IBƏRANIKWA 12:2 - Bible Zulgo

² Ki dzèkwehe a are ka, a təv Yesuw ndàslsla kəla pat. Aɗaba megìse kwa ana kə̀ gə̀sakwa ya ka, ŋgat na à lèh a kwe a aka miɗ, haa a təv mendìsle kwa ya. Akahər ata ka, aka gəs gəzləŋ i təv ana a mət aà dizl magə̀làwà ŋa ya lele. Ku mege tàa ndaɗa aka ŋgat hwarwa tekeɗe ka, aka dzala hwarwa ata tsa, na dite a ŋget a maŋgayaba ana Mbulum a waya a viler a aka miɗ mba ya. Aɗaba taŋa na ŋgat mandza ŋa ika təv mendze *mekwere Mbulum ika tsèke ahər mezime ŋgar kinehe ya.

IBƏRANIKWA 12:2 Iomraidhean Croise

Mata 16:21

I dəba ŋa ya, Yesuw a dza ba aà metsìkè dukw ana a ti le a aà ŋgat aka miɗ mba ya, a gà ɓəzla mazazama ŋgat, i təv are tar tserdze. A gwaɗa a tar: «Iye ka, bàlaarì i ti de a a Yeruzalem mba, dite gà bàba gà mburma ana ta kwere a gà Yahuda ya, nda gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tserdze, ti ti sèwèriŋ a are hinne i fata. Dite ta kiɗ a iye. Ama i huɗ mehinne makər a ka, i mbilere a i məməta ya asa.»

Mata 20:28

Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Markus 14:36

A gwaɗar: «Kamkam Tsir gà, aka təv ana mesewere are ata aka ndzera ka, ma ta giŋ ba a gər tsa te, na mege a ge a ba ya. Aɗaba kər ka, kà sle aà duwa tserdze. Ama ki ge a kəla ka, kamala ana a sàsak a, tsəka, kamala ana a sèsiŋ a tsa.»

Markus 15:28

{Taŋa na dukw ana i wakita Mbulum a, a ge ba kamala ana a tsik piŋŋe ya, a gwa: «Ti ɗeme a ŋgat ka, a liwiŋ gà ɓəzla mege dukw ana ŋgwala tsiye.»}*fa*

Markus 16:19

Əbay Yesuw a fàfəl a tar aba ya kamala taŋa ya tsara ka, Mbulum a zla ŋgat. A da à ŋgat a ma. Yesuw a daha, a ndzaba aka tsèke ahər mezime Mbulum.

Markus 9:12

Yesuw a gwaɗa a tar: «Iliya à mère a dzekwiŋ kaɗəŋ. Aɗaba à mère a ka, à lèmbeɗe a à gà dukw ana ti de a ndaka vatwa Mbulum tsiye tserdze.» Yesuw a gwaɗa a tar asa: «Aàmala na mewetse ŋa a riŋ i wakita Mbulum mbaŋa ka, wur ana a dara i təv Mbulum a, à sèwèr a are hinne, dite gà mìsle ŋgiɗ ta ger a matawak hinne asa ya?

Markus 9:24

Tsir kəla ata a ndə̀var kuɗa ŋgar, a gwaɗar tsara: «A sèsiŋ magəsa kər te ibam, aɗaba i sle aà magəsa kər nda ndzəɗa gà tsa, zlak iye te.»

Luka 17:5

Aləka i dəba ŋa ya, gà ɓəzla meslire Yesuw ta gwaɗar: «Batsah mər ŋa, səkah a mər à megìse a gəzləŋ te.»

Luka 23:11

Gà Hiridus nda gà sliwdze ŋgar tə tsaraka gà dukw ata ka, tə sawla aà Yesuw hinne. Ta ger matawak. Ti tike aka ŋgat petek ana ŋgwal ŋa ya, aà masàwlà dər ahər. dite ta màha à ŋgat a Pilatus.

Luka 24:26

Wànà kà sərum tsiye, na *Kiristi, mala məmbàlà à mburma ana Mbulum a gwa, i slir a kurumaha a ya ka, say à sèwèr a are dzekwiŋ a, dite ka, a ndze a a təv Əbay ŋgar ana gà mburma ti zlibe a à ŋgat a?»

Yuhana 1:29

Ndidwe ŋana ka, Yuhana a ŋgat a Yesuw a riŋ a dehe a a təv ŋgar. A gwaɗa a gà mburma ana i fataya: «Kəla təmaŋ ana Mbulum a vəl, ta kiɗ a aɗaba məpəla à bakal a mburma ya ka, araha, a deriŋa.*fd*

Yuhana 12:24

Iye ihər i gweɗe a kurum a nda ndzer, pàrsa iɗəm tsa: Na tàa tike hwife daw ilik a biye tsəka, a ndze a kataya, à sìkèh a tsa. Ama na tàa slige ka, a sliliŋa. Say wur ŋa ata a gwinekiŋa, dite naha a ge a ba, a ge a wur hinne.

Yuhana 12:32

Iye ka, ta gis a iye, ti tike a iye aà dizl, ta hitse a dər akaba à iye aà mbulum. I dəba ŋa ya, i zelere a a gà mburma ya tserdze, tə dara a təv ga ya.»

Yuhana 13:3

Yesuw a sər ka, Tsir ŋgar aka mbər miviler a ba ndzəɗa aà makwàrà gà dukw ana tserdze ya. Ŋgat nda gər ŋgar a sər mbaŋa ka, a dara ka, i təv Mbulum a, dite a ta mbìɗ a gər tekeɗe ka, a təv ŋgar asa mbaŋa.

Yuhana 6:40

Dukw ana a sàs a Tsir gà ya ka, araha: Gà mburma ana tàa ŋgetiŋ, a iye, Kəla Mbulum, dite tàa gəs iye nda gəzləŋ tar a ka, ta ŋget a mesife ana à ndìv a tsa aà biybiy a, dite ka, i mbele a à tar i məməta ya, a pat ana gər ahəɗ à ndìv a ya.»

Yuhana 8:56

Batsah tsir kurum Abəraham aka ŋgaya ba hinne, i təv ana Mbulum a tsikar i sida ya, a ta ŋget a a pat gà ana i dere a ya. Aka ŋgatar, dite a ŋgaya ba hinne kaɗəŋ.»

Gà Ɓəzla Meslire 2:36

Aɗaba taŋa kinehe tekeɗe ka, gà mburma Isərayel tə sər fit nda ndzer, Yesuw aaha kà ndwandwayum aà dizl magə̀làwà ŋa ya ka, ŋgat na Mbulum a ne dər BATSAH kwa ŋa, dite ka, mala məmbàlà à mburma ana Mbulum a gwa, i slir a kurumaha a asa ya.»

Gà Ɓəzla Meslire 3:15

Kərga taŋa ya, kə̀ kəɗum wele ana a vile a kwe a mesife ya. Ama Mbulum aka mbəlara à ŋgat i məməta ya, a mesife, dite mər kinehe tekeɗe, gà ɓəzla sida ŋa.

Gà Ɓəzla Meslire 5:31

Mbulum a hitse à ŋgat aka tsèke ahər mezime ŋgar, a tike ŋgat a Əbay. A ne à ŋgat mala məmbàlà à mburma asa. A ge dər kamala taŋa ya ka, dite gà mburma Isərayel tə ta ŋgat vatwa aà məmbə̀ɗà à gà gəzləŋ tar nda məpəla à bakal tar tserdze.

Gà Ɓəzla Meslire 5:41

Gà ɓəzla meslire Mbulum ata tə dara i təv mayahaba gər tar ata ya, nda gà maŋgayaba, aɗaba ana Mbulum a gəs tar lele, a vəl a tar vatwa aà mesewere are agəra zləm Yesuw a.

1 Kurintiya 1:18

Aɗaba gà mburma ana tar ti dzeye a ya ka, tar ta fə̀r aà bazlam ata aka gər məməta *Kiristi ana a mət aà dizl magə̀làwà ŋa ya ka, kamala ana dukw falày taf masakəŋa ya. Ama kwa ana Mbulum a mbil à kwe a ya ka, kà sərakwa dər, taŋa na ndzəɗa Mbulum a.

1 Kurintiya 1:23

Ama mər, mìi ɗif a ka, à bazlam ana aka gər Kiristi ata tə ndwandway aà dizl magə̀làwà ŋa ya. Mìi gweɗe a: Ŋgat na mala məmbə̀là à mburma ya. Bazlam ata ka, à tìrfìɗ a gəzləŋ a gà Yahuda tərfə̀ɗ tərfə̀ɗ, a tsahən aà tar tsidze. Dite gà asiŋ gà mburma ana tar gà Yahuda tsiye ka, tar ta fir ahər a kamala ana dukw falày taf masakəŋa ya.

EFESIYA 2:16

Aka mbete à mene are ana ika magər tar a, nda məməta ŋgar ana aà dizl magə̀làwà ŋa ya. A gaw akaba gà gwala ata sula ya, a ne à tar ba ilik. Dite a sər ba aà tar nda gà Mbulum.

EFESIYA 5:2

Wayum mburma kəla pat i təv dukw ana tserdze ki gwim a ya, kamala *Kiristi ana a waya kwa, dite ka, a mət agəra kwa asa ya. A vəl mesife ŋgar biy taf kamala dukw ana ta kəɗ a Mbulum, a dar a gər a.

FILIPIYA 1:6

I sər ndzer, Mbulum ana a dza ba aà megemir ŋgwal ŋa ata i gəzləŋ kurum a ka, a miyek a dər ŋgwìɗik kataya tsa. A ndìv a dər ka, haa a pat ana Yesuw Kiristi à mère a ya.

FILIPIYA 3:20

Ama kwa ka, gà mburma ana i ga i bəra Mbulum a. Kwa ihər ki vevekwe a Yesuw Kiristi BATSAH kwa ŋana mala məmbə̀là à kwa ya, dite a dere a i gər ŋa ya, aà malə̀mà akaba nda gà kwa ya.

2 TIMUTE 4:8

Kinehe ka, dukw mayaba gà a riŋ a veve a iye i təv Mbulum. A viliŋ a ka, aɗaba ana i ne ŋgwal ŋa ika miɗ ŋgar a. Kamala taŋa ya, a pat ana Yesuw Kiristi BATSAH kwa ŋa, wele ana ŋgat mala masàsà ikaba seriye ya nda ndzer a, aka dara ka, à piliŋ a dukw mayaba gà fit. Ama ka, a iye ɗekɗek tsa. Gà na ta veve a ŋgat, à kiv a ter a hinne, ta waya ma dara a təv tar a tekeɗe, ta ŋget a dukw mayaba tar mbaŋa.

IBƏRANIKWA 1:13

Dite ka, Mbulum aka gwaɗa a wura ilik i liwiŋ gà gawla ŋgar a ka: «Ndza aka tsèke ahər mezime gà, haa a pat ana Yàa dza gà ɓəzla gùvəl yak aà huɗ sik yak a»*fg* tsa. Say a Kəla ŋgar Yesuw ilik na a tsiker a.

IBƏRANIKWA 1:3

Ŋgat a riŋ à pèt a à mezlibe Mbulum ana tì zlibe a dər a, nda təv dzaydzay ŋana i təv ŋgar a. Aɗaba ŋgat na a zla ba kalkal kamala Mbulum a, dite ŋgat na a riŋ à gis a gà dukw ana tserdze ya, nda bazlam ŋgar ana ndzəɗa ŋa ya. A làmbaɗa vatwa ana Mbulum à pìl a dər à bakal a mburma ya, na dite ti ne a gà tsəɗaŋŋa lele ika miɗ ŋgar a. I dəba ŋa ya ka, a da a mbulum kuɗa. A daha, a ndza aka tsèke ahər mezime Mbulum, mala ndzəɗa batsah ŋana a kwere a gà dukw tserdze ya.

IBƏRANIKWA 10:14

Kamala taŋa ya, Yesuw a vəl ba ŋgar a Mbulum sik ilik pəra. A vəl ka, na dite gà mburma ŋgar ti ne gà tsəɗaŋŋa ika miɗ Mbulum a. Mipele ata a pala tar a ka, a waya na ti sime ika miɗ Mbulum ɓərɓər lele, aà biybiy a asa.

IBƏRANIKWA 10:33

Aka təv ŋgiɗ ka, tàa burwa à kurum ika miɗ gà mburma tserdze, dite tàa ge a kurum matawak hinne asa. Ama a pat ŋgiɗ asa ka, kàa ndzum i təv ilik ŋa nda gà na ti sèwèr a are kamala taŋa ya mbaŋa.

IBƏRANIKWA 11:36

Gà asiŋ gà mburma Mbulum ŋgiɗ tàa sèwèr are hinne, na i təv ana tə sawla aà tar, ta gazla tar lehhè lehhè ya. Tə dzawaya tar nda tsitsirɓe, dite gədzə̀zl gədzə̀zl tə dzaya tar a daŋgay asa mbaŋa.*fz*

IBƏRANIKWA 12:3

Dzalum a təv Yesuw ana a gəs gəzləŋ i təv mesewere are ana a sèwèr akahər ata ya, dite meme na ndelèɓ ndelèɓ a sèwèr are i ahər gà ɓəzla bakal ata ti ner are ya ya. Dzalum a təv ŋgar, na dite a me a kurum a à ndzəɗa a ba, ki ywim a ba tsiye.

IBƏRANIKWA 13:13

Aɗaba taŋa, kwa tekeɗe ka, say tàkwa a təv ŋgar a bəra a fata, dite kə̀ gə̀sakwa ba nda gà ŋgat. Ki gìsekwe a zìrìwe ana tə ndaɗa aaka ya mbaŋa.

IBƏRANIKWA 5:9

Mbulum a ndəv à dukw ana a dzala, a waya aà mege nda ŋgat a ka, a ne mala məmbə̀là à gà mburma ana tserdze ta gəs ahər ahəm a, dite ka, ta ŋget a mesife ana à ndìv a tsa aà biybiy a.

IBƏRANIKWA 7:19

Aɗaba məpala ahəm Musa ka, ndzəɗa ihər tsa, a sle a aà duwa ilik tsa, na dite mburma ti ne a dər à ba tar ŋgwal ŋa ika miɗ Mbulum a. Ama kinehe ka, duwa ŋgiɗ pam a gekwe a ŋgulum na Mbulum a mbəɗara avukw ŋa ya. Dukw ata ka, kà tikekwa aaka madzala gà gər kwa, na a vile a kwe a dər vatwa, aà mesirikaha a təv ŋgar bise ya.

IBƏRANIKWA 8:1

Wur bazlam ana mìi tsik a kurum a ya ka, araha: Ama kinehe ka, kàa ŋgatakwa medzibe batsah mala mandəva kuɗa a Mbulum ata. Ŋgat a riŋ mandza ŋa ika tsèke ahər mezime Mbulum ana a kwere a gà dukw tserdze ya.

IBƏRANIKWA 9:28

Kamala taŋa ya, Yesuw Kiristi tekeɗe, à mət ka, sik ilik pəra mbaŋa. A vəl ba ŋgar a Mbulum ka, na dite a beye a dər à gà mburma hinne i bakal tar a ya. I dəba ŋa ya ka, à mère a masula ŋa asa. A mère a ka, aà məpəla à tar i bakal tar a asa tsa. Ama ka, aà məmbə̀là à gà mburma ŋgar ana tar ihər ta bebe a ŋgat a.

YAKUBA 2:1

A kurum gà damər gà, na kàa gəsum Yesuw Kiristi BATSAH kwa ŋana a za gà dukw tserdze, tì zlibe a dər a ka, ka ta walum ikaba mburma ya tsa.

1 PIYER 1:11

Aɗaba Mezite Mesife Kiristi ana a ge megemir i gəzləŋ tar a, a ɗif a tar dər daga piŋŋe, a gwaɗa a tar: Kiristi a ti sèwèr a are dzekwiŋ, dite i dəba ŋa ya, a ta ŋget a mezlibe ana gà mburma tì zlibe a à ŋgat kuɗa ya. Gà ɓəzla məma à guma Mbulum ata ta waya mesire bazlam ata nda metsehe tar, meme na gà dukw ata ti ta ge a ba ya, kige tsa ndeɗime.

1 PIYER 3:18

Yesuw Kiristi nda gər ŋgar a mət ka, aɗaba bakal kwa. A pəl dər à kwa i bakal a sik ilik pəra, gər melik tsara. Ŋgat ka, mala ndzer ŋa, bakal ŋgar a riŋ tsa. Ama a mət agəra gà mburma ana ta gewa bakal a, dite na à dzik a kwa a təv Mbulum a. Gà mburma ta kəɗ ŋgat. Ama Mezite Mesife Mbulum a mbəl à ŋgat a mesife asa.

1 PIYER 3:22

Yesuw Kiristi ka, ŋgat aka tsəl a təv Mbulum. A riŋ mandza ŋa ika tsèke ahər mezime ŋgar. Ŋgat ka, a kwere a gà gawla Mbulum, nda gà Əbay tar ŋa dze, dite nda gà asiŋ gà dukw ana tserdze ndzəɗa tar a riŋ hinne i mbulum i gər ŋa ya.

Yuda 1:21

Ndzum i təv mawàyà ba ŋgar ana a waya kurum a, aka miɗ aka miɗ. Vavum pat ana Yesuw Kiristi BATSAH kwa ŋa a ti ɗif a kwe a à dukw mendze are tsehe kwa ana kà ndzekwar a, dite a vile a kwe a mesife ana à ndìv a tsa aà biybiy a.

Sunwa Yuhana 1:11

A gweɗiŋ: «Dukw ana ki ŋgeter a ya ka, wetse aka wakita. Kàa wetse aba ya ka, ka sləraha a gà mayahaba gər gà mburma Mbulum ana i gà kwite ŋgiɗ pampam təsəla ya, a gà Efesiya ya, ndəna i Samirna ya, nda gà na i Pergamus a, dite nda gà na i Tiyatira ya, nda gà i *Sardis a, nda gà i Filadelfiya ya, dite nda gà na i Lawdikiya ya tserdze mbaŋa.»

Sunwa Yuhana 1:17

Aləka i ŋgatar kataya ka, tazl i dəɗ aà mbulum a, aka miɗ ŋgar a fata, kamala ana iye məməta ŋa ya. I dəba ŋa ya ka, a daha, a tike aka iye ahər mezime ŋgar, dite a gweɗiŋ: «Magəɗa ma gik tsa. Iye na malahalah ŋa ika gər gà duwa tserdze ya. Dite iye asa na i ti ndìv a à gà duwa tserdze ya asa mbaŋa.

Sunwa Yuhana 1:8

Mbulum BATSAH kwa ŋana ŋgat Əbay ika gər gà duwa tserdze ya, a gwa ka: «Iye na malahalah ŋa ika gər gà duwa tserdze ya, dite iye asa na i ti ndìv a à gà duwa tserdze ya mbaŋa asa.» Ŋgat ka, wele ana mandza ŋa ɗa aà bəra aà biybiy, à gər ana gər ahəɗ a riŋ zukw tsiye. Ŋgat a riŋ kinehe, dite ŋgat a ta mère a aka gər ahəɗ a asa mbaŋa.

Sunwa Yuhana 2:8

Wele ata a gweɗiŋ asa: «Wetse bazlam aaha a gawla Mbulum ana i kwite Samirna, a kesle a gà mburma Mbulum a. Ki wetse a ka, bazlam aaha: Bazlam ŋa na a tsik ka, wele ana malahalah ŋa ika gər gà duwa tserdze ya, dite ŋgat na à ndìv a à gà dukw ata tserdze ya mbaŋa asa. Wele ata ka, aka mət, ama aka mbəlara i məməta ya asa.