IBƏRANIKWA 6:11 - Bible Zulgo

¹¹ Ama a sàs a mər ka, ku weke mə̀ mər aba kataya kəla pat, haa a pat mandəvandəv gər ahəɗ, dite kə ŋgatum dukw ana ka dzalum, Mbulum a gwa ka, i ta vile a kurum a ya.

IBƏRANIKWA 6:11 Iomraidhean Croise

Mata 24:13

Ama wur ana ədəts aka gəs gəzləŋ, aka simeraha haa a pat ana mesife ŋgar à ndìv a ya ka, Mbulum a mbil a dər.

Luka 1:1

Wusa yak Tiyufil ana i waya kər hinne ya. Gà mburma hinne tàa mbər mewetse gà dukw ana Yesuw a ge ya, nda gà bazlam ana akahər ata a tsik a mburma ya.

RUMA 12:8

Dite bəla na aka vəlak ndzəɗa aà mimè a taraha à arəv ka, mà a tar dərraha asa. Na bəla mìsle ŋgiɗ aka ŋgat ndzəɗa aà məvəla duwa a gà na duwa a sle aà ter a ya ka, mə vəl a tar gər sah nda gəzləŋ ilik. Na bəla biy ŋgiɗ, aka ŋgat ndzəɗa aà mene batsah ŋa ika gər tar ka, mà gəs aaba tar lele. Kige tsa bəla biy ŋgiɗ asa aka ŋgat ndzəɗa aà mege a tar ŋgwal ŋa ka, ma ge nda maŋgayaba lele mbaŋa.

RUMA 15:13

Kinehe ka, iye riŋ i heme a a Mbulum, mala metsìkè dukw ana a tsik a ka, dite gà mburma ti dzele a ya, mə vəl a kurum maŋgayaba, mà rah a gəzləŋ kurum tsìsl lele, nda matasla yam zayya, agəra megìse kurum ana kàa gəsum ŋgat nda gəzləŋ a. Kamala taŋa ya, madzala gà gər kurum tekeɗe, fit a de a a təv Mbulum, nda ndzəɗa Mezite Mesife ŋgar.

1 Kurintiya 13:13

Aɗaba taŋa, kinehe ka, gà duwa a riŋ makər na tì ndìv a tsiye. Kamala megweɗe ya: magəsa Mbulum ana kə̀ gə̀sakwa nda gəzləŋ kwa ya, nda metìkè madzala gà gər kwa ana ki tikikwe a nda təv ŋgar a, na dite dukw tserdze a de a lele ya, nda mawàyà mburma. Ama kəla ka, mawàyà mburma na a za gà dukw ata tserdze ya.

1 Kurintiya 15:58

Aɗaba taŋa, gà damər gà ana i waya kurum hinne ya. Ndzum ka, nda ndzəɗa ɓəŋɓəŋ lele, ka ti yum ba tsidze. Gwim megemir Yesuw BATSAH kwa ŋa ka, nda gəzləŋ ilik aka miɗ aka miɗ. Kurum kà sərum, megemir ana ki gwim a aɗaba ŋgat a ka, a ne a taf masakəŋa tsa.

GALATIYA 5:5

Ama mər ka, mì tike madzala gà gər mər a təv Mbulum. Ŋgat na a ne à mər a gà ŋgwal ŋa ika miɗ ŋgar a, agəra megìse ana mì gəs Kiristi nda gəzləŋ a. Taŋa na kinehe mər ihər mìi veve a pat ana mìi be a aà seriye ya, nda ndzəɗa Mezite Mesife ŋgar a.

GALATIYA 6:9

Aɗaba taŋa, tàkwa aka miɗ aka miɗ nda mege dukw ana ŋgwal ŋa ya, ka ti yàkwa ba tsidze. Aɗaba na kàa yàkwa ba tsəka, aləka a təv məpàslà ahər Mbulum ana a tsik a ka, ki ta ŋgetekewe a dukw ana ŋgwal ŋa ya lele, kamala wele ana a pele a dukw ŋgar i bəɗ a ka, sik sik sik ŋgwal ŋa ya.

FILIPIYA 3:15

Aɗaba taŋa, kwa ana kinehe kàa simekwa ika vatwa Mbulum a ka, say dzalakwa kamala taŋa ya. Na wura a dzele a dukw ŋgiɗ pam ika magər kurum a ka, Mbulum a ti ɗifer a dər parakkà.

KULUSIYA 1:23

Ama kə̀la ka, say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a. Ndzum ka, ɓəŋɓəŋ lele, madzala gà gər kurum ma ta ge wàkit wàkit tsa. Tikwim madzala gà gər kurum ka, aka dukw ana ka tsarakum i huɗ bazlam ŋgwal ŋana ya kəla pat. Bazlam ŋgwal ŋa ata ka, ti tsikeye a gà mburma ana ika gər ahəɗ a tserdze. Aɗaba Mbulum a slər iye, Pul, na dite i ɗif a dər a mburma mbaŋa ya.

KULUSIYA 1:5

Kurum ihər ki gwim a kamala taŋa ya ka, aɗaba ana kà tikwim madzala gà gər kurum aka ŋgwal dukw ana Mbulum a tike a kurum aba ya, i təv ŋgar i gər ŋa, kà sərum ka, ki ta ŋgetwim a ya. Ti ɗif a kurum à dukw ata Mbulum a gwa, i tike a aba ya aɗaba kurum a ka, i təv ana kà tsarakum bazlam ŋgwal ŋana ndzer a.

KULUSIYA 2:2

I mər aba kataya ka, aà məma a kurumaha à arəv, dite ka wayum ba ika magər kurum ilik ilik tserdze, ka gawum ba a təv ilik ŋa. A sèsiŋ asa mbaŋa ka, sərum dukw ana Mbulum a pàt a kwa dər ndərzayya aka gər Yesuw Kiristi ya lele, madzala gà gər kurum ma ta ge wàkit wàkit tsa, na dite ka, ŋgat a ge a kurum a ŋgwal dukw ana a za duwa tserdze ya. Dukw ata a pàt a kwa dər a ka, à Yesuw Kiristi.

1 TESALUNIKE 1:5

Aɗaba akahər ana mì tsik a kurum bazlam ŋgwal ŋa ya ka, mì tsik a kurum nda mezìwè gà gər mər ɗekɗek tsa, ndzəɗa Mbulum iɗəm. Mezite Mesife ŋgar na a zlak ahər mər a, aɗaba mì sər ndzer, bazlam ata ka, pàrsa iɗəm tsa. I təv ana mər mandza ŋa ika magər kurum a ka, kà sərum, meme na mì ndza ika magər kurum a. Mì ge kamala taŋa ya ka, dite mà zlak kurum.

1 TESALUNIKE 4:10

Haya kaɗəŋ, kamala taŋa ya, kurum ihər ki weywim a gà mburma Mbulum ana ika ahəɗ Makaduniya ya tserdze mbaŋa. Ama ka, mìi ge a kurum a kamkam hinne asa, na dite mawàyà ba kurum ata ki weywim a ba ya, à sìkèh a aka miɗ aka miɗ a.

2 TESALUNIKE 3:13

Ama kurum gà damər mər ka, dum aka miɗ aka miɗ nda mege dukw ana ŋgwal ŋa ya, ka ti yum ba tsidze.

IBƏRANIKWA 10:22

Aɗaba taŋa, gə̀sakwa Yesuw Kiristi nda gəzləŋ ilik lele. Madzala gà gər kwa ka, ma ge wàkit wàkit tsa. Dite sìrìkikwa a təv Mbulum ka, ndiɓ nda gəzləŋ ilik mbaŋa. Aɗaba Yesuw aka bara gəzləŋ kwa nda məmbəz ŋgar, dite aka bara kwa nda yam ŋgar ana tsəɗaŋŋa ya asa mbaŋa.

IBƏRANIKWA 3:14

Kwa kinehe ka, gà mburma ana kə̀ ŋgatakwa akaba duwa nda gà *Kiristi ya. Ama kə̀la ka, na ki tèkwe a dər aka miɗ aka miɗ, ki ndzekwe a ɓəŋɓəŋ lele nda təv dukw ana kà lah megìsekwa malahalah ŋa ya, tsikw a təv mendìsle.

IBƏRANIKWA 3:6

Ama *Kiristi ka, kəla mala ga, kamala megweɗe ya ka, Kəla Mbulum. Dukw ana i ma ŋgar tserdze ya ka, i ahər ŋgar. A gewer megemir ndaka vatwa ŋa lele. Kwa tekeɗe, gà mburma ana i ma ŋgar a mbaŋa. Ama kə̀la ka, na ki tèkwe a dər aka miɗ aka miɗ tsikw a təv mendìsle, nda magəsa gəzləŋ, nda maŋgayaba nda təv dukw ana kà tikekwa aaka madzala gà gər a dzekwiŋ.

1 PIYER 1:21

Kə̀ gəsum Mbulum nda gəzləŋ kurum ka, aɗaba ŋgat, ŋgat ana Mbulum a mbəl dərra i məməta ya, dite a vəlar mezlibe ana gà mburma tì zlibe a à ŋgat hinne ya. Aɗaba taŋa ki slwim a aà məvəla gəzləŋ kurum a Mbulum ilik, na dite ki sirwim a dər ka, a ta mbil a kurum mbaŋa ya.

2 Piyer 1:10

Aɗaba taŋa, gà damər gà, mərum aba, ka miyakum à mege gà dukw ata tsidze, aɗaba mezele ana Mbulum a zal a kurum, a pala kurum a ka, ki gwim kataya. Na kàa gwim gà dukw ata ka, ki dzeywim a ika vatwa Mbulum a tsidze.

2 Piyer 3:14

Aɗaba taŋa, a kurum gà masla gà ana i waya kurum hinne ya. I tsik a kurum a ka, a kurum ana kurum riŋ ihər i vevwim a pat ana Yesuw Kiristi à mère a ya ka: Mərum aba nda ndzəɗa kurum fit dze, na dite mendze kurum ana ika miɗ Mbulum a ge a ŋgwal ŋa, ələk a fata ka, bakal a ge a i təv kurum tsidze ya. Sərum ba nda gà ŋgat i gəzləŋ kurum zayzay lele.

1 Yuhana 3:14

Aɗaba kwa kà sərakwa kinehe ka, kwa i təv məməta asa tsa, kàa tàkwara iɗəm a. Kàa ŋgatakwa mesife ana awiya ŋa ya. Dite meme na ki sirekwe a dər ka, kàa ŋgatakwa mesife ata awiya ŋa ya ya? Ki sirekwe a dər ka, aɗaba ana ki weyekwe a gà damər kwa ana ika vatwa Mbulum a. Na wura a waya gà damər ŋgar ata tsəka, ar ka, i məməta hiywe mba.

1 Yuhana 3:19

Na ki gekwe a kataya ka, ki sirekwe a dər, na kwa kà nekwa gà ndzer ŋa ika miɗ Mbulum a, dite gəzləŋ kwa a ndze a zayya ika miɗ ŋgar a mbaŋa.

Sunwa Yuhana 2:26

Gà na ta mbè a aà dukw bakal, dite ta ge a dukw ana i waya ya, haa a pat mandəvandəv ŋa ya ka, i ta vile a ter a ndzəɗa aka gər gà slàla gà mburma tserdze.