1 তীমথিয় 3:16 - Garo New Testament

¹⁶ খ্রীষ্টান থরমখো বিবিরা·আনি নিং·থুয়া বিবি দাল·বাতা হং·আ উখো জেগালনা মান·জা। উয়া বিবি ইয়ান- বিয়া মান্দি হং·এ ফারাকজক; বিয়া দোসগ্রি গিসিক রংথালগিবা ইখো ফিন্নিকজক; সা·গ্রেরাং বিখো নিক্কামিং; গিম্মিক জাতরাংচা বিনি গিম্মিনো আগানফ্রাকামিং; হা·গিলসাকো বিখো মান্দিরাং বিবিরা·আমিং; সালগিও বিখো রাসংমুং দি·দোএ রা·আংআমিং।

1 তীমথিয় 3:16 Iomraidhean Croise

মথিনি চকগিবা নাম্মা খাৎথা 1:23

‘‘মি·থ্রা সাকসা অক্কো খেনুয়া, বিয়া সাকসা দেফান্থিখো বা·নুয়া, বিনি বিমুংখো ইম্মানূয়েল মিংনুয়া।’’ জেখো ফি·ওদে, চিংমুং ইসল, হং·আ।

মথিনি চকগিবা নাম্মা খাৎথা 13:11

বিয়া জা·রিকগিবারাংনা আগানচাকে ইনজক, ‘‘সালগিনি সংনকনি নিং·থুয়া খাৎথাখো না·সংনা হা·আইনা হন·জক ইন্দিবা বিসংনাদে হন·জা,

মথিনি চকগিবা নাম্মা খাৎথা 28:2

উনোন রাং·গিত্তিক বিল্লংএন বাংগুরিজক, মুয়ানা গিত্তেলনি সাকসা সা·গ্রে সালগিওনি হং·ওনবাজক আরো গোপরামনি মিকখাংনিখো রং·থিখো জিত্তেতি উনি সাক্কাও আসংজক।

মথিনি চকগিবা নাম্মা খাৎথা 3:16

রিপ্পলানি জা·মানো যীশু চিওনি গাখাতমিত্তিংওন বিনি মিকখাংও সিলগা ফ্রাকাংজক। বিয়া কইতর গিত্তা বিনি সাক্কাও ইসলনি গিসিকনি হং·ওনবাখো নিকনা মান·জক।

মথিনি চকগিবা নাম্মা খাৎথা 4:11

উনোন শয়তান বিখো ওয়াত্তাংজক, আরো সা·গ্রেরাং রি·বাএ বিনা দাকচাকে হ·ন্না হা·বাচেংজক।

মার্ক 1:13

উনো শয়তান সাল সৎব্র্রিনা দিপ্পাৎ যীশুখো বাং·এ মাদ্দুয়েতি বিখো পাপওনা গালনা হা·ম্মামিং। উনো বাং·আ মাৎবুরুংরাং দংআমিং, আরো সা·গ্রেরাং যীশুনা নিরক-নিসামে দাকচাকে হ·ন্নুয়ামিং।

মার্ক 16:19

জা·রিকগিবারাংনা ইয়া খাৎথারাংখো আগানানি জা·মানো গিত্তেল যীশুখো সালগিচা দি·দোয়ে রা·আংজক। উচা বিয়া ইসলনি জাক্রাচা আসংজক।

মার্ক 16:5

গোপরামনি নিং·আও নাপ্পে বিসং গিব্বক বা·রা চিনগিবা সাকসা ফান্থিখো জাক্রাচা আসংএ দংআখো নিকজক। উনি গিম্মিন বিসং আইয়াও ইনমানজক।

লূকনি চকগিবা নাম্মা খাৎথা 2:32

গিপ্পিন জাতরাংনা ইয়াদে রামা ফিন্নিকানি সেং·আ হং·আ, আরো নাং·নি ইস্রায়েল জাতরাংনা ইয়াদে রাসংনি হং·আ।”

লূকনি চকগিবা নাম্মা খাৎথা 20:44

দায়ূদদে খ্রীষ্টখো গিত্তেল ইন্নে রিক্কামামিং; ইন্দাকোদে খ্রীষ্ট বাদিকে দাক্কে দায়ূদনি দেফান্থি হং·না মা·ন্না?”

লূকনি চকগিবা নাম্মা খাৎথা 22:43

উনোন সালগিওনি সা·গ্রে সাকসা রি·বাএ যীশুখো বিল্লাকেতজক।

লূকনি চকগিবা নাম্মা খাৎথা 24:4

উনি গিম্মিন বিসংনি আইয়াও ইনমানে চানচিমিত্তিংওন মিকখা রিপরাপা গিত্তা চিং·চেতা বা·রাখো গানগিবা মান্দি সাকগ্মি বিসংনি কেচ্চিও রি·বাএ চাদেংজক।

লূকনি চকগিবা নাম্মা খাৎথা 24:51

ফাত্তিমিত্তিংওন বিয়া বিসংখো ওয়াত্তে রি·য়াংজক আরো বিখো সালগিওনা দি·দোএ রা·আংজক।

যোহননা 1:14

উয়া খাৎথান মান্দি ফি·ল্লে আৎচিজক আরো আনচিংনি গিসেপো দংফাজক। ফাগিবা ইসলনি সাকসা খাম·খাম দেফান্থি গিত্তা বিনি রাসংখো আনচিং নিকজক। বিয়া খা·সাচাক্কাও আরো বিবিও গাপগিবা হং·আ।

যোহননা 13:3

যীশু হা·আইয়ামিং, ফাগিবা ইসল বিনি জাক্কো গিম্মিকখোন হন·জক। বিয়া আরোবা হা·আইয়ামিং, বিয়া বিচানিন রি·বাআ আরো বিচান ফি·ল্লাংইংজক।

যোহননা 15:26

“জে দাকচাকগিবাখো আংআ আপফাওনি না·সংনা ওয়াত্তেতনুয়া, বিয়া জেনসালো রি·বানুয়া উনসালো বিয়ান আংনি গিম্মিন সাক্ষি হ·ন্নুয়া। বিয়ান আপফাওনি রি·বাগিবা বিবিনি গিসিক হং·আ।

যোহননা 16:28

বিবিন আংআ ফাগিবাওনি ইয়া হা·গিলসাকো রি·বাজক, দা·আবা আংআ ইয়া হা·গিলসাকখো ওয়াত্তে ফাগিবাচান রি·য়াংইংজক।”

যোহননা 17:5

আপফা, হা·গিলসাক হং·বানা স্খাং নাং·মুং আংআ জে রাসংও দংআমিং উয়া রাসংখো না·আ দা·আবা আংনা হন·বো।

যোহননা 20:12

যীশুনি বে·এনখো জেও দন্নামিং উয়ো গিব্বক বা·রা গানগিবা সা·গ্রে সাকগ্মি আসংএ দংআ- স্খুফাংচাবাক্কা সাকসা আরো সাকগিপ্পিন জা·চকচাবাক্কা আসংআ।

যোহননা 6:62

ইন্দিদে মান্দিনি দেফান্থি জেও দংআমিং উয়োনা বিখো গাদোয়াংআখো নিক্কোদে না·সং মুয়াখো আগান্নুয়া?

ওয়াত্তেতারাংনা 1:19

যিরূশালেমনি দিমদাকান উয়া খাৎথাখো খিন্নামিং। ইনি গিম্মিন বিসংনি খু·সুকচা ইয়া হা·বাখো বিসং আকেল্‌দামা বা হান·চিনি হা·বা ইন্নে মিংআ।

ওয়াত্তেতারাংনা 10:34

উনোন পিতর ইন্না হা·বাচেংজক, “আংআ দা·আও বিবিন হা·আইনা মান·জক ইসলনি মিক্রোনও গিম্মিকান আপসান হং·আ।

ওয়াত্তেতারাংনা 14:27

আন্তিয়খিয়াওনা সক্কে মন্ডলীনি গিম্মিকখো বিসং হা·দামসাও থম·দাকেতজক আরো ইসল বিসং গিত্তা জেখো দাকজক উয়া গিম্মিকখোন আগানজক। ইসল বাদিকে দাক্কে গিপ্পিন জাতরাংনা চলখো দাক্কে হ·ন্নামিং জেদাক্কে বিসং খ্রীষ্টখো বিবিরা·না মা·ন্না উখোবা আগানজক।

ওয়াত্তেতারাংনা 20:28

না·সং আন·থাংথাংনি গিম্মিন সিমসাকে দংবো, আরো গিসিক রংথালগিবা বিবিরা·গিবা দলরাংখো নিরক্ষিনা জে কামখো না·সংনা হন·জক বিসংনি গিম্মিনবা সিমসাকে দংবো। রাক্ষুয়াল জেদাক্কে বিনি মেষরাংখো নিরক্ষিয়া উয়ানদাক্কে না·সংবা ফামং গিত্তা ইসলনি মন্ডলীখো নিরক্ষিবো। ইসল উয়া মন্ডলীখো হান·চিথাংচা ব্রিজক।

রোমানরাংনা 10:12

যিহূদী আরো যিহূদী হং·গিজারাংনি গিসেপো দিংথাংগ্রিকানি দংজা, মুয়ানা গিম্মিকনি গিত্তেল আপসান। জেরাং বিখো রিক্কামা বিসংনা বিয়া বাং·এন ফাত্তিয়াখো হ·ন্না।

রোমানরাংনা 10:18

ইন্দিবা আংআ আগানা, ইস্রায়েলনি মান্দিরাং উয়া খাৎথাখো খিন্নাখুজামা? বিবিন খিন্নাজক। রংথালগিবা শাস্ত্র আগানা, বিসংনি খু·রাং হা·গিলসাক গিম্মিকো গিপ্পাংজক, বিসংনি খাৎথা গিপ্পাংজক হা·গিলসাকনি খি·থিকোনা দিপ্পাৎ।

রোমানরাংনা 16:25

যীশু খ্রীষ্টনি গিম্মিন জে নাম্মা খাৎথাখো আংআ আগানফ্রাকা না·সংখো উয়া নাম্মা খাৎথাও খেম·খেম দন্নানি বিল ইসলনি দংআ। বাং·আ চাসংনা দিপ্পাৎ ইসল বিনি সিউল দনগিবা মিকসংআনিখো দারাংনাবা আগানখুজা,

রোমানরাংনা 16:26

ইন্দিবা নাম্মা খাৎথাচা উখো দা·আও ফারাকজক আরো উগিত্তান আংআ আগানফ্রাকিংজক। ফাংনাজলগিবা ইসলনি গি·য়েতা গিত্তা আগানসোগিবারাংনি চক্কাও গিম্মিক জাতনি মান্দিরাংচা উখো হা·আইএতজক, জেদাক্কে বিসং খ্রীষ্টখো বিবিরা·এ ইসলখো মানিনা মা·ন্না।

রোমানরাংনা 3:4

হং·জানুয়া। মান্দি গিম্মিক বু·এ আগানগিবা হং·ওবা ইসল ফাংনানান বিবিগিবা হং·আ। রংথালগিবা শাস্ত্রও চক্কা দংআ, “নাং·নি খাৎথান থিক, নাং·নি বিচাল দাক্কান খাকখেৎ।”

রোমানরাংনা 8:3

মান্দিনি পাপ-বেওয়ালনি হা·সেল নিয়াম বিলগ্রি হং·জকমিং, আরো উনি গিম্মিন নিয়াম জেখো দাকনা মান·জাজক ইসল আন·থাং উখো দাকজক। পাপখো হা·রিকেতনা বিয়া আন·থাংনি দোসগ্রি দেফান্থিখো মান্দিনি গিসিকখো হ·ন্নে ওয়াত্তেতজক আরো বিনি দেফান্থিনি সিয়াও পাপখো বিচাল দাক্কে উনি বিলখো হা·রিকজক।

রোমানরাংনা 9:5

ইসলনা খা·ফাকগিবারাং বিসংনিন ফাগিৎচামরাং হং·আমিং আরো খ্রীষ্ট মান্দি হং·এ বিসংনিন মা·চংও আৎচিয়ামিং। বিয়ান ইসল, জেআন গিম্মিকনি সাক্কাও; রাসং গিম্মিক ফাংনাজলনা বিনিন হং·আ। আমেন।

1ম করিন্থীয়রাংনা 15:47

ইন্দিবা গ্মিগিবা মান্দি সালগিওনি রি·বামিং।

1ম করিন্থীয়রাংনা 2:7

চং·মতদে আনচিং ইসলনি হা·আইয়াও গাপগিবা নিং·থুগিবা মিকসংআনি খাৎথাখোন আগানা। উয়া মিকসংআখো থুম্মুয়ে দন্নামিং আরো হা·গিলসাক হং·চেংনা স্খাংআন ইসল উখো থারিসোএ দন্নামিং জেদাক্কে আনচিং বিনি রাসংখো মান·ফাগিবা হং·না মা·ন্না।

2য় করিন্থীয়রাংনা 1:19

জেনি খাৎথাখো সীলবান, তীমথিয় আরো আংআ না·সংচা আগানফ্রাকজক উয়া যীশু খ্রীষ্ট, ইসলনি দেফান্থি, আপসান সময়ও “হো·এ” আরো “হং·জা” দাকগিবা হং·জা;

গালাতীয়রাংনা 2:8

ইখো বিসং নিকনা মান·জক, মুয়ানা যিহূদীরাংচা পিতরনি ওয়াত্তেতানি কামনি খি·সাংও জেআন দংআমিং গিপ্পিন জাতরাংচা আংনি ওয়াত্তেতানি কামনি খি·সাংওবা উয়া ইসলান দংআমিং।

গালাতীয়রাংনা 4:4

ইন্দিবা সাল চু·সকানি জা·মানো ইসল বিনি দেফান্থিখো ওয়াত্তেতজক। উয়া দেফান্থি মিচিকনি অকো আৎচিজক আরো নিয়ামনি নিং·আও জাংগি মিৎথাংজক,

ইফিষীয়রাংনা 1:9

জেগিত্তা বিয়া হা·ম্মামিং আরো স্খাংআন খ্রীষ্টও থারিয়ে দনসোআমিং, উগিত্তান বিয়া বিনি নিং·থুয়া মিকসংআখো আনচিংনা আগানামিং।

ইফিষীয়রাংনা 6:19

আংনাবা বি·বো জেদাক্কে আংনি খাৎথা আগানমিত্তিংও ইসল আংনা ইন্দাকা খু·সুকখো র·ন্না জেদাক্কোদে আংআ খেনমানগিজা বিনি রন·গিবা নাম্মা খাৎথানি নিং·থুয়া খাৎথারাংখো আগানফ্রাকনা মা·ন্না।

কলসীয়রাংনা 1:23

ইনি হা·সেল খ্রীষ্টনি গিম্মিন নাম্মা খাৎথাওনি না·সং জে খা·দংআখো মান·জক উয়োনি চে·ল্লাচা রি·য়াংগিজা বিবিরা·আও না·সং খেম·খেম দংনা নাংনুয়া। উয়া নাম্মা খাৎথাখো হা·গিলসাক গিম্মিকো আগানফ্রাকজক আরো না·সং উখো খিন্নাজক। আংআ পৌল ইয়া নাম্মা খাৎথাখো আগানফ্রাকগিবা হং·জক।

কলসীয়রাংনা 1:27

ইসল হাম·জক, গিপ্পিন জাতরাংওবা বিনি ইয়া নিং·থুয়া খাৎথানি রাসং বাদাকা উখো বিনি গিম্মিক মান্দিরাং হা·আইনা মান·খানা। উয়া বিবি ইয়ান- খ্রীষ্ট না·সংনি খা·থংও দংআ ইন্নে না·সং রাসং মা·ন্নানি খা·দংএতাখো মান·জক।

কলসীয়রাংনা 1:6

ইয়া নাম্মা খাৎথা হা·গিলসাক গিম্মিকও গিপ্পাংএ বিথি নাংইংজক আরো সালনিসাল বাতরোরোংজক। জেনসালো না·সং ইয়া নাম্মা খাৎথাখো খিন্নাজক আরো ইসলনি খা·সাচাক্কাখো হা·আইবিবিজক উনসালোনি উয়া না·সংওবা উয়ানদাক্কেন কাম দাক্কিংজক।

কলসীয়রাংনা 2:2

আংআ হা·ম্মা জেদাক্কে বিসং খা·থংও খা·দংএতাখো মা·ন্না আরো খা·সাও আপসান হং·আ, আরো খ্রীষ্টখো হা·আইয়ানি গিম্মিন জেখো মা·ন্না উখো বাং·এ মান·দাপা। উনি গিম্মিন ইসলনি নিং·থুয়া খাৎথাখো, আগানস্খাওদে খ্রীষ্টখো বিসং হা·আইনা মা·ন্নুয়া।

2 থিষলনীকীয়রাংনা 2:7

ইন্দিবা জেআন বিখো চাংফেংএ দন্না বিয়া জিত্তাংজা দিপ্পাৎদে চাংফেংএন দংনুয়া। উনি জা·মানো উয়া বামগিজাগিবা মি·আসা ফারাকনুয়া।

1 তীমথিয় 3:9

জেদাক্কে বিসং রংথালা গিসিকো খ্রীষ্টান থরমখো বিবিরা·আনি নিং·থুয়া বিবিখো রি·ম্মে রা·রিকা।

ইব্রীয়রাংনা 1:3

ইসলনি গিম্মিক গুণ উয়া দেফান্থিওন দংআ; দেফান্থিন ইসলনি চু·গিম্মিক বিমাং হং·আ। দেফান্থি বিনি বিল্লাকগিবা খাৎথাচা গিম্মিকখো রি·ম্মে রা·রিকে চালাইয়া। মান্দিনি পাপখো হা·রিকানি জা·মানো দেফান্থি সালগিও চুবাৎগিবা ইসলনি জাক্রাচা আসংজক।

ইব্রীয়রাংনা 12:2

আরো হাই, আনচিংনি মিক্রোনখো যীশুনি সাক্কাও খেম·খেম দন্না জেআন বিবিরা·আনি ফাংচাকা আরো চু·সকা হং·আ। বিনি মিকখাংও জে হান·সেংআখো দন্নামিং উনি গিম্মিনান বিয়া মান্দিরা·গিজাখো নিগিজা চিসলো সিয়াখো চাকজক আরো দা·আও ইসলনি সিংহাসননি জাক্রাচা আসংএ দংআ।

ইব্রীয়রাংনা 7:7

ইয়ো মামুং খেনচাকানি দংজা, জেআন ফাত্তিয়াখো মা·ন্না উনা বাত্তে জেআন ফাত্তিয়াখো হ·ন্না বিয়ান দাল·বাতা।

ইব্রীয়রাংনা 8:1

চিংআ জেখো আগানিংআ উনি চং·মত খাৎথা ইয়ান, আনচিংনি ইন্দাকগিবা সাকসা খামাল দাল·বাৎগিবা দংআ জেআন সালগিও চুবাৎগিবা ইসলনি সিংহাসননি জাক্রাচা আসংজক।

পিতর 1:12

ইন্দিবা ইসল বিসংনা ফিন্নিকে র·ন্নামিং, বিসং জে খাৎথারাংখো আগানিংআমিং উচা বিসং আন·থাংথাংনা দাকচাকগিজা না·সংনান দাকচাকে র·ন্নিংআমিং। সালগিওনি ওয়াত্তেতা গিসিক রংথালগিবানি রি·দিলাচা জেরাং না·সংচা খ্রীষ্টনি বিদিংও নাম্মা খাৎথাখো আগানফ্রাকজক বিসং আগানসোগিবারাংনি উয়া খাৎথারাংখোন না·সংনা হা·আইএতজক। আরোবা, সা·গ্রেরাংবা ইরাংনি বিদিংও হা·আইনা হা·সিকা।

পিতর 1:20

হা·গিলসাক হং·না স্খাংআন ইসল ইনি গিম্মিন বিখো থিক দাক্কে দন্নামিং, ইন্দিবা ইয়া বন·চতা সময়ও না·সংনি গিম্মিনান বিয়া ফারাকজক।

পিতর 1:21

ইসল বিখো সিয়াওনি থাংচাএতি রাসংখো রন·জক আরো বিওন না·সং ইসলখো বিবিরা·জক; আরো উনি গিম্মিনান না·সংনি বিবিরা·আ আরো খা·দংআ ইসলনি সাক্কাওন দংআ।

পিতর 3:18

খ্রীষ্টবা পাপনি গিম্মিনো রাং·সাসান সিয়ামিং। ইসলচা আনচিংখো রা·আংনা ইন্নে উয়া দোসগ্রি মান্দি পাপ দাকগিবারাংনি গিম্মিন, আগানস্খাওদে আনচিংনি গিম্মিন সিয়ামিং। বে·এনো বিখো দক্কে গাল্লামিং, ইন্দিবা গিসিকচা বিখো থাংচাএতামিং আরো বিয়া বন্দি দংগিবা গিসিকরাংচা রি·য়াংএ আগানফ্রাকামিং।

পিতর 3:22

যীশু সালগিচা রি·য়াংজক আরো দা·আও ইসলনি জাক্রাচা আসংএ দংআ, আরো সালগিসাকনি সা·গ্রেরাং, বিলখো মান·রিকগিবারাং আরো শাসন দাকগিবারাং বিনি নিং·আও দংআ।

1 যোহন 1:2

উয়া জাংগি ফারাকামিং। চিংআ বিখো নিকজক আরো বিনি গিম্মিনো সাক্ষি হ·ন্নিংজক। জেআন ফাগিবাচা দংআমিং আরো চিংচা ফারাকামিং উয়া ফাংনাজলনি জাংগিনি খাৎথাখোন না·সংনা আগানিংজক।

1 যোহন 3:5

না·সংদে হা·আইয়া, আনচিংনি পাপখো হা·রিকনা ইন্নেন খ্রীষ্ট ফারাকামিং। খ্রীষ্টও মামুং পাপ দংজা। জেরাং খ্রীষ্টও দংআ বিসং পাপও গা·আকে দংজা।

1 যোহন 3:8

জেআন পাপ দাক্কেন দংআরিয়া বিয়া শয়তাননি হং·আ, মুয়ানা শয়তান স্খাংওনিন পাপ দাক্কে রি·বাংজক। শয়তাননি কামখো ব·ন্নেতনা ইন্নেন ইসলনি দেফান্থি ফারাকামিং।

ফারাকগিবা খাৎথা 17:5

বিনি কপালও ইন্দাকা বিমুং লিক্ষিয়া দংআমিং জেনি বিদিংও মিংসা নিং·থুয়া বিবি দংআমিং। উয়া বিমুং হং·জক, “বাবিল, দারি বিমারাংনি আরো হা·গিলসাকনি নামজাস্রাংরাংনি মা·গিবা।”

ফারাকগিবা খাৎথা 17:7

আংআ বিখো নিক্কে নাম্মেন আইয়াও ইনমানজক। উনো উয়া সা·গ্রে আংনা আগানজক, “না·আ মুয়ানা আইয়াও ইনমানিংজক? মিচিকনি আরো জে মাৎবুরুং বিখো রিপ্পিএ রা·আংআ উয়া মাৎবুরুংনি নিং·থুয়া অলথোখো নাং·না আগানে হ·ন্নিংজক। ইয়া উয়া মাৎবুরুং জেনি দৎস্নি স্খু আরো গং·চিকখুং গ্রং দংআমিং।

ফারাকগিবা খাৎথা 7:9

উনি জা·মানো আংআ গিম্মিক জাত, মা·চং, হা·সং আরো খু·সুকওনি ইন্দাকফিল্লে মান্দি জিলমাখো নিকজক, দারাংবা বিসংখো চান্না মান·জাজক। গিব্বক চলাখো চিন্নে বিসং উয়া সিংহাসন আরো মেষ বি·সানি মিকখাংও খেজুর বিজাকখো জাক্কো রা·এ চাদেংএ দংআমিং।