IBƏRANIKWA 9:28 - Bible Zulgo

²⁸ Kamala taŋa ya, Yesuw Kiristi tekeɗe, à mət ka, sik ilik pəra mbaŋa. A vəl ba ŋgar a Mbulum ka, na dite a beye a dər à gà mburma hinne i bakal tar a ya. I dəba ŋa ya ka, à mère a masula ŋa asa. A mère a ka, aà məpəla à tar i bakal tar a asa tsa. Ama ka, aà məmbə̀là à gà mburma ŋgar ana tar ihər ta bebe a ŋgat a.

IBƏRANIKWA 9:28 Iomraidhean Croise

Mata 20:28

Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Mata 25:31

I dəba ŋa ya, Yesuw a gwaɗa a tar asa: «Aka təv ana iye, *wur ana a dara i təv Mbulum a, i mère a ya ka, i mère a nda ndzəɗa Mbulum ana a viliŋ a hinne, mər nda gà gawla Mbulum a tserdze. Dite ka, i ndze a aka təv mendze Əbay gà kuɗa.

Mata 26:28

Naha ka, məmbəz ga ana i ti dze a dər a bəɗ, aɗaba məpəla dər à bakal gà mburma ana ika gər ahəɗ hinne ya. Taŋa ka, dukw ana i sir a dər ba à gà mburma nda Mbulum hiywe aà biybiy a.

Yuhana 14:3

Na Yàa da, Yàa làmbaɗa a kurumara aba təv mendze ata ya ka, i mbiɗere a gər a təv kurum a, dite i dzik a kurum a təv gà, kurum tekeɗe, ki ndzwim a i təv ana iye iɗəm a mbaŋa.

Gà Ɓəzla Meslire 1:11

ta gwaɗa a tar: «A kurum gà Galile, aàmala na ki ndzwim a i faha aà məfə̀rà aà gəza mbulum a? Yesuw ka, aka da ika magər kurum a, a gər ŋa. Ama à mère a mba ka, kataya mbaŋa asa, kamala naha a da à kurum a.»

RUMA 3:25

Mbulum a tike ŋgat kamala dukw ana ta kìɗer a ya, na dite à mìt a aɗaba kwa, məmbəz ŋgar a beye a à kwa i bakal a ya. Kamala taŋa ya, Mbulum a sər ba à kwa nda gà ŋgat ka, aɗaba ana kə̀ gə̀sakwa Yesuw Kiristi nda gəzləŋ kwa ya. A ge dər kataya ka, dite mburma tə sər dər, ŋgat ka, mala ndzer, a waya bakal tsa. Akahər ata ka, aka gəs gəzləŋ i təv bakal ana gà mburma ta gewa ya. A fə̀r ahər kamala ana aka ŋgatar tsiye. Ama aka bəra aaha kinehe ya ka, a ɗif dər a gà mburma kuɗa, aà tə sər dər ka, ŋgat mala ndzer, a waya bakal tsa. Ŋgat a sasar a ge a ka, dukw ana ndzer a, dite ŋgat asa ka, a waya a ne a à mburma gà ŋgwal ŋa ika miɗ ŋgar, na à gà na ta gəs Yesuw Kiristi nda gəzləŋ tar a.

RUMA 5:15

Ama gà tar ata sula ya ka, tar pampam mbaŋa, aɗaba ŋgwal dukw ana Mbulum a vəlakwa biy taf masakəŋa ya ka, ar ka, kamala biy bakal Adama ata a ge ya tsa. Kaɗəŋ, gà mburma tserdze ta mete a ka, aɗaba bakal wele ata a ge ya ilik. Ama ŋgwal dukw ana Mbulum a ge a kwa ya ka, a za taŋa kweleŋ fètìte. Aɗaba a pise a kwa ahəm biy taf masakəŋa, a ge a kwa ŋgwal ŋa ka, nda ahər mburma ilik, kamala megweɗe ya ka, Yesuw Kiristi.

RUMA 6:10

I təv ana a mət a ka, a mət aɗaba bakal mburma sik ilik, tsam ka, aka ndəv. Ama kinehe ka, aka mbəlara i məməta ya, ŋgat a riŋ mandza ŋa nda gà mesife i təv Mbulum.

RUMA 8:23

Ama ka, zləma gà dukw ata ɗekɗek tsa, na ti sèwèr a are ya. Kwa ana Mbulum a lah mivile a kwa Mezite Mesife ŋgar a tekeɗe, kwa ihər ki bèsekwe a i gəzləŋ kwa mbaŋa. Kà wayakwa pat ŋa ma ndzera ka, bise na Mbulum a ti ne a à kwa gà ɓəza ŋgar nda ndzer a, kamala megweɗe ya ka, à mbìrwìɗere a ba kwa i mesewere are ya fit kuɗa.

RUMA 8:3

Məpala ahəm Musa ka, a sle aà məvəla kwa mesife tsa, aɗaba ana kwa ka, gà mburma taf masakəŋa, ndzəɗa kwa a riŋ tsiye. Kwa ka, kà mbàkwa aà magəsa ahər ahəm tsa. Ama dukw ana məpala ahəm ata a sle aà mege ŋa tsiye ka, Mbulum nda ahər ŋgar ŋa aka ge. A ge taŋa ka, nda maslə̀rà Kəla ŋgar ana a slərra aka gər ahəɗ a, a ne mburma kamala kwa ya ya. Tàa dzik à ŋgat aà mege bakal kamala kwa mburma ya mbaŋa, ama ka, aka ge tsa. Dite i dəba ŋa ya ka, a mət aɗaba bakal kwa. Kamala taŋa ya na Mbulum a ge seriye bakal ana mburma a gewa ya.

1 Kurintiya 1:7

Aɗaba taŋa, dukw ana Mbulum a dze a a gà mburma ŋgar a tserdze ka, kàa ŋgatum, kuɗa duwa a ge a kurum a tsidze. Dite kurum riŋ ihər ki vevwim a ka, pat ana Yesuw Kiristi à mère a nda ndzəɗa ŋgar ana tì zlibe a dər a ka, nda gà maŋgayaba.

1 Kurintiya 15:54

I təv ana ba kwa à mbìɗ a ba ŋgiɗ kamala taŋa ya ka, taŋa dukw ana mewetse ŋa a riŋ i wakita Mbulum a, a ge a ba kuɗa. Ta gwa ka: «Məməta a riŋ asa tsa, Mbulum aka dzeye dər fit kweleŋ.

1 TESALUNIKE 1:10

Kinehe ka, kurum ihər ki vevwim a Kəla ŋgar ana à mère a i gər ŋa i mbulum a ya. Kəla ata ka, Yesuw, wele ana Mbulum a mbəlara à ŋgat i məməta ya ya. Ŋgat na a ta beye a à kwa i matsəɓatsəɓ Mbulum ana mandza ŋa ika gər gà ɓəzla bakal a. A ta ge a ka, a pat seriye ŋgar ana aka ndze aɗəm a.

2 TESALUNIKE 2:1

Gà damər mər, kurum ihər ki vevwim a ka, pat ana Yesuw Kiristi BATSAH kwa ŋa à mère a ka, dite ki yehekwebe a gər a təv ŋgar a. Ama kəla ka, mìi ge a kurum a kamkam:

2 TIMUTE 4:8

Kinehe ka, dukw mayaba gà a riŋ a veve a iye i təv Mbulum. A viliŋ a ka, aɗaba ana i ne ŋgwal ŋa ika miɗ ŋgar a. Kamala taŋa ya, a pat ana Yesuw Kiristi BATSAH kwa ŋa, wele ana ŋgat mala masàsà ikaba seriye ya nda ndzer a, aka dara ka, à piliŋ a dukw mayaba gà fit. Ama ka, a iye ɗekɗek tsa. Gà na ta veve a ŋgat, à kiv a ter a hinne, ta waya ma dara a təv tar a tekeɗe, ta ŋget a dukw mayaba tar mbaŋa.

TITUS 2:13

Ndzakwa ka, nda mandza zləm, vavakwa pat ŋgwal ŋa ata Yesuw Kiristi, mala məmbə̀là à kwa à mère a ya. A mère a ka, nda mezlibe ŋgar ana tì zlibe a à ŋgat a. Ŋgat ka, Mbulum kwa batsah ŋa ana a za gà dukw tserdze ya.

IBƏRANIKWA 1:14

Dite gà gawla Mbulum dze ana, gà dukùla? Tar ka, gà ɓəzla megemir Mbulum ɗekɗek pəra, a slir a tar aà mazlàkà gà mburma ana a sasar ta mbala ya.

IBƏRANIKWA 10:10

Aɗaba Yesuw Kiristi ka, aka ge gà dukw ana a sàs a Mbulum a, agəra ana a vəlar ba ŋgar kamala dukw taf ana masakəŋa ya. A vəlar ka, sik ilik pəra, i təv ana a mət a tsara ka, aà biybiy. Kamala taŋa ya na kinehe kà nekwa gà tsəɗaŋŋa ika miɗ Mbulum, kà nekwa gà mburma ŋgar a.

IBƏRANIKWA 12:14

Yahum vatwa nda ndzəɗa kurum fit, na dite ki ndzwim a zayya lele ika magər gà mburma tserdze ya. Ki yehwim a vatwa ka, dite mendze kurum ma ge tsəɗaŋŋa ika miɗ Mbulum lele mbaŋa. Aɗaba na wura a ndze a kataya tsəka, wura ilik a ŋget a a Mbulum tsa.

IBƏRANIKWA 2:3

Na Mbulum aka sèwèr a tar are kataya dze ana, kà dzalakwa ana, kwa ana pam a, na ki fìrekwe a aà ŋgwal vatwa ana a mbil a dər à kwa ya ka, kamala dukw taf masakəŋa ya? Yesuw Kiristi BATSAH kwa ŋa nda gər ŋgar aka lah metsìkè a kwa, meme na Mbulum a ta mbil a kwa ya. Gà na tə tsaraka bazlam ŋgar ata ya, dite ka, ta mà a kwa dər, ta gwa ka, bazlam ŋgar ata ka, ndzer kaɗəŋ, pàrsa iɗəm tsa.

IBƏRANIKWA 4:15

Ŋgat na kà ndzekwar are tsehe, a geye ika kwa ya nda təv gà dukw ana mawùràba ŋa i təv kwa ya. Aɗaba ŋgat ka, aka sər aà mesewere are ya pampam mbaŋa, tàa dzik à ŋgat, ta waya madə̀ɗà à ŋgat a bakal kamala kwa ya. Ama ka, aka ge bakal ata tsidze.

IBƏRANIKWA 5:9

Mbulum a ndəv à dukw ana a dzala, a waya aà mege nda ŋgat a ka, a ne mala məmbə̀là à gà mburma ana tserdze ta gəs ahər ahəm a, dite ka, ta ŋget a mesife ana à ndìv a tsa aà biybiy a.

IBƏRANIKWA 7:27

Aɗaba gà asiŋ gà bàba gà ɓəzla mandəva kuɗa a Mbulum ŋgiɗ ata ka, ta batsawa duwa a Mbulum kəla pat. Malahalah ŋa ka, ta batsawa aɗaba bakal tar dzekwiŋ, dite i dəba ŋa ya, ta bets a aɗaba gà mìsle ŋgiɗ kuɗa. Ama biy Yesuw ka, kataya tsa. Ŋgat ka, a vəl ba ŋgar a Mbulum taf masakəŋa, sik ilik pəra, i təv ana ta kəɗ ŋgat a, tsam ka, tsuway tsara. Sik ilik ŋa ata ka, a sle aà biybiy.

IBƏRANIKWA 9:25

*Batsah mala mandəva kuɗa a Mbulum gà Yahuda a dawa a dzə̀ɓər ga ata tsəɗaŋŋa biy Mbulum a ka, kəla viye. A dawa ka, nda gà məmbəz gənaw i ahər, tsəka, nda məmbəz ba ŋgar tsa. Ama Yesuw Kiristi a vəl ba ŋgar a Mbulum ka, sik ilik, tsam ka, tsuway tsara, tsəka, sik diŋ tsa.

1 PIYER 2:24

Yesuw Kiristi nda gər ŋgar a zla bakal kwa aka ba ŋgar. Tə ndwandway ŋgat aà dizl magə̀làwà ŋa ka, dite ka, bakal ma kwara kwa asa tsa, kamala ana a kwere a gà məməta asa tsiye mbaŋa. Ama i təv mege dukw ana ŋgwal ŋa ya ka, taŋa kwa riŋ ka, nda gà mesife, aɗaba megìzle ana ta gə̀zl ŋgat, ta ger mbəlak a, na a mbəl à kurum a.*fg*

1 PIYER 3:18

Yesuw Kiristi nda gər ŋgar a mət ka, aɗaba bakal kwa. A pəl dər à kwa i bakal a sik ilik pəra, gər melik tsara. Ŋgat ka, mala ndzer ŋa, bakal ŋgar a riŋ tsa. Ama a mət agəra gà mburma ana ta gewa bakal a, dite na à dzik a kwa a təv Mbulum a. Gà mburma ta kəɗ ŋgat. Ama Mezite Mesife Mbulum a mbəl à ŋgat a mesife asa.

2 Piyer 3:12

Vavum pat ana Mbulum à mère a ya, kəla pat. Gwim mege megemir ŋgar tserdze lele, na dite à mère a bise ya. A pat ata ka, gəza mbulum a wene a sirikw sirikw, fit a nisiŋa. Dite mawusawus ana gà madzàvà ŋa aà gəza mbulum a ka, wàfùfùfùffa ta wilezliŋa, a tèkwe a, duwa ilik a zehe a tsidze.

1 Yuhana 3:2

Gà masla gà, kinehe ka, kàa nekwa gà ɓəza Mbulum, dite ki ti nekwe a gà dukùla na aka miɗ mba ya ka, ki sirekwe a zukw tsa. Ama kə̀la ka, kà sərakwa ndzer, na *Kiristi aka màra ka, ki ti ndzìkìɗekwe a ba kamala ŋgat a, aɗaba ki ŋgetekewer a parakkà, kamala ana ŋgat a ndza ya kaɗəŋ.

1 Yuhana 3:5

Kurum kà sərum, Yesuw Kiristi a dara aka gər ahəɗ a ka, aà məbàrà aà kwa bakal kwa ana ki gekwe a ya. Ŋgat ka, bakal ŋgar a riŋ ilik tsidze.

Yuda 1:21

Ndzum i təv mawàyà ba ŋgar ana a waya kurum a, aka miɗ aka miɗ. Vavum pat ana Yesuw Kiristi BATSAH kwa ŋa a ti ɗif a kwe a à dukw mendze are tsehe kwa ana kà ndzekwar a, dite a vile a kwe a mesife ana à ndìv a tsa aà biybiy a.

Sunwa Yuhana 1:7

Gwim metsehe, a dere a ka, nda hulɓukw a.*fb* Ku weke a ŋgeteriŋa, ku mege gà na ta geyer suwal a tekeɗe ya. Gà slàla pampam ika gər ahəɗ tserdze, ti tiweye aaba a aɗaba ŋgat. A ta ge a ba ka, kamala taŋa ya kaɗəŋ ndzer. Amin.