IBƏRANIKWA 11:7 - Bible Zulgo

⁷ Agəra megìse Nuhu ana a gəs Mbulum nda gəzləŋ akahər ata ya ka, a dzalawa aka dukw ana Mbulum a tsikewar, a ta ge a ba aka miɗ mba ya. Ku mege aka ŋgat a gà dukw ata ti ta ge a ba ya zukw tsa tekeɗe ka, aka gəs ahər ahəm. A làmbaɗa batsah slə̀làh yam ana gà mburma ŋgar tserdze ta beye dər à batsah yam ana a rah aka gər ahəɗ fèɗìɗe, dite ka, ti dzeye aɗəm asa tsiye. Nda megìse ŋgar ata a gəs Mbulum a ka, a pə̀z gər ahəɗ a bəɗ nda seriye. Gà mburma ana tə sər Mbulum tsiye ka, tàa dzeye fit. Kamala taŋa ya mbaŋa na Mbulum a zla ŋgat kamala mburma ŋgwal ŋa ya ika miɗ ŋgar ka, aɗaba megìse ŋgar ata a gəs ŋgat nda gəzləŋ a.*fc*

IBƏRANIKWA 11:7 Iomraidhean Croise

Mata 2:12

Aləka i dəba ŋa ya asa, Mbulum a gwaɗa a gà mburma ata i sunwa ya: «Kà mbəɗum gər nda təv Əbay Hirirus asa tsa.» Tə tsaraka kataya ka, ta mah ba, ta mbəɗ gər a ma nda tsèke ŋgiɗ.

Mata 24:15

Yesuw a gwaɗa a tar: «Aka miɗ mba ka, ki ŋgetwim a a wele ana ta gwa ahər, swalwa ŋa ŋgwala tsa hinne, dite a ne dukw zlaŋgatsak na i təv Mbulum a. Wele ata a ndze a ka, a ga Mbulum batsah ŋana, kamala ana Daniyel, mala məma à guma Mbulum ana akahər ata a tsik a, a gwa, wele ata a dere a, a ndze a ka, a fata.*fa* Ama wur ana a dzeŋge a dukw aaha ya ka, say mà dzar zləm lele.

Mata 24:25

Taŋa ka, Yàa tsik a kurum aba ya daga aà kinehe ya, ndzum dər i zləm lele.

Mata 24:38

Aka təv ana yam ata aka dza ahər ba zukw tsiye ka, gà mburma a riŋ ihər ti zimeye a gà dukw mezime, ti seye a gà dukw mese, tar riŋ ihər ti zleye a gà daala, gà dəm ibam, ti dzeye a tar a zal, haa a pat ana Nuhu a pəts a ga ŋgar ata a làmbaɗa, a suwayawa dər ika gər yam a.

Mata 3:7

Ama Yuhana a fə̀r ka, gà asiŋ gà *Farisa nda gà *Saduki riŋ ti dere a a təv ŋgar a hinne mbaŋa. Aɗaba a sàs a tar ka, mà tsilwiɓ à tar a yam. A gwaɗa a tar: «A kurum gà ɓəza palas aaha. Weke na a gwaɗa a kurum ka, ki ta beywim a i matsəɓatsəɓ Mbulum ana a dere a mba ya seyiŋ a?

Luka 17:26

Ama dukw ana a ge ba akahər Nuhu ata ya ka, a ta ge a ba a pat ana iye, wur ana a dara i təv Mbulum a, i mère a ya mbaŋa.

RUMA 1:17

Nda təv bazlam ŋgwal ŋa ata ka, Mbulum a riŋ ihər a ɗif a dər a gà mburma tserdze ka, meme na ti sle a aà mene gà ŋgwal ŋa ika miɗ ŋgar a. Ama na a ne a kataya ka, say gà na ta gəs Yesuw Kiristi nda gəzləŋ tar ɗekɗek pəra, daga aà malahalah ŋana ya, haa a tsikw a mandəvandəv ŋana ya, tsəka, vatwa ŋgiɗ ka, a riŋ tsa. Ar ka, kamala ana mewetse ŋa a riŋ i wakita Mbulum ka, ta gwa: «Wur ana aka gəs Mbulum nda gəzləŋ ŋgar a ka, Mbulum a ne a à ŋgat ŋgwal ŋa ika miɗ ŋgar, a viler a mesife.»*fa*

RUMA 10:6

Ama vatwa ana mburma a ne a ŋgwal ŋa ika miɗ Mbulum agəra ana a gəs ŋgat nda gəzləŋ a ka, pampam. Mewetse ŋa a riŋ i wakita Mbulum aka gər vatwa ata ka, ta gwa: «Aàmala na ki dzele a i gər yak, ki gweɗe a ka, weke na a sle a aà matsəla a gəza mbulum a ya?»*fb* Kamala megweɗe ya, aà mazàlàra a mala məmbàlà à mburma ana Mbulum a gwa, i ti slir a kurumehe a ya, ma tarra a bəɗ a asa ya ya, aɗaba aka mbər medera.

RUMA 3:22

Vatwa ata gà mburma ti ne a dər ŋgwal ŋa ika miɗ Mbulum a ka, aɗaba megìse tar ana ta gəs Yesuw Kiristi nda gəzləŋ a. Vatwa ata ka, biy gà na ta gəs ŋgat a tserdze, tsəka, biy gà Yahuda ɗekɗek tsa. Aɗaba i təv Mbulum ka, mburma tserdze kalkal ilik pəra.

RUMA 4:11

Aka ana Abəraham aka sàs ba ŋgar zukw tsiye ka, Mbulum aka ne à ŋgat ŋgwal ŋa ika miɗ ŋgar, aɗaba ana a gəs ŋgat nda gəzləŋ a. Dite i dəba ŋa ya, Mbulum na a gwaɗar ka, sàs ba kuɗa ya. Masàsà ba ŋgar ata a sàs ba ya, a ɗif dər a mburma ka, na dite tə sər dər, Abəraham aka ne ŋgwal ŋa ika miɗ Mbulum kaɗəŋ a. Kamala taŋa ya, na Abəraham a ne tsir gà na ta gəs Mbulum nda gəzləŋ tar a tserdze, ku mege tàa sàs ba tsa tekeɗe ya. Mbulum a ne à ter a gà ŋgwal ŋa ika miɗ ŋgar ka, kamala ana a ne à Abəraham ŋgwal ŋa ika miɗ ŋgar a mbaŋa.

RUMA 4:13

Kamala taŋa ya, Mbulum a tsik i sida ya, akahər ata ka, a gwaɗa a gà Abəraham nda gà ɓəza ŋgar: «I ta vile a kurum a mekwere gər ahəɗ tserdze, a ne a biy kurum.»*fc* Mbulum a tsik taŋa ka, aɗaba ana Abəraham aka zazam məpala ahəm ŋgar ata ya tsa. Ama a tsiker kataya ka, agəra ana a gəs ŋgat nda gəzləŋ a, na dite a ne à ŋgat ŋgwal ŋa ika miɗ ŋgar a.

RUMA 9:30

Kamala taŋa ya, ki gweɗekwe a ana, dukùla kinehe ya? Ki gweɗekwe a ka, gà mburma ana gà Yahuda tsiye, tàa yaha vatwa aà mene ŋgwal ŋa i təv Mbulum tsa. Ama kinehe, tə tsahən ahər ka, agəra ana tàa gəs ŋgat nda gəzləŋ a.

GALATIYA 5:5

Ama mər ka, mì tike madzala gà gər mər a təv Mbulum. Ŋgat na a ne à mər a gà ŋgwal ŋa ika miɗ ŋgar a, agəra megìse ana mì gəs Kiristi nda gəzləŋ a. Taŋa na kinehe mər ihər mìi veve a pat ana mìi be a aà seriye ya, nda ndzəɗa Mezite Mesife ŋgar a.

FILIPIYA 3:9

Say mandza ŋa nda ŋgat ilik na i waya ya. Ama i ta gweɗe a ka, iye ŋgwal ŋa ika miɗ Mbulum, agəra dukw ana piŋŋe i ge ŋgwal ŋa, i zazam məpala ahəm gà Yahuda ya ka, i gweɗe a asa tsa. Ama kəla ka, duwa a riŋ ilik i sir a dər, i gweɗe a, iye ŋgwal ŋa ika miɗ ŋgar a ka, agəra ana i gəs Yesuw Kiristi nda gəzləŋ a. Mbulum na a ne à iye ŋgwal ŋa ya, aɗaba megìse ana i gəs ŋgat a.

IBƏRANIKWA 11:1

Ama magəsa duwa nda ndzer ŋa ka, na wura aka gəs nda gəzləŋ ŋgar a. A sər taŋa ka, a ŋget a dukw ata a waya i gəzləŋ ŋgar a. A sər mbaŋa ka, dukw ata aka ŋgatar zukw tsiye ka, a riŋ kaɗəŋ ndzer.

IBƏRANIKWA 12:25

Aɗaba taŋa, gwim metsehe, ka ti niwim Yesuw ana a riŋ à fèfil a kurum a kinehe ya tsa. Aɗaba gà mburma ana akahər ata tar mandza ŋa aà sik kwite Sinay a ka, ti niw bazlam wur ana a tsik a tar bazlam Mbulum ika gər ahəɗ a, a waya mibe a tar à ɗaf a. Ama ka, tàa beye tsa seyiŋ ana, sakwàn nda kwa ana kinehe ka, kwa riŋ ki tserekikwe a bazlam wur ana a dara i gər ŋa ya ya? Meme na ki ta beyekwe a ya, na kàa niwekwa bazlam ŋgar dze ya?

IBƏRANIKWA 5:7

Aka na Yesuw ɗa ika gər ahəɗ mba ya ka, a sər, Mbulum a sle aà mimbilere a à ŋgat i məməta ya. Aɗaba taŋa na a hama a Mbulum nda magala ŋgəlakəkka hinne, haa a tuwa a dar dərra i are ya. Mbulum tekeɗe, aka tsaraka meheme ŋgar ata, dite i dəba ŋa ya, a mbəlara à ŋgat i məməta ya, agəra ana a hənar à gər a bəɗ a.

IBƏRANIKWA 8:5

Mege megemir ana ta gewa ya ka, mendzikiɗe ba ŋa ɗekɗek pəra. Ta gewa ka, mendzikiɗe ba megemir ana Yesuw, batsah mala mandəva kuɗa a Mbulum kwa a ge a riŋ i mbulum i gər ŋa ya. Mekìrìwè ga tar ata tekeɗe, mendzikiɗe ba təv ata Mbulum mandza ŋa iɗəm a mbaŋa. Ta kiriw ga ata ka, kamala ana Mbulum a tsik a Musa, a gwaɗar ka: «Ge metsehe lele, na dite ki ge a duwa tserdze kamala ana i ɗifek dər i gər kwite ya ya.»*fa*

1 PIYER 3:20

Gà mezite ata ka, biy gà na akahər ata tàa gəs Mbulum tsiye. Mbulum aka bàba tar, a gəs gəzləŋ hinne, akahər ana Nuhu a làmbaɗa slə̀làh yam ata ya. Gà mburma ana tə da aɗəm ka, tar ndaw tsa. Tar ka, tsamakər pəra, na Mbulum a mbala à tar i yam ata ya ya.

2 Piyer 1:1

Na a wetse a kurumaha wakita aaha ka, iye Simun Piyer ana iye mala megemir Yesuw Kiristi ana i gewar meslire ya. I wetseha wakita aaha ka, a kurum ana kà gəsum Yesuw Kiristi nda gəzləŋ kurum tserdze, kalkal kamala mər ana mì gəs ŋgat mbaŋa ya ya. Vatwa megìse ata ka, dukw ŋgwal ŋa. Yesuw Kiristi a vəl a kwa vatwa ata ka, dite ku weke mà gəs ŋgat. Aɗaba ŋgat ka, mala ndzer ŋa, a wele a ikaba mburma ya tsa. Ŋgat ka, Mbulum, a mbəl à kwa i bakal kwa ya.

2 Piyer 2:5

Gà mburma ana akahər ata ta ge bakal a ka, Mbulum aka miyak à tar ɓav tsa asa. Ama a slərra batsah yam aka gà mburma ata ta gəs ŋgat tsiye. A rah aka gər ahəɗ peɗik peɗik, ti dzeye aɗəm fit. A mbala iɗəm a ka, à gà mburma tsamakər a ɗekɗek pəra. Gà Nuhu ana a tsikewa bazlam ŋgar a mburma ya, dite ka, a waya tə zazam vatwa ŋgwal ŋa, tar nda gà mburma ana i ga i ma ŋgar təsəla ya.*fa*

2 Piyer 3:6

Nda yam ata asa mbaŋa na siyèkw Mbulum a dzeye à gər ahəɗ akahər ata ya. Yam ata ka, batsah yam ana a rah aka gər ahəɗ fèɗìɗe, mburma ta mata aɗəm a.