IBƏRANIKWA 10:19 - Bible Zulgo

¹⁹ A kurum gà damər gà, agəra Yesuw ana a mət, a dza à məmbəz ŋgar a ka, kàa ŋgatakwa vatwa aà mede a təv ata tsəɗaŋŋa, Mbulum mandza ŋa iɗəm a. Ar ka, tùwaŋŋà mahə̀ndə̀kà ŋa iɗəm a, wura à hìndìk a kwe aɗəm a asa tsa.

IBƏRANIKWA 10:19 Iomraidhean Croise

RUMA 5:2

Ŋgat na a hə̀ndə̀k a kwa i vatwa ya, na dite Mbulum a ge a kwa ŋgwal, aɗaba ana kə̀ gə̀sakwa ŋgat nda gəzləŋ kwa ya. Ŋgwal dukw ata kə̀ ŋgatakwa ya ka, ki ŋgeyekwe a dər ba, aɗaba ana kà sərakwa ndzer ka, Mbulum a ta vile a kwe a mezlibe ŋgar ana tì zlibe a à ŋgat a mbaŋa ya.

RUMA 8:15

Kamala taŋa ya, duwa a riŋ na ki gwim a dər magəɗa ika miɗ Mbulum a asa tsa. Aɗaba Mezite Mesife ŋgar ana a vəl a kurum a ka, aka ne à kurum gà ɓele tsa, a ne à kurum ka, gà ɓəza ŋgar ivaɗ. Mezite Mesife ŋgar ata ka, a riŋ mandza ŋa i gəzləŋ kwa. Aɗaba taŋa na kù gwaɗawakwa aà Mbulum ka, Tsir kwa ya.

EFESIYA 2:18

Aɗaba kwa tserdze, ku mege gà Yahuda, ku mege gà Yahuda tsa tekeɗe ya ka, kə ŋgatakwa vatwa aà mesirikaha a təv Mbulum Tsir kwa ka, nda təv Yesuw Kiristi. Ama ki slekwe a aà mesirike a təv ŋgar ka, ndaka vatwa ilik ŋa nda ndzəɗa Mezite Mesife Mbulum.

EFESIYA 3:12

Arəv a de a à kwa ya asa tsa na aà mesirike a təv Mbulum a, aɗaba ana kə̀ gə̀sakwa Yesuw Kiristi nda gəzləŋ, kwa riŋ mandza ŋa i təv ilik ŋa nda gà ŋgat a.

2 TIMUTE 1:7

Aɗaba Mezite Mesife ana Mbulum a vəl a kwa ya ka, aka ne à kwa gà ɓəzla magəɗa tsa. Ama a vəl a kwa ka, ndzəɗa ivaɗ, nda meweye kwa ana ki weyekwe a mburma ya, dite nda makwàrà ba kwa ana ki kwerekwe a ba ya ivaɗ asa.

IBƏRANIKWA 10:18

Aɗaba taŋa, na Mbulum aka pəl à bakal a gà mburma kamala taŋa ya ka, gà dukw ŋgiɗ ana ta betser a tserdze ya, ta ge a ŋgulum asa tsa.

IBƏRANIKWA 10:35

Aɗaba taŋa, arəv ma da aà kurum a tsa, sərum dər ka, na kàa mərum aba kamala taŋa ya ka, Mbulum a ta vile a kurum a dukw maya ba kurum batsah ŋa hinne.

IBƏRANIKWA 12:28

Kamala taŋa ya, gekwa kəkaaha a Mbulum, aɗaba ana a ti dze a kwe a Əbay i mekwere ŋgar ana a sle aà miɓezle a tsiye ya. Gekwar kəkaaha, aɗaba mekwere ŋgar ata ki ti zlìbekwe a iɗəm à ŋgat, nda gà megèr iɗəm magəɗa ya. Dite ka, ki gekwer a meslire ŋgar ndaka vatwa ana a tsahən ahər a mbaŋa.

IBƏRANIKWA 3:1

A kurum gà damər gà, Mbulum na a zal a kurum a, dite ka, kà nwim gà mburma ŋgar mbaŋa ya. Aɗaba taŋa, dzalum gà gər a təv Yesuw ana Mbulum a slərra ŋgat a, dite ka, ma ne batsah mala mandəva kuɗa ŋgar, a sir a ba à kwa nda gà ŋgat. Taŋa na dukw ana kə̀ gə̀sakwa nda gəzləŋ, ki tsikikwe a a mburma parakkà lele ya.

IBƏRANIKWA 3:6

Ama *Kiristi ka, kəla mala ga, kamala megweɗe ya ka, Kəla Mbulum. Dukw ana i ma ŋgar tserdze ya ka, i ahər ŋgar. A gewer megemir ndaka vatwa ŋa lele. Kwa tekeɗe, gà mburma ana i ma ŋgar a mbaŋa. Ama kə̀la ka, na ki tèkwe a dər aka miɗ aka miɗ tsikw a təv mendìsle, nda magəsa gəzləŋ, nda maŋgayaba nda təv dukw ana kà tikekwa aaka madzala gà gər a dzekwiŋ.

IBƏRANIKWA 4:16

Aɗaba taŋa, sìrìkikwa a təv mendze mekwere Əbay Mbulum ana a kwere a ya, dite ka, a ge a ŋgwal ŋa a mburma mbaŋa ya. Hìriɓ hìriɓ ki gekwa magəɗa tsa. Aɗaba ka sərakwa, kà ndzekwar are tsehe, dite na a gekwe a ŋgwal ŋa i təv dukw ana a sle a aà kwa ya.

IBƏRANIKWA 7:25

Aɗaba taŋa na ŋgat a riŋ nda gà ndzəɗa, a sle a aà məmbàlà à gà mburma ana kinehe ti dere a a təv Mbulum, nda ahər ŋgar a ya. Aɗaba ŋgat a ndze a ka, aà biybiy, dite ŋgat a riŋ a heme a a Mbulum agəra gà mburma ata kəla pat mbaŋa asa.

IBƏRANIKWA 9:12

Akahər ana Kiristi a da a təv ata tsəɗaŋŋa ŋana, Mbulum mandza ŋa iɗəm a ka, a da aɗəm sik ilik pəra, tsam ka, aka ndəv. I təv ana a de aɗəm a ya ka, aka tə̀f dər məmbəz gà vugul nda biy gà mbuluv sla tsa. Ama a vəl ka, məmbəz ba ŋgar ŋa ivaɗ na avukw ŋa ya. Kamala taŋa ya, nda məmbəz ŋgar ata ka, a mburuɗ dərra kwa i bakal a aà biybiy.

IBƏRANIKWA 9:3

Ika biye hərmaga mada a dzə̀ɓər masula ŋana ka, petek a riŋ madànà ŋa aà mbulum, tsikw a ndzera a bəɗ a mbaŋa. Dzə̀ɓər ga ata ka, təv ana tə zalar tsəɗaŋŋa biy Mbulum a, a za dər biy ŋgiɗ aaha.

1 Yuhana 4:17

Na kà wayakwa tar nda ndzer ŋa lele kamala taŋa ya ka, aləka a pat seriye Mbulum ana a ta ge a kwe a ya ka, ki gekwe a magəɗa tsidze. Ki gekwe a magəɗa tsəka, aɗaba mendze kwa ana ki ndzekwe a ika gər ahəɗ kinehe ya ka, ar ka, kamala mendze Yesuw Kiristi ana a ndza ɗa ika gər ahəɗ a mbaŋa.