IBƏRANIKWA 7:26 - Bible Zulgo

²⁶ Kamala taŋa ya, Yesuw ka, batsah mala mandəva kuɗa a Mbulum kwa. Ŋgat ka, wele ana a sle a aà mege dukw ana a sle aà kwa ndaka miɗ ŋgar a. Aɗaba ŋgat ka, tsəɗaŋŋa, bakal i təv ŋgar tsa, dite swalwa i ba ŋgar kwizikw ɓav tsa asa mbaŋa. Mendze ŋgar ka, tsàkàlàk aà gà ɓəzla bakal a. Mbulum a tike ŋgat a təv ŋgar i gər ŋa.

IBƏRANIKWA 7:26 Iomraidhean Croise

Mata 27:18

A tsik a tar kataya ka, aɗaba a sər, ta gəsaha Yesuw ka, agəra ana ti ner are sàmma ya.

Markus 16:19

Əbay Yesuw a fàfəl a tar aba ya kamala taŋa ya tsara ka, Mbulum a zla ŋgat. A da à ŋgat a ma. Yesuw a daha, a ndzaba aka tsèke ahər mezime Mbulum.

Luka 1:35

Gawla Mbulum ata a gwaɗar aaka: «Kataya tsa, Mezite Mesife Mbulum na a dere a aka gər yak a. A dere a ka, nda gà ndzəɗa Mbulum ana i gər ŋa ya. A dere a, à dze aka kər a mezite ŋgar tirɓiɓits. Aɗaba taŋa na ŋgat Kəla Mbulum ndzer ŋana ya, na kəla ata ki ta we a ya.

Luka 23:22

Pilatus a gwaɗa a tar aaka məmakər ŋa asa: «Wànà a ge dze ana, dukùla na ŋgwal ŋa tsa kataya, dite ka, araha kwets, iye ka, Yàa ŋgat bakal ŋgar ana biy mekìɗe ahər ŋgat a tsiye ya? Ŋgulum ka, i gìzl a ŋgat nda megwiymbiɗ, tsam ka, i pìl a dər, ma daba.»

Luka 23:41

Aɗaba ma ka, ki sèwèreme a are ka, ndzer ndaka vatwa ŋa, ta gema gà dukw aaha kataya ka, aɗaba ana kàa gema gà dukw ana ŋgwala tsiye kaɗəŋ. Ama ŋgat ka, bakal ŋgar a riŋ tsidze.»

Luka 23:47

Əbay gà sliwdze gà Ruma ana ti tike aà makàslà Yesuw a, a ŋgat a dukw ana a ge ba ya ka, a zàmbaɗa a Mbulum. A gwa: «Wele aaha ka, ŋgwal mburma ndzer kaɗəŋ.»

Luka 24:26

Wànà kà sərum tsiye, na *Kiristi, mala məmbàlà à mburma ana Mbulum a gwa, i slir a kurumaha a ya ka, say à sèwèr a are dzekwiŋ a, dite ka, a ndze a a təv Əbay ŋgar ana gà mburma ti zlibe a à ŋgat a?»

Luka 24:46

Dite a gwaɗa a tar: «I fata mewetse ŋa iɗəm ka, say *Kiristi, mala məmbàlà à mburma ana Mbulum a gwa, i slir a kurumaha a ya ka, à sèwèr a are hinne, dite i huɗ mehinne makər a ka, a mbilere a i məməta ya.*fa*

Yuhana 14:30

Kinehe ka, i tsik a kurum a duwa hinne asa tsa, aɗaba Əbay gər ahəɗ aaha aka à mendzera. Ama kə̀la ka, ndzəɗa ŋgar a riŋ aà mekwere iye tətsà.

Yuhana 8:29

Wele ana a slərra iye ya ka, a riŋ i təv ga. Aka miyak à iye à gər gà tsa, aɗaba iye ihər i ge a ka, dukw ana a dar a gər a ɗekɗek.»

Gà Ɓəzla Meslire 3:14

Kàa kalum à wele ana mala ndzer ŋa, bakal ŋgar riŋ tsiye ivaɗ. Kàa wayum mewize ahər məpəla a kurum ka, à mala makə̀ɗà mburma ya seyiŋ ivaɗ.

Gà Ɓəzla Meslire 4:27

I huɗ meheme tar ata ya hiywe, ta gwa asa: «Kaɗəŋ, ar ka, kamala Mezite Mesife yak ana ka tsik ahər akahər ata ya. Aɗaba gà *Hiridus nda Puntiyus Pilatus ta gaw ba i kwite aaha nda gà slele, dite nda gà Yahuda, aà magàwà aà Kəla yak Yesuw ana kà slərra kamala mala məmbàlà à mər a.

2 Kurintiya 5:21

Kiristi ka, aka ge bakal duwa ilik tsidze. Ama ka, Mbulum a zla bakal kwa tserdze, a tike aka gər ŋgar. A ge dər kataya ka, aɗaba kwa, dite i təv ana kwa mandza ŋa i təv ilik ŋa nda gà Kiristi ya ka, a ne a à kwa gà ŋgwal ŋa ika miɗ ŋgar.

IBƏRANIKWA 1:3

Ŋgat a riŋ à pèt a à mezlibe Mbulum ana tì zlibe a dər a, nda təv dzaydzay ŋana i təv ŋgar a. Aɗaba ŋgat na a zla ba kalkal kamala Mbulum a, dite ŋgat na a riŋ à gis a gà dukw ana tserdze ya, nda bazlam ŋgar ana ndzəɗa ŋa ya. A làmbaɗa vatwa ana Mbulum à pìl a dər à bakal a mburma ya, na dite ti ne a gà tsəɗaŋŋa lele ika miɗ ŋgar a. I dəba ŋa ya ka, a da a mbulum kuɗa. A daha, a ndza aka tsèke ahər mezime Mbulum, mala ndzəɗa batsah ŋana a kwere a gà dukw tserdze ya.

IBƏRANIKWA 12:2

Ki dzèkwehe a are ka, a təv Yesuw ndàslsla kəla pat. Aɗaba megìse kwa ana kə̀ gə̀sakwa ya ka, ŋgat na à lèh a kwe a aka miɗ, haa a təv mendìsle kwa ya. Akahər ata ka, aka gəs gəzləŋ i təv ana a mət aà dizl magə̀làwà ŋa ya lele. Ku mege tàa ndaɗa aka ŋgat hwarwa tekeɗe ka, aka dzala hwarwa ata tsa, na dite a ŋget a maŋgayaba ana Mbulum a waya a viler a aka miɗ mba ya. Aɗaba taŋa na ŋgat mandza ŋa ika təv mendze *mekwere Mbulum ika tsèke ahər mezime ŋgar kinehe ya.

IBƏRANIKWA 2:10

Mbulum na a ge dukw tserdze ya. A ge ka, a kesle a mbaŋa. Kərga taŋa ya, lele na i təv ŋgar a, a sasar Yesuw a sèwèr a are, na dite a sime a nda təv gà dukw tserdze ya. A ge kataya ka, dite gà mburma hinne ti ne gà ɓəza ŋgar, ta ŋget a ndzəɗa ŋgar ana tì zlibe a dər a mbaŋa, aɗaba Yesuw na a ndze a ter a aka miɗ, a mbil a à tar a.

IBƏRANIKWA 2:17

Aɗaba taŋa, ku mege i təv dukùla ya tserdze ka, say a ne à ba ŋgar kalkal ba gà damər ŋgar a dzekwiŋ, na dite ti ndzer are tsehe ya, a ne *batsah mala mandəva kuɗa a Mbulum aà mege megemir ndaka vatwa ŋa ika miɗ ŋgar mbaŋa. A ge dər kataya ka, aà məbàrà dər bakal aà mburma ya tserdze, dite ka, tə sər akaba ahəm nda gà Mbulum.

IBƏRANIKWA 3:1

A kurum gà damər gà, Mbulum na a zal a kurum a, dite ka, kà nwim gà mburma ŋgar mbaŋa ya. Aɗaba taŋa, dzalum gà gər a təv Yesuw ana Mbulum a slərra ŋgat a, dite ka, ma ne batsah mala mandəva kuɗa ŋgar, a sir a ba à kwa nda gà ŋgat. Taŋa na dukw ana kə̀ gə̀sakwa nda gəzləŋ, ki tsikikwe a a mburma parakkà lele ya.

IBƏRANIKWA 7:11

Akahər ata, Mbulum a ɗe à məpala ahəm ŋgar ka, a gà Isərayel. A ɗif a tar dər ka, a gà gwala Live, na dite a waya ti ne gà ɓəzla mandəva kuɗa ŋgar a. Na mege mandəva kuɗa Mbulum ata tì ndìver a i gwala Live ya, a sle a aà are a Mbulum kamala ana a sasar a ka, ana ka, mala mandəva kuɗa a Mbulum ŋgiɗ ana kamala Melikisedek a, a dere a asa tsa. Ana ka, gà ɓəzla mandəva kuɗa a Mbulum gà gwala Live kamala Haruna ya, ti sliŋa.

IBƏRANIKWA 8:1

Wur bazlam ana mìi tsik a kurum a ya ka, araha: Ama kinehe ka, kàa ŋgatakwa medzibe batsah mala mandəva kuɗa a Mbulum ata. Ŋgat a riŋ mandza ŋa ika tsèke ahər mezime Mbulum ana a kwere a gà dukw tserdze ya.

IBƏRANIKWA 9:14

Ama na məmbəz gà dukw ata aka sle aà məbàrà tar kamala taŋa ya ka, məmbəz Kiristi à zè a taŋa fit kweleŋ nda ndzəɗa. Ŋgat ana aka ge bakal duwa ilik tsidze ya, a vəl ba ŋgar a Mbulum nda ndzəɗa Mezite Mesife Mbulum ana a ndze a aà biybiy a. Məmbəz ŋgar ata ka, a bere a bakal i gəzləŋ kwa ya lele, na dite ki gekwe a dukw ana a dzeye a à kwa asa tsiye. Ama ki gekwe a ka, megemir Mbulum ana ŋgat mala məvəla mesife a mburma ya ivaɗ.

1 PIYER 1:19

Ama kə ŋgatum mezìwè gər kurum ka, nda məmbəz Yesuw Kiristi ana a za gà dukw tserdze ya. Ŋgat a ndzikiɗ ba ka, kəla təmaŋ ana ŋgwal ŋa lele, duwa ihər tsidze, ta kəɗ a Mbulum taf masakəŋa ya.

1 PIYER 2:22

Ŋgat ka, aka ge bakal duwa ilik tsidze, dite wura aka tsaraka pàrsa duwa i bazlam ŋgar a ilik tsidze asa mbaŋa.*ff*

1 PIYER 3:22

Yesuw Kiristi ka, ŋgat aka tsəl a təv Mbulum. A riŋ mandza ŋa ika tsèke ahər mezime ŋgar. Ŋgat ka, a kwere a gà gawla Mbulum, nda gà Əbay tar ŋa dze, dite nda gà asiŋ gà dukw ana tserdze ndzəɗa tar a riŋ hinne i mbulum i gər ŋa ya.

1 Yuhana 2:2

Ŋgat na a dara, a mət kamala dukw ana ta kəɗ a Mbulum biy taf a, na dite Mbulum à pìl a kwe a dər à bakal kwa ya. Ama ka, bakal kwa ɗekɗek tsa na à pìl a dər a. A sle a aà məpəla à bakal a gà mburma ana ika gər ahəɗ tserdze ya mbaŋa.

1 Yuhana 3:5

Kurum kà sərum, Yesuw Kiristi a dara aka gər ahəɗ a ka, aà məbàrà aà kwa bakal kwa ana ki gekwe a ya. Ŋgat ka, bakal ŋgar a riŋ ilik tsidze.

Sunwa Yuhana 3:7

Wele ata a gweɗiŋ asa: «Wetseha bazlam aaha a gawla Mbulum ana i Filadelfiya, a kesle a gà mburma Mbulum a. Ki wetse a ka, bazlam aaha: Na a tsik bazlam ŋa ka, wele ana tsəɗaŋŋa, bakal ihər tsa, dite ŋgat ka, mala ndzer ŋa asa ya. Lèkilè Əbay Dawda ka, i ahər ŋgar. Na bəla aka hə̀ndə̀k i duwa ya ka, wura ilik a sle aà mehìndìkè aɗəm a tsidze, kige tsa, na bəla aka hə̀ndə̀k aɗəm ka, wura ilik a sle a aà mehìndìkè iɗəm a tsa asa mbaŋa.