IBƏRANIKWA 6:2 - Bible Zulgo

² Ki sle aà meɗekwebe a à bazlam metsìlwìɓè à mburma a yam, meme na metìkè ahər aka gər mburma nda zləm Mbulum a ɓav tsa, dite meme na Mbulum a mbil a dərra à mburma i məməta ya tsa asa, dite meme na ta ge a seriye aka gər mburma a pat mandəvandəv gər ahəɗ a ɓav tsa asa mbaŋa.

IBƏRANIKWA 6:2 Iomraidhean Croise

Mata 28:19

Aɗaba taŋa, dum à bazlam gà a təv gà mburma ana ika gər ahəɗ a tserdze, ka nwim à tar gà ɓəzla mazazama iye. Tsilwiɓwim à tar a yam nda zləm Tsir gà Mbulum, dite nda zləm gà, Kəla ŋgar ŋa, dite nda zləm Mezite Mesife Mbulum asa mbaŋa.

Mata 3:14

Ama Yuhana a gəs tsa, a màr aba ahəm a. A gwaɗar: «Iye ivaɗ na i waya i dehe a a təv yak, ki tsilwiɓ a à iye a yam ana, naha kà dara a təv ga ya, i tsilwiɓ a à kər a yam ana, meme ivaɗ a?»

Markus 16:16

Wur ana aka gəs iye nda gəzləŋ, tàa tsilwiɓ dər a yam a ka, a mbiliŋa. Ama wur ana aka gəs iye tsiye ka, sida ika gər ŋgar.

Markus 7:4

Na bəla tàa màha a ma i kwaskwa ya ka, say ta bere a ba lele dzekwiŋ, na dite ti zim a ɗaf a. Ta ge a gər a gà asiŋ gà fəla gà tsir tar ana ɗa tə zazəɗ dər a ka, hinne. Kərga dukw masà yam a, nda gà dukw yam a, nda gà tasà tar a, say ta bere a ka, lele kamala ana fəla gà tsir tar a tsik a.

Markus 7:8

Aɗaba taŋa, Yesuw a gwaɗa a tar asa: «Kà miyakum à məpala ahəm Mbulum, dite ki giswim a bazlam mburma ana ti tsik a ya tsəna?»

Luka 11:38

Farisa ata a samata Yesuw ka, aka bara ahər kamala ana fəla tar a tsik a tsa. A ge ahər kamala dukw mene aà mburma ya.

Luka 12:50

Ama ti dzik a à iye a liwiŋ gà mesewere are ana a ŋgiɗits a iye, haa a təv ana Yàa ndəv dər a dzekwiŋ.

Luka 14:14

Na kàa ge dər kataya ka, ki ta ŋgeye a ba mba. Aɗaba tar ka, ti sle aà mimèk a dər aɗəm tsa. Mbulum na a ta mèk a dər aɗəm i təv ana gà na tàa ger ŋgwal ŋa, ti ta mbilere a i məməta a mesife ya.»

Luka 3:16

I dəba ŋa ya, Yuhana a gwaɗa a tar ata tserdze ya: «Iye ka, i tsilwiɓ à kurum a ka, a yam pəra. Ama mìsle ŋgiɗ a riŋ a dere a i dəba gà ya mba. Ŋgat ka, a za iye nda ndzəɗa kweleŋ fètìte. I sle aà mesirikaha a təv ŋgar aà məpəla à liɓir tsàpà ŋgar tsidze. Ama ŋgat aka dara ka, a tsilwiɓ à kurum a ka, a yam asa tsa, say a Mezite Mesife Mbulum, nda seriye ŋgar ana a ge a nda akwa ya asa mbaŋa.

Yuhana 1:33

Akahər ata Yàa sər ŋgat ana weke zukw tsa, ama Mbulum ana a slərra iye, aà metsìlwìɓè à mburma a yam a, a gweɗiŋ: A gweɗiŋ asa ka: «

Yuhana 5:29

Tàa tsaraka ka, ta hitsere a i gà dive tar a. Gà na tàa ge dukw ana ŋgwal ŋa ya ka, ta mbil a, dite ta ŋget a mesife ana à ndìv a tsa aà biybiy a. Ama gà na tàa ge dukw ana ŋgwal ŋa tsiye ka, ta mbilere a i tar ka, aà mehìtsè aka miɗ seriye Mbulum pəra.»

Gà Ɓəzla Meslire 10:47

«Kinehe ana, dukùla na a pele a ahəm a gà mburma aaha, aà metsìlwìɓè à tar a yam dze ya, na tàa ŋgat Mezite Mesife Mbulum kamala kwa ya mbaŋa ya?»

Gà Ɓəzla Meslire 13:3

A ta megeha tə ndzək iɗəm gà mburma ata ya ka, ta ge ndəra asa. Dite tə daha, ta hama a Mbulum aɗaba tar. Tə dzaya aka tar ahər. I dəba ŋa ya, gà mburma Mbulum ata i fataya, ta miyak à tar aà megemir ŋa, ta gəs, tə da dər aka miɗ nda maŋgayaba lele.

Gà Ɓəzla Meslire 16:15

Dite i dəba ŋa ya, ti tsilwiɓ à tar a yam nda gà asiŋ gà mburma ana i ma ŋgar a tserdze. Ama a zal a mər aà mada a ma ŋgar, a gwaɗa a mər: «Na kàa dzalum i gər kurum, iye ka, Yàa gəs Yesuw BATSAH kwa ŋa nda ndzer ka, dumara, tàkwa a ma gà.» I dəba ŋa ya, a ge a mər kamkam hinne, dite mì da a ma ŋgar.

Gà Ɓəzla Meslire 16:33

Mala makàslà ga daŋgay ata a ndzək gà Pul nda Silas ndaàvəɗ ŋa ata tsara. A daha, a bara a tar à mbəlak megìzle ana ta gazla tar a. I fataya tsara ka, gà wele aaha ti tsilwiɓ à tar a yam nda gà na i ga i ma ŋgar a tserdze.

Gà Ɓəzla Meslire 17:18

Gà wele duwa a riŋ i kwite ata mbaŋa. Zləm tar gà *Epikuriya nda *Situkiya. Tar ka, gà ɓəzla meɗe à fəla ana ti ɗe a dər a mburma ya. A pat duwa, gà asiŋ ŋa ana i liwiŋ tar a, tə dza ba aà mege bazlam nda gà Pul asa. Gà mìsle ŋgiɗ ta gwaɗawa: «Dukùla na naha a ɗeme a dze ka, kà sərakwa tsiye?» Gà asiŋ ŋa ibam, ta gwaɗawa: «A ɗif a ka, à gà zləm mbulum ana kà sərakwa ilik tsiye.» Ti tsik ahər gà bazlam ata ka, aɗaba ana Pul a riŋ a tsik a ka, aà Yesuw nda mimbile ŋgar ana a mbəlara i məməta ya.

Gà Ɓəzla Meslire 2:38

Piyer a gwaɗa a tar aakaha: «Mbəɗum à madzala gà gər kurum, dite ti tsilwiɓ à kurum a yam, nda zləm Yesuw Kiristi. I dəba ŋa ya, Mbulum à pìl a kurum a à bakal kurum, dite ka, ki ŋgetwim a Mezite Mesife Mbulum ana a vile a kurum a ya.

Gà Ɓəzla Meslire 2:41

Gà mburma hinne ta gəs bazlam Piyer ata, ti tsilwiɓ à tar a yam. A pat ata ka, gà mburma ti sle a dəbuw makər, na tə sə̀kàhəha a təv gà ɓəzla magəsa Yesuw nda gəzləŋ ata ya.

Gà Ɓəzla Meslire 23:6

Ama Pul a samata ka, gà mburma ata mayahaba gər ŋa ya, tàa tə̀rə̀ts ba ikaba ya. Gà *Saduki pam, gà *Farisa tekeɗe, pam. Aɗaba taŋa, a fàfəl nda ndzəɗa, a gwaɗa a tar: «Gà damər gà, iye ka, gà Farisa, gwala gà tekeɗe ka, gà Farisa ndzer. Ta giŋ a seriye kinehe ka, aɗaba ana i gwa ka, gà məməta ti sle aà məmbə̀lara i məməta ya asa ya.»

Gà Ɓəzla Meslire 24:15

Aɗaba i sər ndzer, kamala tar ana tə sər a mbaŋa, Mbulum a mbilere a à gà ɓəzla bakal nda gà na gà ŋgwal ŋa ya tserdze i məməta ya.

Gà Ɓəzla Meslire 24:21

Bəla tsiw, ta gis iye ka, agəra ana i tsik a tar dukw ilik nda magala ika miɗ tar, i gwaɗa a tar ka: «

Gà Ɓəzla Meslire 24:25

Aləka Pul a daha ka, a dza ba aà mifefile a tar. A ɗif a tar à duwa pampam hinne. Ti ta metsereke dukw ana ta ge a nda ndzer a, nda magəsa gəzləŋ, dite nda seriye ana a dere a ika miɗ mba ya ka, Filikus a ge magəɗa hinne, a gwaɗa a Pul: «Yaw, taŋa ka, ki sle a aà medeba na kinehe ya. Aka təv ana Yàa ŋgat vatwa ka, i mèkehe a à mezele asa.»

Gà Ɓəzla Meslire 26:8

Aɗaba la na kurum gà Yahuda ka dzalum ka, kà nwim dər pàrsa aà dukw ana Mbulum a gwa ka, i ta mbilere a mburma i məməta ya kaɗəŋ a tsiye?

Gà Ɓəzla Meslire 4:2

Tə daha ka, ta ge arəv hinne nda təv gà ɓəzla meslire Mbulum ata sula ya, aɗaba ana tar riŋ ti tsik a bazlam a mburma ya, ta gwaɗa a tar ka, Yesuw aka mbəlara i məməta ya a mesife ya, kərga megweɗe a tar a ka, gà məməta ti sle aà məmbə̀lara a mesife ya fit mbaŋa.

Gà Ɓəzla Meslire 6:6

Aləka i dəba ŋa ya asa, tə ndzəkaha tar a təv gà ɓəzla meslire Mbulum ata. Tə daha ka, gà mburma ata tə dzaya aka tar ahər. Ta hama aà Mbulum agəra tar.

RUMA 2:16

Ama a pat ana Mbulum a ta ge a seriye a gà mburma nda ahər Yesuw Kiristi ya ka, gà dukw ana i tsik i faha tserdze ya, à pèt a ka, parakkà lele. A ge a ter a seriye ka, aka gər gà dukw ana makàhà ŋa titstsè i gəzləŋ tar, nda gà madzala gà gər tar ana tə dzalawa ya. Na a ɗif a à dukw ata, a ta ge a ba kamala taŋa ya ka, ŋgwal bazlam aaha iye ihər i tsik a gà mburma ya.

1 Kurintiya 10:2

Tar ata tserdze ya ka, kamala na Mbulum a tsilwiɓ à tar a hulɓukw ata, dite a duluv ata asa mbaŋa ya. Kamala taŋa ya, ti ne gà ɓəzla mazazama Musa.

1 Kurintiya 12:13

Aɗaba aka ana ti tsilwiɓ à kwa a yam a ka, kwa tserdze kà nekwa kamala ba ilik a, nda ndzəɗa Mezite Mesife Mbulum ata ilik ŋa ya. Aɗaba ku mege gà Yahuda, ku mege gà na tar gà Yahuda tsiye, nda gà ku mege gà ɓele, nda gà na ti ziwe a gər tar a tekeɗe, Mbulum a vəl a kwa akaba Mezite Mesife ŋgar ka, ilik pəra.

2 Kurintiya 5:10

Aɗaba kwa tserdze ka, bàlaarì, ki ta hitsekwe a aka miɗ Yesuw Kiristi, na dite à ses a kwe a ikaba seriye kwa ya ya. Ku weke a ŋget a duwa kalkal kamala megemir ŋgar ana a gewa ɗa ika gər ahəɗ a mbaŋa. Na bəla kàa gekwa dukw ana ŋgwal ŋa ya ka, a ta vile a kwe a dukw maya ba kwa. Ama na bəla kàa gekwa dukw ana ŋgwal ŋa tsiye ka, a ti sèwèr a kwe a are.

FILIPIYA 3:21

I təv ana a dere a ya ka, a ta mbìɗ a à ba kwa ana tsèfek tsèfek ndzəɗa iɗəm tsiye, na dite ba kwa a nis a asa tsa, a ndze a aà bəra aà biybiy kamala biy ŋgar ana ti zlibe a dər a. A ta ge a kamala taŋa ya ka, nda ndzəɗa ŋgar ana a kwere a gà duwa tserdze ya.

KULUSIYA 2:12

Aɗaba i təv ana ti tsilwiɓ à kurum a yam a ka, a ne kamala ana tàa le akaba kurum a biye, a təv ilik ŋa nda gà Yesuw Kiristi ya. Dite i təv ana kà dumara i yam a tekeɗe ka, a ne kamala ana kà mbəlum akabara i məməta ya nda gà ŋgat a təv ilik ŋa ya asa mbaŋa, aɗaba ana kàa gəsum ŋgat nda gəzləŋ, ka sərum dər ka, Mbulum na a mbəlara à ŋgat i məməta ya, dite ka sərum dər asa ka, ŋgat na a sle a aà məmbàlà à kurum i məməta ya mbaŋa ya.

2 TIMUTE 2:18

Tar ka, tàa miyak à vatwa ndzer ŋana. Ta gwa: «Mimbile kwa ana ki mbilekwe a i məməta ya ka, aka mbər mege ba aka ndəv.» Tsaatsa, pàrsa. Kamala taŋa ya, ti dzeye a ka, à mburma ika vatwa Mbulum a hinne.

IBƏRANIKWA 11:35

Agəra megìse ana gà məkəs duwa ta gəs Mbulum nda gəzləŋ a ka, tàa ŋgat a gà mburma tar ana ta mata ya asa, i təv ana ta mbəlara i məməta ya ya.*fy* Gà asiŋ gà mburma ŋgiɗ ti sèwèr are hinne nda ahər gà ɓəzla mene are tar ana ta ge a ter a matawak a, haa ta mata dər. A sàs a tar ka, ti niw Mbulum, dite ta miyak à tar. Ama ta waya na ti niw a ya tsa. Ta ge dər kataya ka, aɗaba ta veve a pat ana ti ta mbilere a i məməta ya asa, dite ta ŋget a mesife ana ŋgwal ŋa i gər ŋa, à zè a taŋa ya.

IBƏRANIKWA 9:10

Aɗaba mege gà dukw ata ka, məpala ahəm aka gər gà dukw mezime nda gà dukw mese, kige tsa aka matsakasla gà duwa ɗekɗek pəra. Ama taŋa ka, dukw gà mburma ta ge a ika gər ahəɗ a ɗekɗek, tsəka, aka ndza hinne tsa. A ndza ka, haa a pat ana Mbulum a mbəɗ à gà dukw ata tserdze ya ɗekɗek pəra.

2 Piyer 3:7

Ama gər ahəɗ nda gəza mbulum ana kinehe ya ka, ti ndze a ɓav tsa. Tits a təv ana Mbulum a tsik a ka, a wene a nda akwa hilɓèk hilɓèk kuɗa. Aɗaba kinehe ka, Mbulum a waya mandza zaakwa tə̀ma, haa a pat ana a ta ge a seriye a gà mburma tserdze, a bets a iɗəm gà na ta gəs ahəm ŋgar tsiye ya.