1 Juan 2:28 - Biblia

²⁸ Jayawe cheraɨ mii reta puau wae, jekuaeño piñemɨïru kawi Jesucristo ndiwe. Echa’ä jukuärái yayapo yawe, ndarau yayepokouka jokua ara Cristo ou ye yawe. Ñaïta jae jowai yayerowia rewe jare ñanemara mbae rewe.

Guaraní Pe (Western): Simba

²⁸ Añave, cheraɨ reta, piñemɨatangãtu piñemɨĩru vaerã Jesucristo ndive. Jucuarãi yave, jae ou ye yave, ñaĩta jae jovai yayerovia reve. Ndarau ñanemara jae ndive ñañeovãiti yave.

1 Juan 2:28 Iomraidhean Croise

San Mateo 16:27

“Che jae pewe kua mbaembae, echa’ä pëti ara che kuimbaerä ayeyapo wae ayu yeta aï cheRu imbaepuere jembipete rewe jare chearaɨwa reta ndiwe. Jare jayawe amɨñatimata aï pëti pëti wae pe mbae uyapo wae rupi,” jei.

San Mateo 16:28

“Che tae pewe añetete wae, amokue pe reta kua pe peï wae ndei pemano mbowe cherechata che kuimbaerä ayeyapo wae ayu ye yawe aiko waerä opaete wae imburuwicha wasurä jaeño mái pewa.” Jukuärái Jesús jei jemimboe reta pe.

Marcos 8:38

“Añetete kua ɨwɨ pe añawe ñonoï wae reta uyerowa ma Tumpa wi jare uyawɨ reta ma jeta ikotɨ. Jare ime yawe kía imara chewi jare chiñee wi kua reta jowai, che kuimbaerä ayeyapo wae chemarata wi chuwi che ayu ye yawe. Echa’ä ayu yeta ko aï. Jare ayu ye ma yawe, ayuta cheRu imbaepuere jembipete rewe jare araɨwa Tumpa oñono tee wae reta ndiwe.” Jukuärái jei Jesús jemimboe reta pe.

San Lucas 17:30

“Jare jukuärái wi ɨwɨ pewa reta uyepokoukata ñonoï kuri, che kuimbaerä ayeyapo wae ayekuaa ye yawe,” jei chupe reta.

Romanos 9:33

Jukuärái wi Tumpa iñee uikuaaka yandewe jae reta rewa, echa’ä Tumpa jei iñeerɨru pe kuärái: “Mase, añono aï pëti wae Israel iñemoñaa reta ipɨte pe. Jae ikota pëti ita rami ipotawe wae kía ipɨsapäa jese waerä. Echa’ä jae jeko pewa jeta wae reta ipɨsapäata oa oo, jare jukuärái ndarau uepitɨ reta tekowe opa mbae wae. Erëi ipotawe kía wɨrowia jese wae ndarau imara.” Jukuärái uyekuatía oï.

1 Corintios 1:7

Jáeramo kua mbaembae reta rupi pepuere pikuaa kawi uata’ä etei pewe mbae awe Espíritu Santo umee wae. Jukuärái ko añawe rupi peäro peï rambuewe piyerowia rewe yandeYa Jesucristo ou yeta wae.

1 Corintios 15:23

Cristo rani tenonde ikowe ye. Jare Cristo ara wi ou ye yawe ramo yande yaikowe yeta ñaï kuri wi. Jukuäraita ko yasa opaete yande Cristo pewa yaiko wae reta.

Efesios 3:12

Jayawe Cristo re yarowia ramo, pëti ramiño ñaï jese. Jáeramo yandepuere ñañemɨïru kawi Tumpa ndiwe yakɨye mbae rewe jare yandepɨawiwe rewe.

1 Tesalonicenses 2:19

Ore nduipota tëi ndoo ye ndopou pepɨ, echa’ä pe reta tuicha rupi orembɨyerowia peï. Jare ore nduikuaa jokua ara yandeYa Jesús ou ye yawe ara wi, pe reta wi peïta jae ndiwe joko pe. Jare ore nduyerowiaeteta noï jae jowai jae oreporu rambuewe pe reta penoi waerä tekowe opa mbae wae.

1 Tesalonicenses 3:13

Pëti ara yandeYa Jesucristo ou yeta oï opaete kía kía jae oñono tee jae imaerä wae reta ndiwe. Jare jokua ara opaete yande yayemboɨta ñaï Tumpa jowai. Jáeramo yandeYa tumɨmɨräta pepɨa pepuere waerä piko jupi, jare jukuärái pepuere waerä piyemboɨ Tumpa jowai pereko mbae rewe jokua ara. Jukuärái tuiko.

1 Tesalonicenses 5:23

Tumpa ko jae yanembɨpɨakatu wae. Jare jae etei tapeñono tee opaete mbae ikawi mbae wae wi. Jare tuyandareko kawi peré – perekowe jare peä jare perete re – awɨye waerä peï teko pe yandeYa Jesucristo ou ye yawe.

1 Timoteo 6:14

Jáeramo che tae ndewe, jekuaeño iyapo kawi opaete mbarawɨkɨ Tumpa umee ndewe wae yandeYa Jesucristo ou ye rewa. Jukuärái ndiyapo yawe, ndarau ndiyapo mbae ikawi mbae wae. Jare ndarau wi kía ipuere nembɨjeko mbae re awe.

2 Timoteo 4:8

Añawe aikuaa aï yandeYa upi oï mbae ikawiete wae chemaerä umee waerä chewe jokua ara jae ou ye yawe. Tumpa jokua umeeta oï chewe kërái pëti corona uñemee upurumbɨsɨpe wae pe rami, echa’ä mbae ikawi mbae wae amɨamɨri ramo. Erëi cheño’ä ko anoita. Echa’ä jokua mbae ikawiete wae yandeYa jupiete wae umeeta oï ipotawe kía pe ipɨakɨrëɨ rewe uäro oï jokua ara jae ou yeta wae.

Tito 2:13

Jukuärái ko yaikota añawe rupi, yande ñaäro ñaï rambuewe yayerowia rewe yandeYa Jesucristo ou ye rewa. Jokua ara jae uyekuaata oï imbaepuere jembipete rewe. Echa’ä jae ko yandeTumpa jare yandeRepɨ wae, jare jae imbaepuere tuichaete.

Hebreos 9:28

Jare jukuärái wi Cristo pëti weseño uñemee umano waerä jeta wae reta re mbaembae jae reta uyawɨ Tumpa kotɨ wae opa umbái waerä. Jare jae ou yeta oï, erëi mbaetɨta ma ou umbɨepɨ ye waerä mbaembae yayawɨ wae. Jae ou yeta oï umee waerä tekowe opa mbae wae opaete kía uäro ñonoï wae reta pe.

1 Pedro 1:7

Kua yembɨawái reta yuweru ma pewe uyekuaa waerä perowia ko Tumpa re añetete rewe. Jare kua ikawiete ko oro wi Tumpa pewarä. Yaikuaa ñaï oro awe yamɨndɨkui tata pe opa jae yepái uyembatɨ waerä. Jare jukuärái rami Tumpa uyapo oï pewe yembɨawái rupi. Echa’ä jekuaeño perowia yawe Tumpa re yembɨawái rupi, jayawe Tumpa uyemɨngeta kawita peré jare pembutuichakata. Kua uyeyapota oï jokua ara yandeYa Jesucristo ou ye yawe.

1 Pedro 5:4

Jare jokua ara Cristo ou ye yawe, jae umɨñatimata oï pewe peparawɨkɨ re. Echa’ä yandeYa Cristo ko jae jese wɨrowia wae reta itenondewa itenondewa yuapɨ ye wae. Jare jae umeeta oï pewe kuri pëti corona ikawiete ye wae jare ikumewa mbaei wae.

1 Juan 2:1

Cheraɨ mii puau wae reta, aikuatía aï pewe kua mbaembae awɨye waerä piyawɨ Tumpa kotɨ. Erëi kía uyawɨ Tumpa kotɨ yawe, ime ko pëti wae yandeRu Tumpa jowai oï yandepepɨka pe – jae ko Jesucristo. Jae jupiete ye wae ko.

1 Juan 3:2

Cheïru puau wae reta, añawe yande ko jae Tumpa taɨ reta. Jare ndeiño Tumpa uikuaaka yandewe kërái eteita ra ko ñaï kuri wae. Erëi yaikuaa ko ñaïta Cristo rami jae ou ye yawe, echa’ä yaechata jae etei kërái ko jae wae.

1 Juan 3:21

Cheïru puau wae reta, yandepɨa mbaetɨ ma yanembɨjeko mbae re yawe, yandepuereta yaya Tumpa re yayerowia rewe.

1 Juan 4:17

Jare jukuärái yayapo yawe, yaikota Cristo rami jare yayerauta päwe rewe kërái Tumpa jukuäraiño mái uipota wae rupi. Jáeramo yande yayerowiata ñaï kuri yayemboɨ yawe Tumpa jowai ara taɨkuewa uwäe yawe. Ndarau yakɨye.

1 Juan 5:14

Jáeramo yandepuere yayerure Tumpa pe ipotawe mbae re. Jare yayerure yawe jae uipota wae rupi, yandepuere yarowia katu jese uyandu waerä yandewe yandiyerure.

Apocalipsis 1:7

¡Mase, ko jae ma ou amapɨ̈tu re! Jare opaete wae uechata ñonoï. Uikutuka wae retawe uechata wi. Jare opaete kua ɨwɨ pewa reta tuicha ipɨatɨtɨta jae jeko pewa. Añetete jukuärái tuiko.