpa ndarau uyapɨsaka jeko kachi wae reta re. Erëi ime yawe kía Tumpa jee umbutuicha wae jare uyapo Tumpa jei wae, Tumpa uyapɨsakata oï jese,” jei chupe reta.

Hechos 17:30

“Ɨma ma Tumpa ipɨawasu iko chupe reta, echa’ä jae reta uikuaa’ä yureko kërái ko Tumpa wae. Erëi añawe jae jei oï opaete wae pe yaeya waerä yandepɨayemɨngeta jupi mbae wae Tumpa rewa.

Hechos 20:21

“Jare jekuaeño amɨmbeu opaete wae pe – judío reta pe jare judío mbae wae reta pe wi – ueya reta waerä ipɨayemɨngeta jupi mbae wae Tumpa rewa jare wɨrowia reta waerä yandeYa Jesucristo re,” jei chupe reta.

Filipenses 4:18

Jayawe pe reta pikuaa waerä, uwäe ma chewe opaete mbaembae pe reta peruruka chewe wae. Epafrodito umee ma chewe opaete jare añawe ayekou aï. Uata’ä etei oï chewe mbae awe. Kua yemborɨ pe reta peruruka chewe wae, jae ko mbae pemee Tumpa pe wae rami. Jokua nunga Tumpa umbɨyerowia.

Colosenses 1:10

Jukuärái ore nduyerure noï peré pereko kawi waerä kërái ikawi ko yureko waerä kía kía Tumpa pewa iko wae reta. Echa’ä jukuärái piko yawe, pembɨyerowiata Tumpa opaete mbaembae piyapo wae rupi. Echa’ä piyeyokui kawita chupe opaete mbae ikawi wae Tumpa pe piyapo wae rupi, jare jekuaeño wi pekuakuaata Tumpa kotɨ arakuaa rupi.

Hebreos 13:21

Che ayerure aï Tumpa pe jekuaeño pemborɨ piyapo kawi waerä opaete jae jei wae rupi. Jare jae tuparawɨkɨ yandepɨa pe yande reta jekuaeño yambɨyerowia waerä jae. Jare jukuärái tuyapo yandeYa Jesucristo imbaepuere rupi. ¡Tuyembutuichaka yandeYa Jesucristo jee jaeño mái pewa! Jukuärái tuiko.

Santiago 1:5

Erëi ime yawe kía pepɨte rupi kua mbaembae rewa arakuaa uata chupe wae, tuyerure Tumpa pe jokua re. Jare Tumpa umeeta chupe arakuaa. Echa’ä Tumpa umeeta arakuaa ipɨakawi rewe jare umɨanga mbae rewe opaete ueka reta chupe wae pe.

Santiago 4:3

Ani aramoi piyerure tëi chupe jese, erëi jae umee’ä pewe. Echa’ä piyerure kawi’ä pepɨa ikawi’ä oï ramo. Echa’ä jokua mbaembae piyerure jese wae, jaeño pipota piporu piyembɨyerowia waeräño.

Santiago 5:16

Jáeramo pe reta piyawɨ yawe Tumpa kotɨ, piyemɨmbeu peyupe piñemɨmichi rewe. Jare piyerure piyé Tumpa pe pekuera waerä. Añetete ko, pëti jupi wae ipɨa rewe uyerure yawe Tumpa pe mbae re, jokua yerure ime onoi mbaepuere.

1 Juan 2:3

Jare ¿kërái ra yandepuere yaikuaa añetete ra yaikuaa Tumpa wae? Yande yayapo yawe mbaembae Tumpa jei yandewe wae, jokua uikuaaka yandewe yaikuaa ko Tumpa wae.

1 Juan 5:14

Jáeramo yandepuere yayerure Tumpa pe ipotawe mbae re. Jare yayerure yawe jae uipota wae rupi, yandepuere yarowia katu jese uyandu waerä yandewe yandiyerure.