IBƏRANIKWA 6:18 - Bible Zulgo

¹⁸ A sasar a tsik aba i sida ya dzekwiŋ, dite i dəba ŋa ya, a mbaɗa asa. A tsik aba ya kataya ka, aà tə sər dər, gà dukw ata a tsik sula ya ka, à me a a dəba tsidze. Mbulum a sle aà mesèse a pàrsa tsa. Gà dukw ata ta mèkwehe a à arəv, a kwa ana kà valakwa a təv ŋgar kamala mendzikwir ana a vel a aà huɗ məmər ŋgar aà məmba ya. Dite ka, ki ndzekwe a nda magəsa gəzləŋ ɓəŋɓəŋ lele. Ki vevekwe a dukw ana Mbulum a tsik a kwa i sida ya, a gwa, a ta vile a kwe a ya.

IBƏRANIKWA 6:18 Iomraidhean Croise

Mata 24:35

Gà kuvəl mbulum nda gər ahəɗ ka, tì ndìviŋa. Ama bazlam gà ka, à ndìv a tsa, a ndze a aà biybiy.»

Mata 3:7

Ama Yuhana a fə̀r ka, gà asiŋ gà *Farisa nda gà *Saduki riŋ ti dere a a təv ŋgar a hinne mbaŋa. Aɗaba a sàs a tar ka, mà tsilwiɓ à tar a yam. A gwaɗa a tar: «A kurum gà ɓəza palas aaha. Weke na a gwaɗa a kurum ka, ki ta beywim a i matsəɓatsəɓ Mbulum ana a dere a mba ya seyiŋ a?

Luka 2:25

Ama wele duwa a riŋ, zləm ŋgar Simeyun, mandza ŋa i Yeruzalem i fata. Wele ata ka, ŋgwal mburma ndzer, a ge magəɗa a Mbulum. A babawa wele ana a ta mbil a à gà Isərayel a. Ŋgat ka, maràhà ŋa nda Mezite Mesife Mbulum i ba ŋgar.

RUMA 15:5

I heme a Mbulum, mala məmàha à arəv a mburma, nda məvəla tar ndzəɗa, na dite ta mir aba a dzəŋdzəŋ a. I hemer a ka, i waya mə vəl a kurum madzala gà gər ilik ndəɓəts a təv ilik ŋa, ki zezemwim a dukw Yesuw Kiristi ana a ge akahər ata ya,

RUMA 3:25

Mbulum a tike ŋgat kamala dukw ana ta kìɗer a ya, na dite à mìt a aɗaba kwa, məmbəz ŋgar a beye a à kwa i bakal a ya. Kamala taŋa ya, Mbulum a sər ba à kwa nda gà ŋgat ka, aɗaba ana kə̀ gə̀sakwa Yesuw Kiristi nda gəzləŋ kwa ya. A ge dər kataya ka, dite mburma tə sər dər, ŋgat ka, mala ndzer, a waya bakal tsa. Akahər ata ka, aka gəs gəzləŋ i təv bakal ana gà mburma ta gewa ya. A fə̀r ahər kamala ana aka ŋgatar tsiye. Ama aka bəra aaha kinehe ya ka, a ɗif dər a gà mburma kuɗa, aà tə sər dər ka, ŋgat mala ndzer, a waya bakal tsa. Ŋgat a sasar a ge a ka, dukw ana ndzer a, dite ŋgat asa ka, a waya a ne a à mburma gà ŋgwal ŋa ika miɗ ŋgar, na à gà na ta gəs Yesuw Kiristi nda gəzləŋ tar a.

RUMA 3:4

Awaŋ, kataya tsa. Ku mege gà mburma tserdze ti ne gà ɓəzla pàrsa, tàa zazam ŋgat tsa tekeɗe ka, Mbulum a ge a dukw ana a gwa, i ge a nda ndzer a hiywe pəra. Ar ka, kamala ana mewetse ŋa a riŋ i wakita Mbulum, a gwa ka: «I təv ana kər Batsah mər ŋa ki fèfil a ya ka, ku weke a sir a dər ndzer, kà tsik taŋa ka, ndzer kaɗəŋ, pàrsa iɗəm tsa.» A gwa asa ka: «I təv ana ta mèk a à bakal a ka, wura ilik à gis a kər i seriye tsidze.»*fa*

RUMA 5:5

Na ki dzelekwe aaka a gà gər kamala taŋa ŋa ya ka, biy taf masakəŋa tsa. Mbulum à mbìɗ a kwe a dəba tsa dukw ŋgar. Aɗaba a ɗif a kwa ka, à meweye ŋgar ana a waya kwa hinne ya. A ɗif a kwa dər kataya ka, nda ahər Mezite Mesife ŋgar ana a vəl a kwa ya.

FILIPIYA 2:1

Kurum kà sərum ka, kurum riŋ mandza ŋa i təv ilik ŋa nda gà Yesuw Kiristi. Kamala taŋa ya na a vile a kurum a ndzəɗa a gəzləŋ kurum ɓəŋɓəŋ a. Meweye ŋgar ana a waya kurum a, na à me aà kurum a à arəv a. Kà sərum, kurum riŋ mandza ŋa ka, ndìɓèkke i təv ilik ŋa nda gà Mezite Mesife Mbulum. Kwa ihər ki weyekwe a ba ilik ilik tserdze ika magər kwa, dite na gà mburma ti ndzekwe a are tsehe mbaŋa ya.

KULUSIYA 1:23

Ama kə̀la ka, say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a. Ndzum ka, ɓəŋɓəŋ lele, madzala gà gər kurum ma ta ge wàkit wàkit tsa. Tikwim madzala gà gər kurum ka, aka dukw ana ka tsarakum i huɗ bazlam ŋgwal ŋana ya kəla pat. Bazlam ŋgwal ŋa ata ka, ti tsikeye a gà mburma ana ika gər ahəɗ a tserdze. Aɗaba Mbulum a slər iye, Pul, na dite i ɗif a dər a mburma mbaŋa ya.

KULUSIYA 1:27

A waya meɗìfè a tar dər ka, à dukw ana ŋgwal ŋa ndzer, a za dukw tserdze ya, dite ka, à zlèk a gà mburma tserdze, ku mege i ŋga tekeɗe ya. Na a ne dukw ata makàhà ŋa piŋŋe, dite araha, a pàt aba kinehe ya ka, Yesuw Kiristi na a riŋ mandza ŋa i gəzləŋ kurum a. Aɗaba taŋa, kàa tikwim madzala gà gər kurum a təv mezlibe ŋgar ana ti zlibe a à ŋgat a, ka sərum ka, ki ndzwim a a fata ndzer.

KULUSIYA 1:5

Kurum ihər ki gwim a kamala taŋa ya ka, aɗaba ana kà tikwim madzala gà gər kurum aka ŋgwal dukw ana Mbulum a tike a kurum aba ya, i təv ŋgar i gər ŋa, kà sərum ka, ki ta ŋgetwim a ya. Ti ɗif a kurum à dukw ata Mbulum a gwa, i tike a aba ya aɗaba kurum a ka, i təv ana kà tsarakum bazlam ŋgwal ŋana ndzer a.

1 TESALUNIKE 1:10

Kinehe ka, kurum ihər ki vevwim a Kəla ŋgar ana à mère a i gər ŋa i mbulum a ya. Kəla ata ka, Yesuw, wele ana Mbulum a mbəlara à ŋgat i məməta ya ya. Ŋgat na a ta beye a à kwa i matsəɓatsəɓ Mbulum ana mandza ŋa ika gər gà ɓəzla bakal a. A ta ge a ka, a pat seriye ŋgar ana aka ndze aɗəm a.

1 TIMUTE 1:1

Na a wetse wakita aaha ka, iye Pul, mala meslire Yesuw Kiristi. Gà Mbulum, mala məmbə̀là à kwa, nda Yesuw Kiristi ata, wele ana kà sərakwa nda madzala gà gər kwa ka, a ta ge a dukw ana aka mbər metsìkè a kwa ya, na tə slərra iye ya ya.

1 TIMUTE 6:12

Ne mala aka miɗ i təv magəsa gəzləŋ ana ika vatwa Mbulum a, kamala gà wele ana tì dzìr a ba aà mivele, ta mir aaba a sah lele ya. Gəs vatwa mesife ana à ndìv a tsa aà biybiy a nda gəzləŋ yak, dite ma ne biy yak. Aɗaba Mbulum a zalak ka, aà mesife ata akahər ata kà tsik ika miɗ mburma hinne, meme na kə̀ gəs bazlam Yesuw Kiristi nda ndzer a gəzləŋ yak a ya.

2 TIMUTE 2:13

Ama ku mege megìse kwa a riŋ tsa, ki nekwe a à ŋgat bakal tekeɗe, ŋgat ka, mala ndzer ŋa hiywe. Aɗaba dukw ana aka mbər megweɗe, i ge a ka, a ge a kaɗəŋ, a sle a aà masàsà pàrsa tsidze.

TITUS 1:2

I tsikewa kamala taŋa ya ka, na dite mburma ti sir a dər ka, ta ŋget a mesife ana à ndìv a tsa aà biybiy a. Aɗaba akahər ana Mbulum aka ge gər ahəɗ zukw tsiye ka, aka mbər metsike a kwa aba i sida ya, a gwa: «I ta vile a kurum a mesife ata.» Ŋgat ka, à ses a pàrsa tsidze.

IBƏRANIKWA 11:7

Agəra megìse Nuhu ana a gəs Mbulum nda gəzləŋ akahər ata ya ka, a dzalawa aka dukw ana Mbulum a tsikewar, a ta ge a ba aka miɗ mba ya. Ku mege aka ŋgat a gà dukw ata ti ta ge a ba ya zukw tsa tekeɗe ka, aka gəs ahər ahəm. A làmbaɗa batsah slə̀làh yam ana gà mburma ŋgar tserdze ta beye dər à batsah yam ana a rah aka gər ahəɗ fèɗìɗe, dite ka, ti dzeye aɗəm asa tsiye. Nda megìse ŋgar ata a gəs Mbulum a ka, a pə̀z gər ahəɗ a bəɗ nda seriye. Gà mburma ana tə sər Mbulum tsiye ka, tàa dzeye fit. Kamala taŋa ya mbaŋa na Mbulum a zla ŋgat kamala mburma ŋgwal ŋa ya ika miɗ ŋgar ka, aɗaba megìse ŋgar ata a gəs ŋgat nda gəzləŋ a.*fc*

IBƏRANIKWA 3:11

Aɗaba taŋa, Yàa mbaɗa i təv matsəɓatsəɓ ga ata ya. I gwa ka, ti sle a aà medera a təv mendze gà ana zayya, tì sifik a iɗəm ba ya tsidze.»*fb*

IBƏRANIKWA 3:6

Ama *Kiristi ka, kəla mala ga, kamala megweɗe ya ka, Kəla Mbulum. Dukw ana i ma ŋgar tserdze ya ka, i ahər ŋgar. A gewer megemir ndaka vatwa ŋa lele. Kwa tekeɗe, gà mburma ana i ma ŋgar a mbaŋa. Ama kə̀la ka, na ki tèkwe a dər aka miɗ aka miɗ tsikw a təv mendìsle, nda magəsa gəzləŋ, nda maŋgayaba nda təv dukw ana kà tikekwa aaka madzala gà gər a dzekwiŋ.

IBƏRANIKWA 6:17

Aɗaba taŋa na Mbulum a mbaɗa i sida ya mbaŋa, aà gà mburma ana a gwaɗa a tar, i ta vile a kurum a duwa i sida ya ka, tə sər dər nda ndzer, a sle a aà mimbìɗè à bazlam ŋgar asa tsa.

IBƏRANIKWA 7:19

Aɗaba məpala ahəm Musa ka, ndzəɗa ihər tsa, a sle a aà duwa ilik tsa, na dite mburma ti ne a dər à ba tar ŋgwal ŋa ika miɗ Mbulum a. Ama kinehe ka, duwa ŋgiɗ pam a gekwe a ŋgulum na Mbulum a mbəɗara avukw ŋa ya. Dukw ata ka, kà tikekwa aaka madzala gà gər kwa, na a vile a kwe a dər vatwa, aà mesirikaha a təv ŋgar bise ya.

IBƏRANIKWA 7:21

I dəba ŋa ya, Yesuw a ne mala mandəva kuɗa ŋgar ka, a mbaɗa i sida ya, a gwaɗar: «Iye Mbulum batsah ŋana, i mbìɗ a ahər a bazlam gà tsa. Yàa mbaɗa kamala taŋa ya ka, kər ki ti ne a mala mandəva kuɗa gà aà biybiy.»*fd*

1 Yuhana 1:10

Na bəla ki gweɗekwe a, maa ge bakal tsəka, taŋa ka, kà nekwa à Mbulum ka, kamala ana mala pàrsa ya. Bazlam ana a tsik a kwa ya ka, a riŋ i təv kwa tsa.

1 Yuhana 5:10

Aɗaba taŋa, na wura aka gəs Kəla Mbulum nda gəzləŋ ŋgar ka, a sir a gà dukw ata ti ne ndzer a i gəzləŋ ŋgar. Ama wur ana aka gəs bazlam Mbulum a gəzləŋ ŋgar tsiye ka, a ne à ŋgat mala pàrsa. Aɗaba aka gəs dukw ana Mbulum a tsik aka gər Kəla ŋgar a tsa.