IBƏRANIKWA 9:14 - Bible Zulgo

¹⁴ Ama na məmbəz gà dukw ata aka sle aà məbàrà tar kamala taŋa ya ka, məmbəz Kiristi à zè a taŋa fit kweleŋ nda ndzəɗa. Ŋgat ana aka ge bakal duwa ilik tsidze ya, a vəl ba ŋgar a Mbulum nda ndzəɗa Mezite Mesife Mbulum ana a ndze a aà biybiy a. Məmbəz ŋgar ata ka, a bere a bakal i gəzləŋ kwa ya lele, na dite ki gekwe a dukw ana a dzeye a à kwa asa tsiye. Ama ki gekwe a ka, megemir Mbulum ana ŋgat mala məvəla mesife a mburma ya ivaɗ.

IBƏRANIKWA 9:14 Iomraidhean Croise

Mata 12:28

Ama na bəla i delewe a gà sitene ata nda ndzəɗa Mezite Mesife Mbulum ka, taŋa ki slwim aà mesire a dər ka, *mekwere Mbulum aka dara a təv kurum a.»

Mata 16:16

Simun Piyer a gwaɗar aaka: «Kər ka, Kiristi, mala məmbə̀là à mburma ana Mbulum a gwa, i slir a kurumaha a ya, Kəla Mbulum ana a riŋ nda gà mesife aà biybiy a.»

Mata 20:28

Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Mata 7:11

Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kurum ana i gər ŋa ya ivaɗ a. A vile a gà ŋgwal gà dukw a gà na ta wiz ahər a ya ana, à zè a taŋa tsiye?

Luka 1:74

Luka 12:24

Fə̀rum aà gà ŋgatak kwaŋ. Kwets ti slige a duwa tsa, ta pele a duwa i bəɗ a tsa, dite awura tar a riŋ aà mekèhe aɗəm gà dukw tar, kige tsa ləmba tar a riŋ aà medzè aaka gà dukw mezime tar ɓav tsa asa. Ama Mbulum na a riŋ a vile a ter a dukw mezime ya. Dite kurum dze ana, kà zùm gà ɗiyeŋ tsiye, na i təv Mbulum a?

Luka 12:28

Aɗaba taŋa, na Mbulum a riŋ ihər, à dìweye a gà gər gà kwizir ana i dala ya lele, a biziŋa, ama ndidwe ŋana ka, ta wene a tsara dze seyiŋ ana, sakwàn kurum a. A dìweye a kurum ana, à zè a taŋa tsiye, na kurum ana kə̀ gəsum iye nda gəzləŋ kwizikw a?

Luka 4:18

«Iye i ahər Mezite Mesife Mbulum, aɗaba a zla iye aà meɗìfè à bazlam ŋgwal ŋana a gà ɓəzla matawak. A slərra iye ya ka, a təv gà ɓəzla daŋgay a, aà meɗife a tar à məpala à tar. Dite aà mahə̀ndə̀kà are a gà ɓəzla guluf mbaŋa nda gà aà mibeyè à gà na ti sèwèrewa a tar are ya.

Yuhana 3:34

Aɗaba wele ana Mbulum a slərra ŋgat a ka, a me a ka, à bazlam ŋgar, aɗaba a vəlar Mezite Mesife ŋgar, a ràhar dər tsìsl a gəzləŋ.

Gà Ɓəzla Meslire 1:2

haa a pat ana a ndisl dər, a da a gər ŋa ya. Aka ana aka tsəl a gər ŋa zukw tsiye ka, aka ɗe a tar aba à metsehe ya, nda ndzəɗa Mezite Mesife Mbulum, a gà mburma ana a ndzək tar kamala gà ɓəzla meslire Mbulum a.

Gà Ɓəzla Meslire 10:38

Kàa tsarakum, meme na Mbulum a rah à Mezite Mesife nda ndzəɗa ŋgar aka gər Yesuw gà Nazaret a. Ama ka, Yesuw a sùwayawa ika ahəɗ gà Yahuda tserdze nda mege ŋgwal ŋa a mburma, a mbala à gà na Əbay sitene a kwere a tar a tserdze mbaŋa, aɗaba ka, Mbulum a riŋ nda gà ŋgat.

Gà Ɓəzla Meslire 14:15

«Gà wele aaha, ki gwim a kataya dze ana, aàla? Mər na Mbulum a? Mər ka, gà mburma kamala kurum a mbaŋa. Mì da a kurumara ka, à bazlam ŋgwal ŋana, dite a gweɗe a kurum a ka, miyakum à matawala gà dukw ana kù gwaɗum ka, gà mbulum kurum a, tsaatsa ki pezwimebe a za ya. Ama kà mbəɗum ahəm a təv Mbulum ana a riŋ nda gà mesife aà biybiy a. Ŋgat na a ge gəza mbulum nda gər ahəɗ, nda gà duluv, dite nda gà dukw ana ika gər ahəɗ tserdze ya.

Gà Ɓəzla Meslire 15:9

Aka wala ikaba tar nda gà kwa ya tsa. A pə̀lara à tar i bakal a ka, aɗaba ana tàa gəs ŋgat nda gəzləŋ ilik a.

RUMA 1:20

Wura aka sle aà meŋgete a Mbulum ilik tsidze. Ama daga aà gər ana a ge gər ahəɗ a, haa kinehe ka, gà dukw ana a ge tserdze ya, ti ɗif dər a gà mburma parakkà, meme na ŋgat a ndza ya. Aɗaba ndzəɗa ŋgar ana a ndze a aà biybiy a ka, aka pàt aba ndzer. Ti sir a dər mbaŋa, ŋgat ilik na Mbulum a. Aɗaba taŋa na ti sle a aà megweɗe a ka, maa sər tsəka, ti sle a tsiye.

RUMA 1:4

Ama i təv ana Mbulum a mbəlara à ŋgat i məməta ya, a ɗif dər ka, Kəla ŋgar ana a vəlar ndzəɗa aka gər gà duwa tserdze ya.

RUMA 11:12

Akahər bakal tar ata ta ge ya ka, Mbulum a ge ŋgwal ŋa ka, a gà asiŋ gà mburma ana ika gər ahəɗ tserdze ya. Agəra medìɗè tar ata tə dəɗ ika vatwa ŋgar a ka, a pise ahəm a gà asiŋ gà mìsle ŋgiɗ hinne kuɗa. Dite na gà Yahuda tserdze ta mbəɗ gər a təv ŋgar ana, a pisakwe a ahəm ana, à zè a taŋa tsiye.

RUMA 11:24

Aɗaba taŋa, kurum gà mburma ana gà Yahuda tsiye, kà nwim ka, kamala ahər dizl ɗaf ata taf masakəŋa i dala, tə sàsara, tə dara, tə dzava aka na ŋgwal ŋa lele ya ya. Na Mbulum a sər mege dukw ana kuɗa ihər a kataya ya ana, kà dzalum ana, a sle a aà məma à gà Yahuda a təv mendze tar ata dukw tar tsiye, na tar ana ti ne gà ahər ŋa ana ndzer ŋa ya seyiŋ a?

RUMA 6:13

Kamala taŋa ya, ka ta vəlum ba kurum a ahər a bakal, ma kwara kurum aà mege dukw ana ŋgwala tsiye asa tsidze. Ama vəlum ba kurum a ahər ka, a Mbulum ivaɗ. Aɗaba kurum kà nwim ka, kamala gà mburma ana tàa mbəlara i məməta ya, tàa ŋgat mesife ana awiya ŋa ya. Vəlumar ba kurum a ahər fit, na dite ki nwim a dukw ahər ŋgar aà mege dukw ana ŋgwal ŋa ya ya.

RUMA 6:22

Ama kurum kinehe ka, gà ɓele bakal asa tsa, kàa beywimera iɗəm a. Kàa nwim gà ɓele Mbulum kuɗa. Aɗaba taŋa, dukw ana kə ŋgatum i təv ŋgar a ka, a ne à kurum gà tsəɗaŋŋa, na dite ki gwimer a dukw ana a tsahən ahər a ya. Dite aka mandəvandəv ŋana ka, ki ŋgetwim a dər mesife ana à ndìv a tsa aà biybiy a.

1 Kurintiya 15:45

Aɗaba a riŋ mewetse ŋa i wakita Mbulum ka, a gwa: «Adama malahalah ŋa na Mbulum a vəlar mesife ya.»*fe* Wele ana a ndə̀vara aba i dəba Adama ya ka, *Kiristi. Tar ka, ilik nda Mezite Mesife Mbulum ana a vile a mesife awiya ŋa a mburma ya.

2 Kurintiya 5:21

Kiristi ka, aka ge bakal duwa ilik tsidze. Ama ka, Mbulum a zla bakal kwa tserdze, a tike aka gər ŋgar. A ge dər kataya ka, aɗaba kwa, dite i təv ana kwa mandza ŋa i təv ilik ŋa nda gà Kiristi ya ka, a ne a à kwa gà ŋgwal ŋa ika miɗ ŋgar.

2 Kurintiya 6:16

Wànà kà dzalum dze ana, dukw ana gà mburma ti ne dər mbulum nda ahər tar ŋa ya ana, a sle a aà mendze i ga Mbulum batsah ŋana ya? Awaŋ, a ge a ba tsidze. Yaw, sərum dər ka, kwa na kà nekwa ga Mbulum batsah ŋa ata ŋgat a riŋ nda mesife ya. Aɗaba Mbulum a gwa ka: «I ti ndze a ika magər gà mburma gà, i ta ŋget a təv mendze gà i fata. Iye i ti ne a Mbulum tar, dite tar tekeɗe, ti ti ne a gà mburma gà mbaŋa.»*fb*

GALATIYA 2:19

Ama məpala ahəm gà Yahuda ka, aka mbər medzeye à iye. I ne kamala ana iye məməta ŋa ya na nda təv məpala ahəm ata ya, aɗaba a giŋ a ŋgulum ika miɗ Mbulum asa tsa. Ama kinehe ka, Yàa ŋgat mesife ika miɗ Mbulum a. Akahər ata piŋŋe, i təv ana tə ndwandway Kiristi aà dizl magə̀làwà ŋa ya ka, mì mata akaba a təv ilik ŋa nda ŋgat.

EFESIYA 2:5

ku mege kwa kamala gà məməta ana ta mìt a i bakal a tekeɗe ya. Aɗaba taŋa na a mbəlara iɗəm a kwa, a vəl a kwa akaba mesife awiya ŋa nda gà Yesuw Kiristi ya. Ama ka, ma ta məts a kurum gər tsa: A mbəl à kwa ka, agəra ŋgwal ŋgar ana a vəl biy taf a.

EFESIYA 5:2

Wayum mburma kəla pat i təv dukw ana tserdze ki gwim a ya, kamala *Kiristi ana a waya kwa, dite ka, a mət agəra kwa asa ya. A vəl mesife ŋgar biy taf kamala dukw ana ta kəɗ a Mbulum, a dar a gər a.

1 TESALUNIKE 1:9

Ku mege i ŋga, i təv ana mì dawa aɗəm a ka, ti tsikewa a mər nda ahər tar, meme na kə̀ gəsum mər lele ya. Ta gwaɗa a mər mbaŋa ka, kàa miyakum aba à gà fəla kurum ana ki gewim a, dite ka, kà dzàwum gurmits a bəɗ a Mbulum ana ndzer, ŋgat a riŋ nda gà mesife ya.

1 TIMUTE 1:17

Ku weke mà zàmbaɗa à Əbay Mbulum ana mekwere ŋgar a ndze a aà biybiy a. Ŋgat na nda gà mesife ana à ndìv a tsiye. Ŋgat ilik na Mbulum Batsah ŋa, mburma a sle aà meŋgeter a tsiye. Mezembeɗe ma ge ka, biy ŋgar ilik. *Amin.

1 TIMUTE 3:15

Aɗaba ku mege Yàa ndzeha bise tsa tekeɗe ka, wakita aaha a ɗifek a à dukw ana i tsikik a zləmana ya, dite ka, ki sir a dər ka, meme na gà mburma ti sle a aà mede ika magər gà mburma Mbulum ndaka vatwa ŋa lele ya. Na a ne gà mburma ata ka, gà na tar riŋ i huɗ mayahaba gər gà mburma Mbulum ana ŋgat a vile a ter a mesife ya. Gà mburma ŋgar ata na ndəzlzlà ti ne mendweŋe bazlam ŋgar ana ndzer a.

TITUS 2:14

Ŋgat a dzeye à mesife ŋgar aɗaba kwa. Kamala taŋa ya na a pəl a kwa dər à bakal kwa tserdze ya. A bara aà kwa bakal kwa ya, na dite kà nekwa gà mburma ŋgar ana gà biy ŋgar, ta vile a ba aà mege gà megemir ana ŋgwal ŋa lele ya.

IBƏRANIKWA 1:3

Ŋgat a riŋ à pèt a à mezlibe Mbulum ana tì zlibe a dər a, nda təv dzaydzay ŋana i təv ŋgar a. Aɗaba ŋgat na a zla ba kalkal kamala Mbulum a, dite ŋgat na a riŋ à gis a gà dukw ana tserdze ya, nda bazlam ŋgar ana ndzəɗa ŋa ya. A làmbaɗa vatwa ana Mbulum à pìl a dər à bakal a mburma ya, na dite ti ne a gà tsəɗaŋŋa lele ika miɗ ŋgar a. I dəba ŋa ya ka, a da a mbulum kuɗa. A daha, a ndza aka tsèke ahər mezime Mbulum, mala ndzəɗa batsah ŋana a kwere a gà dukw tserdze ya.

IBƏRANIKWA 10:10

Aɗaba Yesuw Kiristi ka, aka ge gà dukw ana a sàs a Mbulum a, agəra ana a vəlar ba ŋgar kamala dukw taf ana masakəŋa ya. A vəlar ka, sik ilik pəra, i təv ana a mət a tsara ka, aà biybiy. Kamala taŋa ya na kinehe kà nekwa gà tsəɗaŋŋa ika miɗ Mbulum, kà nekwa gà mburma ŋgar a.

IBƏRANIKWA 10:12

Ama Yesuw Kiristi ka, a vəlar ba ŋgar ka, sik ilik pəra, na a pəl dər à bakal gà mburma aà biybiy a. Dite i dəba ŋa ya ka, a da a ta mendze ba aka tsèke ahər mezime Mbulum.

IBƏRANIKWA 10:2

Na mege ti ne a gà ŋgwal ŋa tsəɗaŋŋa ika miɗ ŋgar sik ilik pəra ka, ana ka, bakal tar a wurawa aà tar i gəzləŋ, dite ta betsewer a duwa asa tsa.

IBƏRANIKWA 10:22

Aɗaba taŋa, gə̀sakwa Yesuw Kiristi nda gəzləŋ ilik lele. Madzala gà gər kwa ka, ma ge wàkit wàkit tsa. Dite sìrìkikwa a təv Mbulum ka, ndiɓ nda gəzləŋ ilik mbaŋa. Aɗaba Yesuw aka bara gəzləŋ kwa nda məmbəz ŋgar, dite aka bara kwa nda yam ŋgar ana tsəɗaŋŋa ya asa mbaŋa.

IBƏRANIKWA 11:21

Agəra megìse Zakup ana a gəs Mbulum nda gəzləŋ a ka, a pise ahəm a gà ɓəza Yasufa kəla ŋgar sula məma, i təv ana à mìt a ya. A pat ata ka, a diyakw gə̀ràh ŋgar a bəɗ, diyakw a tike aaka gər, a zàmbaɗa à Mbulum.*fk*

IBƏRANIKWA 13:12

Aɗaba taŋa, Yesuw Kiristi tekeɗe, a mət ka, i huɗ kwite tsa. Aka dara iɗəm a bəra ya mbaŋa. A ge dər kataya ka, aà məbàrà dər bakal aà gà mburma ya, nda məmbəz ŋgar ata.

IBƏRANIKWA 3:12

Gà damər gà, gwim metsehe, aɗaba gəzləŋ wura ika magər kurum ma ta ge makula ŋa kamala taŋa ya tsa, dite ka, a niw a magəsa Mbulum, à mbìɗer a dəba, a ŋgat ana mala məvəla mesife ya tsa.

IBƏRANIKWA 6:1

Aɗaba taŋa, tàkwa aka miɗ nda təv bazlam ana aka gər Yesuw Kiristi ya, dite ka, ka nekwa gà mburma ana tàa sime i huɗ bazlam ŋgar ata ya. Tsəka, dìndìleɓ dìndìleɓ ka ta mətsakwa aà bazlam ana kà lah megìsekwa aka gər Yesuw Kiristi ya tsa. Aɗaba kàa mbər medzèkweha aka ndəv, ki tèkwe a ka, aka miɗ aka miɗ nda mazlazla ŋa. Ki slekwe aà meɗekwaba a à dukw ana kàa mbər metserekekwe ya hiywe asa tsa. Kamala kà gwaɗakwa: Mbə̀ɗakwa à madzala gà gər ana ŋgwal ŋa tsiye, nda mimìyàkà à dukw ana ŋgwal ŋa tsa, a ne aka kwe a məməta ya, nda gà magəsa Mbulum nda gəzləŋ ilik a asa tsa.

IBƏRANIKWA 7:16

A ne mala mandəva kuɗa a Mbulum ka, ndaka vatwa məpala ahəm gà mburma ana tə zazaɗawa dər a asa tsa. Mbulum a ne à ŋgat mala mandəva kuɗa ŋgar ka, aɗaba ana ndzəɗa ŋgar a riŋ, ŋgat ka, a ndze a aà bəra aà biybiy a.

IBƏRANIKWA 7:27

Aɗaba gà asiŋ gà bàba gà ɓəzla mandəva kuɗa a Mbulum ŋgiɗ ata ka, ta batsawa duwa a Mbulum kəla pat. Malahalah ŋa ka, ta batsawa aɗaba bakal tar dzekwiŋ, dite i dəba ŋa ya, ta bets a aɗaba gà mìsle ŋgiɗ kuɗa. Ama biy Yesuw ka, kataya tsa. Ŋgat ka, a vəl ba ŋgar a Mbulum taf masakəŋa, sik ilik pəra, i təv ana ta kəɗ ŋgat a, tsam ka, tsuway tsara. Sik ilik ŋa ata ka, a sle aà biybiy.

IBƏRANIKWA 9:12

Akahər ana Kiristi a da a təv ata tsəɗaŋŋa ŋana, Mbulum mandza ŋa iɗəm a ka, a da aɗəm sik ilik pəra, tsam ka, aka ndəv. I təv ana a de aɗəm a ya ka, aka tə̀f dər məmbəz gà vugul nda biy gà mbuluv sla tsa. Ama a vəl ka, məmbəz ba ŋgar ŋa ivaɗ na avukw ŋa ya. Kamala taŋa ya, nda məmbəz ŋgar ata ka, a mburuɗ dərra kwa i bakal a aà biybiy.

IBƏRANIKWA 9:26

Na mege kataya tsəka, ana ka, a ŋgetewe a mesewere are hinne daga aà gər ana Mbulum a ge gər ahəɗ a. Ama ka, kataya tsa, aɗaba a dara kinehe ka, sik ilik pəra, aka mandəvandəv gər ahəɗ aaha kinehe ya. A vəl ba ŋgar ka, na dite sifek à pìl a dər à bakal gà mburma ana ta gewa ya, aà biybiy.

IBƏRANIKWA 9:7

Ama dzə̀ɓər ana i huɗ ŋa ya ka, say mala mandəva kuɗa a Mbulum ana batsah ŋa ya na a dawa aɗəm a. Ama a dawa aɗəm i huɗ mive ya ka, sik ilik pəra. I təv ana a de aɗəm a ya ka, a tə̀fawa dər məmbəz dukw ana ta kə̀ɗawa a Mbulum a, aà ahər a fata, dite ka, Mbulum mə̀ pəl à bakal ŋgar, dite nda gà bakal gà mburma ana ta gewa ka, tə sərawa aaba tsiye ya mbaŋa.

IBƏRANIKWA 9:9

Aɗaba ga malahalah ŋa ata ka, mendzikiɗe ba dukw ana a ge ba kinehe ya pəra. A riŋ ihər a ɗifekwe a dər ka, gà dukw ana ta vile a iɗəm a Mbulum, nda gà dukw gənaw ana ta batsawar a ka, taŋa tsa na a sle a aà məbàrà gəzləŋ gà mburma ata tə zàmbaɗawa dər à ŋgat a ya.

1 PIYER 1:19

Ama kə ŋgatum mezìwè gər kurum ka, nda məmbəz Yesuw Kiristi ana a za gà dukw tserdze ya. Ŋgat a ndzikiɗ ba ka, kəla təmaŋ ana ŋgwal ŋa lele, duwa ihər tsidze, ta kəɗ a Mbulum taf masakəŋa ya.

1 PIYER 2:22

Ŋgat ka, aka ge bakal duwa ilik tsidze, dite wura aka tsaraka pàrsa duwa i bazlam ŋgar a ilik tsidze asa mbaŋa.*ff*

1 PIYER 2:24

Yesuw Kiristi nda gər ŋgar a zla bakal kwa aka ba ŋgar. Tə ndwandway ŋgat aà dizl magə̀làwà ŋa ka, dite ka, bakal ma kwara kwa asa tsa, kamala ana a kwere a gà məməta asa tsiye mbaŋa. Ama i təv mege dukw ana ŋgwal ŋa ya ka, taŋa kwa riŋ ka, nda gà mesife, aɗaba megìzle ana ta gə̀zl ŋgat, ta ger mbəlak a, na a mbəl à kurum a.*fg*

1 PIYER 3:18

Yesuw Kiristi nda gər ŋgar a mət ka, aɗaba bakal kwa. A pəl dər à kwa i bakal a sik ilik pəra, gər melik tsara. Ŋgat ka, mala ndzer ŋa, bakal ŋgar a riŋ tsa. Ama a mət agəra gà mburma ana ta gewa bakal a, dite na à dzik a kwa a təv Mbulum a. Gà mburma ta kəɗ ŋgat. Ama Mezite Mesife Mbulum a mbəl à ŋgat a mesife asa.

1 PIYER 4:2

Daga aà kinehe ya, na kurum mandza ŋa ɗa ika gər ahəɗ tə̀ma ka, ndzum ka, kamala ana a sàs a Mbulum a, tsəka, meèweke ana i ba kurum a, ma ta kwara kurum asa tsa.

1 Yuhana 1:7

Ama na kwa mandza ŋa i təv dzaydzay ŋa kamala Mbulum ana ŋgat mandza ŋa i təv dzaydzay ŋa ya ka, kàa gawakwa ba na taŋa ya. Məmbəz Yesuw Kəla ŋgar ana a dza dər aɗaba kwa ya ka, a bere a gəzləŋ kwa, à pìl a kwa a à bakal ana ki gewakwa ya tserdze.

1 Yuhana 3:5

Kurum kà sərum, Yesuw Kiristi a dara aka gər ahəɗ a ka, aà məbàrà aà kwa bakal kwa ana ki gekwe a ya. Ŋgat ka, bakal ŋgar a riŋ ilik tsidze.

Sunwa Yuhana 1:5

Dite Yesuw Kiristi ana ŋgat mala sida nda ndzer ŋa ya tekeɗe ibam, mi pise a kurum ahəm, mə vəl a kurum matasla yam ata a gəzləŋ mbaŋa asa. Ŋgat ka, wele ana a lah məmbə̀lara i məməta ya. Ŋgat ka, Əbay ana ika gər gà Əbay gər ahəɗ tserdze ya. Ŋgat ka, a waya kwa, a dzeye à mesife ŋgar aɗaba kwa. Agəra ana a dza à məmbəz ŋgar ata ya ka, a beye dər à kwa i ahər bakal kwa ya.