IBƏRANIKWA 6:9 - Bible Zulgo

⁹ Ama kurum gà masla mər, ku mege mì tsik kataya tekeɗe ka, mì sər ndzer, kurum riŋ ki zezemwim a ŋgwal vatwa ana lele, dite ka, Mbulum a ta mbil a dər à kurum a.

IBƏRANIKWA 6:9 Iomraidhean Croise

Markus 16:16

Wur ana aka gəs iye nda gəzləŋ, tàa tsilwiɓ dər a yam a ka, a mbiliŋa. Ama wur ana aka gəs iye tsiye ka, sida ika gər ŋgar.

Gà Ɓəzla Meslire 11:18

Gà mburma ata tə tsaraka bazlam Piyer ata kataya tsara ka, ta miyak à mimbètsè ahəm ata ndeɗiŋa ya, tə zàmbaɗa à Mbulum. Ta gwa: «Mbulum aka vəl vatwa a gà mburma ana tar gà Yahuda tsiye, aà məmbə̀ɗà à madzala gà gər tar, dite ta ŋgat ŋgwal mesife ana ndzer a kaɗəŋ mbaŋa.»

Gà Ɓəzla Meslire 20:21

I tsikewa a gà Yahuda nda gà mburma ana tar gà Yahuda tsiye, dite ta mbəɗ à gəzləŋ tar, a təv Mbulum, dite ka, ta gəs Yesuw Kiristi BATSAH kwa ŋa nda gəzləŋ tar.

1 Kurintiya 10:14

Gà masla gà ana i waya kurum hinne ya. Aɗaba taŋa, iye ihər i tsik a kurum ŋa: Mbəɗum dəba a mandza gurmits a bəɗ a gà dukw ata mburma ti ne dər mbulum tar a tserdze.

2 Kurintiya 12:19

Bəla akahər ana mì wetse a kurumaha a huɗ wakita aaha ya, na kà dzalum, kù gwaɗum ka: «A ge a ka, gà mburma aaha ta geye ikaba tar a pəra, na ika miɗ mər a.» Ama ka, kataya tsa. Aɗaba mìi fèfil a ka, ika miɗ Mbulum kamala ana a sàs a *Kiristi ya. A kurum gà masla mər ana mì waya kurum hinne ya: Mì tsikeye a kurum gà dukw ata tserdze ya ka, aà mà zlak kurum. A sàs a mər ka, ki dwim a aka miɗ aka miɗ, ki ŋgetwim a ndzəɗa ika vatwa Mbulum a.

2 Kurintiya 7:1

A kurum gà masla gà ana i waya kurum hinne ya. Mbulum aka tsik a kwa i sida ya, a gwa, a ta vile a kwe a gà dukw ata tserdze ya. Aɗaba taŋa, say barakwa dukw ana ŋgwala tsiye, aà ba kwa ya, dite ma ne tsəɗaŋŋa na i təv are Mbulum a. Kà barakwara dukw ana ŋgwala tsa i gəzləŋ kwa ya asa mbaŋa. Mede kwa ana ki tèkwe a ika vatwa Mbulum a, ma ge ka, kamala ana ŋgat a waya ya. Ka hənakwar à gər a bəɗ tiɓìzl lele.

2 Kurintiya 7:10

Na bəla wura a riŋ a ge a matsəɓatsəɓ kamala ana a sàs a Mbulum a, i fataya ka, à mbìɗer a à madzala gà gər ŋgwal ŋana ivaɗ. Kamala taŋa ya ka, Mbulum a mbil a à ŋgat. Medzìbe matsəɓatsəɓ ata ka, wura a dzele a dər akaba gà gər tsidze. Ama na bəla wura a ge a matsəɓatsəɓ kamala ana gər ahəɗ a waya ya ka, taŋa na a de a à ŋgat a məməta ana ika miɗ Mbulum a ya.

GALATIYA 5:6

Na wura a riŋ aka gaw ba nda Kiristi ka, bəla ŋgat masàsà ŋa, kige tsa bəla masàsà ŋa tsa tekeɗe ka, a ge a ŋgulum tsa. Dukw ana a ge ŋgulum a ka, say megìse kwa ana kə̀ gə̀sakwa ŋgat nda gəzləŋ a. Dite megìse ata na a vile a kwe a ndzəɗa aà mawàyà gà mburma tserdze ya mbaŋa.

IBƏRANIKWA 10:34

Kàa sèwèrwim akaba are nda gà na ta gasa tar a daŋgay, aɗaba Yesuw Kiristi ya hinne. I təv ana gà mburma tə ndzaka aà kurum gà dukw kurum a tifeɗ tifeɗ tekeɗe ka, kàa gəsum gəzləŋ, kàa ŋgayum ba nda gà tar ivaɗ, aɗaba ana kà sərum ka, kàa ŋgatum gà ŋgwal gà dukw ana i təv Mbulum, à zè a gà dukw ata tserdze, wura a sle a aà mekìzele aà kurum a asa tsiye ya.

IBƏRANIKWA 10:39

Ama kwa kinehe ka, ka ti nekwa gà mburma ana ta me a a dəba ka, dite ti dzeye a ya tə tsa. Aɗaba kwa ka, gà mburma ana Mbulum a ta mbele à ter a ivaɗ, agəra ana kə̀ gə̀sakwa ŋgat nda gəzləŋ kwa ya.

IBƏRANIKWA 2:3

Na Mbulum aka sèwèr a tar are kataya dze ana, kà dzalakwa ana, kwa ana pam a, na ki fìrekwe a aà ŋgwal vatwa ana a mbil a dər à kwa ya ka, kamala dukw taf masakəŋa ya? Yesuw Kiristi BATSAH kwa ŋa nda gər ŋgar aka lah metsìkè a kwa, meme na Mbulum a ta mbil a kwa ya. Gà na tə tsaraka bazlam ŋgar ata ya, dite ka, ta mà a kwa dər, ta gwa ka, bazlam ŋgar ata ka, ndzer kaɗəŋ, pàrsa iɗəm tsa.

IBƏRANIKWA 5:9

Mbulum a ndəv à dukw ana a dzala, a waya aà mege nda ŋgat a ka, a ne mala məmbə̀là à gà mburma ana tserdze ta gəs ahər ahəm a, dite ka, ta ŋget a mesife ana à ndìv a tsa aà biybiy a.

IBƏRANIKWA 6:10

Mbulum ka, mala ndzer ŋa. Mege megemir ana ki gwim a ya ka, à mìtser a gər tsa. Kamala taŋa ya, a sər ka, kàa zlakum gà asiŋ gà mburma ŋgar, dite kurum riŋ ki zlèkwim a tar hiywe, haa kinehe. Aɗaba taŋa na a sər ba ka, kà wayum Mbulum a.

1 PIYER 2:11

Gà masla gà ana i waya kurum hinne ya, mə̀ məts a kurum gər tsa. Kurum kà nwim ika gər ahəɗ ka, kamala gà slele ya. Aɗaba taŋa, i ge a kurum a kamkam: Gwim metsehe, ka ta vəlum vatwa a gà dukw bakal ana ba kurum a waya aà mege ya asa tsa. Aɗaba medzibe dukw ata ka, a dzeye a à mesife kurum.

2 Piyer 3:1

Gà masla gà ana i waya kurum hinne ya. Araha naha ka, wakita masula ŋa ana i wetse a kurumaha ya. I huɗ gà wakita ata sula ya ka, a sèsiŋ məma a kurumaha a gər ka, à gà dukw ana kàa mbər mesirwim a, na dite ki dzelwim aaka gà gər lele asa ya.

1 Yuhana 2:7

Gà masla gà, dukw aaha i wetse a kurumaha ya ka, dukw ana awiya ŋa, kàa tsarakum ilik zukw tsiye tsa. Ama ar ka, ilik nda məpala ahəm Mbulum ana kà tsarakum daga aà gər ana kà dzum ba aà mazazama Yesuw Kiristi ya. Məpala ahəm ata ka, miviye ŋa, bazlam ana kàa mbər metserekwim piŋŋe ya.

Yuda 1:3

A kurum gà masla gà ana i waya kurum hinne ya. Ana ka, a sèsiŋ mewetse a kurumaha wakita hinne, agəra bazlam ŋgiɗ zləmana, aà meɗìfè a kurum dər ka, meme na Mbulum a mbəl à kwa tserdze ya. Ama i samata ka, ŋgulum i wetse a kurumaha kinehe, aɗaba mə vəl a kurum ndzəɗa, dite ki mirwim a aba nda təv bazlam ŋgwal ŋa ana kə̀ gəsum a ivaɗ. Mbulum a vəl ahər ka, a gà mburma ŋgar gà tsəɗaŋŋa ŋana. Bazlam ata ka, à mbìɗ a aba tsidze.