IBƏRANIKWA 4:12 - Bible Zulgo

¹² Kà sərakwa bazlam Mbulum ka, ŋgat na a vile a mesife a mburma ya. Ar ka, ndzəɗa ŋa hinne mbaŋa. Ndzəɗa ŋgar ka, a za dər màsalamà ana matasla ŋa hapəpəpa a zəm tsèke sula ya. A pìts a madzala gà gər mburma ka, kamala màsalamà ana à ses a ikaba təv mezìve ya, nda gà tsa, a dehe a, ərrats à ses a atasl ana azuz iɗəm a. Bazlam ŋgar ata ka, kwàndàlàz à pètere a iɗəm à gà dukw ana gà mburma ti dzele a i gəzləŋ tar, a sàs a tar aà mege ya.

IBƏRANIKWA 4:12 Iomraidhean Croise

Luka 8:11

I dəba ŋa ya, Yesuw a gwaɗa a tar kuɗa: «Bazlam minew ata a sasar aà megweɗe ka, na a ne hwife ka, bazlam Mbulum.

Yuhana 12:48

Wur ana aka niw iye, aka gəs bazlam gà tsəka, seriye à gis a ŋgat a pat mandəvandəv gər ahəɗ ana Mbulum a ta ge a seriye aà mburma ya. Bazlam gà ana i tsik a ya pəra na à gis a ŋgat i seriye a pat ata ya.

Yuhana 6:51

Iye ka, i ne dukw mezime ana a tarra i gər ŋa ya. Na wura aka zəm dukw mezime ata ka, a ndze a birek birek aà biybiy, à mìt a tsa. Dukw mezime ata i vile a a mburma, dite na ta ŋget a dər mesife ya ka, slu ba gà.»

Gà Ɓəzla Meslire 2:37

Gà mburma ata tə tsaraka bazlam ata tsara ka, arəv a da aà tar a, ta ge magəɗa hinne. Ta gwaɗa a gà Piyer nda gà asiŋ gà ɓəzla meslire Mbulum ŋgiɗ: «Gà damər mər, dite mìi ge a dze ana, meme?»

Gà Ɓəzla Meslire 4:31

Tə ndəv à meheme tar ata tsara ka, təv ata tar iɗəm a, a ɓazla hinne. Mezite Mesife Mbulum a rah a ba tar ilik ilik tserdze. Ti tsikewa bazlam Mbulum a mburma parakkà, hwarwa aà are tar asa tsa.

Gà Ɓəzla Meslire 5:33

Gà ɓəzla mayahaba gər ata tə tsaraka taŋa ka, ta ge arəv hinne. Tə dza akaba ahəm, aà mibetse iɗəm gà ɓəzla meslire Mbulum ata ya fit.

Gà Ɓəzla Meslire 7:38

I təv ana gà mburma Isərayel ti yahaba gər i kusak aà sik kwite Sinay ka, Musa na mala mazàzə̀ɗà à bazlam gawla Mbulum ana a tsikarra i gər kwite ya, dite na a zazəɗ dərraha a gà gwala kwa ya. Mbulum a ɗerra à bazlam mesife ya, dite na, araha a ndzera a təv kwa ya mbaŋa ya.*fp*

RUMA 1:16

Iye ihər i ɗif a à bazlam ŋgwal ŋa ata ka, parakkà, hwarwa a giŋ a tsa. Aɗaba bazlam ŋgwal ŋa ata ka, ndzəɗa Mbulum iɗəm, a sle a aà məmbə̀là à gà na ta gəs Yesuw Kiristi nda gəzləŋ tar tserdze ya. Malahalah ŋa ka, a mbil a à gà Yahuda, dite i dəba ŋa ya, a mbil a à gà mburma ana tar gà Yahuda tsiye mbaŋa.

1 Kurintiya 1:24

Ama gà mburma ana Mbulum a pala tar, a ne à tar gà biy ŋgar a ka, ku mege tar gà Yahuda, ku gà Yahuda tsa tekeɗe ka, ta fir ahər a kamala ana dukw falày masakəŋa ya tə tsa. Aɗaba tar tə sər, Yesuw Kiristi ka, ndzəɗa Mbulum, dite ŋgat a ɗif ibam, à metsehe Mbulum a mburma asa mbaŋa.

2 Kurintiya 2:17

Ama mər ka, mìi sle a aà mege ŋa, agəra ana Mbulum a slər ahər mər a, tsəka, mìi sle a ɓav tsa. Aɗaba gà mburma hinne, na ti tsikewa bazlam Mbulum a mburma ka, ta fə̀r ahər kamala dukw metsèkèle ya. A sàs a tar aà maŋgata dər nuba. Ama mər ka, mì gewa dər kamala taŋa ya tsa. Mì tsikewa bazlam ŋgar a mburma ka, nda gəzləŋ ilik ika miɗ ŋgar, agəra ana mər ka, gà ɓəzla meslire Kiristi ya.

2 Kurintiya 4:2

Maa niw gà dukw ana mburma ta ge a nda wirwir kìtsèh kìtsèh, a ndeɗe aka mər a hwarwa ya tserdze. Mər ka, mìi kèhe a dukw ana mìi ge a ya tsa. Dite mìi bene a mburma, kige tsa mìi mbìɗ a à bazlam Mbulum tsa asa mbaŋa. Ama mìi ɗif a ka, à ndzer ŋana parakkà ivaɗ. Mì waya ka, ku weke mà sər dər, bazlam ana mìi tsik a ya ka, ika miɗ Mbulum ndzer, pàrsa iɗəm tsa.

EFESIYA 5:13

Na gà dukw ata tàa pata aba parakkà lele ka, a ŋgeter a ba, meme na tə ndzaya kuɗa.

EFESIYA 5:26

A bara tar herrè lele, aruwaŋ a da aà tar a. A ne à tar gà tsəɗaŋŋa ka, agəra bazlam ana a tsik a tar a. Kamala taŋa ya na ti ne biy Mbulum a.

EFESIYA 6:17

Gəsum mimbile kurum ana Mbulum a mbil a kurum a, kamala *tazak daw ana i gər a. Dite gəsum bazlam ŋgar ɓəŋɓəŋ kamala màsalamà ana Mezite Mesife ŋgar a vəl a kurum a.

1 TESALUNIKE 2:13

Mìi misek a à mege kəkaaha a Mbulum tsidze, aɗaba akahər ana mì ɗif a kurum à bazlam Mbulum a ka, kàa gəsum kamala taŋa ya. Kurum kà sərum, bazlam ata a dara ka, i təv Mbulum a, tsəka, bazlam gà mburma ana taf masakəŋa ya tsa. Ndzer kaɗəŋ, bazlam ata ka, biy Mbulum dukw ŋgar. Ar ka, ndzəɗa ŋa, a ge a megemir i ba kurum ana kurum gà mburma Mbulum a.

1 TESALUNIKE 5:23

Mìi heme a a Mbulum ana a vile a kwe a matasla yam a gəzləŋ a, na dite ki nwim a gà mburma ŋgar, ki ndzwim a tsəɗaŋŋa kamala ŋgat ana a ndze a ya mbaŋa. Dite ma kasla mesife kurum nda madzala gà gər kurum nda gà ba kurum ŋa tserdze, na dite a pat ana Yesuw Kiristi BATSAH kwa ŋa à mère a ya ka, bakal a ge a i təv kurum tsidze ya.

IBƏRANIKWA 13:7

Gà na tə lah meɗe a kurum à vatwa, ti tsik a kurum bazlam Mbulum a ka, tə ta məts a kurum gər tsa. Dzalum gà gər aka mendze tar ana tə ndza ɗa ya, dite meme na ta mata ya asa mbaŋa. Zazamum ka, megìse tar ana ta gəs Mbulum nda gəzləŋ a mbaŋa.

IBƏRANIKWA 6:5

Dite tàa mbər mesire bazlam Mbulum ka, ŋgwal ŋa. Tàa sər aà ndzəɗa gər ahəɗ awiya ŋana Mbulum a ge a ika miɗ mba ya asa mbaŋa.

YAKUBA 1:18

Ŋgat na a waya, a vəl a kwa mesife awiya ŋa na i təv guma ŋgar ndzer ŋana a tsik a. A sasar na ka nekwa gà malahalah ŋana i liwiŋ gà dukw ana a ge tserdze ya.

1 PIYER 1:23

Aɗaba kà sərum, Mbulum a vəl a kurum mesife awiya ŋa, nda ndzəɗa bazlam ŋgar ana a vile a mesife a mburma, diydiy à ndìv a tsiye. Kurum ka, kàa nwim gà ɓəza Mbulum ana ŋgat à mìt a tsidze ya. Ŋgat ka, kamala kwa ana ki metekwa a ya tsa.

Sunwa Yuhana 1:16

Gà mawusawus təsəla magàsà ŋa i ahər mezime ŋgar. Dite màsalamà ana a zəm hapəpəpa, matasla ŋa tsèke sula ya, a dere a ka, i bazlam ŋgar a. Yam are ŋgar ka, a də̀v twiytwiy kamala pat ana à div a nda magər pat a.

Sunwa Yuhana 19:15

Dukw ana a dere a i bazlam ŋgar a ka, màsalamà ana matasla ŋa, a zəm hapəpəpa ya. A kweteɓe a dər akaba ka, gà mburma ana ta gəs ahəm ŋgar tsiye tserdze. A ne a ka, Əbay ana a ta kwere a tar nda ndzəɗa ika gər tar a tserdze. A ta ɓile a aka ter a ka, mbiymbiy kamala manàhà dukw ana ti ɗwitsewara iɗəm yam ŋa ya. Kamala taŋa ya, a ti ɗif a à taŋa ka, à matsəɓatsəɓ Mbulum ana ŋgat mala makwàrà gər ahəɗ tserdze ya.

Sunwa Yuhana 19:21

Ama gà sliwdze dukw dala ata ka, mala piris aaha ndeɗiŋa ya, a batsaya tar fit nda màsalamà ana a dere a i bazlam ŋgar a ya.*fa* Dite gà məmba tserdze tə dara, ti yahaba gər, tə zəm gà məməta tar ata fit ka, a sleye a tar huɗ zìhhwe zìhhwe.

Sunwa Yuhana 2:16

Mbəɗum à madzala gà gər kurum, tsəka, i dere a a təv kurum a nda gà màsalamà ata a dere a i bazlam gà ya ya. I ge a dər gùvəl aà gà mburma kurum ata.

Sunwa Yuhana 2:23

tsəka, i ta bets a gà ɓəza ŋgar mbaŋa, na dite gà mayahaba gər gà mburma Mbulum tserdze ti sir a dər ka, iye na i sər dukw ana gà mburma tə dzala i gər tar, nda gà dukw ana a tsahən aà tar a ya. Kurum tserdze ka, i ti dzèye a kurum a gà dukw mayaba kurum, ku weke kalkal nda megemir ŋgar ana a ge ya.

Sunwa Yuhana 20:4

I dəba ŋa ya asa ka, i ŋgataha a gà təv mendze gà Əbay. Gà mburma a riŋ mandza ŋa ikəka. Mbulum a vəl a tar ndzəɗa aà mege seriye a gà mburma ŋgiɗ. Dite ka, i ŋgataha a gà mezite gà mburma ana tə sasaya ika tar gər a ya mbaŋa. Tə sasaya ika tar a ka, aɗaba ana ti tsikewa parakkà, Yesuw ka, BATSAH kwa ŋa, dite agəra ana ti ɗifewa à bazlam Mbulum a mburma ya asa mbaŋa. Aɗaba tar ka, tàa dza gurmits a bəɗ a dukw dala ata, kige tsa, a mendzikiɗe ba ŋgar ŋa tsidze. Dite tàa gəs lambà ŋgar aà mege aka yemere tar, ku mege aà ahər tar ɓav tsidze. I ŋgat a tar ka, tar riŋ nda mesife. Tar nda gà Yesuw ka, gà Əbay, ta kwere a mive dəbuw.