IBƏRANIKWA 3:1 - Bible Zulgo

¹ A kurum gà damər gà, Mbulum na a zal a kurum a, dite ka, kà nwim gà mburma ŋgar mbaŋa ya. Aɗaba taŋa, dzalum gà gər a təv Yesuw ana Mbulum a slərra ŋgat a, dite ka, ma ne batsah mala mandəva kuɗa ŋgar, a sir a ba à kwa nda gà ŋgat. Taŋa na dukw ana kə̀ gə̀sakwa nda gəzləŋ, ki tsikikwe a a mburma parakkà lele ya.

IBƏRANIKWA 3:1 Iomraidhean Croise

Yuhana 17:3

Wur ana aka ŋgat mesife ana à ndìv a tsiye ka, a sər, kər na Mbulum ndzer a, dite a sər, iye Yesuw Kiristi ana kà slərra iye ya mbaŋa.

Yuhana 20:21

Yesuw a gwaɗa a tar asa: «Mandza zayzay ma ge i təv kurum. I slir a kurum aà mege megemir gà, kamala Tsir gà ana a slərra iye a təv kurum a mbaŋa.»

Yuhana 20:27

I dəba ŋa ya, a gwaɗa a Tumas: «Dzakara ahər yak a faha ya, kà fə̀r ahər, kà ləm aà girɗe ana i ahər gà ya, dite kà ləm aà na ika wèlèɓè ga ya mbaŋa kwaŋ. Miyak à mimbètsè ahəm, dite kə̀ gəs kuɗa.»

Gà Ɓəzla Meslire 1:15

A pat ŋgiɗ duwa, i təv ana gà ɓəzla magəsa Yesuw nda gəzləŋ ti yahaba gər, ti sle a dərməka nda dzik səla ya ka, Piyer a hitse aà mbulum i magər tar. A gwaɗa a tar:

RUMA 11:17

Kamala taŋa ya, dizl duwa a riŋ, ŋgwal ŋa biy mezime, tə sàsara iɗəm tsèke ahər ŋgiɗ a. Tə daha, tə sàsara aɗəm ahər dizl ɗaf ŋgiɗ i dala ya taf masakəŋa, tə dzavaya aaka. Aɗaba taŋa, kurum gà mburma ana gà Yahuda tsa, kà nwim ka, kamala ahər dizl ɗaf ata, tə sasara i dala ya taf masakəŋa, tə dzava aaka ya. Dukw ŋgwal ŋa ana gà Yahuda ta ŋgat a ka, kurum kinehe tekeɗe, kàa ŋgatum mbaŋa, kamala ahər dizl ɗaf ana dzəŋdzəŋ a ŋgat ndzəɗa, a sara yam i ba batsah ŋana ya ya.

RUMA 15:27

Tə dzala taŋa ka, ika magər tar. Ama ndzer kaɗəŋ, mazlàkà gà mburma ata ka, ŋgwal ŋa. Aɗaba tar tekeɗe, kamala megweɗe ya ka, ta mà akaba à dukw ŋgwal ŋa ana Mbulum a tsik a tar i sida ya, a gwa, i ta vile a kurum a ya, nda gà na gà Yahuda tsiye. Aɗaba taŋa, lele na gà na tar gà Yahuda tsiye, tì zlèk a gà Yahuda ata i təv dukw ana a sle aà ter a ya ya.

RUMA 15:8

Kurum kà sərum, Yesuw Kiristi a dara ka, aà mazlàkà gà Yahuda aà mege dukw ata Mbulum a tsik i sida ya, a gà bàba gà tsir tar ana akahər ata ya, a gwa, i ta ge a nda ahər ŋgar a. Kamala taŋa ya, a ɗif a tar à dukw ana Mbulum a tsik i sida ya, ndzer kaɗəŋ, pàrsa iɗəm tsiye.

RUMA 9:24

Kwa kinehe tekeɗe ka, i liwiŋ tar mbaŋa. A pala ka, gà mburma ana ika magər gà Yahuda ya ɗekɗek tsa. A zal a kwa dər ka, i liwiŋ gà asiŋ gà mburma ŋgiɗ a mbaŋa.

1 Kurintiya 1:2

Mì wetseha ka, a kurum gà mburma Mbulum ana i Kurintiya ya. Mbulum na a pala kurum, aà mandza i təv ilik ŋa nda gà Yesuw Kiristi ya. A zal a kurum, na dite kà nwim gà mburma ŋgar a. Mì geha wusa mbaŋa ka, a gà na ta heme a a Yesuw Kiristi BATSAH kwa ŋa ya tserdze, ku mege ika ahəɗ awara tekeɗe ya. Aɗaba ŋgat ka, Batsah tar ŋa, dite Batsah mər ŋa asa mbaŋa.

1 Kurintiya 10:17

Taŋa tapa ɗaf ata ka, ilik pəra. Kwa tserdze ka, hinne. Ama ki zimekwe a ka, taŋa ilik pəra. Aɗaba taŋa, ku mege kwa hinne tekeɗe ka, kwa tserdze kàa nekwa ba ilik.

1 Kurintiya 9:23

Dukw ata i ge a tserdze ya ka, na dite bazlam ŋgwal ŋana ma da aka miɗ aka miɗ a. A sèsiŋ ka, i ŋget a dər mipìsè ahəm Mbulum ana a pisiŋ a ya, mər nda gà asiŋ gà mburma ana ta gəs bazlam ata tserdze mbaŋa ya.

2 Kurintiya 1:7

Mì sər ndzer, ki ta ŋgetwim a ndzəɗa ika vatwa Mbulum ɓəŋɓəŋ lele. Aɗaba mì sər ka, Mbulum à me a kurumehe a à arəv kamala ana a mà a mər dərraha ya mbaŋa, agəra ana kàa gawum ba nda gà mər i təv mesewere are ana mìi sèwèr a ya.

2 Kurintiya 9:13

Məvəla dukw taf kurum ata na à pèt a à ndzer kurum a mburma parakkà, ti sir a dər, gəzləŋ kurum ŋgwal ŋa, kàa gəsum ŋgwal bazlam ata aka gər Yesuw Kiristi ya ka, ndzer kaɗəŋ, dite kàa gəsum ahər ahəm lele asa ya. Na tàa samata, ki gwim a kataya ka, gà mburma hinne ti ti zèmbeɗe a à Mbulum. Ti ti zlibe a dər mbaŋa, agəra ana ki vilwim a ter a gà dukw kurum fə̀làh fə̀làh, dite ki vilwim a a gà asiŋ gà mburma Mbulum ŋgiɗ tserdze mbaŋa ya.

EFESIYA 3:6

Dukw ata Mbulum a ɗif dər a ka, kurum gà mburma ana gà Yahuda tsiye tekeɗe, ki ta ŋgetwim a dukw ana a vile a a gà Yahuda ya mbaŋa. Kurum nda gà Yahuda ka, kàa nwim ba ilik. Aɗaba kurum tekeɗe, kurum i dukw ana Mbulum aka mbər megweɗe i sida ya ka, i ta vile a a gà mburma Yesuw Kiristi ya mbaŋa. A ta vile a a kurum a gà dukw ata tserdze ya ka, agəra ana kàa gəsum bazlam ŋgwal ŋana nda gəzləŋ kurum a.

EFESIYA 4:1

Kərga taŋa ya, iye ka, iye i daŋgay, aɗaba ana iye mala meslire Yesuw Kiristi BATSAH kwa ŋa ya. Iye ihər i ge kurum a kamkam: Ama mede kurum ma ge ka, kamala biy ana Mbulum a waya, a zal a kurum dər a.

EFESIYA 4:4

Aɗaba gà mburma ti ne ka, ba Yesuw Kiristi ilik pəra. Mezite Mesife Mbulum tekeɗe, ilik, nda dukw ana Mbulum a zal a kurum dər, a vile a kurum a ya ka, ilik mbaŋa, tsəka, sula tsa.

FILIPIYA 3:14

Iye ihər i vel a ɗegìrgìr aà mendze a təv ana i ndze a iɗəm a ya, dite i ta ŋget a dukw mayaba ana Mbulum a gwa, a ta vile a kwe a ya. Na a ne dukw mayaba ata ka, mesife awiya ŋa ana i ŋget a i təv ŋgar i gər ŋa aɗaba Yesuw Kiristi ya.

KULUSIYA 1:12

A sèsiŋ ka, ki gwim a kəkaaha a Mbulum Tsir kwa kəla pat nda gà maŋgayaba ata i gəzləŋ kurum mbaŋa asa. Aɗaba ŋgat na a vəl a kurum vatwa, na dite ki ta ŋgetwim a dukw ana ŋgwal ŋa, a ti dzeye a a gà mburma ŋgar a ya. Dukw ata ka, i təv dzaydzay ŋgar ana i gər ŋa, à div a hinne ya.

KULUSIYA 1:22

Ama kinehe ka, Mbulum aka gəs masla nda kurum, aɗaba Kəla ŋgar ana a ne mburma, dite a vəl mesife ŋgar a. Aɗaba taŋa, na kinehe a ne dər à kurum gà tsəɗaŋŋa ŋa, a de à kurum a a təv Mbulum, ki nwim a gà mburma ŋgar ana gà ŋgwal ŋa ya, dite ka, wura a sle aà mimè a kurum a à bakal asa tsiye.

KULUSIYA 3:12

Mə məts a kurum gər tsa: Mbulum a pala kurum, na dite kà nwim gà biy ŋgar a. Ŋgat na a waya kurum a ya. Aɗaba taŋa, say mede kurum ma ge ka, ŋgwal ŋa, kamala i gà mburma ŋgar ana a ne à tar gà awiya ŋa ya. Gà asiŋ gà mìsle ŋgiɗ ti ndze a kurum are tsehe, kə̀ gəsum ba lele, Hənum ba à gər a bəɗ, ki gwim ŋgwal a gà mìsle ŋgiɗ, dite kə̀ gəsum gəzləŋ mbaŋa.

1 TESALUNIKE 2:12

Mì màwa a kurumaha à arəv, mì vəlawa a kurum ndzəɗa, dite mì hamawa a kurum ka, hinne asa mbaŋa, na dite mede kurum ana ki dwim a ya, mà tsahən aà Mbulum a. Ŋgat a zal a kurum ka, na dite ki dwim a a mekwere ŋgar, ki ti ndzwim a nda gà ŋgat i təv mezlibe ŋgar ana tì zlibe a dər a ya.

1 TESALUNIKE 5:27

Iye ihər i ge a kurum a kamkam hinne, nda zləm BATSAH kwa ŋa: Ka dzeŋgwim wakita aaha a gà asiŋ gà mburma Mbulum ŋgiɗ tserdze mbaŋa.

2 TESALUNIKE 1:11

Aɗaba taŋa, mìi heme a a Mbulum kəla pat agəra kurum. Mìi hemer a ka, dite ma ne à kurum gà tsəɗaŋŋa, mendze kurum mə̀ pàt ka, ŋgwal ŋa, kamala ana ŋgat a waya, a zal a kurum a. Mìi hemer a asa ka, dite mə vəl a kurum ndzəɗa ŋgar aà mege gà dukw ana ŋgwal ŋa tserdze, a sàs a kurum ki gwim a ya. Dite nda gà megemir ana ki gwim a ka, agəra ana kə̀ gəsum ŋgat nda gəzləŋ kurum a ya.

2 TESALUNIKE 2:14

Mbulum a zal a kurum ka, i təv ana mì ɗif a kurum à bazlam ŋgwal ŋa ana aka gər Yesuw Kiristi ya ya. A sasar ka, ki ŋgeywim a ba agəra ndzəɗa Yesuw Kiristi BATSAH kwa ŋana ika gər gà duwa tserdze ya mbaŋa.

1 TIMUTE 6:12

Ne mala aka miɗ i təv magəsa gəzləŋ ana ika vatwa Mbulum a, kamala gà wele ana tì dzìr a ba aà mivele, ta mir aaba a sah lele ya. Gəs vatwa mesife ana à ndìv a tsa aà biybiy a nda gəzləŋ yak, dite ma ne biy yak. Aɗaba Mbulum a zalak ka, aà mesife ata akahər ata kà tsik ika miɗ mburma hinne, meme na kə̀ gəs bazlam Yesuw Kiristi nda ndzer a gəzləŋ yak a ya.

1 TIMUTE 6:2

Na bəla gà ɓəzla ga tar ata tar riŋ ti zezem a Yesuw Kiristi nda gà tar tserdze ka, tə ta dzala ka, mər ilik ika miɗ Yesuw Kiristi tsam ana, là ŋa ya, aàmala na mìi zlibe a à tar a asa ya tsa. Seyiŋ tsa, ŋgwal ŋa ka, ta ge a tar megemir nda gəzləŋ ilik lele, mà za dər na tə lah ahər piŋŋe ya. Aɗaba gà ɓəzla ga tar ata ta gəs Yesuw Kiristi nda gəzləŋ a, ta waya tar, dite tar tekeɗe, ta ge ŋgwal a gà mburma aaha mbaŋa. Araha, naha ka, gà dukw ana ki ɗif a dər a mburma, ki mbizle a ter aaka a, ta ge kamala taŋa ya.

2 TIMUTE 1:9

Ŋgat ka, aka mbala à kwa. A zal a kwa ka, a ne à kwa gà mburma ŋgar. A ge dər kataya ka, agəra ana ki gewakwar ŋgwal ŋa ya tsa. A ge taŋa ka, aɗaba ana a waya mege kataya ya pəra. Ŋgwal ŋgar ata a ge a kwa nda ahər Yesuw Kiristi ya ka, daga piŋŋe, akahər ana gər ahəɗ a riŋ zukw tsiye.

2 TIMUTE 2:7

Ama dzala gà gər ka, aka dukw ana i tsik a, a ge a ba kataya ya. Kər kà sər ka, BATSAH kwa ŋa na a zlèk a kər, dite ki tsereke a lele, ki sir a ikaba à gà duwa ya tserdze ya.

IBƏRANIKWA 10:19

A kurum gà damər gà, agəra Yesuw ana a mət, a dza à məmbəz ŋgar a ka, kàa ŋgatakwa vatwa aà mede a təv ata tsəɗaŋŋa, Mbulum mandza ŋa iɗəm a. Ar ka, tùwaŋŋà mahə̀ndə̀kà ŋa iɗəm a, wura à hìndìk a kwe aɗəm a asa tsa.

IBƏRANIKWA 10:21

*Batsah mala mandəva kuɗa a Mbulum kwa a riŋ, a kesle a gà mburma ana i ga i bəra Mbulum a lele.

IBƏRANIKWA 10:23

Mərakwa aba aà magəsa dukw ana Mbulum a tsik a kwa, kwa ihər ki ɗifekwe a dər a mburma ya, nda gəzləŋ. Madzala gà gər kwa tekeɗe, ma ta ge wàkit wàkit tsa. Aɗaba dukw ana Mbulum a tsik i sida ya, a gwa, a vile a kwe a ya ka, a vile a ndzer kaɗəŋ, dukw ŋgar, à ses a pàrsa tsidze.

IBƏRANIKWA 13:22

A kurum gà damər gà, iye ihər i ge a kurum a kamkam: Gəsum bazlam gà ana i tsik a kurum a ya, nda maŋgayaba lele, na dite a vile a kurum a ndzəɗa a gəzləŋ kurum a. Aɗaba bazlam ana i wetse a kurumaha a wakita aaha ya ka, zùbəl ŋa tsa, ar ka, kəla bazlam zaakwa pəra.

IBƏRANIKWA 2:11

Yesuw na a ne à mburma ŋgwal ŋa ika miɗ Mbulum a, dite gà mburma ata ti ne gà ŋgwal ŋa tsəɗaŋŋa aɗaba ŋgat a ka, Tsir tar ka, Mbulum ilik. Aɗaba taŋa na Yesuw a zal a tar gà damər gà, a ge a ter a hwarwa tsiye.

IBƏRANIKWA 2:17

Aɗaba taŋa, ku mege i təv dukùla ya tserdze ka, say a ne à ba ŋgar kalkal ba gà damər ŋgar a dzekwiŋ, na dite ti ndzer are tsehe ya, a ne *batsah mala mandəva kuɗa a Mbulum aà mege megemir ndaka vatwa ŋa ika miɗ ŋgar mbaŋa. A ge dər kataya ka, aà məbàrà dər bakal aà mburma ya tserdze, dite ka, tə sər akaba ahəm nda gà Mbulum.

IBƏRANIKWA 3:12

Gà damər gà, gwim metsehe, aɗaba gəzləŋ wura ika magər kurum ma ta ge makula ŋa kamala taŋa ya tsa, dite ka, a niw a magəsa Mbulum, à mbìɗer a dəba, a ŋgat ana mala məvəla mesife ya tsa.

IBƏRANIKWA 3:14

Kwa kinehe ka, gà mburma ana kə̀ ŋgatakwa akaba duwa nda gà *Kiristi ya. Ama kə̀la ka, na ki tèkwe a dər aka miɗ aka miɗ, ki ndzekwe a ɓəŋɓəŋ lele nda təv dukw ana kà lah megìsekwa malahalah ŋa ya, tsikw a təv mendìsle.

IBƏRANIKWA 6:20

Yesuw aka làhakwa aɗəm a fata. A lah ka, aà mendze ika miɗ Mbulum, agəra kwa. Aɗaba ŋgat ka, aka ne *batsah mala mandəva kuɗa a Mbulum, kamala Melikisedek a, aà biybiy.

IBƏRANIKWA 7:26

Kamala taŋa ya, Yesuw ka, batsah mala mandəva kuɗa a Mbulum kwa. Ŋgat ka, wele ana a sle a aà mege dukw ana a sle aà kwa ndaka miɗ ŋgar a. Aɗaba ŋgat ka, tsəɗaŋŋa, bakal i təv ŋgar tsa, dite swalwa i ba ŋgar kwizikw ɓav tsa asa mbaŋa. Mendze ŋgar ka, tsàkàlàk aà gà ɓəzla bakal a. Mbulum a tike ŋgat a təv ŋgar i gər ŋa.

IBƏRANIKWA 7:28

Gà bàba gà ɓəzla mandəva kuɗa a Mbulum ata məpala ahəm Musa a pala tar a ka, gà məfara ŋa ɗekɗek pəra, ndzəɗa tar a riŋ tsa. Ama dukw ana Mbulum a mbaɗa, a mburuɗ aɗəm avukw məpala ahəm ata ya ka, a zla Kəla ŋgar, a ne dər batsah mala mandəva kuɗa ŋgar ana bakal ŋgar a riŋ tsiye, aà biybiy.

IBƏRANIKWA 9:11

Ama kinehe ka, *Kiristi aka dara kaɗəŋ. Ŋgat ka, *batsah mala mandəva kuɗa a Mbulum. Gà ŋgwal gà dukw ana kə̀ ŋgatakwa kinehe ya ka, a dara ka, i təv ŋgar a. Ŋgat a ge a megemir ka, i təv ana a za mekìrìwè ga petek ana akahər ata ya. Təv ata ka, ŋgwal ŋa lele, dite ar ka, ŋgulum asa. Ama ka, gà mburma tsa na ta ge təv ata ya. Kamala megweɗe ya: Ta ge təv ata ika gər ahəɗ ɓav tsa asa mbaŋa.

IBƏRANIKWA 9:15

Aɗaba taŋa, Kiristi ka, wele ana mandza ŋa ika magər gà Mbulum nda gà mburma, a sər ba à tar, a ɗif a tar à masəra ba awiya ŋana ta gis a ba ika magər tar a. Kamala taŋa ya, gà mburma ana Mbulum a pala tar, ti ne gà biy ŋgar a ka, ta ŋget a dukw ŋgwal ŋa ata a tsik a tar i sida ya, a gwa, i ta vile a ter a aà biybiy a ya. Dukw ata a ge a ba kataya ka, aɗaba Yesuw Kiristi ana a mət a. Məməta ŋgar ata a mət a ka, a mburuɗ dərra mburma i bakal tar ana ta gewa akahər ata piŋŋe, i təv ana tar riŋ i masəra ba tar ana miviye ŋa ata, Mbulum a gəs ba nda gà tar a.

1 PIYER 2:9

Ama kurum ka, gà gwala Mbulum ana a pala kurum a. Dite kurum gà ɓəzla mandəva kuɗa ŋgar ana ki gwim a meslire a batsah Əbay a. Kurum ka, gà tsəɗaŋŋa, kurum gà mburma ŋgar ana a ndzəkara kurum i luvuŋ a, a da à kurum a təv dzaydzay ŋgar ana a də̀v hinne kamala dukw mene aà mburma ya.*fd* Dite a pala kurum ka, aà ka nwim gà mburma ana ki tsikwim a dukw ana a ge ŋgwal ŋa, a za gà dukw tserdze ya, a mburma.

1 PIYER 3:5

Kamala taŋa ya, gà məkəs gà mburma Mbulum ana akahər ata ya, tar tə làmbaɗa ba tar ka, nda madzala gà gər tar ana i təv Mbulum a. Tar ka, ta hənawa à gər a bəɗ a gà zal tar.

1 PIYER 5:1

Kinehe ka, iye ihər i fèfil a a gà bàba ŋa ana ika magər kurum gà mburma Mbulum a. Iye tekeɗe ka, batsah ŋa mbaŋa. Na a ne mala sida mesewere are Yesuw Kiristi ka, iye ŋa naha. A pat ana Mbulum à mère a à Yesuw a təv kwa ya ka, gà mburma tì zlibe a à ŋgat parakkà aà are mburma tserdze. Iye tekeɗe, i ti zlibe a à ŋgat a hinne mbaŋa. Aɗaba taŋa, iye ihər i ge a kurum a kamkam:

1 PIYER 5:10

Ama i dəba mesewere are kurum ana ki sèwèrwim a kinehe ya ka, Mbulum ana ŋgat mala mege ŋgwal a mburma tserdze ya, à lèmbeɗe a kurum à gər ŋgar, a vile a kurum a ndzəɗa ana dite, ki hitswim a dər lele, ki ta mirwim a aba a nda təv gà dukw ana tserdze ya ya. Aɗaba a zal a kurum ka, dite ka dumara, ka ndzum nda gà Yesuw Kiristi i təv mezlibe ŋgar ana tì zlibe a à ŋgat aà biybiy, à ndìv a tsiye.

1 Yuhana 1:3

Dukw ana mì ŋgatar a, ndəna mì tsaraka ya, na mìi tsik a kurum a mbaŋa, na dite kurum tekeɗe ka, ki gewim a à ba nda gà mər i təv gà dukw ata. Magàwà ba ana ki gewekwe a ba ya ka, nda gà Mbulum Tsir kwa, dite nda gà Yesuw Kiristi Kəla ŋgar asa.

Yuda 1:1

Iye Yuda, mala megemir Yesuw Kiristi, dite iye damər Zakup mbaŋa. I wetseha wakita aaha ka, a kurum gà mburma ana Mbulum Tsir kwa a waya ya. A pala kurum kamala gà mburma ŋgar a, dite a riŋ a kesle a kurum nda təv Yesuw Kiristi ya.

Sunwa Yuhana 17:14

Ti ta ge a gùvəl aà wele ana a ndzikiɗ ba Kəla Təmaŋ a. Ama ŋgat ka, a ti zè a tar nda ndzəɗa, à mbè aà teriŋa. Aɗaba ŋgat ka, batsah ŋa ika gər gà bàba ŋana, dite ika gər gà Əbay ŋa ana ta kwere a ya mbaŋa asa. Gà mburma ŋgar ti zezem a ŋgat ka, nda gəzləŋ ilik. A zal a tar, dite a pala tar ka, aà ti zezem a ŋgat. Kamala taŋa ya, tar tekeɗe, ti ta mbè aà ter a mbaŋa.»

Sunwa Yuhana 18:20

Kurum gà mburma ana i gər ŋa i mbulum a, ŋgayum ba agəra kwite aaha a mbazla ya. A kurum gà ɓəzla meslire Mbulum, nda gà ɓəzla məma à guma ŋgar, dite nda gà asiŋ gà mburma ŋgar tserdze, ŋgayum ba, aɗaba Mbulum aka ge a tar seriye agəra dukw ana ta gewa a kurum a.