IBƏRANIKWA 3:6 - Bible Zulgo

⁶ Ama *Kiristi ka, kəla mala ga, kamala megweɗe ya ka, Kəla Mbulum. Dukw ana i ma ŋgar tserdze ya ka, i ahər ŋgar. A gewer megemir ndaka vatwa ŋa lele. Kwa tekeɗe, gà mburma ana i ma ŋgar a mbaŋa. Ama kə̀la ka, na ki tèkwe a dər aka miɗ aka miɗ tsikw a təv mendìsle, nda magəsa gəzləŋ, nda maŋgayaba nda təv dukw ana kà tikekwa aaka madzala gà gər a dzekwiŋ.

IBƏRANIKWA 3:6 Iomraidhean Croise

Mata 10:22

Gà mburma tserdze, ku weke tekeɗe, ti ne a kurum a are, aɗaba ana kurum gà mburma gà ya. Ama wur ana ədəts aka gəs gəzləŋ, aka simeraha haa a pat ana mesife ŋgar à ndìv a ya ka, Mbulum a mbil a dər.

Mata 16:18

Iye ihər i gweɗekiŋa: Kər ka, Piyer, kamala megweɗe ya ka, kuvəl. Ama i ti yehe a gər a gà mburma gà aka kuvəl ata kamala kur ana tì zlèzl a dər ga ya. Taŋa, gà ɓəzla mene are tar ka, ti sle a aà medzeye à tar tsa, ku mege ndzəɗa məməta tekeɗe, a sle a aà mimbè aà tar tsa mbaŋa.

Mata 24:13

Ama wur ana ədəts aka gəs gəzləŋ, aka simeraha haa a pat ana mesife ŋgar à ndìv a ya ka, Mbulum a mbil a dər.

RUMA 11:22

Fə̀rum kwaŋ, meme na Mbulum a ge ŋgwal ŋa a mburma ya, dite ka, meme asa ya na a tike matsəɓatsəɓ aka gà asiŋ ŋa ya? A tike matsəɓatsəɓ ka, aka gà na ta məsak à vatwa ŋgar a. A ge ŋgwal ka, a kurum. Ama kəla ka, say na ki dwim a aka miɗ aka miɗ nda mendze i təv ŋgar a. Na kataya tsəka, kurum tekeɗe ka, ŋgwìɗik a ta misek a à kurum a mbaŋa.

RUMA 12:12

Ŋgayawum ba aɗaba madzala gà gər aka dukw ana Mbulum a gwa, i ta vile a kurum a i sida ya ya. I təv ana ki sèwèrwim a are ya ka, mərum aba sah lele, bàsumaraha. Hamum a Mbulum kəla pat, kà yum ba tsa.

RUMA 15:13

Kinehe ka, iye riŋ i heme a a Mbulum, mala metsìkè dukw ana a tsik a ka, dite gà mburma ti dzele a ya, mə vəl a kurum maŋgayaba, mà rah a gəzləŋ kurum tsìsl lele, nda matasla yam zayya, agəra megìse kurum ana kàa gəsum ŋgat nda gəzləŋ a. Kamala taŋa ya, madzala gà gər kurum tekeɗe, fit a de a a təv Mbulum, nda ndzəɗa Mezite Mesife ŋgar.

RUMA 5:2

Ŋgat na a hə̀ndə̀k a kwa i vatwa ya, na dite Mbulum a ge a kwa ŋgwal, aɗaba ana kə̀ gə̀sakwa ŋgat nda gəzləŋ kwa ya. Ŋgwal dukw ata kə̀ ŋgatakwa ya ka, ki ŋgeyekwe a dər ba, aɗaba ana kà sərakwa ndzer ka, Mbulum a ta vile a kwe a mezlibe ŋgar ana tì zlibe a à ŋgat a mbaŋa ya.

1 Kurintiya 3:16

Kurum kà sərum te tsiye, kurum gà mburma Mbulum, kà nwim ka, kamala ga Mbulum batsah ŋana ŋgat mandza ŋa iɗəm, dite ka, Mezite Mesife ŋgar ibam, a riŋ mandza ŋa i gəzləŋ kurum a?

1 Kurintiya 6:19

Kurum kà sərum te tsiye: ba kurum a ne ka, ga Mezite Mesife Mbulum a? Mbulum a vəl a kurum Mezite Mesife ŋgar ata ka, aà dite ma ndza i gəzləŋ kurum a. Aɗaba taŋa, ba kurum a ne ka, biy kurum asa tsa.

2 Kurintiya 6:16

Wànà kà dzalum dze ana, dukw ana gà mburma ti ne dər mbulum nda ahər tar ŋa ya ana, a sle a aà mendze i ga Mbulum batsah ŋana ya? Awaŋ, a ge a ba tsidze. Yaw, sərum dər ka, kwa na kà nekwa ga Mbulum batsah ŋa ata ŋgat a riŋ nda mesife ya. Aɗaba Mbulum a gwa ka: «I ti ndze a ika magər gà mburma gà, i ta ŋget a təv mendze gà i fata. Iye i ti ne a Mbulum tar, dite tar tekeɗe, ti ti ne a gà mburma gà mbaŋa.»*fb*

GALATIYA 6:10

Aɗaba taŋa, daga aà kinehe ya, na vatwa a riŋ ka, gekwa ŋgwal a gà mburma tserdze. Ndeyndey ŋana ka, a gà na ta gəs Yesuw Kiristi nda gəzləŋ a mbaŋa.

GALATIYA 6:9

Aɗaba taŋa, tàkwa aka miɗ aka miɗ nda mege dukw ana ŋgwal ŋa ya, ka ti yàkwa ba tsidze. Aɗaba na kàa yàkwa ba tsəka, aləka a təv məpàslà ahər Mbulum ana a tsik a ka, ki ta ŋgetekewe a dukw ana ŋgwal ŋa ya lele, kamala wele ana a pele a dukw ŋgar i bəɗ a ka, sik sik sik ŋgwal ŋa ya.

EFESIYA 3:12

Arəv a de a à kwa ya asa tsa na aà mesirike a təv Mbulum a, aɗaba ana kə̀ gə̀sakwa Yesuw Kiristi nda gəzləŋ, kwa riŋ mandza ŋa i təv ilik ŋa nda gà ŋgat a.

KULUSIYA 1:23

Ama kə̀la ka, say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a. Ndzum ka, ɓəŋɓəŋ lele, madzala gà gər kurum ma ta ge wàkit wàkit tsa. Tikwim madzala gà gər kurum ka, aka dukw ana ka tsarakum i huɗ bazlam ŋgwal ŋana ya kəla pat. Bazlam ŋgwal ŋa ata ka, ti tsikeye a gà mburma ana ika gər ahəɗ a tserdze. Aɗaba Mbulum a slər iye, Pul, na dite i ɗif a dər a mburma mbaŋa ya.

1 TESALUNIKE 5:16

Ŋgeyewim ba ka, kəla pat.

2 TESALUNIKE 2:16

Aɗaba Mbulum Tsir kwa a waya kwa. A ge a kwa ŋgwal ŋa. A vəl a kwa madzala gà gər aka ŋgwal dukw ana ka sərakwa, ki ta ŋgetekewe a aka miɗ mba ndzer a. Kamala taŋa ya, a riŋ à me a kwe a dərraha à arəv hiywe. Mìi hemer a ka, a tar nda Yesuw Kiristi BATSAH kwa ŋa,

1 TIMUTE 3:15

Aɗaba ku mege Yàa ndzeha bise tsa tekeɗe ka, wakita aaha a ɗifek a à dukw ana i tsikik a zləmana ya, dite ka, ki sir a dər ka, meme na gà mburma ti sle a aà mede ika magər gà mburma Mbulum ndaka vatwa ŋa lele ya. Na a ne gà mburma ata ka, gà na tar riŋ i huɗ mayahaba gər gà mburma Mbulum ana ŋgat a vile a ter a mesife ya. Gà mburma ŋgar ata na ndəzlzlà ti ne mendweŋe bazlam ŋgar ana ndzer a.

IBƏRANIKWA 1:2

A fàfəlawa kataya, haa tsikw a ndzera aà mendze kwa aaha kinehe mandəvandəv ŋa ya. Ama kinehe a fàfəl a kwa ka, nda bazlam Kəla ŋgar kuɗa. Nda ahər Kəla ŋgar ata, na Mbulum a ge gà gəza mbulum nda gər ahəɗ a. Ŋgat asa mbaŋa na a zla ŋgat a, dite ka, dukw tserdze ma ge biy ŋgar.

IBƏRANIKWA 10:19

A kurum gà damər gà, agəra Yesuw ana a mət, a dza à məmbəz ŋgar a ka, kàa ŋgatakwa vatwa aà mede a təv ata tsəɗaŋŋa, Mbulum mandza ŋa iɗəm a. Ar ka, tùwaŋŋà mahə̀ndə̀kà ŋa iɗəm a, wura à hìndìk a kwe aɗəm a asa tsa.

IBƏRANIKWA 10:21

*Batsah mala mandəva kuɗa a Mbulum kwa a riŋ, a kesle a gà mburma ana i ga i bəra Mbulum a lele.

IBƏRANIKWA 10:23

Mərakwa aba aà magəsa dukw ana Mbulum a tsik a kwa, kwa ihər ki ɗifekwe a dər a mburma ya, nda gəzləŋ. Madzala gà gər kwa tekeɗe, ma ta ge wàkit wàkit tsa. Aɗaba dukw ana Mbulum a tsik i sida ya, a gwa, a vile a kwe a ya ka, a vile a ndzer kaɗəŋ, dukw ŋgar, à ses a pàrsa tsidze.

IBƏRANIKWA 10:35

Aɗaba taŋa, arəv ma da aà kurum a tsa, sərum dər ka, na kàa mərum aba kamala taŋa ya ka, Mbulum a ta vile a kurum a dukw maya ba kurum batsah ŋa hinne.

IBƏRANIKWA 11:1

Ama magəsa duwa nda ndzer ŋa ka, na wura aka gəs nda gəzləŋ ŋgar a. A sər taŋa ka, a ŋget a dukw ata a waya i gəzləŋ ŋgar a. A sər mbaŋa ka, dukw ata aka ŋgatar zukw tsiye ka, a riŋ kaɗəŋ ndzer.

IBƏRANIKWA 3:14

Kwa kinehe ka, gà mburma ana kə̀ ŋgatakwa akaba duwa nda gà *Kiristi ya. Ama kə̀la ka, na ki tèkwe a dər aka miɗ aka miɗ, ki ndzekwe a ɓəŋɓəŋ lele nda təv dukw ana kà lah megìsekwa malahalah ŋa ya, tsikw a təv mendìsle.

IBƏRANIKWA 4:11

Aɗaba taŋa, mərakwa aaka aba, dite ka, kə ŋgatakwa vatwa aà mede a təv mendze ŋgar ata zayya ŋa, ki sìfìkikwe a iɗəm ba ya. Gekwa metsehe, wura ilik ika magər kwa ya ma ta mà a dəba kamala gà tsir kwa ata ta gəs ahəm aà Mbulum tsiye tsa.

IBƏRANIKWA 4:14

Aɗaba taŋa ki ndzekwe a nda gà megìse ana kə̀ gə̀sakwa ya, a gəzləŋ ɓəŋɓəŋ lele, dite ki ɗifekwe a dər a mburma ŋgarra lele mbaŋa asa. Aɗaba batsah mala mandəva kuɗa a Mbulum ata ka, Yesuw Kəla Mbulum ana a tsəl a təv ŋgar a gər ŋa ya.

IBƏRANIKWA 4:16

Aɗaba taŋa, sìrìkikwa a təv mendze mekwere Əbay Mbulum ana a kwere a ya, dite ka, a ge a ŋgwal ŋa a mburma mbaŋa ya. Hìriɓ hìriɓ ki gekwa magəɗa tsa. Aɗaba ka sərakwa, kà ndzekwar are tsehe, dite na a gekwe a ŋgwal ŋa i təv dukw ana a sle a aà kwa ya.

IBƏRANIKWA 6:11

Ama a sàs a mər ka, ku weke mə̀ mər aba kataya kəla pat, haa a pat mandəvandəv gər ahəɗ, dite kə ŋgatum dukw ana ka dzalum, Mbulum a gwa ka, i ta vile a kurum a ya.

IBƏRANIKWA 6:18

A sasar a tsik aba i sida ya dzekwiŋ, dite i dəba ŋa ya, a mbaɗa asa. A tsik aba ya kataya ka, aà tə sər dər, gà dukw ata a tsik sula ya ka, à me a a dəba tsidze. Mbulum a sle aà mesèse a pàrsa tsa. Gà dukw ata ta mèkwehe a à arəv, a kwa ana kà valakwa a təv ŋgar kamala mendzikwir ana a vel a aà huɗ məmər ŋgar aà məmba ya. Dite ka, ki ndzekwe a nda magəsa gəzləŋ ɓəŋɓəŋ lele. Ki vevekwe a dukw ana Mbulum a tsik a kwa i sida ya, a gwa, a ta vile a kwe a ya.

IBƏRANIKWA 7:19

Aɗaba məpala ahəm Musa ka, ndzəɗa ihər tsa, a sle a aà duwa ilik tsa, na dite mburma ti ne a dər à ba tar ŋgwal ŋa ika miɗ Mbulum a. Ama kinehe ka, duwa ŋgiɗ pam a gekwe a ŋgulum na Mbulum a mbəɗara avukw ŋa ya. Dukw ata ka, kà tikekwa aaka madzala gà gər kwa, na a vile a kwe a dər vatwa, aà mesirikaha a təv ŋgar bise ya.

1 PIYER 1:8

Ku mege kàa ŋgatum a Yesuw nda are kurum zukw tsa tekeɗe ka, kà wayum ŋgat. Ku mege kàa ŋgatumar kinehe tsa tekeɗe ka, kàa gəsum ŋgat nda gəzləŋ kurum lele. Aɗaba taŋa na kurum ihər ki ŋgeywim a ba kinehe hinne, a za dukw ana mburma a tsik a nda bazlam a.

1 PIYER 2:5

Kinehe kurum tekeɗe ka, dumara, nwim gà kur ata mesife iɗəm, Mbulum à dzik a, à zlèzle a dər ga ŋgar ana Mezite Mesife ŋgar a ndze a iɗəm a. Vəlum vatwa a Yesuw Kiristi a gəzləŋ kurum, dite ka, mə vəl a kurum ndzəɗa, ma ne à kurum gà ɓəzla mandəva kuɗa a Mbulum ana gà tsəɗaŋŋa lele, ta viler a duwa masakəŋa, dite a tsahən aà ŋgat a.

1 PIYER 4:17

Pat ana Mbulum a ge a seriye a gà mburma ya ka, aka à mendzera. A lah mege a ka, a gà mburma ŋgar dzekwiŋ. Ama na Mbulum à lèh mege a seriye ka, biy gà mburma ŋgar dzekwiŋ ana, dite meme na a ta ge a biy gà mburma ana ti niw bazlam ŋgwal ŋa aaha seyiŋ a?

Sunwa Yuhana 2:18

Wele ata a gweɗiŋ asa: «Wetseha bazlam aaha a gawla Mbulum ana i kwite Tiyatira, a kesle a gà mburma Mbulum a. Ki wetse a ka, bazlam aaha: Bazlam ŋa, na a tsik ka, Kəla Mbulum, wele ana are ŋgar a də̀v kamala akwa ya, dite ŋgat ka, wele ana sik ŋgar ndizze kamala ndzemde ana ti tike a akwa ya asa mbaŋa.

Sunwa Yuhana 2:25

Gəsum dukw ana ŋgwal ŋa, kà sinikwim dər ba ya, nda ndzəɗa ɓəŋɓəŋ lele, haa a pat ana i ta mère a ya.

Sunwa Yuhana 2:26

Gà na ta mbè a aà dukw bakal, dite ta ge a dukw ana i waya ya, haa a pat mandəvandəv ŋa ya ka, i ta vile a ter a ndzəɗa aka gər gà slàla gà mburma tserdze.

Sunwa Yuhana 3:11

Yàa à mimèra ka, bise. Gà dukw kurum ana ŋgwal ŋa, kà sinikwim dər ba ya ka, gəsum nda ndzəɗa ɓəŋɓəŋ lele, tsəka, gà mìsle ŋgiɗ ti ndzeke a aà kurum gà dukw mayaba kurum a.