1 Juan 3:12 - Biblia

¹² Awɨye yaiko Caín rami. Caín Añawasu pewa ko jare uyuka tɨwɨ. Jare ¿mbae jeko pewa ra uyuka? Echa’ä Caín jeko kachi ko, erëi tɨwɨ uyapo jupi wae.

Guaraní Pe (Western): Simba

¹² Agüɨye yayapo Caín uyapo rami. Echa'ã Caín aña guasu imbae co jare uyuca tɨvɨ. Jare picuaa co maera uyuca. Caín uyapo icavi mbae vae, jare tɨvɨ uyapo jupi vae. Jáeramo Caín uyuca tɨvɨ.

1 Juan 3:12 Iomraidhean Croise

Génesis 4:25

Adán jembireko Eva imembɨ ye kuimbae jare umbɨjee Set, echa’ä Eva jei: “Tumpa umee chewe kua chemembɨ Abel ipepɨka pe Caín uyuka wae,” jei.

San Mateo 13:19

“Añawe rupi uyemɨmbeu oï ñee kërái kía ipuere waerä oï Tumpa ndiwe, Tumpa oï ma yawe opaete wae imburuwicha wasurä jaeño mái pewa. Jare kía kua ñee uyandu yawe, erëi uikuaa kawi’ä yawe jokua uyandu wae, jayawe ou Añawasu jare opa umɨakañɨka Tumpa iñee wi. Jokua re ko umbɨjaanga yandewe tape raɨ rupi oa temitɨ wae,” jei chupe reta.

San Mateo 13:38

“Jare jokua koo uyembɨjaanga oï opaete ɨwɨ re. Jare trigo ikawi wae uyembɨjaanga oï kía reta ikota Tumpa ndiwe wae re, Tumpa oï ma yawe opaete wae imburuwicha wasurä jaeño mái pewa. Jae reta ko Tumpa taɨ reta. Jare kapii ikawi mbae wae uyembɨjaanga oï jokua uyeyokui Añawasu pe wae reta re. Jae reta ko jae Añawasu taɨ reta.

San Mateo 23:35

“Jáeramo peré oata oï teko opaete jupi wae reta juwɨ uyepɨyere wae re pe reta piyuka wae rami. Jae ko opaete jupi wae reta Abel wiwe Zacarías rewa – jae ko Berequías taɨ. Jokua Zacarías, peramɨkue reta uyuka tupao wasu joka mbɨte pe etei,” jei chupe reta.

San Mateo 27:23

Erëi Pilato upɨrandu chupe reta: “¿Marái ramo pipota umano waerä kua kuimbae? ¿Mbae ikawi mbae wae pa uyapo?” jei chupe reta. Jayawe jae reta jeiete usapɨkai rewe jei: “¡Ikutuka kurusu re!”

San Mateo 5:37

“Jayawe ndipota ndikuaaka yawe nderapicha pe añetete ko ndere neï wae, ereño chupe: ‘Ayapota,’ ani ‘Ayapota’ä.’ Jokuaño ere chupe, echa’ä nemɨïru yawe jokua ndere wae, jokua ou ko Añawasu wi,” jei Jesús chupe reta.

San Lucas 11:51

– jae ko Abel wiwe Zacarías rewa. Jokua Zacarías, peramɨkue reta uyuka tupao wasu joka mbɨte pe etei,” jei. “Erëi yepe tëi peramɨkue reta ko opa uyuka reta, erëi Tumpa pembɨjekota oï wi pe añawe peï wae reta opaete jae reta imano re. Kua che jae pewe wae añetete ko,” jei chupe.

San Juan 10:32

Jayawe Jesús jei chupe reta: “Ayapo ma jeta mbaembae ikawi wae perowake cheRu imbaepuere rupi. Erëi ¿mbae nunga jokua mbae ayapo wae jeko pewa pa pipota cheyuka peï?” jei chupe reta.

San Juan 8:40

Erëi jukuärai’ä piyapo peï. Echa’ä añawe yepe tëi che aikuaaka ma pewe añetete wae Tumpa jei chewe wae, erëitu pe reta pipota cheyuka peï. Abraham uyapo’ä jokua nunga mbae.

San Juan 8:41

Jáeramo Abraham jae’ä ko perukue. Pe reta ime penoi ambɨe peru. Jare jokua peru jekoño pemomoe peï,” jei Jesús chupe reta. Jayawe jae reta jei: “¡Awasa rupi uyekuaa wae’ä ko ore reta! ¡Tumpaño ko jae oreru!” jei reta.

Hechos 7:52

“Echa’ä peramɨkue reta uyapo ikawi mbae wae opaete Tumpa iñee arakae umɨmbeu wae reta kotɨ. Jare ipotawe kía umɨmbeu jokua Upuruepɨ jupi wae outa iko wae rewa yawe, jae reta uyuka. Jare añawe Upuruepɨ wae ou ma, erëi pe reta pemee ma piyukaka waerä,” jei chupe reta.

Hebreos 11:4

Yanemandúa kawi ñaï Abel re. Jae wɨrowia Tumpa jei wae re; jáeramo wɨraa mbaemɨmba uyuka umee Tumpa pewarä. Jare jukuärái umee chupe mbae ikawiete wae tɨkeɨ Caín mbae umee wae wi. Jáeramo Tumpa uikuaaka yandewe jae umae Abel re jeko mbae wae rami, jare uyemɨngeta kawi jokua Abel ueru umee chupe wae re. Jare yepe tëi Abel umano, erëi jae jeko imeño yanemboe oï añawe rewa kërái yarowia waerä Tumpa re.

Hebreos 12:24

Jare yaya ma wi Jesús re. Jae rupi ko Tumpa uyapo yemɨngeta ipɨau wae yande ndiwe. Echa’ä jae upɨyere juwɨ yande yandepuere waerä ñanoi tekowe opa mbae wae. Jáeramo Jesús juwɨ ikawiete ko Abel juwɨ wi, echa’ä Abel juwɨ jaeño uyembɨjaanga oï uyepɨ wae.

1 Pedro 4:4

Jare Tumpa re wɨrowia mbae wae reta pe yawái uikuaa waerä maera ra piyapo’ä ma jae reta ndiwe opaete kua mbaembae ikawi mbae wae reta. Jáeramo jae reta uyemɨngeta ñonoï kachi pekotɨ.

1 Juan 3:8

Erëi ime kía Tumpa jei wae jekuaeño uyawɨ wae, jae Añawasu pewa ko. Echa’ä Añawasu iyɨpɨ wiwe uyawɨño mái Tumpa kotɨ. Erëi Tumpa Taɨ uyeyapo kuimbaerä opa umbái waerä Añawasu iparawɨkɨ.

Judas 1:11

¡Kërái etei Tumpa uiporarakata oï chupe reta! Echa’ä jae reta omomoe ñonoï Caín jeko. Jare korepoti uipotaete reta ramo, uyapo reta ñonoï wi kuimbae Balaam jee wae uyapo rami. Echa’ä jae reta umɨkɨrëɨ ïru wae reta uyapo waerä mbae kachi wae jukuärái umɨngana waerä jese reta korepoti. Jae nunga wi jae reta ko kuimbae Coré jee wae rami, echa’ä uyapo’ä reta Tumpa jei wae rupi. Jáeramo opata umano reta Coré umano rami.

Apocalipsis 17:6

Jokua kuña jatangätuete uyuka waerä Tumpa oñono tee iyupewarä wae reta. Jare upɨyere ma jeta wae reta Jesús rewa umɨmbeu wae juwɨ. Kërái usawɨpose wae ueka awariëte rami, jukuärái wi kuña oete ueka jae reta juwɨ upɨyere chuwi reta waerä. Jare che aecha yawe jokua kuña, chepɨakañɨete apɨta.