IBƏRANIKWA 6:4 - Bible Zulgo

⁴ Ki sle aà meɗekwebe a à bazlam ata hiywe asa tsəka, aɗaba na bəla gà asiŋ ŋa i liwiŋ kwa, tàa mà a dəba ika vatwa Mbulum a ka, ki sle a aà mimèkwe aakara à tar a, dite ka, ta mbìɗ a à gəzləŋ a təv Mbulum asa tsa. Aɗaba gà mburma ata ka, tàa mbər meŋgete təv dzaydzay ŋana a dara i təv Mbulum a. Tàa ŋgat mipìsè ahəm ŋgar. Tàa ŋgat Mezite Mesife ŋgar a gəzləŋ tar mbaŋa ibam.

IBƏRANIKWA 6:4 Iomraidhean Croise

Mata 12:45

I dəba ŋa ya, a de a, a ti ndzikere a gà asiŋ gà sitene ŋgiɗ a təsəla aà mendze i fata, gà na gà ŋgwal ŋa tsa ndeyndey a. Ti de akabaha aɗəm a tserdze a fata. Zàmma tsəka, dukw ata à me a aka wele ata, mendze ŋgar a ge a ŋgwala tsa ndeyndey, à zè a dər na piŋŋe ya asa. Kamala taŋa ya asa na a ti ne a i təv gà mburma ana kinehe ta məsak à vatwa Mbulum a mbaŋa.»

Mata 5:13

I dəba ŋa ya ka, Yesuw a gwaɗa a tar asa: «Kurum kà nwim ika gər ahəɗ ka, kamala liwir ana ika ala ya. Ama na liwir aka və̀ɗ ika ala ya tsəna, ki ge a dər ana, meme, na dite à vìɗ a ya? Ama na bəla a ge a ŋgulum asa tsa dukw ŋgar ka, say dùf mende dər iɗəm a dala ya, mburma ta ɓala aaka pəra.

Yuhana 15:6

Wele ana ŋgat i təv ga tsiye ka, Mbulum a niw a ŋgat. A ne a kamala ahər dizl ɗaf ana tə sàs ihər a, tì yè a a dala, dite a kwile a ya. Na aka kula ka, ti yeher a gər, dite tì dzer a akwa, a weniŋa.

Yuhana 3:27

Yuhana a gwaɗa a tar aaka: «Wura a sle aà meŋgete a duwa tsa, na Mbulum aka vəlar tsiye.

Yuhana 4:10

Yesuw a gwaɗar aaka: «Na mege kà sər dukw ana Mbulum a vile a a mburma ya, dite kà sər iye na i wiz aà kər yam a ka, kər ivaɗ na ki wiz aà iye a yam ana a vile a mesife a mburma ya, dite ka, i vilek a ya.»

Yuhana 6:32

Yesuw a gwaɗa a tar aaka: «Iye ihər i tsik a kurum a nda ndzer, pàrsa iɗəm tsa: Dukw mezime ata akahər ata Musa a vəl a kurum i kusak a ka, na a dara i mbulum a nda ndzer a tsa. Ama dukw mezime ana Mbulum Tsir gà a vile a kurumara a i gər ŋa ya, na ndzer a.

Gà Ɓəzla Meslire 10:45

Ama gà ɓəzla magəsa Yesuw ata nda gəzləŋ, tar gà gwala gà Yahuda, tə da akabara nda gà Piyer i Yafa tserdze ya ka, tar riŋ i fata mbaŋa. Aləka ta ŋgat a dukw ata, Mbulum a vəl Mezite Mesife a gà mburma ana gà Yahuda tsiye ka, a ge a tar kamala sunwa ya.

Gà Ɓəzla Meslire 11:17

Aɗaba taŋa nda ndzer, pàrsa iɗəm tsa, Mbulum aka vəl a tar dukw ŋgar kamala ana a vəl a kwa i təv ana kə gə̀sakwa Yesuw Kiristi nda gəzləŋ a mbaŋa. Iye dze ana, weke, na i ŋge a vatwa a Mbulum a?»

Gà Ɓəzla Meslire 15:8

Mbulum ana ŋgat a sər gəzləŋ mburma tserdze ya, na a ɗif a kwa dər ka, aka gəs gà na gà Yahuda tsiye mbaŋa, aɗaba ana a vəl a tar Mezìtè Mesife ŋgar kamala ana a vəl a kwa ya ya.

Gà Ɓəzla Meslire 8:20

Ama Piyer a gwaɗar aakaha: «Dzeye akaba nda siŋgwe ŋa dze fit. Wànà kà dzala ana, ki sle aà mesikime a dukw ana Mbulum a vile a məfara ŋa ya, nda siŋgwe ya?

RUMA 1:11

Aɗaba a sèsiŋ ka, hinne na i ŋget a kurum a te, dite ka, Mbulum a pise a kurum a ahəm nda ahər Mezite Mesife ŋgar a. Kamala taŋa ya, na Yàa daha a təv kurum ka, a sèsiŋ ki ŋgetwim a ndzəɗa a gəzləŋ kurum ɓəŋɓəŋ lele.

2 Kurintiya 4:4

Tə tsaraka bazlam ŋgwal ŋa ata tsəka, aɗaba ana Əbay sitene, mala makwàrà gər ahəɗ aaha, aka ge à tar guluf i huɗ metsehe tar, dite ta gəs tsiye. Aɗaba a waya tsa na ta ŋget a a dzaydzay ana à div a i təv tar a ya. Dzaydzay ata a dara ka, i huɗ ŋgwal bazlam ata aka gər ndzəɗa Yesuw Kiristi ana tì zlibe a dər a. Aɗaba Mbulum nda gər ŋgar a pàt à ba ka, nda təv Kiristi.

2 Kurintiya 4:6

I təv ana Mbulum a ge gər ahəɗ akahər ata ya ka, a gwa: «Dzaydzay mà də̀v i luvuŋ.» Ama Mbulum ŋa ka, taŋa ilik hiywe na a vəl dzaydzay ŋgar ata à div a i gəzləŋ mər a mbaŋa. A ge dər kataya ka, aà məpàtà à ndzəɗa ŋgar ana tì zlibe a dər, à div a ika miɗ Kiristi ya. Aɗaba taŋa na mər ihər mìi tsik a bazlam ŋgwal ŋa ata a mburma ya.

GALATIYA 3:2

I tsèm aà kurum a ka, duwa ilik pəra. Wànà Mezite Mesife ana Mbulum a vəl a kurum ana, agəra ana kà zazamum məpala ahəm gà Yahuda ya ya? Awaŋ, Mbulum a vəl a kurum Mezite Mesife ŋgar ka, agəra ana kàa dzum zləm a bazlam ŋgwal ŋana, dite kə̀ gəsum Yesuw Kiristi nda gəzləŋ kurum a. Wànà kataya tsiye?

GALATIYA 3:5

Aɗaba Mbulum a riŋ ihər a vile a kurum Mezite Mesife ŋgar, dite a riŋ ihər a ge a gà dukw mene aà mburma ŋgiɗ pampam ika magər kurum mbaŋa asa. A ge taŋa dze ana, wànà agəra ana kà zazamum məpala ahəm gà Yahuda ya ya? Awaŋ, a ge taŋa ka, agəra ana kàa dzum zləm a bazlam ŋgwal ŋana, dite kàa gəsum Yesuw Kiristi nda gəzləŋ kurum a.

EFESIYA 1:18

I hemer a asa ka, dite mà hə̀ndə̀k a kurum are lele, kə ŋgatum a dukw ana a zal a kurum dər a mbaŋa. I hemer a asa mbaŋa ka, dite ka sərum dər, meme na dukw ata a ta vile a kurum a ka, ŋgwal ŋa hinne, a za gà dukw tserdze ya. A ta vile a dukw ata ka, a kurum nda gà mìsle ŋgiɗ ana gà mburma ŋgar a.

EFESIYA 2:8

Mbulum a mbəl à kurum nda ŋgwal ŋgar ka, aɗaba ana kàa gəsum ŋgat nda gəzləŋ kurum a, tsəka, aɗaba megemir kurum ana ki gwim a tsa. A ge a kurum ŋgwal ŋgar ata biy taf a ka,

EFESIYA 3:7

Mbulum aka giŋ ŋgwal ŋa, aka viliŋ ndzəɗa asa, dite a zle iye kamala mala meslire ŋgar a, aà metsìkè bazlam ŋgwal ŋa ata a mburma.

EFESIYA 4:7

Ama kə̀la ka, kwa tserdze kàa ŋgatakwa ndzəɗa aà megeye gà megemir pampam, ku weke, kamala ana Yesuw Kiristi a vəl a kwa ya,

1 TIMUTE 4:14

Ka ta fə̀r aà ndzəɗa ana Mbulum a vəlak a, kamala dukw masakəŋa ya tsa. A vəlak ndzəɗa ata ka, daga piŋŋe, akahər ana gà ɓəzla məma à guma Mbulum ti ɗif à madzala gà gər Mbulum ana a dzala aɗaba kər a. A vəlak ka, ndakahər gà bàba ŋana ika magər gà mburma Mbulum, ta hamar, tə dzaya aka kər ahər a.

2 TIMUTE 2:25

Na bəla gà ɓəzla mene are yak ta gəs mege dukw ana ŋgwal ŋa ya tsəka, ɗif a tar dər nda zèyezèye nda himmè bazlam ivaɗ. Na kàa tsik a tar kamala taŋa ya ka, biytsà Mbulum a vile a ter a metsehe, ta mbìɗ a à madzala gà gər, na dite ta gis a vatwa ndzer ŋana ya.

2 TIMUTE 4:14

Aleksandire, mala mivìɗe duwa, aka giŋ dukw ana ŋgwal ŋa tsiye hinne. Ama ka, BATSAH kwa ŋa à mèr aɗəm a à bakal kalkal dukw megemir ŋgar ana a gewa ya.

IBƏRANIKWA 10:32

Ama kinehe ka, dzalum, kà sərum dər à mendze kurum ana piŋŋe, aka ana kà lah mendzwim i təv dzaydzay Mbulum ana ndərzayya, a da a gəzləŋ kurum a ka, mə̀ məts a kurum gər tsa. Akahər ata ka, gà mburma tàa sèwèr a kurum are hinne. Ama ku mege kataya tekeɗe, kàa dum aka miɗ aka miɗ nda ndzəɗa ɓəŋɓəŋ lele.

IBƏRANIKWA 2:4

Mbulum ibam, aka pàt à bazlam ata ndzer, pàrsa iɗəm tsiye, nda təv gà dukw mene aà mburma ŋgiɗ pampam hinne mbaŋa. Aka dzaya ndzəɗa a gà mburma nda ahər Mezite Mesife ŋgar, aà mege dukw pampam kərga biy na a sasar a.

1 Yuhana 5:16

Ama bakal ŋgiɗ a riŋ ka, mburma ta mìt a dər tsa. Na bəla wura a riŋ a ŋget a a damər ŋgar ana ika vatwa Mbulum a, a riŋ a ge a medzibe bakal ata ka, ma hama a Mbulum aɗaba ŋgat, dite ka, Mbulum mə vəl mesife a damər ŋgar ata. I tsik kataya ka, agəra gà mburma ana ta ge a bakal, dite ka, ta mìt a dər tsiye ɗekɗek. Aɗaba bakal ŋgiɗ a riŋ ka, ta mìt a dər. Yàa gwa ka, hamum a Mbulum agəra gà mburma ana ta ge a medzibe bakal ata ya tsa.